ادبیات سئونلر

اوشاق ادبیاتی

"فیروز سیمین فر"

اوشاقلار آی اوشاقلار
بئللرینده قورشاقلار
من بیر قشنگ اوغلانام
چوخدا زیرنگ اوغلانام
گوجلودور یادیم منیم
"فراز" دیر آدیم منیم
اون ایل یاریم یاشیم وار
بیر دوزلو قارداشیم وار
"آراز"دیر اونون آدی
دیشله یر او هر زادی
گونش شافاق سالجاغین
ساعات زنگین چالجاغین
یئریمدن تئز دورارام
ال اوزومو یویارارام
سالام وئررم آناما
گولومسه رم آتاما
قارداشیمی اوپه رم
آسدا اوستون چکه رم
پالتاریمی گئیه رم
قلیان آلتی یئیه رم
چانتامی ساللام دالا
دئیر تئز اول آی بالا
آنام اوزومدن اوپر
سرویس گوتوروب گئدر
معللیمی ایسته رم
جهالتی پیسله رم
درسه قولاق آسارام
سؤزلرینه باخارام
مودور منی چوخ ایستر
ناظیم اورکده بسلر
درس اوخورام اوینارام
مدرسه دن دویمارام
مدرسه ده کیلاسدا
فارسجا اولوبدور قایدا
فارسی یازیب اوخورام
تورکو خیال توخورام
تورکو آنا دیلیمدی
بیرینجی سئوگیلیمدی
الیفباسین یازماغین
اوخوماسین پوزماغین
اورگه در آتام منه
ال چالار آنام منه
آخیر زنگی ویرجاغین
هامی یئردن دورجاغین
منده دوروب گئدرم
مینی بوسا مینه رم
ماشین گئدر ویژیلدار
اوره ییمیز قیژیلدار
ائوه گئدیب چاتینجاق
آجیخارام دویونجاق
آغ عطیرلی چؤرکلر
خوش مزه لی خورکلر
پیشیرر آنام منیم
دئیر، یئ بالام منیم
دویار قارین یئیرم
آللاه شوکور دئیرم
یئمکدن سورا بیر آز
هم من اؤزوم هم آراز
اویونجاقلا اویناربق
آغلا سادا قویماریق
اویوندان کی دویاریق
باشی یئره قویاریق
دینجلجه یین اوچارام
کیتابلاری آچارام
روانلارام درسیمی
حاضیرلارام مشقیمی
چیزگی فیلمی سئوه رم
واخیتین هرگون گوده رم
کیپریییمی قیرپمارام
سیمیشگه می چیتلارارم
آخشام اوستو سرینده
وئریلن سؤز یئرینده
یولداشلارلا اویناریق
لذذتیندن دویماریق
هردن بیر آز چرخ سورروک
موتور ماشین کی گؤرروک
تورموز توتوب دایانلیق
چکیله ریک اویانلیق
آخشام اولوب گون باتار
تنگه ده های هوی یاتار
یوبانمارام ائشیکده
آنام قالار کئشیکده
گئدر هاممی ائوینه
عایله سی سئوینه
شام سوفره سین سالاریق
یونگول غذا آلاریق
تئلویزیونو آچاریق
دیزی سینه باخاریق
چوخ باخسام من بیر ساعات
آتام دئیر دور گئت یات
گؤررم قالان ایشیمی
فیرچالارام دیشیمی
یوخو دونون گئیه رم
گئجز خئییر دییه رم
رفدن کیتاب سئچه رم
یاتاغیما کئچه رم
اوخورام بیر آز ناغیل
گؤتوررم اوندان آغیل
میشیل-میشیل یاتارام
قیزیل گوله باتارام.

https://t.me/Adabiyyatsevanlar