یعقوب_نیکزاد
سنه بورجوم اولسون هرگون داریخماق
باخمیشام کؤرپه‌جه گولوشلرینه
من سنی یوخودا گؤرمه‌دیم، آنجاق
سئودیم قافیه‌سیز، دوشدوم درینه

سنی دورنالاردان سوروشمالی‌یام
منی قوردا وئردی چیلقین گؤزلرین
من اؤز اوره‌ییمله باریشمالی‌یام
اؤزونو باغریما باسدی سؤزلرین

بو سنسیز کوچه‌دن قوپوب، گئدیرم
یوخوما گلمه‌ین خاطیره‌لرله
اؤزومو یوخونا قوربان ائدیرم
اوزومه گولمه‌ین خاطیره‌لرله

باخمیشام کؤرپه‌جه گولوشلرینه
سنه بورجوم اولسون هرگون داریخماق
سئودیم قافیه‌سیز، دوشدوم درینه
من سنی یوخودا گؤرمه‌دیم، آنجاق

باغیشلا کؤرپه‌جم! سنین یئرینه،
قوشولدوم بولودا داغ، داشی سئودیم
سئودیم... سئویلمه‌دیم حاییف بیرینه
باغیشلا! سنی‌ده چوخ ناشی سئودیم

https://t.me/Adabiyyatsevanlar

حسن‌بابایی ( عجب‌شئرلی)

کبریت‌یوخسا شامشا

هامیسینا‌بئله باخاندا بیر‌بوی‌داگورونوردولر،آرتیق دقت‌دن کئچیرنده فرق‌لر گوز  اوءنونده جانلانیردی. .آریق  ،یوغون ،کوله،اوجا،اورتا‌باب بعضی‌لری‌نین‌ائنی‌بویونو‌باسمیش ماراقلی هئیکل قازانیب گوز قاماشیردی ،بوتونلوکده‌چئشیدلی اولدوغوندان آدام‌هئچ نه‌دئیه بیلمه‌ییردی .
دئمک‌باخیشدا اوءز رولونو اویناییردی ،آشاغی‌دان یوخاری باخاندا آیاق‌اوسته نظره‌گلیردیلر،ائنینه باخاندا اوزا‌ناقلی گورونوب باخانی ایسه چاش - باش سالیب فیرلاییردیلار.
یاناقلاری‌آلمانین بیر‌اوزو‌کیمی قیزارمیش،بوغازدان آشاغی‌لاری عینی دوروم‌دا آغا چالیردی .باشی‌کسیک آداملار کیمی اوءزلرینی آپاریب شبهه‌یاراتماقدا ال‌لریندن گلنی نم- نئچه قابا چکیب هره‌نیردیلر.هر‌نه بیردن باش وئریردی،درحال هجوما گیریب هر‌نه‌یی پوزوب تیتره‌یش سالیب قیراغا چکیلب ساکیت دایانیب سوسوردولار،سوزلری‌ده اوءزلری کیمی بیر ایدی ،دئملی بو بیرلیگه ائله‌ده راحات ال تاپمامیشدیلارنئجه دئیرلر قوربان وئریب آد قازانیب اولموشدولاراوءزلری....
واختیلا یولداشلاریندان بیرینی ایتیریب داها تورمه‌نی دوشونمه‌دن اوءزلرینی اودا- کوزه ویریب قان سالیب دوشوندوروردولربیز واریق ،بویالار بونلارین نظرینده تعریف‌لنمه‌میشدی آرتیق قارا بویانی ائله‌ده یوخاری بیلمه‌ییردیلر ،بیر هیمه بند ایدیلر آلیشیب یانیب - یاندیرسینلار،دوزونه دورساق بیر پارچا اود پارچاسینا دونموشدولر.
آتامی دئیردیم گونده بیر قوطو سیگارت قورتاراردی،اوزءوده آنجاق شامشا‌ینان آلیشدیریب ایشی بیتیرردی  .یازیق کیبریت‌لر کیمه چاخماق اولاردیلار آتاما،منه،قارداشلاریما ،باجیلاریما نیه بیرده یازیق آناما،ائله تکجه آنامین الینده دوز یاناجاغا چاره قازانیب آلیشاردیلار .مندن کیچیک قارداشیم کیبریت قنیمی ایدی ،آنام‌اونون الی چاتماسین‌دئیه گیز‌له‌درد‌ی  کیبریت‌لری ،البته بیزیم الیمیزنن یانان کیبریت‌لربیزدن باشقا بیر کیمسه‌یه زیان یئتیرمزدی ...
آما واختیلا باشیمیزا اویون آچانلار تبریزین ساهات قاباغیندا آذربایجانی نجات وئرمک اوزریندن قالاق ' قالاق کیتاب یاندیریب بیزه آغ گون باغیشلادیلار،دئمک زامانی یاندیریب گویه سووروب هئچ ائله‌مک فیکرینده اولانلار بیلمه‌دیلر بو کیتابلار بیر میلتین قان یادداشی کیمی تاریخ بویو دوراجاق ...
یازیق شامشالار( کیبریت‌لر) گو‌ءر کیمین الینه دوشوب نه‌یی اودا چکیب یاندیردیلار...

