صالح سجادی

یئنی بیر غزل:

ساعاتین تیک-تاکی دوشوب باشیما بو اتاقدان ساعاتلاری گؤتورون
من داشام، قوشلارین دیلین بیلمم آی قفسلر! بو قوشلاری اؤتورون

بیزه کیم"رویادیر حیات" دئدی کیم؟بیزی کابوس باسیر بیزی اویادین
بیزه کیم"ماهنی دیر یاشام" دئدی کیم؟ بیز قبول ائتمه ریک اونون عوذورون

اونودولموش، قاریق، اسیرگنمیش، هاوادا سم لی چیس، سودا سیانور
رادیواکتیو رحِم ده بسلنمیش، آنلامین بیلمه دیک نه دیر عؤمورون

تانریلار! بیز هارا یارانمیشی ییق؟ بیر قیچی یئرده بیر قیچی گؤیده
بوغازیزدا یامان کیمی یاشیریق بیزلری یا اوتون یادا توپورون

ییرمی دؤرد، ییرمی اوچ، یا ییرمی ایکی عصره یا بیزلره نه فرق ائده جک؟
ییرمی بیر مین ایلین قاریخماسی ییق. بیزی، لوطفا بیزی باشا دوشورون

بیز بؤیوک بیر هئچین ایچینده اؤلن دیریلیش احتراصی نین توزویوق
بیز حیات قورساغیندا درد گازی ییق جانیزی سیخمایین بیزی اؤتورون

سؤزو بیتمیش، دوشونجه سی ایتمیش خسته شاعیرلریک زامان تالامیش
بیزه سالدیردی قحبه تکنولوژی الهام اورژانسینا بیزی یئتیرین

آند اولا آللاها آتئیست یک بیز کیتاب بیلمه ریک قورآن شاهید
بیز کیم ایک؟ بیلمیریک اؤزوموزده کی نه دیر آنلامی دینین کوفورون

آه منیم عصریمین مثل کیشی سی سن اؤزون بیر آغ آتلی بَی.سن آما
قیزی دئولردن آلماغا، ایشدن چیخماغا اذن وئرمه ییر مودورون

آه منیم عصریمین مثل قادینی سن اؤزون سیندرللاسان آمما
بیر سارای.دا آیاق قابین قالمیش بیر سارای دا اوبیرسی پوخ پوسورون

ساعاتین تیک-تاکی دلیر باشیمی اود توتوب ساغ-سولومدا عقربه لر
یئل اسیر، یاندیریر زامان یئنی دن تن اوجاغیندا روحومون کؤمورون

بیز مدرنیته نی دانیب چیخدیق او دمیرباش ماشینلارا قارشی
خیاوانلاردا لئش لری قوخوموش او پیشیکلر بیزیک بیزی سوپورون.

https://t.me/Adabiyyatsevanlar

✅✅✅✅سایین کانالداشلار
بو گئجه 97/02/03ساعات 22ده ادبیات سئونلر گروپوندا دیکلمه یاریشماسی اولاجاق بو یاریشمانین شعری سئویملی گروپداشیمیز جناب محمد فرد خدایی دندیر سئویملی شاعیرلری گوزل سسلی دیکلاماتورلاری آذربایجان شعرینین هوسکارلارین بو یاریشمایا دعوت ائدیریک.

محمد فرد خدایی

بیر قادین تانیرام
گؤزلرینده آراز
اوره‌یینده آجی آخیر
هیچقیریق‌لار وار سوسقونلوقوندا
نیسگیل قوخور ساحته گولوشلری
بیر قادین تانیرام
سحر سحر
آرزولارین سه‌ریر
شهرین گؤنشسیز شریطلرینه
قاپی قاپی نیسگیل پایلییر
پای قویور گؤز یاشلارینی
قونشو قادینین گتیردیغی داریخمالارا
بیر قادین تانیرام
یاشامین سورور
سس‌سیز سمیرسیز
چیرکین دوشونجه‌لر شهرینده
بیر قادین تانیرام
اومود اکیب گله‌جک بیچیر
یاشام توپراقیندا
قورخولوق آدامین قارقایا یول وئرمه‌سینه عیناد
بیر قادین تانیرام
ساچلاریندا اولدوزلار گیزلی
اللرینده گئنچ‌لیگینین جنازه‌سی
آزادلیق بایراقین داشیر چینینده
من بو قادینی تانیرام
آناما بنزه‌ییر دوغروسو
باجیمادا
قونشونون قادینینا بیله
بو منیم وطنیمین قادینی‌دیر
وطنیم تک
آرازین حسرتی گؤزلرینده
آجی طالعی آخیر اوره‌یینده
من بو قادینی تانیرام
بو قادین
وطنیمین قادینی‌دیر

https://t.me/Adabiyyatsevanlar

رجب ابراهیمی( فرهاد )

