فندیقلی مئشه سی

https://t.me/Adabiyyatsevanlar

محمد_مختاری

چه خلوت است
خیابان جمعه
دمی که دور می شوی از خویش
و باز بر میگردی در خویش
و هیچ کس نخواهد دانست
که در دلت
چه گذشته است.
https://t.me/Adabiyyatsevanlar

اکبر بزرگ امین" عاشیق جنون"

چیلله گئجه سینه!

اوزون گئجه لره حئیران دئییلیک،
دوغمایان سحردیر دردیمیز بیزیم!
خزانلی فصیللر قوی اوزاق اولسون،
باغلاردا به هه ر دیر، دردیمیز بیزیم!

یامان گونه قالیب قاراش باجیمیز،
سایی نی آشیبدیر پولسوز، آجیمیز،
بیر تورلو دئییلدیر آغری- آجیمیز ،
هرگون بیر ته هه ر دیر، دردیمیز بیزیم!

گئجه لر دهشتلی، یاتماق اولماییر،
بو دردی قوپاردیب آتماق اولماییر،
مین کیلو بالینان اوتماق اولماییر،
آجی بیر زه هه ر دیر، دردیمیز بیزیم!

"جنون"! ائله درددیر، فیل ایستر دوزه،
اونون وصف - حالی، سیغیشمیر سوزه،
بیر، ایکی ،اوچ اولسا ، گلمزدی گوزه ،
اویویان شه هه ردیر ، دردیمیز بیزیم!


۹۰/۹/۳۰ اورمو شهری

https://t.me/Adabiyyatsevanlar

قێشین دوْغوم گۆنو

✍️شاعر: نورالدین_مقدم (آیدین دومان)

بير  پايێز آخشامێندا
سوْيوق بير يئل اسيردی
رنگی سارالمێش گۆنش
- سانكی اۆشودوڲوندن -
باتماغا تله‌سيردی

بوْز بولود، قارا بولود
گؤڲ اۆزون بۆروموشدو.
گؤڲ اۆزوندن اوْنلارێ، 
كيم سيله‌جكدی؟ آخێ!
آغاجلارێـن قوْل‌لارێ
شاختادان قوروموشدو!

قار، قا، قار، قا، قار، قا، قار
اوْخـويـوردو قارقالار.
قارقادێر خبرچيـميز
گؤره‌سن نه خبر وار؟

گۆن باتدێ، قاش قارالدێ
دۆنيـا يئنه دارالـدێ
نه بير اولدوز پارلادێ
نه آيدان خبر اوْلدو!

گئجه‌نين  ياتاغێندا
اوْ گئجه ياتدێ پايێز.
اۆشودو ها اۆشـودو
سانكی لۆت بير قوش ايدی!
بيردن بللی اوْلمايان
كيمسه، اؤز آغ كۆركونو
سردی اوْنون اۆستونه
آنجاق كۆركون آلتێندا
اوْ گئجه ايتدی پايێز

سحر، داها قێـش ايدی!

https://t.me/Adabiyyatsevanlar

دونیاسندن کیملر کئچدی
مبارز معلیم اوستاد" عباس قنبری" حیاتا گوز یومدو.

https://t.me/Adabiyyatsevanlar

دونیا سندن کیم‌لر کئچدی!