https://t.me/Adabiyyatsevanlar

کریم گول اندام

مینیمال دوشونجه لر

توسباغا قوی گوونسین چاناغی نین ایچینده دائیماآماندادی!
اونون گوُرمه لی حالی بیر کره آرخا اوسته دوشدویو زاماندادی !

***


جان هاییندا اولانلار یاخشی بیلَر سیچان دئشیگی یاشاماق اوچون قیمتی ,مفرغ،
گیزلنمک اوچون قیزیل باهاسیندا دی!
***


بئشیکدن تابوتا ,ایستر اوزون اولسون ایسترسه قیسا, اولایلارلا دولو زمان، ,انسان حیاتی آدلانیر .
***


چالیش ایپین قیریلماسین! دوگونله نر سه ده، یئنه آدین اوستونده قالار !
***


شیطانین عاغلینا گلمه ین کلکلی ایشلر الله آداملارینین عاغلینا گلر !الله ایسه شاشیردیغیندان بارماغینین باشینی دیشلر!

***

تانری دیش وئردی ،دولت ایش وئرمه دی!
منبرلرده باغیردیلار(لیس للانسان الا ما سعی ) یعنی ایشله مه ین دیشله مز !
بیز گوزوموزله گوُروروک : ،دیشله مه ینلر ایشله ییر ،ایشله مینلر دیشله ییر !

***

باجارسان سیاستی یاخشی بیل آنجاق قاریشما،
بو اویونا قوشولانلار ایچینده ،
یاریشانلار اودوزوب ،باریشانلار اودوبلار !



***
سیراسیندا اولدوغوم بوگونکو فوسیللرین،
هر بیرینین ایچینده قورخو گیزلن پاچ اوینار ! تانریم سوُیله هاردادیر جانین دیشینده توتان باریشماز نسیللرین ؟


***
بیزی یئرقوردو ائدیب ! دوُنوب قارداش ساندیلار !
بالیق توتماغا چکیب، بیزلری قوللاندیلار !

***

۵۰ ایل فلاکتدن سونرا بیلمک ایسته سن کی نه دیر باشیمیزاگلن بو اویون،جهالت دونونو اگنیندن سویون !!