آیریلیق
یکی از ترانه‌های فولکلور و عامیانه آزربایجان به شمار می‌آید رجب ابراهیمی (فرهاد) که در روستای کورعباسلو از توابع اردبیل در آبان ماه ۱۳۱۴ از مادر زاده شد. پس از آشنایی با استاد سلیمی اشعار زیادی را نوشت . وی آیریلیق را در ۱۳۳۵ خورشیدی سرود .
آهنگ سازی سحرانگیز این شعر جاودانه را استاد علی سلیمی که متولد سال ۱۳۰۱ در باکو و در خانواده‌ای اردبیلی می باشد ، انجام داده است. وی تا ۱۶ سالگی در باکو می زیست و پس از آن همراه خانواده‌اش به زادگاه پدرش، اردبیل بازگشت. در سال ۱۳۳۲ رهبر ارکستر آزربایجانی رادیو ایران شد و در سال ۱۳۳۸ با همکارش، فاطمه قنادی (وارتوش) ازدواج کرد. درسال ۱۳۴۲ ارکستر آزربایجانی رادیو ایران منحل شد ولی علی سلیمی به آهنگ‌سازی ادامه داد. تندیس استاد سلیمی به عنوان «آهنگساز برجسته شرق» در یونسکو نصب شده‌است. آیریلق اولین بار با اجرای خانم فاطمه قنادی (همسر استاد سلیمی) از رادیو تبریز پخش گردید و با اجرای رشید بهبودف در باکو شهرت جهانی پیدا کرد. و بعدها لطف یار ایمانوف و گوگوش (آلبوم: نیمه گمشده من) هم آن را اجرا کردند.




فیکریندن گئجه لر یاتا بیلمیرم
بو فیکری باشیمدان آتا بیلمیرم
دئییرم چون سنه چاتا بیلمیرم
آیریلیق، آیریلیق، آمان آیریلیق
هر بیر دردن اولار یامان آیریلیق

اوزوندور هیجرینده قارا گئجه لر
بیلمیرم من گئدیم هارا گئجه لر
ووروبدور قلبیمه یارا گئجه لر
آیریلیق، آیریلیق، آمان آیریلیق
هر بیر دردن اولار یامان آیریلیق

یادیما دوشنده آلا گوزلرین
گویده اولدوزلاردان آلام خبرین
نئیله ییم کسیبدیر مندن نظرین
آیریلیق، آیریلیق، آمان آیریلیق
هر بیر دردن اولار یامان آیریلیق

آیریلیق دردینی چکمه ین بیلمز
یاردان آیری دوشن گوز یاشین سیلمز
دئییرلر اینتظار خسته سی اؤلمز
آیریلیق، آیریلیق، آمان آیریلیق
هر بیر دردن اولار یامان آیریلیق

نئجه کی ائلیمدن آیری دوشندن
سورار بیربیرینی گوروب بیلندن
حسرتله سیزلار یار داییم بو غمدن
آیریلیق، آیریلیق، آمان آیریلیق
هر بیر دردن اولار یامان آیریلیق

ایل لردی اوزاقام آرخام ائلیم دن
بلبلم دوشموشم آیری گولوم دن
جور ایله آییریب شیرین دیلیم دن
آیریلیق، آیریلیق، آمان آیریلیق
هر بیر دردن اولار یامان آیریلیق

اولوبدور بیگانه یاریم_ یولداشیم
غریبه ساییلیر سئوگیم – سیرداشیم
بوجاوان چاقیمدا آغاردیب باشیم
آیریلیق، آیریلیق، آمان آیریلیق
هر بیر دردن اولار یامان آیریلیق

منی آغلاداندان گولوش ایسته رم
آیری دوشنیمله گوروش ایسته رم
حصاری ییخماقا یوروش ایسته رم
آیریلیق، آیریلیق، آمان آیریلیق
هر بیر دردن اولار یامان آیریلیق