مبارز معلیم، نباتی انجومنی‌نین تمل داشین قویان‌لاردان اولان، ادبیات ورغونو، ائل خادیمی، وطن قایغی‌کئشی" عباس قنبری" بو گون 1404/10/13 تهرانین اندیشه بولگه‌سینده آغیر خسته‌لیکدن سونرا، حیاتا گوز یومدو.
عباس قنبری 1332_جی ده کلیبرده زحمتکئش بیر عایله‌ده دونیایا گلدی. ایلک تحصیلاتینی کلیبرده بیتیرندن سونرا، اهرده تحصیلاتینا دوام وئردی. گنج عباس قنبری 1352_جی ایل‌ده سپاهی دانش عنوانیله آذربایجان کندلرینه گئتدی. کند حیاتیندا باش وئرن حادثه‌لر،  ظالیم ارباب‌لارین ظلومو گنج عباسدا اویانیش روحونو یاراتدی. استاد قنبری 1354 ده اؤز خالقینا آرتیق خدمت یولون آموزش پرورشه داخیل اولماقدا گؤروب، اوزون ایل‌لر محروم منطقه‌لرده کوتله‌لرین بالالار‌ی‌نین معلیمی اولوب، مبارز معلیم 1357 ده مدرسه عالی پارسا وارد اولور، عالی تحصیلاتینی اوردا بیتیریر. سونرا تهراندا، خزانه ده، ملارددا،
شهریاردا، اسلام شهرده  معلیم‌لیک پئشه‌سینده صمیم قلبدن چالیشیر. اوستاد یاندیران چیراغین ایشیغیندا یوزلر دوشونجه‌لی ائل سئور، وطن سئور شاگرد بویا- باشا چاتیر. بوگون زحمتکئش‌لرین سیراسیندان بیر معلیم بیزدن آیریلسادا، اونون شاگیردلری، اوستادین عدالت اجتماعی اینامی‌نین بایراغین قالدیراجاقلار. اوستاد بیزدن آیریلمامیشدان سون درسینده بیزه وئردی. اوستادین وصیتی اساسیندا اونون جنازه‌سینی دانشگاه تهرانا، اورقان‌لاری ایشدن دوشن خسته‌لره جان وئرمک اوچون تاپشیردیلار.
ادبیات سئونلر بو آجی آیرییلغی اوستادین سایین عایله‌سینه، نباتی انجومنین مدیره هیتینه، اوستادین سئون‌لرینه باش ساغلیغی وئریر.
آرتیرمالییق
اوستاد عباس قنبری‌نین ابدی خاطیره‌سینه عشق اولسون دئیه، رک، خاطیره‌سین عزیزلمه مجلیسی قورولاجاق.

زامان:
یکشنبه گونو 1404/10/14
ساعات 20_ 18
یئر:
شهریار، کهنز، تالار شباهنگ،

ادبیات سئونلر 1404/10/13


https://t.me/Adabiyyatsevanlar

حسن ریاضی


بیر گونش باتدی اوفوقده،
قورخو چؤکدو اوستوموزه.
قورخو دؤیدو قاپی‌لاری،
یاساق ائتدی اوخوماغی، یازماغی.
یاساق ائتدی سئومه‌یی سئویلمه‌یی.
بیر گونش دوغدو قلبیمده،
یاییلدی شفق‌لری.
کیتابلاریمی تورپاقدا گیزله‌دیم،
یازیلاریمی آنامین صاندیغیندا.
سئوگینی دامارلاریمدا گیزله‌دیم،
آدیمی بولود‌لاردا،
اودومو اوجاق‌لاردا؛
نیفرتیمی اوره‌ک آغریلاریمدا گیزله‌دیم،
محبتیمی بولاق‌لاردا.
گونشی یاشادیم، سئودیم؛
آچیلدی گؤزلریم اؤنونده مین بیر کیتاب،
ورقله‌دیم جیغیر- جیغیر، کوچه – کوچه؛
ورقله‌دیم کند- کند، شه‌هر- شه‌هر؛
اوخودوم آددیم – آددیم، قاپی- قاپی؛
اوخودوم آدام- آدام، اوره‌ک – اوره‌ک؛
اوخودوم گؤز- گؤز، سؤز- سؤز؛
جانلاندی روحومدا باخیش‌لار،
ایزلر،
نغمه‌لر،
ناخیشلار.
سوزولدو بارماقلاریمدان اوره‌ک شفق‌لری،
بزه‌ندی سئوگی اوفوق‌لری.
کؤرپه‌لر گولدو
آچیلدی قلبیم،
بیر نغمه دینله‌دیم:
حیات نغمه‌سی،
ائللر نفسی.
جوشدو اوره‌ییمده سئوگی، حیات؛
آچدیم قانات.
کوسگون- کوسگون
سوروندو آرخامجا قورخو، اؤلوم؛
سئوگینی،
اینامی
یاساق ائت گؤروم!
۱۳۶۶