,اورمو - آذر آیی ۱۴۰۴

https://t.me/Adabiyyatsevanlar

✍️:ایلقار موذن‌زاده

«ائلیاس افندی‌اف»ین «خنجر» آدلی حئکایه‌سینه قیسا بیر باخیش

حئکایه بئله باشلاییر: «ایران آذربایجانینین کیچیک بیر شهرینده گونده‌لیک حیات ساکیت آخیردی. اینسانلار بازاردا آلیش-وئریش ائدیر، اوشاقلار دار کوچه‌لرده اویناییر، یاشلیلار ایسه چایخانادا صحبته دالیردیلار.» بو ساده حیاتین آرخا پلانیندا بیر گنجین طالئعی اؤن پلانا چیخیر. او، شهرین داریسقال موحیطینده اؤز آرزولاری ایله بوغوشور، آزادلیق و گئنیش دونیایا چیخماق ایسته‌ییر.
گنج، عائله‌سینین و جمعیتین گؤزلنتیلری ایله اؤز ایچ آرزولاری آراسیندا قالیب. بیر طرفدن عنعنه‌لر، دیگر طرفدن ایسه معاصرلیک و یئنی‌لیک چاغیریشی اونو سیخیر. او، سئودییی قیزلا گؤروشمک، اؤز حیاتینی قورماق ایسته‌ییر، اما قورخو و ترددود اونو گئری چکیر. شهرین دار کوچه‌لری اونون روحونداکی محدودیتلرین سیمبولونا چئوریلیر.»

حئکایه‌ده تصویر اولونان اینسانلار ساده‌دیر: بازار ساتیجی‌سی، معلم، چایخانا موشتریلری. اونلارین صحبتلری، گونده‌لیک قایغیلاری گنجین ایچ دونیاسی ایله ضدیت تشکیل ائدیر. او، بو کیچیک شهرده بوغولدوغونو حیسس ائدیر، اما عینی زاماندا دوغمالیغینی دا اینکار ائده بیلمیر.

افندیئو حئکایه‌ده پسیخولوژی گرگین‌لیگی اینجه‌لیکله گؤسته‌ریر: گنجین آرزولاری ایله رئاللیق آراسینداکی اوچوروم، سئوگی ایله قورخو آراسینداکی موباریزه. آخیردا قهرمان آنلاییر کی، آزادلیق یالنیز فیزیکی مکاندان چیخماقلا دئییل، ایچ جسارت و قرار وئرمکله مومکوندور. بئله‌جه، کیچیک شهرین داریسقال حیاتی بؤیوک بیر پسیخولوژی درامین آرخا پلانینا چئوریلیر. افندیئو اوخوجویا گؤستریر کی، اینسانین ان بؤیوک موباریزه‌سی اؤز ایچینده‌دیر.

بو حئکایه‌ده یازیچی عادی بیر اشیانی – خنجری – سیمبولا چئویریر. بو سلاح یالنیز فیزیکی گوجون دئییل، هم ده اینسانین ایچینده‌کی قورخو، آقرئسییا و گیزلی ائهتیراسلارین گؤستریجی‌سی‌دیر. افندیئو حئکایه‌ده ساده اینسانلارین گونده‌لیک حیاتینی تصویر ائتسه ده، خنجرین وارلیغی اونلارین پسیخولوگییاسینی ده‌ییشیر: کیمی‌سی اونو قورخو ایله، کیمی‌سی ایسه گوج و حاکمیت آرزوسو ایله علاقه‌لندیریر.

اثرین گوجلو طرفی اودور کی، یازیچی عئینیاتین پسیخولوژی تأثیرینی اینجه‌لیکله گؤستریر. حئکایه اوخوجونو دوشوندورور: اینسانی تهلوکه‌لی ائد‌ن سلاحین اؤزو دئییل، اونونلا باغلی دوشونجه و نییتلردیر.
عمومی‌لیکده، «خنجر» ائلیاس افندیئوین پسیخولوژی رئالیزم اوسلوبونون پارلاق نومونه‌سی‌دیر: عادی بیر اشیا واسطه‌سیله اینسانین ایچ ضدیتلرینی آچیر و اوخوجونو جمعیتین گیزلی گرگینلیکلری اوزه‌رینده دوشونمه‌یه وادار ائدیر. 1404/09/19