سئوگیلیک اولوبدور شانی فرهادین
سئوگی سی هاردادیر، هانی فرهادین
دییه ره ک چیخاجاق جانی فرهادین
آیریلیق، آیریلیق، آمان آیریلیق
هر بیر دردن اولار یامان آیریلیق



https://t.me/Adabiyyatsevanlar

یاغیش
سوز و سس:یئتیم ایواز

https://t.me/Adabiyyatsevanlar

سوسن نواده رضی

‍ منی چاغیر

منی گوزگو چاغیر
سن اولوم
سنله شیم!
منی سس سیز
منی سؤزسوز
منی ائله بئله
بهانه سیز چاغیر!
منی گؤی چاغیر
گونشله شیم،آیلاشیم،اولدوزلاشیم
دنیز چاغیر
سولاشیم،شپه له شیم،بالیغلاشیم
دالیم داملالارینا
قاریشیم دالغالارینا
باااااااااخ!
گئجه قوشوقلارینین عطرینی اؤزله میشلیییم
ییغیب بوغازیما جانیمی
گَلده افلاطونون استدلالینا یئرلشدیر سنسیزلیییمی
و اقلیملرین سنلیسیندن ییغیب ییغیشدیر
سئویشمه لرین قیریق قالینتیلارینی
بَرک اورکسیزله میشم
بیر آز اورک وئر منه
شعرلریم اینجیمه سین
بیر آز دا اؤزوندن
یازیلاریم آغریماسین دئیه
بیر منلیک وئررسن یئتر سانیرام!


https://t.me/Adabiyyatsevanlar

✅ مراسم رونمایی از سردیس شاعر پرآوازه شعر و ادب آذربایجان، استاد نادر الهی روز چهارشنبه 5اردیبهشت ساعت 17 عصر در میدان دادگستری اول بلوار استاد الهی برگزار خواهد شد.

https://t.me/Adabiyyatsevanlar

✅✅✅سایین کانالداشلار
بوگئجه 97/02/03ادبیات سئونلر گروپوندا دیکلمه یاریشماسی کئچدی بو یاریشمانین غالیب لری بیرینجی غالیب لر:سالار بی ، ویدا خانیم ، سئودا آرازلی
ایکینجی غالیب لر :تایماز میانالی ،خانیم بی تا دباغ، خانیم تئلناز تبریزلی اولدولار یاریشمایا قاتیلان دوسلارا اوغورلار
دیکلمه صنعتینه خوش گله جک آرزو ائدیریک .
عزیز دوسلاری بو گوزل دیکلمه لری دینله مه یه دعوت ائدیریک.
https://t.me/Adabiyyatsevanlar

بیر قادین تانیرام من
شعیر: محمد فرد خذایی
بیرینجی غالیب:سالار موغانلی
https://t.me/Adabiyyatsevanlar

بیر قادین تانیرام من
شعیر :محمد فرد خدایی
بیرینجی غالیب:ویدا
https://t.me/Adabiyyatsevanlar

بیر قادین تانیرام من
شعیر:محمد فرد‌خدایی
بیرینجی غالیب :سئودا آرازلی
https://t.me/Adabiyyatsevanlar

بیر قادین تانیرام من
شعیر : محمد فرد خدایی
ایکینجی غالیب : تایماز مییانالی
https://t me/Adabiyyyatsevanlar

بیر قادین تانیرام من
شعیر :محمد فرد خدایی
ایکیجی غالیب: بی‌تا دباغ
https://t.me/Adabiyyatsevanlar

بیر قادین تانیرام من
شعیر : محمد فرد خدایی
ایکینجی غالیب : تئلناز تبریزلی
https://t.me/Adabiyyatsevanlar

حسین رزمی

" آنتاقونیسم "

یادیما دوشن آلما،
آغاجدان یئره دوشدو.

چایدا بیر اولدوز آخدی...
" نیوتون" سنه باخدی .
"کرم" آلمانی آلدی
ألينده معطل قالدى.

"اصلى"ده لالاليقدا
بير لالانين سوآلیندان ، سو آلمادان
اؤزونو دارا چکدی!

"له له " کولکده ، کول أكدى
آللار آلمادان آلیندی
"یانیق کرمی " چالیندی...

