✅✅✅✅سایین کانالداشلار
ائتیمولوژوی حاقیندا علمی دانیشیق بو گئجه 96/11/29 ادبیات سئونلر کانالیندا اوستاد دوکتور ارشد نظری جنابلارینین اوزمانلیغی ایله کئچدی بو دانیشیغی ادبیات سئونلر کانالیندا ایزلییه بیلرسینیز .
https://t.me/Adabiyyatsevanlar

نبی خزری
ایسته سن یوخونا گله‌رم سنین،
گله‌رم دنیز کیمی.
اوزونه اینجیلر چیله‌رم سنین،
چیله‌رم دنیز کیمی.
یولونا شفقلر سپه‌رم هردن
سپه‌رم دنیز کیمی.
ایسته سن اوزوندن اؤپه‌رم هردن،
اؤپه‌رم دنیز کیمی.
آدینی قلبیمین ساحیللرینه
یازارام دنیز کیمی.
" سئومیرم " سؤیله‌سن بیر آخشام منه،
سوسارام دنیز کیمی،
سوسارام دنیز کیمی...
https://t.me/Adabiyyatsevanlar

✅✅✅✅سایین کانالداشلار
صاباح گئجه 96/11/30 ادبیات سئونلر گروپوندا ساعات 21/30 دا دیکلمه یاریشماسی اولاجاق بو یاریشمانین شعری سئویملی گروپداشیمیز آذربایجان ادبیاتینین تانمیش سیماسی ائلدار موغانلی جنابلارینداندیر سئویملی شاعیرلری , گوزل سسلی دیکلاماتورلاری آذربایجان شعرینین هوسکارلارین بویاریشمایا سیجاق قاتیلماغا دعوت ائدیریک .
🔹🔹🔹🔹🔹🔹
‍
ائلدار موغانلی

اوشویور دویغولاریم،
کؤزوندن پای اومورام.
گؤرونمز یوخولاریم،
گؤزوندن پای اومورام.
دوشوبدو دیله سئوگیم،
آی‌لارا، ایله سئوگیم؛
پوزولور بئله سئوگیم،
ایزیندن پای اومورام.
گئجیکیب ایلک باهاریم،
تالانیب سئوگی واریم؛
چوخونا یوخ قراریم،
آزیندان پای اومورام.
اری‌ییر یئره کؤلگم،
اوینادیر آتینی غم؛
چکیلیب دارا نغمه‌م،
سؤزوندن پای اومورام.
اورکده بیتنیمسن،
گول اوسته اؤتنیمسن؛
پای وئرن وطنیمسن،
اؤزوندن پای اومورام.
https://t.me/Adabiyyatsevanlar

سحر_خیاوی


باشقا اوزای دان دئییلم
اوزاق فضادان دئییلم
یوخ من سماء دان دئییلم
نه دن منی دوشونمه دین؟!

نه قوتسال بیر ال چاتمازام
نه قولچاق نه جانامازام
نه ذره یجه سن دن آزام
نه دن منی دوشونمه دین؟!

سویوندوم تورکو اوزومو
دئدیم آنا دیل سوزومو
آچدیم بو یئرده گوزومو
نه دن منی دوشونمه دین؟!

یالنیز سوموک ات دئییلم
عبث لره"چت" دئییلم
هیروگلیف خط دئییلم!!
نه دن منی دوشونمه دین؟!

سئودین منی سن قانادسیز
کولگه لرده قالمیش آدسیز
کوله لنمیش بیر "آزادسیز"
نه دن منی دوشونمه دین؟!

قانادلاریمی سره جم
رویالاریمی هوءره جم
هامیدان اونجول سوره جم
نه دن منی دوشونمه دین؟!