https://t.me/Adabiyyatsevanlar

خنجر
✍یازان: ایلیاس افندی‌یئو
کوچورن: سحرخیاوی
حاضیرلایان:ادبیات سئونلر

بو احوالات ایران آذربایجانی‌نین کیچیک بیر شهرینده اولدو. شهرین آرخا طرفی مئشه، قاباق طرفی ایسه گؤز ایشله‌دیکجه اوزانیب گئدن گئنیش دوزَنلیک ایدی. پالچیقدان هؤرولموش هوندور دیوارلار ایچینده یئرله‌شن و دئمک اولار کی هامیسی بیر مرتبه‌دن عیبارت کرپیج ائولرین یالنیز داملاری گؤرونوردو.
بیر ایله یاخین ایدی کی شهر خوشبخت گونلر کئچیریردی... بیر ایله یاخین ایدی کی ایران آذربایجانیندا میللی حکومت قورولموشدو‌. دوکانلارین اوزریندن فارسجا لوحه‌لر گؤتورولموش، یئرینه آذربایجان دیلینده یازیلمیش لوحه‌لر وورولموشدو. کوچه‌لرین آدلاری دییشدیریلیب آذربایجانجا اولموشدو.
آداملار " آنا دیلی، میللی حکومت، آذربایجان" سؤزلرینی ایندی تئز- تئز تکرار ائدیردیلر. ائله بیل کی اونلار بو سؤزلرین تلفظوندن سونسوز بیر ذوق دویوردولار... ائله بیل کی اونلار بو سؤزلرله اؤیونور، فخر ائدیردیلر.... سحر تئزدن تاجیر و پئشه‌کارلار آذربایجان قزئتی‌نین تزه نومره‌سینی آلیب اوخوماغا تلسیردیلر.
اونلار آذربایجان دیلینده چاپ اولونموش خبرلری، شعر و حیکایه‌لری بؤیوک لذّتله اوخویوردولار.
بیر ایله یاخین ایدی کی قصبه‌ده آچیلمیش تزه مکتبده گنج قیز سودابه خانیم، آتاسی صراف مشه‌دی تاغی‌نین اراده‌سی خیلافینا چیخاراق، معللیم‌لیک ائدیر، اوشاقلارا آذربایجان دیلینده درس دئییردی.
مشه‌دی تاغی قصبه‌نین ان وارلی تاجیری اولوب، یگانه اولادی سودابه‌نی فارس و فرنگ دیللرینده اوخوتدوروب یوکسک تحصیله چاتدیرمیشدی.
قیزی سودابه خانیم میللی حکومت قورولاندان سونرا معللیم‌لیگه گئتمک ایسته‌دیینی بیلدیردیک‌ده او، اوّلجه او قدر عصبلشدی کی آز قالدی ووروب ائو- ائشیگی داغیتسین... سونرا قیزی‌نین اؤز فیکرینده محکم اولدوغونو گؤروب ایشی ملایم‌لیک‌له یولونا قویماق ایسته‌دی...
- بو قدر وار- دولت‌له منیم قیزیمین گئدیب ایتین- قوردون اوشاقلارینا درس دئییب پول آلماسی منیم اوچون بی‌آبیرچیلیق دیر،‐دئدی.
آمما قیز ایته- قوردا دئییل، اؤز وطنداشلارینا خیدمت ائتمک ایسته‌یینی بیلدیردیکده، عاغیللی و حیله‌گر مشه‌دی تاغی ایشین نه یئرده اولدوغونو آنلاییب سوسدو.
19یاشلی تاجیر قیزیندا بو عوصیان روحو هارادان یارانمیشدی؟ مشه‌دی تاغی بونو آنلایا بیلمیردی. عؤمرونون اللی ایلدن آرتیق بیر دؤورونو پول کیسه‌لری آرخاسیندا کئچیرن، قیزیل‌لارین جینگیلتی‌سیندن باشقا بیر شئی گؤروب دویمایان بو قوجا صراف آز مدّت‌ده بوتون گنج‌لییین قلبینده، روحونا حاکیم کسیلن وطن‌پرورلیک دویغوسونون حؤکمونده‌کی سیرری آنلایا بیلمیردی...
اونون قلبی ده قارشیسیندا کی قیزیللار کیمی سویوق و اؤلو ایدی...
سودابه خانیم اوجا بویلو، نازیک بدنلی، آغ و ظریف اوزو ایری، آلا گؤزلری‌نین مهریبان ایفاده‌سی ایله ایشیقلانمیش، ساکیت و ملاییم بیر قیز ایدی.
سودابه‌ده میللی دویغونون اویانماسی تاریخی چوخ کیچیک و عادی تصادف‌دن باشلامیشدی. بیر دفعه رفیقه‌لریندن بیرینین ائوینده ضیافتده او، گوزللییی، دولت و رتبه‌سی ایله قیزلار آراسینده شهرت قازانمیش گنج بیر فارس ضابیطی گؤرموشدو. ضابیط اونا باخیب یانینداکی قیزا دئمیشدی: " گوزل قیزدیر. آمما حئییف کی آذربایجانلی دیر". فارس ضابیطیندن تصادوفن ائشیتدییی بو سؤزلر گنج قیزین عزت- نفسینی یارالامیشدی.
بونا گؤره ده سودابه ایران آذربایجانیندا  قالخان آزادلیق حرکاتینا اوره‌ک یانغیسی ایله قوشولدو و بو حرکاتین گؤزه گؤرونمز، جوشغون دالغالاری اونو اؤز آغوشونا آلاراق چوخ اوزاقلارا آپاردی. حیاتیندا ایلک دفعه اولاراق بو گنج قیزدا میللی غرور حیسسی باش قالدیریب، بوتون وارلیغینا حاکیم کسیلدی. او، اوره‌ک چیرپینتی‌لاری ایله سحرلر یئریندن قالخیب، بیر استکان چای ایچیب مکتبه تله‌سیردی، اؤز شاگیردلرینی ائله تشویش، هیجان و احتراسلا قارشیلاییردی کی، ائله بیل اونلاری ایتیره‌جه‌ییندن، اونلارا بیر شئی اولاجاغیندان قورخوردو.
چوخلاری جین- جیندیر ایچینده اولان بو یاریم- آج کؤرپه‌لرین شکایتسیز، طلبسیز باخیشلاری گنج معللیمه‌نین قلبینی اودلاییردی. او، بو سولغون و معذّب اوزلره هیجانلا باخیب، گؤز یاشلاری ایچینده دوشونوردو: " باخ، بونلار منیم وطنداشلاریم دیر."