بیر آلما دا داها یادا دوشمه دی
یا دا یئره دوشمه دی.
"نیوتون" اؤز ايشين بيلدى
بوتون يازديقلارين سيلدى.
...
ياندى "كرم"
ياندى "كرم"
ياندى ياندى ياندى" کرم"
یاندی یاندی یاندی" کرم"
یاندی "کرم"
یاندی "کرم "...




https://t.me/Adabiyyatsevanlar

قسمت رستموو
آيدينليق

ياغيش سحره‌جن ياغسين شهره،
هامينين درديني يوسون آپارسين.
قوشلار قوناق گلسين ماوي خزره،
باليقلار ائوينه يوسون آپارسين...

اؤلوم قاپيميزا ائله گلسين کي،
بيريني آلاندا، بيري قاييتسين...
اوشاقلارين اوزو ائله گولسون کي،
مرميلر اوتانيب گئري قاييتسين.

ياغيش سحره‌جن ياغسين شهره،
تيتره‌سين ائولرين ناوالچالاري....
ياغمور ملکلري ائنميشکن يئره،
وئرک آپارسينلار تاپانچالاري...

بير قيزين ائيواندا اللري دونسون،
قيز دوروب بويلانسين کوچه‌يه بير ده...
چتيرسيز بير اوغلان ايسلانيب دورسون،
قيز گؤزو کوچه‌ده داريخان يئرده...

اوغلان او کوچه‌يه چکديکجه کئشيک،
سکيده تيتره‌ين کؤلگه ايسلانسين.
آسفالتدان سو ايچن قونور بير پيشيک،
چتيرسيز اوغلانلا بيرگه ايسلانسين.

بير گون هاميميزا ائله گلسين کي،
ياغيشلار ياغيرسا هر شئي دوزه‌لر...
سينوپتيکلر چيخيب خبر وئرسين کي،
صاباحدان آداملار سئوينه بيلر.
ياغيش سحره‌جن ياغسين سحره...

https://t.me/Adabiyyatsevanlar

آدربایجان قادینلارینین کنسرتینه یاردیم ا ولاق
https://t.me/Adabiyyatsevanlar

"سعید موغانلی "
‍


اُحِبُّ دئدیم ایت قاپدی منی!

بوراخما اَللریمی ساتَن کؤینکلیم
اردبیل کوچه‌لرینده ایته رم بیردن
یومما گؤزلرینی کتان کؤینکلیم
باخیشینین هاواسی باشیمدا گزیر

سسینی توراغایی‌لار اوخویور
قاتارلار تُرمُز ائدیر
ماشین‌لار توی سیغنالی چالیر
سسینی شئعیر یازیرام
سسینی سئویشیرم.
-باغیشلایین خانیم سسیزی ایتیرمیشم
سیزین موبایلین نؤمره‌سی زیندانا دوشوب
آدینیز سارایین دؤشلویونون جیبینده گئتدی
چایی توللانا بیلمه‌دی
عشقه ووردو اؤزونو
آدینیزی خان چوبان بازار آغزیندا
یئرآلما چؤرک ساتیر.
آدینیزی ایستی سیمیشقا چیرتداییرام
آدی نه ایدی سیزین؟
هه کلاسیک شعر،فلاش فیکشن
یوخ آد سیغمیر ادبیاتا
سسیزی یاشاییرام ساده‌‌جه
آخی سئللولوم کیچیکدی بیر آز
سیز سیغیشمیرسیز
یومروغومدا یئرله شن قلبیمه
یومروغوم آچیلسا
بوتون قزئت‌‌لر خبردن داشار
داشماسایدی آرپا چایی
داشما،داش…