بیر اوزومدو هله گلین
دوشونورم درین درین
منه قانادیمی وئرین
نه دن منی دوشونمه دین؟!
https://t.me/Adabiyyatsevanlar

سعید موغانلی
یاز بیر حادیثه دئییل سن سیز
یاشیل گؤزلرین
قانا دؤنموش یای گیلاسی دیرسا
باخ
شکی دؤش لرینده قورالیق لارا کئفلی دیر پاییز
و قیرخ یاشیندان باشلانان
ساچلاریندی قیش

قار گولله لریله-گولله له نن من
-و یازی لاردا سئویلن وطن-
#گون_آیدین سئوگیلیم
#گون_آیدین آی قیز!!!!
#گون_آیدین بئش بؤلوک خزر دنیزی
و یالنیز
ماهنی لاردا اونودولمایان قارا باغ یازی
گون آیدین
قاراباغ شیکسته سی نین قارداش سیز قیزی......

https://t.me/Adabiyyatsevanlar

سعید صادقی فر
قار یاغیر ...
چاتیمیزدان ، باجامیزدان
دامجیلاری دامیر
داملالارینی خالچانین اوزه‌رینده ایزله‌ییرلر
بوش ساخسی لار ، بوش کاسالار
قار چیچه یینی سئون بیریسی
اونونلا دانیشسین
کاسیبلارین دامینا
یاغماسین آرتیق
قار آدامینا تاپشیرسین کی
دامیمیزا دامیزدیرماسین داملالارینی
بیز هر گون گؤز یاشیمیزلا
دولدوروروق اودوزموش بوش کاسالارینی

https://t.me/Adabiyyatsevanlar

ع یالچین
قورويا بيلمه ديك داغي –داشيني
باغيشلا سن بيزي باغيشلا وطن
يئرده پلنگيني گويده قوشونو
باغيشلا سن بيزي باغيشلا وطن

سن بيزيم اولدوقدا بيزيم اولمادين
گوزومون نوروسان گوزوم اولمادين
كوكسونده پارلايان ايزيم اولمادي
باغيشلا سن بيزي باغيشلا وطن

سنسيز پوهره وئريب اچا بيلمه ديك
قوش اوليب گويونده اوچا بيلمه ديك
يولوندا اولمه گي قوجا بيلمه ديك
باغيشلا سن بيزي باغيشلا وطن

سو اوليب تارلاندا اخماديق حاييف
يول اوليب زيروه نه چيخماديق حاييف
يولوندان سدلري ييخماديق حاييف
باغيشلا سن بيزي باغيشلا وطن


قورويا بيلمه ديك داغي-داشيني
يئرده پلنگيني گويده قوشونو
چيچكلي يازيني قارلي قيشيني
باغيشلا سن بيزي باغيشلا وطن
باغيشلا سن بيزي باغيشلا وطن.


https://t.me/Adabiyyatsevanlar

✅✅✅✅✅سایین کانالداشلار
بو گئجه ادبیات سئونلر گروپوندا دیکلمه یاریشماسی اولدو بو یاریشمانین بیرینجی غالیب لری : جناب حسرت زنگانلی , جناب بهروز صدیق اولدولار .
ایکینجی غالیب :خانیم رقییه عبدیلی ( سازاق )
اوچونجوغالیب : خانیم سارای محمد رضائی اولدولار .یاریشمایا قاتیلانلار اوغورلار آرزو ائدیب سیزدن دعوت ائدیریک غالیب لرین دیکلمه لرین ادبیات سئونلر کانالیندا دینله مییه .
https://t.me/Adabiyyatsevanlar

یاریشمانین بیرینجی غالیبی 96/11/30
شعر: ائلدار موغانلی
سس: حسرت زنگانلی
https://t.me/Adabiyyatsevanlar

یاریشمانین بیرینجی غالیبی 96/11/30
شعر : ائلدار موغانلی
سس : بهروز صدیق
https://t.me/Adabiyyatsevanlar

یاریشمانین ایکینجی غالیبی 96/11/30
شعر : ائلدار موغانلی
سس : رقییه عبدیلی (سازاق )
https://t.me/Adabiyyatsevanlar

یاریشمانین اوچونجو غالیبی 96/11/30
شعر: ائلدار موغانلی
سس : خانیم سارای محمد رضائی
https://t.me/Adabiyyatsevanlar