بیر دفعه تنفس زامانی باییردا برک سس- کوی ائشیدیب قاپینی آچاراق آرا کسمه‌یه چیخدی. شاگیردلر یاخشی گئیینمیش و قورخوسوندان آغاپپاق آغارمیش بیر اوشاغین اوستونه دارتینان و الینده خنجر اون اون دؤرد یاشلی آریق، بوغدایی بیر اوغلانی گوجله ساخلاییردیلار. اوغلان دارتینیر:- بوراخین. من اونا کیمین شرفسیز اولدوغونو گؤستره‌رم- دییه غضبله قیشقیریردی.

بو حال معللیمه‌نی چوخ عصبلشدیردی. او، اوشاقلاری آرالاییب الینده خنجر اولان اوغلانین یانینا گئتدی. اوغلان اونو گؤره‌رک ساکیت اولدو. یولداشلاری اونون قولونو بوراخدیلار و او، خنجرینی آرخاسیندا گیزلَده‌رک باشینی آشاغی سالدی.
- بونلار نییه دالاشیر؟- معللیمه شاگیردلردن سوروشدو.
-باخ، تقصیر بوندا دیر،- یاشجا او بیری‌لریندن بؤیوک و دیری‌باش اوغلان، یاخشی گئیینمیش اوشاغی گؤستریب ایضاح ائتدی.- ایلدیریم، الینده خنجر اولان اوشاق دئییردی کی پلیس‌لر بیشرف آداملار دیر. بو دا دئییر بیشرف سنسن. چون کی اؤزونون آتاسی فارسلارین واختیندا پلیس اولوب...
معللیمه الینده خنجر اولان اوغلانین قولوندان یاپیشیب معللیم‌لر اوتاغینا آپاردی. اونون تمیز آمما اونلارجا یاماغی اولان کؤهنه پالتارینا، قارا قیوریم ساچلارینا، مقصر حالدا یئره تیکیلن گؤزلرینه باخیب–خنجری وئر بورا- دییه آجیقلا سسلندی. اوغلان خنجری آرخاسیندا توتوب جاواب وئرمه‌دی.
–وئر خنجری- دییه معللیمه تکرار ائتدی. بو زامان اوغلان اوزونه باخمادان ایستر- ایسته‌مز خنجری اونا اوزاتدی.
معللیمه آغ سوموک قبضه‌لی و آلماس کیمی ایتی تیغه‌لی خنجری نظردن کئچیردی.
- شاگیرد ده اؤزو ایله خنجر گزدیررمی؟ - دییه آجیقلا اوغلانا باخدی.
اوغلان باخیشینی یئردن چکمیه‌رک سوسدو.
- دئمک خالقین اوشاغینی اؤلدورمک ایسته‌ییردین؟–دییه معللیمه اونو دیققت‌له نظردن کئچیردی.
بیر ده اوغلان باشینی قالدیریب شَوه کیمی پارلاق گؤزلرینی معللیمه‌نین آلا گؤزلرینه تیکه‌رک:
- او، خالقین اوشاغی دئییل، پُلیسین اوغلودور- دئدی.
اونون سسینده کی کین و قطعیت‌دن معللیمه‌نین غضبی در حال سویودو و او، داها دا ماراقلا اوشاغا باخاراق:
- نئجه مگر، پلیس خالق دئییل؟- دییه گیزلی بیر تبسسومله سوروشدو. اوغلان اونا خنجر کیمی کسکین نظرینی سالیب، تکرار یئره باخدی. معللیمه بو آنی باخیشین معناسینی آنلادی.