سسینی یاشاییرام اردبیل کیمی
سسینی"سحر"
"سحر-سحر باغا گیردیم"
باغیشلا خانیم"پیر عبدالملیکدن بالیغلی"یا نئجه گئدیم من؟
آخی ساوالانی آشماغیم گلیر
سیزین سسیزی چوخدان گؤرموشم
تلفونوز زیندانا دوشموشدو
من خوشوم گلیردی آدینیزدان
آدی نه ایدی سیزین؟
تلفونوز دیلیمین اوجوندان
صیفیردن باشلانیردی
سیزینله"یاشماق"یم گلیر
یاشاماق
یاشاماق اولار
بو شهَرده پولسوز؟
-کیم دئدی من اؤلموشم؟
هانسی یوسف خیال اوغلو؟
آی ائششگ اوغلو!
-سارایین دالیجا گئتمیشدیم
قورخومدان چایی توللانانما‌‌دیم!
-کیم لووا وئردی منی؟
من بارالاریمی ییغیشدیرا بیلمیرم خانیم
بوردان قبریستانا نئچه اؤلو سیغیشار؟
یانی دیری‌‌لر نئجه کئف چکیرلر اهمال-اهمال
بوردان ساوالانا نئچه؟
گؤزلدی ساعاتیز
سوئیس‌‌دی کوردوستان؟!
یانی دئییرم من ساختا قلبدن باش چیخاردیرام
اللریزی وئرین الیمه
لوطفن
منی بیر یئره گؤتورون
خسته‌‌ خانایا
ائوینیز یاخشی‌‌دی البتته
نؤمره‌زی آلیب قاییدارام
سسیزی ایتیرمیشم اینشیلدن
بوراخما اللریمی نه اولار
"سسین گلسین ساری بولبول"
منه بیر آدرسجیک سسین گلسین.
-سیزین ائوه هانسی پلاک لازیمدی؟
هانسی خیابان،منی فخری خیابانیندان
سیزه گتیرر؟
هانسی اوتوبوس؟
اوزوزو چؤنده رین گونشه
بیر،ایکی،اوچ
تولازلانین منیمله دلی‌‌لیگی
سارای توللاندی‌‌ ها،قاداسی…
بس اوندا نؤمره‌‌‌زی وئرین
بیر شاعیر سیزی شئعیرلندیریر
-من آزمیشام خانیم ناز
منی ائویزه،
پولیسه آپارین.
نؤمره‌سی نه ایدی؟
ائویزین!قاپیسی!پولیسین!
دانیشین موبایلیم سسیزدن دولسون
بولوتوث ائدین اؤزونوزو لوطفن
باش اوسته یومدوم گؤزلریمی!
"سسین گلسین باری بولبول"

من عاشیقم وطن یاخشی
گئیمه‌یه کتان یاخشی
کؤینک ایسته‌‌میرم من
سیزی گئیمک ایسته‌‌ ییرم
آجام
اللریزی یئمه‌رم واللاه

قاشسیز اوزویومون قاشلیسیندان
جیبیمده اولسایدی
بارماغیزا نه یاراشیر اوزوک
یوخدو منده اوز
یانی دئمه‌لی سیز هارالی‌‌سیز؟
شورابیل سیزه اوخشاییر
سیز یوخ
آخی تربیه‌‌ سیزدی آتلاری
آغ بالیغلاری آنجاق
یانی سیز آغ بالیق
نئور گؤلو سیزدن
سیز گؤزلسیز دئییرم موطلق
گئرچکدن

اللریمی بوشلاساز،اللریم تؤکولر هاااا
کیم ییغیشدیراجاق بو سویوقدا
بو قدَر سئوگی بارماغلارینین ایزلرینی.
دئییرم هادیر اولون
من الیزده قالارام
قالسامدا کی"پنجره‌‌ دن داش گلیر"
آی سانسور ائتدیم بیر آزین
"آللاهادا خوش گلیر"
آی منه بیر زنگ ائله

منی راپور وئرمه گؤزلرینله
داما وئردیر دامسیزام
سنَد گتیر آدامسیزام
سن کی زیبا کرباسی‌‌ دن ده گؤزلسن
نازپری‌‌دن ده،همده
گؤزوم گؤزونون اویونجاغی‌‌دیر
بوراخما
بوراخما اللریمی نه اولور؟!
اردبیل کوچه‌‌ لرینده ایت قاپار منی
سسله آدیمی سسله
من؟من؟
من گونش اوغلویام خانیم سن آی؟
آدینیز دیله-دیشه گلمیر
آدی نه ایدی سیزین؟
من سیزه گئدیرم
سیز هاچان گلیرسیز منه قوناق؟!
من…من…من…
نه دیلنن دئییم جوجه‌‌‌م
آی لاو یو آی آی
اُحِبُّ اُحِبُّ اُحِبُّ یا حبیبی
قیزا سئوییوروم سِنی
بالالی….
گئتمه…
دایان…
دور…
به ائششه‌‌‌یین قیزی
آخی سئویرم سنی!