"نارسیسم"(خود شیفتگی)
✍افروز خانیم

گونلرین بیر گونو بو من کی افروز خانیم اولام اوزومو چووووخ اونملی و اهمیت لی بیری بیلیردیم.دونیانی دوءرد اللی ائله جیددی توتموشدوم کی گل گوره سن.یانی حیس ائدیردیم گونش مندن ساری منیم اوزومو گورمه یه چیخیر.آی گوی دن منی بویلانیر.اولدوزلار منه سایریشیر.من شکست یئسه م قارقالاردا قارا گئییر.اوغور قازانسام گوللر چیچکلر مندن خاطیره گولور.دونیانین ان بیلیکلی سی منم و هئچ کیمی دال جیبیمه قویماغا بئله لاییق بیلمیرم.
خیلاصه یانی نوشافا قالمیردی اوزومه آچیردیم.
تا بوکو بیر گون بو"افروزلیق" اویاندی منده.نئجه ده اویاندی.
۱) بیرینجی شوخ طبع لیک برکتینه مهم اولماق آتین دان پیاده اولدوم.یانی بیلدیم هله بو یئکه لیغدا یئر کوره سی بو قدر کهکشانلارین ایچینده سرگردان بیر توپ اوشاق اویونجاغی دیر.من ده بیر ذره بو قدر آدامین ایچینده.ائله توتوب یئریییرم اوزومو آز قالیر بلانسبت یئر جیریلا.یا ائله بورنومو توتوب گوءیه یئریییرم کی آیاغیم قوهون قارپیز قابیغی اوستدن سویروشور.
۲)بیلدیم منیم شکست یا اوغوروم بشر تاریخینده هئچ یئنی بیر سرفصل آچمیر.یانی تاریخین هئچ ق....نا دئییل بو افروز هاردان گلدی هارا گئتدی.
۳)بیلدیم گونش منسیزده چیخاجاق.آی پنجره دن منسیزده ده بویلاناجاق.اولدوزلاردا منسیزلیگی هئچ وئجینه آلمادان سایریشاجاق.
۴)بیلدیم یاشام چوخ اعتبارسیزدیر.اوءلوم فیکر ائله دیگیمدن آرتیق یاخین.
۵)دئدیم بو احوالینان افروز توش غرور آتیندان ائله بو شوخ طبع لیک ائششگی سنی گوءرر.وور چاتلاسین/ چال اویناسین/ اهلا و سهلا یا حبیبی
صاف ساده اولدوم، دولاشیق سیز، پیرتلاشیق سیز، قوشلار کیمی آزاد، یونگول قاناد.ایندیسه نفس چکمک کیمی راحات یاشاییرام.چوخدا اوزومه گوونمیرم.آغزیمدان یئکه دانیشمیرام،ایکی اوزلو دئییلم.بوش یئره اوزومو بتر پیچیده گورستمیرم.عوض ده بئینیمین گولدانین آچمیشام.تلاشیم دا یوخ حتمن منی اییله سینلر.دیرلی گولوم اولسا اوءز قوخوسون یایاجاق.
هردن مزارلیغا باش وورورام.بونلارین چوخو منه تای دئییردیلر بلکه کائنات بونلارسیز فیرلانمایاجاق.هئی....هئی....یازیغلار.بیر ایکی گون اوهو اوهو ائله دیلر.اوچونجو گونون گونشی باتان ائله یاددان چیخدیز کی قاریشدیز مین ایلین اوءلولرینه.سانکی هئچ یوخویموشسیز.هه....بودو اوزوموزو اوندان ساری اولدوردوگیمیز دونیا.
داها نه اوزومو هشترخان کیمی شیشیرتمیرم نه اوءزگه لری.نه اوزومو اولدوغومدان اسکیلتمیرم نه اوزگه لری.حیس ائدیرم افروزلا هر نه یوءنون تاپیب.یئرین آلیب.

بونو قبول ائله مک کی بیز بو دونیادا چوخدا مهم دئییلیک چتین ایدی امما چوخ شیرین.
ایندیسه من "افروز" جیلدیمی او بیری اوزومدن داها چوخ سئویرم.نئیه کی یولومدان آزاندا بیرده گورورم"افروز" چیلپاق ائششگینه مینیب بیر گوشه دن منه قاه قاه گولور.و تامام اونلارا کی اوءزلرین بتر مهم سانیرلار.نه یاخشی بو دونیادا "افروزومو" تاپدیم و اوزومه گولمگی اویرندیم.
شوخ طبع لیک کوءمک ائلیر یاشامین آجیلیغین دا آسان ایچه سن. و هر بیر شئیه قاه-قاه گوله سن.نئیه کی حیات بوتونلوک له گولمه جه دیر.افروزوموزو تاپاق و گولوشله یاشامین استقبالینا گئده ک.
https://t.me/Adabiyyatsevanlar

