ادبیات سئونلر:ویدا حشمتی

«قادالی آدا» شعر کتابینین دوواق گؤتورمه مراسمی


حسن رحمانی‌نین «قادالی آدا» آدلی شعر کتابینین آچیلیش مراسمی شاعیرلر، یازارلار، دانشگاه اوستادلاری، فرهنگی فعّاللار و ادب‌سئونلرین ایشتیراکی ایله کئچیریلدی.
مراسم، شبستر ادبی انجمنی‌نین مسئولی «زمانخانی‌»نین دانیشیغی ایله باشلاندی. او، سؤزلرینده آذربایجان خلقینین مشروطه‌دن ۱۳۵۷ اینقلا‌بینا قدر اولان مبارزه تاریخی‌نه اشاره ائدیب، ۱۳۲۵ ایلی و پهلوی دوره‌سینده باش وئرن حادثه‌لری یادا سالدی و معاصر ادبیاتین اجتماعی و تاریخی مسائلین عکس ائتدیرمه‌ده‌کی رولونو وورغولادی.
سونراکی بؤلومده، «بابا آهنگر» اؤز شعرلرینی هابئله حسن رحمانی‌نین شعرلریندن نمونه‌لر اوخودو. سونرا «شاهرخ نخعی»، کتابدا یئر آلان شعرلردن بیرینی دیکلمه ائتدی.
مراسیمن دیگر بؤلومونده دکتر «باقری حمیدی‌»نین سؤزلرینه آیریلدی. ادبیات انگلیسی اوستادی و منتقدی اولان باقری حمیدی، ادبی مکتب‌لر، ادبی ادوار، ادبیاتین وظیفه‌لری و معاصر جامعه‌ده شعرین یئری باره‌سنده دانیشدی و «قادالی آدا» اثرینه عمومی بیر باخیش سوندو.
بو مراسمده، آیناز جشنی‌نین شعر دیکلمه‌سی ده یئر آلدی. اوستاد یوسف اعظمی شاعرین شعرلریندن بیرینی دیکلمه ائتدی. اوستاد «شاهد اسکویی» و «موسی احمدی» قیساجا شاعرین شخصیتی و اثرلری باره‌سینده معلومات وئردیلر.
سونرا، «خوش‌خبر» نشریه‌سینین مدیرمسئولو دکتر دلاویز، شاعرین عاییله‌سینه تشکر ائدیب، حسن رحمانی‌نین حیاتی و ادبی فعالیتلری ایله ایلگیلی مختصر معلومات وئردی. هم‌چنین «دیدار با مفاخر» کانونو طرفیندن گول و هدیه ایله شاعیردن تقدیر اولوندو.
دوکتوز عزیزپور و نئچه ادبی شخصیت  کیتابین دوواغینی گؤتوروب ایشتیراک‌چیلارا تقدیم ائتدیلر.
مراسیمن سون بؤلومونده، «شیرین وطن» شرکتینین مدیر‌عاملی دکتر کافی، فرهنگی فعالیتلره حمایتین اهمیتینه اشاره ائدیب، شاعرین کتابلرینی حاضیر اولانلارا هدیه ائتدی.

مراسم، اوستاد عبدالعلیزاده‌نین رهبری ایله اجرا اولونان موسیقی اورکستری و حسن جداری‌ و نئچه ایفاچی‌نین ماهنیلاری ایله سونا چاتدی.

۱۴۰۴/۱۰/۱۶

https://t.me/Adabiyyatsevanlar

اوشاق ادبیاتی

سایین کانالداش لار نت سورونلریندن آسیلی اولاراق اوشاق ادبیاتینی بو هفته حاضیرلاماق ایمکانی اولمادی.
اوشاق ادبیاتی

هرهفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین


https://t.me/Adabiyyatsevanlar

کریم گول اندام

ازلدن ابده! 

اُولومدان اوُلومه گئدن یولچویام ،
ساغچی یام بیلمیرم یوخسا سولچویام ؟!
سانکی ازل چاغدان ائله من بویام !
من کیمم ،بو گل -گئت ،بوحیات نه دیر؟

• ظولمت دریاسینین باغرینی یاردیم،
• گونشه چاتارکن ساندیم قورتاردیم !
• گوُزله مه دن یئنه ظولمته واردیم ،!
• بیلمه دیم قورولموش بو بوسات نه دیر!؟
•
• یئرین بئشیگینده ییرغالانیرام،
• زمان اوکیانیندا چالخالانیرام،
• کائینات بطنینده دالغالانیرام،
• یئرنه ،زمان نه دیر، کائینات نه دیر؟
•
• بیلیکله یوکسه لیب نردووانلاری،
• سیر ائتدیکجه سونسوز کهکشانلاری،
• زمانین دیشیندا لا مکانلاری ،
• حیرتده قالیر ام بو شاهمات نه دیر !
•
• ندن انسان اوغلو فلسفه بازدی؟
• هانسی فیکیر درین ،هانسی دایازدی؟
هگل نه دوشوندو،نیچه نه یازدی ؟
افلاطون،ارسطو ،یا سوقرات نه دیر!

انساندی یارادان مین -بیر آللا هی!
آلله مقامینا چاتدیران شاهی !
دوغروبئله دیر سه سوُیله بس داهی
بو اوروج بو ناماز بو ذکات نه دیر؟!

بئش گون بو دونیادا من قوناق اولدوم
اودا سرگشته بیر  اویونجاق اولدوم!
خیالدان بوشالدیم ،عاغیلا دولدوم !
نه معنانی قاندیم نه ده ذات نه دیر !