قایناق:ایشیق سایتی

https://t.me/Adabiyyatsevanlar

ائلدار موغانلی
بوداغ لار

بو داغ‌لار گؤزومدن ایراق اولماسین،
من اونو هر زامان وار ایسته‌ییرم.
دؤشونده کهلیگین قاققیلتی سسین،
باشیندا پارلایان قار ایسته‌ییرم.
قوینوندا دیرچه‌لن بنؤشه‌لرین،
سیلدیریم قایادا قافلان‌لار یئرین،
گئجه‌سین- گوندوزون، آخشام- سحرین،
بوسبوتون هر نه‌یی وار، ایسته‌ییرم.
دوستا بیر آنادیر، دوشمانا غنیم،
یامان- دارگونومده دوغما وطنیم،
او منیم سئوه‌نیم، هم سئویله‌نیم،
باخ، بئله بیر یولداش، یار ایسته‌ییرم.
دومان اوجالماسین باشیندان مودام،
یالیندا، یولوندا ایتمه‌سین آدام؛
گلرسم قوینونا، دئمه‌سین یادام،
من اؤز بالاسی‌یام، بار ایسته‌ییرم.
منلیگی، غرورو اوندان آلمیشام،
اونون سینه‌سینده من اوجالمیشام،
ایندی اوجاق اوچون اودا گلمیشم،
آغزیندان پوسگورن نار ایسته‌ییرم؛
باخ، بئله بیر یولداش، یار ایسته‌ییرم.
اردیبهشت ۱۳۸۴ – تهران

قایناق:ایشیق سایتی
https://t.me/Adabiyyatsevanlar

اسماعیل مددی (اولکر)  
 
آنام اورمویا
ائشیدیرسینیزمی سیز ده؟
«اورمو»یا قولاق آسیرام
اورمویا!
او قومرولاری سس- سسه وئرنمه¬میش
چیناری دینله¬ییرم!

سيز ده داليرسينيزمى؟
اورمويا داليرام من اورمويا!
فره¬لرينى قوروماغا
قاناد گَرَن
او ووقارلى «قو»يا...
«زارتوشت» اوجاغى باشيندايام
آیدین و سيجاق
اودلار يوردونون چؤره¬ك قاپيسيندايام
تندير، بركت قوخويور تنيم
اون كيمى اوزوم آغ!
اوسكوك- اوسكوك سو داشيیير
دييرمان دولانديريرام...
اورمونو ايشله¬ييرم، اورمونو!

      «اولکر»م
«آغزيندا يوين چاتلايان
اورمودان گلن بير آت» اوستونده¬يم.
هله ده گؤرورم!
- سيز ده گؤرورسونوز
گؤردونوز
دئييلمى؟
قيرمانجلادى «سامان ميدانى»ندا
بوغدا تيغيمى «قيزيل ديش قشه»
گؤزو گؤى گاوور قالديردى بير باش
مسجيديمين دوز قاپيسيندا قان پياله¬سينى
هله ده جينگيلده¬يير بازاريمين باجاسيندا
- ائشيديرسينيز دئييلمى؟- 
«... مالي عجم حلاله!»  سسينى...

«قاباغی دوموز»
«داليسى دنيز» شهريم!
تانيغيمسان
محشر گونودور
شاهديم اول!
مينلرجه داغيلديق
يوزلرجه بوغولدوق
اونلار يول
اونلار يول...
يئنه سندن اومدوق چاراميزى!
ساده¬جه سنين قاپينا گلديك.
اولوب- بيتنى
اؤولادينا سورمادين
سن
سارمادين!
دوزونلا ديرى ساخلادين ياراميزى
آيينلا
اولدوزونلا
آيازينلا دؤللـه¬دين قبيرلريميزى
«كاظيم خان»
«قورد اوصالى»  بوغازييلا بؤيله اولادين:
بو اؤلكه¬دن بير چينقيل
ياد نالينا دريلمز!
جان- باشدان پاى وئريلسه
تورپاقدان پاى وئريلمز!
و
قالخديق قبيرلريميزدن
آت دؤشوندن
ايت ديشيندن آلديق سنى
سنى يئنيدن دوغدوق عزيز شهريم
سن
يئنيدن دوغولدون كيشى بطنيميزدن.
و سونرا
ايليكلريميزه ايشلتدين
بو ياسانى هايقيراراق:
- نه قدر وارسا گلسين
يوردوموزا گؤز تيكن
چاغريلماميش قوناق!
توركوك
قوناق سئوريك!
تورپاغيميزين اوستونده ده اولماسا
هامیسینا
آلتيندا
يئر وئره بيلريك...

https://t.me/Adabiyyatsevanlar

رحیم گوزل


1


یئری بوش گورونور یوخاری باشدا،
ائو اونسوز ائله بیل قاشسیز  اوزوکدور،
شکیلی دیوارا سویکه‌نیب قالیر،
مین- مین خاطیره‌نی یادیما سالیر؛
آتامی دینله‌ییرم.