حسن ریاضی ( ایلدیریم)
آنا دیلیم

سؤزومون دادی،دوزو
اوره یمین ایچ اوزو
بایاتیلی،قوشمالی
آنا نفَسلی دیلیم
 
ایستکلرین شفقی
آرزولارین اوفوقو
سئوگی طاملی،یاز اوزلو
نسیمی سسلی دیلیم

آنام عؤمور شیره سین
وطنیمین نغمه سین
آخیدیب لایلا لارلا
گئجه-گوندوز جانیما

قیزیل گول بئشییینده
میشیل-میشیل یاتمیشام
اوخشامالار اوخشاییب
نازلامالار نازلاییب

آرزولار قانادلانیب
دیلکلریم اوچوشوب
آنا دیللی دونیام دا
دیرچه لیب بوی آتمیشام

هر دیلین اؤز آدی وار
هر دیلین اؤز دادی وار
باشقا دیللر شَکرسه
آنامین دیلی بال دیر

شَکرلردن دادیرام
دادلانیر سؤزوم،نغمه م
بالیمین دادی قاچسا
شَکر بال دادی وئرمز

ایتر کؤنلومون اودو
ایتر سؤزومو دادی
ایتر آرزومون آدی
سؤزومون دادی دوزو

اوره ییمن  ایچ اوزو
قورقود آرزولو دیلیم
فضولی سؤزلو دیلیم
نسیمی سسلی دیلیم
آنا نفسلی دیلیم

https://t.me/Adabiyyatsevanlar

علی جواد پور
یالان اؤیرتمه‌لر

یاپیشیب الیمدن آلفابئت اؤیره‌ت 
 چؤره‌یی اؤیرنیم، دوزو اؤیرنیم
گونده دیلیم-دیلیم آنادیلیمدن،
 من یازی اؤیرنیم، پوزو اؤیرنیم!

قانیمی ایچمک‌دن دوی بیرکره‌ده
  سویورسان ده‌ریمی، سوی بیرکره‌ده
  یاخامدان ال گؤتور، قوی بیرکره‌ده،
دوغرونو اؤیرنیم، دوزو اؤیرنیم!

تزه‌ک‌لر دئییلمی بوچیچک‌له‌نن!؟
نه‌لر داداجاقسان قوخوسوندان سن؟
 یالان اؤیرتمه‌لر بوراخمیرکی من،
 اؤزومو اؤیرنیم، سیزی اؤیرنیم

گوندوزون گوناهین آنجاق‌کی گئجه،
بیر ته‌هر اؤرت باسدیر ائده گیزلیجه.
ساختا کیپریک‌لرین ایچیندن نئجه،
باخیشی اؤیره‌نیم، گؤزو اؤیره‌نیم!

بیرآز جیزما-قارا باجارسام من‌ده
 اؤیرتمن اولارام بیر بویوک کنده!
 قوی چوروک درس‌لری اؤیرنمه‌سم‌ده
 چؤریی اؤیرنیم، دوزو اؤیرنیم!
 اؤزوم اؤزدیلیمده یازی اؤیرنیم!..


https://t.me/Adabiyyatsevanlar

✅✅✅✅بیلدیریش
سایین کانالداشلار صاباح گئجه 96/12/02 ساعات 21/30 دا ادبیات سئونلر کانالینداندا
تنقید گئجه سی اولاجاق .اوزمان سئویملی کانالداشیمیز رسول اسمعیلیان جنابلاری اولا جاقلار.
https://t.me/Adabiyyatsevanlar