- یاخشی، گئت. بو دفعه سنین تقصیریندن کئچیرم. آنجاق بیر ده بئله ایش ائتمه. ائشیتدین می؟
آمما اوغلان یئریندن ترپنمه‌دی.
- نییه گئتمیرسن؟
اوغلان باشینی قالدیریب یاواش، آمما محکم سسله:
- خنجرینی وئرین- دئدی.
- لازیم دئییل، گئت. مکتب اوشاغی خنجر گزدیرمز.
بیر نئچه ثانیه‌لیک سوکوتدان سونرا، اوغلان گوجله یئریندن قوپوب، آغیر آددیملارلا قاپی‌یا طرف گئتدی و قاپی‌یا چاتاندا دایانیب، گئری چئوریله‌رک:
- خنجری وئرین معللیمه- دئدی.
معللیمه اونون آلیشیب- یانان قارا گؤزلرینه باخیب:
- دئدیم کی شاگیرد خنجر گزدیرمز‐ دئدی.
- یوخ، وئرین–دییه اوغلان بو دفعه تیترک سسله تاکید ائتدی.
- چیخ باییرا- دییه معللیمه قیشقیردی. اوغلان باشینی آشاغی سالیب یئریندن ترپنمه‌دی و آجیقلا اونا باخان معللیمه، اوغلانین بوغدایی یاناغیندان یاواش- یاواش یووارلانان بیر داملا گؤز یاشینی گؤردو.
- صاباح من بونون عوضینده سنه باشقا بیر شئی باغیشلایارام. آخی خنجر سنین نه‌یینه لازیم دیر؟
معللیمه‌نین سسینده کی مرحمت اوغلانین قلبینی کؤورلتدی. او، یالواردی.
- منی باغیشلایین معللیمه- دئدی. واللاه بیر ده هئچ کس‌له ساواشمارام. آنجاق خنجری وئرین.
- دئدیم کی سنه بوندان دا قیمتلی‌سینی باغیشلایاجام...
- ایسته‌میرم. خنجری وئرین. او آتامین دیر.
- عیبی یوخدور. من آتانلا دانیشارام.
- آتام یوخدور.
- وفات ائدیب؟
- بیلمیرم. پلیس‌لر دؤرد ایل بوندان قاباق توتوب آپاردیلار.
معللیمه‌نین ایری- ایری آچیلمیش گؤزلری اوغلانین قورو آتش‌له یانان گؤزلرینه زیللندی.
بایاق کی بیر داملا گؤز یلشی اوغلانین یاناغیندا قوروموشدو.
- نئجه؟ بس او واختدان هئچ بیر خبر یوخدور؟
- یوخدور.
بو سؤزو دییه‌ن اوغلان ائله کدرلی، اومیدسیز و یانیقلی ایفاده ایله دئدی و اونون یانان گؤزلری ائله بیر احتراسلا معللیمه‌نین الینده کی خنجره تیکیلدی کی، گنج قیز بوتون وجودو ایله تیتره‌دی و غیر- اختیاری حرکت‌له الینی یاواش- یاواش قالدیریب خنجری اوغلانا وئردی.
قیز بو حرکتی مقدّس بیر آیین اجراء ائدیرمیش کیمی ائله‌دی.
اوغلانین گؤزلری سوینج‌له پارلادی و، خنجری آلیب اوتاقدان چیخدی.