باخیشی یازیلیب پنجره‌لره،
سسی قاپیلارین لئنتیاسیندا.
هر آچیب اورتدوکجه دویولور سسی،
دورور گوز اونونده گولر چئهره‌سی؛
آتامی دینله‌ییرم.

بعضی کئچیدلردن کئچیرم بعضاً،
دئیه‌سن بو یئردن بیر ده کئچمیشم.
بعضی آن‌لار بئله تکراردیر منه،
باخدیقجا اوزومه، من دونه-دونه؛
آتامی دینله‌ییرم،
              آتامی.


2

دده‌م
یاخشی آدام ایدی،
جنّت‌مکاندیر بیلیرم.
بو کیم‌دیر
کی،
گونده- گونده
یانیر
منیم حیاتیمدا؟!.

https://t.me/Adabiyyatsevanlar

‏مراغا، یای کندی


https://t.me/Adabiyyatsevanlar

بؤیوک تورک شاعری ناظم حکمت و تورک دنیاسی... 
پرفسور. دکتر علی کافکاسیالی
نوبل آکادمیک یایینجیلیک کتاب، آنکارا، 2023 
چئویرن: مجید تیموری فر (م. صفا) 

 600صحیفه لیک بو کیتابی آردی جیل اولاراق   هرهفته چرشنبه گونو ادبیات سئونلر ده پایلاشاجاییق
اوچونجو بولوم

https://t.me/Adabiyyatsevanlar

 بؤیوک تورک شاعری ناظم حکمت و تورک دونیاسی...
پرفسور، دکتر علی کافکاسیالی
چئویرن: مجید تیموری فر (م. صفا)
اوچونجو بؤلوم
 
ناظم حکمت «هئیبلی آدا» حربی دنیزچی‌لیک مکتبینده   
   دنیز آکادئمییاسی چوخ انتظاملی بیر مکتب‌دیر. یحیا کمال اورادا هم ده، معلّم‌دیر. او، ناظم حکمتین شاعر کیمی استعدادینی گؤرور. اونا ماراق گؤستریر. شعرلرینی تصحیح ائدیر. پوئتیک استعدادی‌نین انکیشافینا یاردیم ائدیب و تحفه‌وئریر.
 

ناظم حکمت، دنیز آکادئمییاسی‌نین طلبه‌سی                                                               
   بو واخت آتاسی‌ایله آناسی آراسینداکی فکر آیریلیغی دؤزولمز حالا گلیر. آیریلیق قاچیلماز گؤرونور. طبیعی کی، عائله‌ده‌کی ناراحاتلیق ناظم حکمتی چوخ ناراحت ائدیر. او، بو آیریلیغین قارشی‌سینی آلماق اوچون چوخ چالیشیر. حتّا آناسینا تهدید دولو مکتوبلار دا گؤندریر. اما مناسبت‌لرینی هئچ واخت دوزلده بیلمه‌ییر.
 
    ۱۹۱۷-جی ایلده حکمت بیگ‌له جلیله خانم آیریلاندا بابالاری محمد ناظم پاشا، ناظم و باجی‌سی سامییه‌نین حمایه‌سینی اؤز اوزه‌رینه گؤتوردو. ناظم پاشا اؤز آداشی ناظمی، پاشا اوغلو کیمی بؤیوتدو.
 
 
 
 