ائلیار پولاد
گؤي قورشاغي
(آنا دیلی گونو مناسبتی‌ایله)
گونون اورتا چاغيدير. ياز ياغيشي شيديريغی ياغير. تله‌سرك ائوه گليرم. اوست-باشيم تامام ايسلانيب. ايچري گيرديكده، ائله گيره‌جكده اوست پالتاريمي سويونورام. عايله‌م بيرليكده ائوده‌ديرلر. من ايچري گيرر-گيرمز، اوغلوم قاچير قاباغا:
- سالام آتا ، آخشام سؤز وئرميسن بو گون منله توپ اويناياسان.
منده جاواب وئريرم:
- اوغلوم باييردا ياغيش ياغير، ايندي اولماز. نئينک ياغيش كسسين گئديب حیطده سنيله توپ اوينارام.
زامان اوتور و ياغيش كسير. اوغلوم دا مندن ال چكمير. نهايت بير يئرده حیطه چيخيريق. هاوا چوخ اوره‌يه ياتيملی‌دير. ياز ياغيشيندان سونرا هر نه تميز و گؤیچک گورونور. اوره‌كلره سئوينج پايلانير. كوچه‌دن اوشاقلارين و يئني يئتمه‌لرين هاي–كويو گلير. اونلاردا يازين ايليق هاواسيندان ذوق آليرلار. ائله بو آن اوغلوم هيجانلا، بارماغيلا گؤي عالمين منه گؤستریب، سوينجله قيشقيرير:
- آتا، آتا. باخ «رنگين كمانا» باخ. نئجه‌ده گؤزلدير.
منده گؤي قورشاغينا باخديقدا، اوز توتدوب اوغلوما دئيرم:
- هه چوخ قشنگدير ،آما او«رنگين كمان» دئييل. او «گؤي قورشاغی»دير.
اوغلومون چوهره‌سينده اولان تعجبلي حسي دويورام. اوغلوم دئییر:
-آتا. او «رنگين كمان»دير. ائله آنامدا، كوچه‌دكي اوشاقلاردا و حتا باخچاميز داكي معليمه‌ده اونا «رنگين كمان» دئيير. سن منه يالان دئمزدين بو دؤنه مني نييه آلداديرسان؟
مني فيكير گوتورور. بو صحبتلر مني بير آز سارسيديردا. اوغلوم دا بو حسي دوياراق منه دئییر:
- آتا نه اولدو. نييه كئفسيز اولدون؟
بودؤنه من اوغلوما يالان دانيشیرام:
- اوغلوم بير آز باشيم آغريير. سن بو دفعه گئت كوچه‌ده ياشيدلارينلا اوينا. سؤز وئريرم، بير آزدان گليب منده سنلن اوينارام.
اوغلوم كونولسوز مندن آيريليب كوچه‌يه گئدير .
منده حیطين پله‌‌سينده اوتوروب خيالا داليرام.ائله اوزاماني دوشونورم كي اوغلوم ياشيندا اولارديم. گونلرين بير گونو آنام حیطده دولاشير وسيل-سوپورله مشغول ايدي. منده اؤز-اؤزومه نه‌سه حیطده آختاريرديم. بيردن گؤزوم گؤي‌د‌كي گؤزل بير منظره‌يه دوشدو. سئوینرک آنامدان سوروشدوم:
- آنا. او نه دير؟ گؤر نه قدر گؤزلدير.
آنام گولومسه‌یرک دئدي:
- هه اوغلوم، او فاطما خالانين حاناسي دير.
نئچه گون اوستوندن كئچدي. بير گون آخشام اوستو آناملا قونشو حیطينه گئتديك. ائله آستانادان ايچري گيرديكده حیطده بير منظره گؤردوم . من گؤي‌ده اولان فاطما خالانين حاناسيني ،يئرده گؤروردوم. ائله بو آن سئوینرک هيجانلا قيشقيرديم:
- آنا، آنا ،باخ. فاطما خالانين حاناسي. نه قدرده قشنگدير.
ائله بو آن حانانين ياخينليغينا چاتميشديم. اليمي حانايا سورترک گؤزوم حانانين ايلك و آخريندا اولان يئره باسديريلميش آغاجلارا دوشدو. منجه حاناني آغاجلارا باغلاميشديلار. يئنه آناما دئديم:
- آنا باخ. آغاجلارا باغلاييبلار كي گؤيه اوچماسين، هه؟
ائله بو آن قونشو قاديني ائودن حیطه چيخيب و آناملا ساغولاشاندان سونرا من يئنه آنامدان سوروشدوم:
- آنا فاطما خالا بودور؟ نه ياخشي. ائله بيزنن قونشويمش كي.
آنام اوجادان گولرك دئدي:
- يوخ اوغلوم بو اسمر خالادير. بو حانا دا گؤيه اوچماز. اسمر خالا اونو آغاجا باغلاييب كي اوزرينده گؤیچک ناخيشلار سالا بيلسين. او كي قالدي گؤي‌ده‌كینه، او دا گؤي قورشاغي دير . ائله¬بئله جاماعات آراسيندا اونا فاطما خالانين حاناسي دا دئيلير.
من داي دينمه‌ديم. اسمر خالا گلدي اوتوردو و ايشله‌مه‌يه باشلادي. من اونون بارماقلاري و اللري‌نين حركتیني ايزله‌ييرديم. او هر حركتده بير بويا ناخيشا آرتيريردي. گؤز اوخشايان ناخيشلار هر آن اؤتدوكجه ،بير رنگه دوشور وگؤزللشيردي. اسمر خالا ايشله‌يه-ايشله‌يه حزين ماهنيلار زومزومه ائديردي. اونون ماهنيلاري ندنسه منده بير نيسگيل ويا حسرت اوياديردي. ائله ناخيشلاردا اولان اينجه‌ليك وماهني‌نين ملاحتلييي منه سئوينج دولو، كدرده باغيشلاييردي.
ايندي يئنه‌ده او ماهنيلار و ناخيشلار گؤزوم اونونده جانلانير و قولاغيمدا عكس-صدا يارادير. ومن دوشونورم كي:
- گؤره‌سن اوغلومون اوشاغي «گؤي قورشاغين» اوندان سوروشاندا هانسي ديلده آدلانديراجاغ؟.
https://t.me/Adabiyyatsevanlar