https://t.me/Adabiyyatsevanlar

دومان بختیاری

سن یوخسان
دورنالاردا کؤچون چاتیب
دومانا بورونوب( خان پری) ده چینار آغاج‌لاری
سن یوخسان
پاییزلاییر گؤزو یاشلی کوچه لرده بنؤوشه‌لی بارماق‌لاریم
شَوه ساچ‌لاریندا آغ یئل اسیر
بو شهَرین
قوشمالاریندا بیر دنیز قیزی
تلَه سیر
سن یوخسان
یوخسان
یوخسان

https://t.me/Adabiyyatsevanlar

یاغیش گونو
اسماعیل خرمی


دردلی بیر آدامین گیزلی گیزلی، خیسین خیسین آغلادیغی کیمی، بولوتلاردان آیاغی سوروشوب ییخیلان یاغیش گیله لری یاواش یاواش اوستومه دوشوردو. یول اوستو چالا چولالاردا ایسلانمیش قورو یارپاقلار قاییق کیمی اوزمه یه باشلامیشدیلار. بعضی یارپاقلار سانکی دنیز فیرتیناسینا توش گلیب دایاز چالالارین دیبینه ائنمیشدیلر. آغاجلارین چینمه واختی گلیب چاتمیشدی. بیرر بیرر پالتارلارینی سویونوب دوش آلماقا حاضیرلانیردیلار. منده بو دورومون باشقا طرفی اوز وئریردی. بؤز نیمداش پئمجه ییمین دومه سینی باغلاییب، قارا بؤرکومو باشیم ایسلانماسین دییه، آلنیم ایتینجه آشاغی چکیردیم. آغاجلارین بو گؤرونتوسو سول آیاغیمین باش بارماغی و ساغ آیاغیمین دابان حیسسه سینه تانیش ایدی.
بیر ایله یاخین ایدی ایشدن چیخارتیلمیشدیم. آلتی آی آیلیغیم و باشقا ایش حاقلاریم وئریلمه میشدی. نئچه واخت اولاردی کی امک بوروسونا شکایت ائتمیشدیم. بوگون واخت گلیب چاتمیشدی.آرخایین ایدیم کی اونلارین یاردیملاری ایله ایسته دییمه چاتا بیله جم. خانیمین یؤیلولوغو سککیز آیین ایچینده ایدی. سونوگرافدا اوغلان اولدغونو اؤرگنمیشدیک. هر گون الیمی خانیمین قارنینا چکیب اونون تپیک آتماغینی دویوردوم. خانیما دئییردیم:
- گؤرورسن ایتین اوغلو ایندیدن آیاغین یئره چیرپیرکی گئت دوغوم گونونه حاضیرلیق ائله.
پوللاری آلدیقدا، دوغوم خرجلرینی بیر یئره توپلاییب، اونا ان سئودییم گئییملری آلمالیدیم. آیاغیمیا سوواشان پالچیقلاری دوشونموردوم. یولو الیمه آلیب امک بوروسونا دوغرو گؤتورولموشدوم. گئده گئده اوغلومو ذهنیمده گئیندیریردیم. ماوی گئییملر ظالیم اوغلونا یامان یاراشیردی. آغ بؤرکده باشیندا اولاندا محشر اولوردو. بارماغیمی یاواشجاسینا بورنونا سورتنده اؤردک کیمی قیغیلداییردی. سوت قوخوسو آدامی مدهوش ائدیردی. آناسی نازلانا نازلانا دئییردی:
- کیشی اوشاغی اینجیتمه. قوی اوشاق یاتسین.
ایندی اؤزومون حیاتیمی و هله دوغولمایان کؤرپه مین، گئییملرینی ایش بوروسو رئییسینین الینده گؤروردوم. منیم بوتون ایستکلریمی یئرینه یئتیریب، اوسته لیک فیکریمدن کئچن ماوی گئییملری و آغ بؤرکو هدیه اولاراق اوغلوما پای وئریر. البته ده بئله اولمالی ایدی. انسانلیغین یاریسی اؤلسه ده یاریسی دیری قالمالیدی. اگر انسانلیق بوتولوکده اؤلوبسه، بیز بو دونیادا نه سوله نیریک. بو قدر قانونلار، مدنی ایستکلر و انسان حاقلاری نه اوچوندور؟ بورا اؤز آرامیزدی الیمیزدن بیر یانلیش ایش گلنده، قونوم قونشودان توت، امنیتی اداره لره دک آدامین دده سین یاندیرارارلار. اونا گؤرا انسانلیغین یاری قالان جانینا ایناناراق آددیمیمی ایش بوروسونا دوغرو داها سرت گؤتوروردوم.