ناظم حکمت آناسی و باجی‌سی ایله                                                                     
   جلیله خانملا یحیا کمالین ائولَنَه‌جکلری باره‌ده شایعه‌لر یاییلدی. لاکن اونلار ائولنمه‌دیلر. جلیله خانیم رسّام‌لیق تحصیلی آلماق اوچون پاریسه گئتدی. ناظم حکمت والدین‌لرینین آیریلماسیندان چوخ اوزولدو. مکتب حیاتی پوزولدو. دفعه‌لرله جزالاندیریلدی. اؤزونه قوللوق ائده بیلمیردی. سویوق‌دیمَه‌یه توتولدو. تئز-تئز خسته‌له‌نیردی. سونونجو صینفه چاتاندا ذات‌الریه خسته‌لیگینه توتولدو.  
   اونون اوّللر یازدیغی و یحیا کمالین دوزلتدیگی "هله ده سرو آغاجلاری آراسیندا آغلاییرلارمی؟" شعری، ۳ اوکتیابر ۱۹۱۸-جی ایلده یئنی ‌مجموعه قزئتینده محمد ناظم تخلّوصو ایله درج اولونموشدور..  
 هله ده سرو آغاجلاری آراسیندا آغلاییرلار؟       
سرو باغلاریندا بیر اینیلتی ائشیتدیم.  
دئدیم کی، «بورادا دا آغلایان وارمی؟
 یوخسا بو تنها یئرده تکباشینا،
کُهنه بیر سئوگینی خاطیرلایان کولک‌دیر؟»  
حیات آشاغی دوشدوکجه قارا اؤرتوکلر،  
کاش اؤلن‌لر ایندی گولئیدی،
یوخسا حیاتیندا سئومیش اؤلولر هله ده،
 سرو آغاجلاری‌نین آراسیندا آغلاییرلار؟  
* بو، ناظیم حکمتین ایلک نشر اولونان شعری‌دیر. (یئنی مجموعه، سری ۶۳ ، ۳ اوکتیابر ۱۹۱۸) شغر محمد ناظم تخلوصو ایله نشر ائدیلمیش‌دیر. 
   باجیسی سامییه‌نین، آنالاریندان آیری قالماسی اونو دا، چوخ کدرلندیرمیشدی. او، بو کدری ۱۹۱۹-جو ایلده کادیکؤی‌ده یازدیغی "کدرلریمدن" شعرینده ایفاده ائتمیشدی:     
آیدین‌دیر کی، باجیم یئنه داریخمیش،  
بودور، سولغون اوزوندن اوچ داملا دامجی دوشدو.
من اونون غُصه سینه شریک اولماق ایسته‌دیم،  
منه غضبله مینلرله سبب سایدی. او 
دئدیم: یئنه اوزونده یاشلار وارمی؟  
بالاجا خانیملار هئچ آغلاییرمی؟ 
او دئدی: آغلایاجاغام‌می، بونا شوبهه وارمی؟  
کاش آنام یانیمدا اولسایدی...‌
 
   ناظمین آتاسی حکمت بئی داها سونرا جاویدئ خانیملا عائله قوروب. اونلارین متین و فاطما (مئلدا) آدلی ایکی ائولادی وار ایدی.
 
افسرلیک تعلیمی‌نین باشلانماسی     
   ناظم حکمت ۱۹۱۷-جی ایلده «هئیبلی‌آدا دنیزچی‌لیک» مکتبینه داخل اولاراق ۱۹۱۹-جو ایلده مأذون اولدو. حامیدیه کرووازوروندا (رزم‌ناو) عرشه ضابطی تعیین ائدیلدی. سونونجو کورسوندا، ذات‌الریه خسته‌لیگی تکرارلاندی. عائله دوستو باش حکیم «حاقّی شناسی» پاشانین نظارتی آلتیندا ایکی آی دنیزچی‌لیک خسته‌خاناسیندا معالجه آلدی. ائوده دینجلمک اوچون اونا ایکی آیلیق مأذونیّت ده، وئریلدی. بو دؤورون سونوندا حاضرلانان حسابات طبّ شوراسینا تقدیم ائدیلدی. ۱۷ مای ۱۹۲۰-جی ایلده شورا "بو ساغلامسیزلیق سبب ایله دنیز ضابطی کیمی خدمت ائده بیلمز" قرارینا گلدی و طبّی سببلره گؤره حربی خدمتدن ترخیص ائدیلدی.  
   گنج شاعر اولماق ایسته‌ین ناظم و والا نورالدین بزَن "هئجه‌چیلر"ین مجلس‌لرینده زامان-زامان اشتراک ائدیردیلر. شعرلری کمال ساهرین رئداکتورلوغو ایله نشر اولونان "کتاپ" ژورنالیندا درج ائدیلدیکدن سونرا ناظمین آدی مشهور "هئجه‌چیلر" ایله علاقه‌لندیریلمه‌یه باشلادی. "عالمدار" قزئتینین تشکیل ائتدیی شعر مسابقه‌سینده بیرینجی یئری توتماسی دا، اونون آرتیق استاد شاعر اولدوغونو ثبوت ائتدی.
باریشیق (صُلح) ایل‌لری 
داغیدیلمیش بیر وطنین خارابالیقلاریندا،  