یئنه دیلیمیز، ادبیاتیمیز
همت شهبازی

بئله نظره گلیر کی بو گونکو دیلیمیزی قورویوب ساخلاماق یاواش-یاواش چتین‌لشیر. دیلیمیزین الینده، قوروما جیهازلاری (مثلن: مکتب، مئدیا، تلویزیا و…) اولمادان یاری جان حیاتا داوام ائدیر. بئله اولدوقدا دیل اؤز کؤکونو، اؤز اوریژینال‌لیغینی ایتیریر؛ بو دا ادبی یارادیجیلیقدا تاثیر قویور. دیلیمیزین کلمه احتیاطلاریندان (ذخیره) اوزاقلاشان اوخوجوموز، ادبیاتیمیزین دا دیلینی باشا دوشمه‌یه‌جکدیر. داها دوغروسو، بو گون ادبیاتیمیز بیر دیل یاشاییر، کوتله آراسیندا یاشانان دیل ایسه، باشقا بیر دیل حساب اولونور. بو سؤز، ائله آلینماسین کی عمومیتله بو ایکی دیل حقیقتن ایکی فرقلی یابانجی دیل ساییلیرلار. بو سؤزدن مقصد دیلیمیزده اولان گئدیشاتا اولتیماتوم وئرمکدیر.
دانیشیق دیلیمیز صنعی و ساختالاشیر. اونا گؤره کی هم قراماتیکاسی (نحوی) یادلاشیر هم یئرلی و دوغما سؤزلریمیز باشقا دیل‌لردن گلن سؤزلرله قاریشیر. بعضی‌لری بونو آل-وئر حساب ائدیرلر. منجه بونو او زامان آل-وئر حساب ائتمک اولار کی آلیش-وئریشده اولان ایکی دیل آراسیندا بوتون واریانت‌لار آربا و برابر، یعنی منیم دیلیمی‌تبلیغ ائدن مئدیا، یازی، اوخوجولوق، مکتب و … آلیش-وئریش‌ ائتدییم دیلین جیهازلار ایله باشا باش اولسون. بیز بونون ترسینی گؤروروک.
بیر طرفین خئیرینه سونا چاتان دیلده اولان سؤز آلیش-وئریشی‌نین آدی یالنیز قوماردیر. بو قومارین بیر اوجوندا اودان، بیر اوجوندا ایسه اودوزان واردیر. چونکی جیهازلاردا برابرسیزلیک حاکیمدیر. بس دیلیمیزه داخیل اولان یاد بیر دیلین کیملییی برابر دورومدا آلیش-وئریشه کئچه بیلر. عکس حالدا ایسه زیان گؤرن کیمسه، بو مسئله‌یه یئترینجه قایغی گؤسترمه‌ین طرف اولاجاقدیر.
بوردا ایسه صحبت بیزیم آنا دیلیمیزدن گئدیر. مسئله‌نین هر طرفینه یاناشدیقدا ان آزیندان دانیشیق و یا کوتله دیلیمیزده اودوزان طرف ده ائله بیزیک. قالیر ادبیات دیلیمیز. بو دا هر ایکی طرفدن قیسقیدادیر. یعنی بیر طرفدن باشقا دیل‌لرین هجوم گتیرمه‌سی، بیر طرفدن ده یوخاریدا دئدییم او دانیشیق دیلینی باشقا دیل‌لرین خئیرینه اودوزان واریانت، ادبیاتیمیزین دیلینی باشا دوشمه‌مکده سوچلاندیریر؛ بونون آردیندا ایسه ادبیاتیمیز اوخوجوسوز قالیر. ادبیاتچیلاریمیز، یالنیز بیر خاص ادبیاتچیلارلا دانیشیغا و دیالوگا کئچه بیلیر.
بو دورومدا نه ادبیاتچی و نه اوخوجو اؤز توتدوغو یولدان گئری چکیله بیلمیر. ادبیاتچی گئری چکیلدیکده اونون تکجه سیلاحی اولان دیلی‌نین آرادان گئتمه‌سی‌نین شاهیدی اولور. بونا گؤره ده اوغراشدیغی دیل، دوشونو‌لمز اولسا دا قورویوب ساخلاماسینا فیکیرلشیر. داها دوغروسو او، بو گونکو یازدیغی اثره گله‌جکده، تاریخی دیلچیلیکده، موزئی‌لره باش ووران آرخئولوقلار (باستان‌شناس) گؤزوندن یاناشیر. بئله کی ان آزیندان بو دوشونجه‌ده‌دیر کی، بو گون اونون دیلینی باشا دوشمه‌سه‌لر ده، گله‌جکده اونون بو گونکو یازیب یاراتدیغی دیلدن بیر دیل اؤزه‌یی کیمی‌استفاده ائده بیلرلر.
دیل چئشیدلی موضوعلارلا یاناشی چئشیدلی سجییه قازانیر. سیاست، شعر، ادبیات، فلسفه، بیلیم و گونده‌لیک دیل‌لرین هر بیریسی‌نین اؤزونه مخصوصلوغو وار. بو قونولار، اؤزونه مخصوص دیل‌لری بیربیریندن سئچیلیر و اؤزو اوچون سجییه قازانیر.
مدرن دونیامیزین دایم حرکتده اولماسی طلب ائدیر کی اونو عکس ائتدیرن صنعت ده حرکتده اولسون. صنعت ده بو حرکتی گؤسترن شئی، دیل و اونون اوزرینده یارادیلان صنعتکارلیقلاردیر. دیل آنلاییشلاری‌نین گئنیشلنمه‌سی نتیجه‌سینده صنعتکارین دا گؤروش‌لری گئنیشله‌نیر.
یئنه بو مسئله‌یه قاییداجاغیق….
https://t.me/Adabiyyatsevanlar