میلیونلار پیغمبر مینلرجه ایمام،
گلسه ده قیرغینلار اولمادی تامام!
نه فایدا یهودا،نصارا ، اسلام !
بیرقران ،دوُرد اینجیل ،بیر تورات نه دی؟!

هر دینه قوللوقچو اولدوم یورولدوم !
مارکس اولدوم ،کانت اولدوم اپیکور اولدوم !
عشق ایله قورولدوم کوُکدن دورولدوم !!
آنلادیم مقالات،منشئات نه دیر  !!

اورمو_دی آیی ۱۴۰۴
  
https://t.me/Adabiyyatsevanlar

ناصر-داوران

بالتاچيلار
قان قوخويورلار
بالتاچيلار
فيدان قاني
چيچك قاني.
اووچولارديلار بالتاچيلار
بئيين توربالاريندا
آغاج باشي
قلم قولو
ماهني لئشي.
يئكه گؤوده لري وار بالتاچيلارين
گونده بير چووال يئمك يئييرلر
قيرميزي گؤزلري بير كاسا
بارماقسيز اللري 
نئجه توتور بالتاني بيلميرم.
يوخولارينا گيرن قادينلاري دا يئييرلر
يوخولارين قاچيران 
پيچيلتيلاري دا.
هاواني دومانلي سئويرلر
سويو بولانليق
گوزگونو سئوميرلر آمما
قيزيل آلماني دا.
پبسينه گه لير بو سونلو سونسوزلارين
سجل احوال اداره سي.

https://t.me/Adabiyyatsevanlar

مهناز صابونی( آیتای)

اسیرگه‌مه الینی تئللریمدن، آی قاداسی !
گل ایندی مین یارامی شانه_شانه  سای ،قاداسی!
 
دیدرگینم قلمیم سانکی قان سپیر کاغیذا
دئشیر اورکده‌کی باسدیردیغیم هارای ،قاداسی!

نه واخت‌دیر کی اؤلوم یونتاییر اولای‌لارینی
سارایلی کؤنلومه قونداقدی آرپا چای، قاداسی!

بولودکیمی دولانیر گؤزلریمده یاغمورلار
اورک سیخینتیما مهمان گلیب اوخای ،قاداسی!

زمانه میز ائله آلت، اوست اولور گؤرورسن کی
باتیبدیر آل قانینا اؤلکه‌ده سونای، قاداسی!

باغیردی سوردوگوم عؤمروم ،حاییفلادیم جانیمی
جهنم ایچره بهشت آختاریب هر آی ،قاداسی!

سوسوبدو سؤزلری سس سیز، سمیرسیز آردینجا
گلنده « آیتای» ایچون ساخلا گیزلی پای ،قاداسی!

https://t.me/Adabiyyatsevanlar

بیر ایتین نوستالژی‌سی

حیف اولدو اوشاقلیق، گؤرسن نه اولدو اوگونلر، سحردن آخشاماجا ائو آدامی‌نین قوجاغیندا گزردیم. هرکس هرنه یئسه ایدی اؤز پاییندان منه ده وئرردی، قاپیدان گیرن سویونمامیش قاچاردی منیم باشیما‌.
قارا بالا - قارا بالا دیلدن دوشمزدی.
منی قوجاقلاماغا ائوده رقابت اولاردی.
یاغیشلی گونلر دئیردیلر: قاچین قارا بالانی گتیرین ایچری ایندی اونا سویوق دگر...
اوندا من  یئمه‌ییمی سئچیردیم، جانین اوچون اتدن، تویوقدان باشقا هئچ نه یئمز ایدیم. ائله توتوقلانمیشدیم گل گؤرسن. هفته‌ده بیردفه منی حاماما آپاراریدیلار، یویوندوراندان سونرا ساچ قورودان ماشینی ایله بدنیمی داراییب قوروداردیلار. منی بیر ازدیرردیلر گل گؤرسن. من ده هئی ازیلردیم، اونون - بونون باشماغینی آپاریب گیزلدردیم، ال - آیاقلارینی یالاردیم، آتیلیب دوشردیم، حیطده بیر جیغان - ویغان سالاردیم گل گؤرسن.
ائو، حیط، هریان منیم اویلاغیم ایدی. هر هارا سئوسه‌یدیم باش چکردیم، هردن ده منی ماشین ایله چؤله آپاراردیلار، منقلین دؤر - برینده ال - آیاغا دولاشاردیم، آتیلیب دوشردیم، اؤزلریندن چوخ منه کاباب یئدیدردیلر.
جانین اوچون ایندی دورد - بئش ایلدیر ات جهنم سومویه ده حسرت قالمیشام، پئندیرلی چؤریی، سوت تیلته‌سینی یادیمادا دئییل هاچان یئمیشم.
حقیقتن بیلمیرم بو ائوین باشینا نه اویون گلیب، سانکی ائو آداملارینین دا وضعیتی منه تایدیر.
چوخداندی بو ائوین میطباغیندان خورک قوخسو گلمیر، دایم ائوده دالاشما وار. من ائله یادان چیخمیشام بعضن اوچ گونله منه یاوان چؤرک ده آتان یوخدور. ایندی همان قارا بالا یاوان چؤرگه ده حسرتدی. حیطده دووار دیبینده قالماقدان بیت باسمیشام. دده‌م روحی آجیمدان بئش کیلو آریقلامیشام، دای حورمه‌یه ده  قادیر دئییلم. بئله گئتسه بو ائودن قاچاجاغام.

https://t.me/Adabiyyatsevanlar