سن بایقوشلارین اولاما سسینه قولاق آسمادین.  
غلبه گونلری‌نین سئوینجی سنده‌دیر،   
کئچمیشین خاطره‌لری ایله، سن اینیلده‌مه‌دین...
(ناظیم حکمت)    
 
  ۱۹۱۴- جو ایلین یاییندا آوروپادا باشلایان و آمریکادان اوزاق شرقه قدر بیر چوخ اؤلکه‌یه درین تأثیر گؤسترَن بیرینجی دنیا محاربه‌سی ۱۹۱۸-جی ایلین پاییزیندا متّفق دولتلرین (بؤیوک بریتانیا، فرانسا، روسیا، ایتالیا، آمریکا و س.) غلبه‌سی ایله باشا چاتدی. مرکزی دولتلر (آلمانیا، آوستریا-مجارستان، عثمانلی ایمپئریاسی و بولغارستان) مغلوب اولدولار. اونلار ۳۰ اوکتیابر ۱۹۱۸-جی ایلده موندروس صُلحونو امضالاماغا مجبور اولدولار. صُلحون بیرینجی مادّه‌سینه گؤره، «چاناققالا بوغازی و قارا دنیز بوغازلاری و اطرافینداکی اراضی قارا دنیزه کئچیدی تأمین ائتمک اوچون متّفق‌لر طرفیندن اشغال ائدیله‌جک.»     
   دانیشیقلار زامانی بریتانیا نماینده‌سی آدمیرال کالتورپ-ا، عثمانلی نماینده‌سی، حربی دنیز قوه‌لری ناظری رائوف بئی‌-ه "موندروس باریشیغیندان سونرا استانبول اشغال اولونمایاجاق، بیر دنه ده اولسون متّفق عسگری استانبولا ائنمه‌یه‌جک. هئچ بیر یونان گمی‌سی استانبول و ایزمیت لیمانلارینا گئتمه‌یه‌جک" وعده سینی وئرسه ده، عثمانلی پایتختی استانبول ۱۳ نویابر ۱۹۱۸-جی ایلده واقعی شکلده اشغال ائدیلدی. یونان گمی‌لری ده، داخل اولماقلا ۵۵ گمی- ‌دن عبارت متّفیق دونانماسی(نیروی دریایی) بوسفوردا لنگر سالدی و بوغازین هر ایکی طرفین‌ده اشغال پُستلاری و کومیسارلیقلار(کلانتری‌لر) یارادیلدی.  
   فئورال ۱۹۱۹-جو ایلده فرانسا ژنرالی «فرانچئدائسپئرئی» استانبولدان بئی‌اوغلونا  بیرغلبه رژه‌سی تشکیل ائتدی. اونو قارشیلایان عثمانلی اورکئسترینی قامچیلایاراق و میندیگی آتینی قورخوتدوقلاری اوچون سوسدوراراق، تحقیر ائتدی. ائرته‌سی گون "حادثات" قزئتینده بو حادثه‌نی تنقید «ائد‌ن سلیمان» نظیف حبس ائدیلدی و قزئت هفته‌لرله باغلاندی.
 
 
 
فرانسیز ژنرالی فرانچئد'ائسپئرئی استانبولا داخل اولارکن شیشهانی‌-دن بئی‌اوغلونا آپاران خیاوانلاردا غلبه رژه‌سی کئچیریر. (۹ فئورال ۱۹۱۹)

https://t.me/Adabiyyatsevanlar

ناظم حکمت دنیز آکادمییاسی نین طلبه سی

https://t.me/Adabiyyatsevanlar

ناظم حکمت آناسی و باجیسی ایله

https://t.me/Adabiyyatsevanlar

فرانسیز ژنرالی فرانچئد'ائسپئرئی استانبولا داخل اولارکن شیشهانی‌-دن بئی‌اوغلونا آپاران خیاوانلاردا غلبه رژه‌سی کئچیریر. (۹ فئورال ۱۹۱۹)

https://t.me/Adabiyyatsevanlar

سون آرزو

شعیر:مهدی سربازی
سسلندیرن:یاغیش زنگانلی
میکس:محسن عبادی


https://t.me/Adabiyyatsevanlar

خاطرات سئودا طاهیرلی، نوۀ «میرزاعلی‌اکبرصابر»
برگردان: بهروز مطلّب‌زاده

بو خاطیره لری گلن هفته چرشنبه گونو 10,17ادبیات سئونلر کانالیندا اوخویون.

https://t.me/Adabiyyatsevanlar