✅✅✅✅سایین کانالداشلار
چهارشنبه گونلری ادبیات سئونلر کانالیندا یالنیز نثر یازیلارین پایلاشیریق .
https://t.me/Adabiyyatsevanlar

⬅️⬅️امروز
روز جهانی زبان مادری است... ➡️➡️

💎موضوع انشا:
زبان کسانی که نمی شناسیم

🔴 اسم روستاهای شهر ما به زبان کسانی نوشته می‌شوند که در شهر ما زندگی نمی‌کنند.

🔴تابلوهای راهنمایی و رانندگی به زبان کسانی است که در شهر ما زندگی نمی‌کنند.

🔴مدرسه‌ها کتاب‌ها را به زبان کسانی درس می‌دهند که در شهر ما زندگی نمی‌کنند.

🔴رستوران‌ها غذا را به زبان کسانی سرو می‌کنند که در شهر ما زندگی نمی‌کنند.

🔴کتاب و دفتر و قلم به زبان کسانی است که در شهر ما زندگی نمی‌کنند.

اما:

🔴هیچ کس در این شهر به زبان کسانی که در شهر ما زندگی نمی‌کنند، صحبت نمی‌کند.

🔴اگر روزی یکی از آن‌هایی را که در شهر ما زندگی نمی‌کنند، ببینم، خواهم پرسید:
چرا شما دوست دارید به جای کسانی که در شهرشان زندگی نمی‌کنید، زندگی بکنید.

نوشتۀ:غفور امامی زاده خیاوی
به نقل از:
@oykumuz
https://t.me/Adabiyyatsevanlar

آد گونون موبارک
https://t.me/Adabiyyatsevanlar