ایش بوروسونا چاتمیشدیم. ایش صاحیبیمین قاپیدا تانکا اوخشار پرادو ماشینی دورموشدو. مودورون قاپیسینی تانییردیم بیریندن سوروشمادان قاپینی دؤیوب ایچه ری گیردیم. اداره مودوروایله بیزیم مودور باش باشا وئریب خیسینلاشیردیلار. منی گؤردوکده بیربیریندن آیریلدیلار. سلاملاشاندان سونرا بؤیوک، یوموشاق و قهوه ای مبلون اوستونده ائیلشمه یه یئر گؤستردیلر. بیزیم مودورمنی گؤرنده گولومسه دی ندنسه بیرآز ایچیم راحاتلادی. بیر باشقا آدام دا واریدی. قاباغیندا نئچه نئچه دفتر دستک واریدی یازماقلا مشغول ایدی. امک بوروسونون مودورو دورمادان دانیشیغا باشلادی:
- دفعه قبل من جنابوزون خدمتینه عرض ائله دیم کی تمام تلاشیمی ائده جم تا حق و حقوقو بو کیشیدن آلام. اما متاسفانه آقا ورشکست دوشوب و دییه سن جنابعالی دن شرمنده اولاجاییق.
باشیما بیر قازان قاینار قیر تؤکدولر. جهنم اؤز الیله اوتاقا گیرمیشدی. منی تر سوپوردو باسدی. چوخ چتینلیکله اوتقونا بیلدیم. قیریق قیریق سؤزلرله دانیشیغا باشلادیم.
- نئ نئ نئجه یا یا یانی ورشکست دوشوب؟ به م م م م م نیم ایشده دددددددددیم نه اولدو؟
- آقای محترم وقتی من دئییرم ورشکست یعنی ورشکست. یعنی آغانین سنه وئرمه یه پولو یوخدو. قوی سنی باشا سالیم.
بیر ساعاتا یاخین دانیشیقدان سونرا ورشکست سؤزجویونون نه اولدوقونو چوخدا گؤزل باشا سالدیلار. ایش صاحیبیمین یاخشیلیغینداندا او قدر دانیشدی کی آز قالدیم اوندان عوذورده ایسته یم. کیشی الله آدامی ایمیش. من آخماقدا یازیغین علیهینه تانیمادان شکایت ائتمیشم. شرکتده گؤرردیم ها، نماز واختی قولون چیرماییب بیر ترلیکله یوخاری چیخیر. و حتی آدینا آخشاملار ایشچیلره ایشدن چیخان واختلار نماز جومعه یه گلمه یی تاپشیراردی. هله اونون خئیریه ایشلریندن اوقدر سایدیلارکی دوغروسو اؤزومدن اوتاندیم. نئچه یئرده مچید تیکدیردیی، موختلف اداره لره لازیمی قدر یاردیمی، مینلر نفره احسان وئردیی، و حتی باشقا مملکتلرده کی موسلمان باجی قارداشلاریمیزا دویونجان امگی کئچمیشمیش.


اؤزومو توپارلاییب یاواش یاواش اوتاقدان چیخدیم. مودورده مندن بی

رآز سونرا چیخدی. مودورون گؤزلرینین ایچی گولوردو. ماشینا چاتدیقد

ا منه آشاغیدان یوخاری باخدی:
- اوستو باشین پالچیق اولماسایدی مسیرینه آپاراردیم.
اؤزومده اوستومه باخدیم. گلنده نئجه گلیرمیشم هاردان کئچیرمیشم، آنلادیم. ایندی بولود هؤنکور هؤنکور آغلاییردی. بؤرک مئیدانی دئییلدی. بولودون گؤز یاشلارینین نه اولدوغونو جانیم آنلاییردی. آنجاق او ظالیم اوغلونون ماوی گئییمی و آغ بؤرکو گؤزومدن کنارا چکیلمیردی. ائوه گئتمک ایسته سمده، ایسته مه سمده ، آیاقلاریم منیم دئییلدی.


https://t.me/Adabiyyatsevanlar