ادبیات سئونلر

"ارسطو_مجرد"

آواوا رمانینی نهایت کی اوخودوم .

بیر معیار دیل واردیر و بو معیار دیلین ان آزی یوز ایل کئچمیشی و هله یوزلرجه ادبیات ساحه سینده شاعیر و یازیچیسی واردیر. و دقیقا بو فاکتور سبب اولور کی بو معیار دیلی معتبر و قایناق بیر دیل کیمی تانییاق. یوخسا لهجه لر اولدوقجا چوخدور و اگر هر کیمسه دوروب اؤز لهجه سیله یازماغا چالیشسا اوندا هئچ بیر مرکزی دیل یارانمایاجاق و سوندا ایره لی له مه یه جکدیر.
بو تایدا بیزیم رمان تاریخیمیزده ایکی یازیچی گنجعلی صباحی و ایواز طاهادان باشقا هئچ بیر رمان یازانین دیلی تانینمیش معیار دیل اساسیندا یازیلمامیشدیر. او معیار دیل کی یوسف وزیرچمن زمینلی، اسماعیل شیخلی، الیاس افندییئو، میرزه ایبراهیم اوو،میرجلال پاشایئو، مولود سلیمانلی،آنار رضا، اکرم ایلیسلی،ائلچین افندییئو، کامال عبدالله و باشقالاری بؤیوک اثرلر یارادیب عرصه یه چیخارمیشلار.
بوتون بو یازارلارین اوغورو باشقا سببلرله یاناشی معتبر بیر دیلین اطرافیندا توپلاشمالاری اولموشدور. بیزده ایسه خییوودان توتدو اردبیل، زنجان،اورمو و تبریزه کیمی هرکس معین ادعاایله چیخیش ائدیب اؤز محلی لهجه،آغیز و لغت لریله یازماغا چالیشمیشدیر. بو ایسه مسئله نی قارماقاریشیق بیر دیلین فورمالاشماغینا گتیریب چیخارمیشدیر.بو ادعانی ثبوت ائتمه یه چوخلو فاکتلار واردیر آنجاق من لاپ ایریسی اولان "آواوا"دان میثاللار گتیرمک ایسته ییرم. هانسی کی من نئچه لغت منبعینه باش چکدیم آنجاق بو کلمه لرین معنیلرینی تاپا بیلمه دیم.(یئری گلمیشکن اوخوجولاردان یاردیم ایسته ییرم)میثال اوچون "زئین"،"شاغی"،"هاندا بیر"،"گولبورد"،"ساآت"،"یالقیزک"،"توپپا"،"سازاخ"،"سزیرگییر"،"دستالات"،"پیستیک"،"باشلانقیش"،"جیلخ"،"شوراه"،"بیر کئش یا ایلک کئش"،"گورپ"،"ایشگین.ایشگیلنمک"،"گؤرسه دیش"و سایره... و بیر چوخ عجیب قریب و فارسجا قورولوشلو جومله لر:
"عجبی بوردادیر کی"،"گئجه چوخ گئج یوخوم آپاردی"،"حامام حالیمی حسابی سازالتدی"،"ایندیه نه کی هئچ ووجودو اولماسین،چوخدا ووجودو واردیر"،"رحمتلییین تورپاغینیندا اوستونه گئتمک ایستییرم"،"یئری قینجیقدیرمازدان سنین تکین یاتیملی بئللیییم"،"ساآت اوچ آرالاریندا ایدی"،"سونرا اوتانقاج بیر گولومسوندو"،"چوخدا مزاحیم اولان آدام لارا بنزه میر"،"اوغلان ایش گوجونو بوراقدیقدا قیزبازلانیر"،"بیر بیرلرینی ورانداز ائلییردیلر"، هانسی اؤلکه ده بئله دیر. سایماقدان قورتارمیر. نه یازیق کی هامیسینی بو یازییا یوکله مک اولمور. ساختا و اؤلو جومله لر. نثر دوروموموز آرتیق بئله دیر.
ایندی نئیله مک لازیمدیر. هرکس دورسون اؤز شهرینین،کندینین دیلی ایله یازسین. نتیجه نه اولار؟نه تبریز آغیزی، نه اورمو،نه موغان، نه اردبیل و نه ده باشقا ماحاللارین آغزی تک باشینا معیاردیلین خصوصیتلرینه صاحیب دئییلدیر. معیار دیل یوکسک اجتماعی اعتبارا مالیک اولمالیدیر.معیار دیل او دور کی اونیوئرسیته لرده ، مدرسه لرده یازیلیر و اوخونور. ژورناللاردا،رادیو و تلویزیوندا و تحصیل آلمیش اینسانلارین دیلینده آخیر.معیار دیل او دیل دیر کی تاریخی ادبیاتی و بؤیوک یازیچیلاری واردیر.

آواوا رمانینین یازاری حؤرمتلی ناصر منظوری جنابلاریدیر.
https://t.me/Adabiyyatsevanlar