معللیمه بیر نئچه ثانیه اونون آردینجا باخیب آه چکدی.
معللیمه، او گونو درسدن چیخیب ائوه گلنده، قصبه آداملاری آراسیندا نه ایسه بیر هیجان حیس ائله‌دی. ائله بیل کی اونلار هارا ایسه تله‌سیر، نه‌دن ایسه احتیاط ائدیب سوسوردولار. قارشیسینا چیخان آداملار، ایندی معللیمه‌نی گؤررکن  دوننکی شَن و مهریبان ایفاده ایله گولومسه‌میر، سویوق بیر احتراملا باش اَییب، تئز اؤتوردولر.
بو نه دئمک ایدی؟
آخشام اؤگئی آناسی زرین‌تاج خانیم گلیب اونو آتاسی‌نین حضورونا چاغیردی.

باشیندا آراقچین، چیینینده عبا اولان مشه‌دی تاغی ترمه دؤشکچه‌نین اوستونده اوتوروب سولو قلیان چکیردی.
اونون اوزونده عادتی خلافینا اولاراق ناراحات ایفاده وار ایدی. سودابه آیاق اوسته اونون قارشیسیندا دایانیب:
- نه بویورورسان آتا؟- دییه احتراملا سوروشدو. بیر نئچه دقیقه‌ سکوتدان سونرا مشه‌دی تاغی باشینی قالدیریب قیزی‌نین اوزونه باخمادان:
- یقین ‌کی تزه خبری ائشیدیبسن.‐دئدی.
‐هانسی خبری آتا؟- دییه قیز ماراقلا سوروشدو.
- نئجه هانسی خبری؟- مشه‌دی تاغی زهرلی تبسسومله گولومسه‌ییب علاوه ائله‌دی:
- گؤرونور اجلافلار( او دمکرات تشکیلاتی عضولرینی بئله آدلاندیریردی) باشلارینی گؤتوروب قاچاندا سنه خبر وئرمه‌یه ماجال  تاپماییب‌لار!
او، " قاچاندا" سؤزونو خصوصی بیر وورغو ایله تلفظ ائتدی.
- هئچ کس قاچماییب آتا- دییه قیز آجیغینی بوغاراق جاواب وئردی.
- بو باره‌ده مباحثه ائتمه‌یین ایندی معناسی یوخدور، قیز.- مشه‌دی تاغی بو دفعه تامامیله ساکیت و ملاییم بیر آهنگ‌له سؤزونه داوام ائتدی.
–اگر قاچیبلارسا، چوخ عاغیللی ایش گؤروبلر. شاهین قوشونلاری دونن زنگانا وارد اولوب، دمکراتلارین هامیسینی اوشاقدان- بؤیویه قیلینجدان کئچیریب‌لر‌. صاباح، بیری گون بورادا اولاجاقلار.
مشه‌دی تاغی سوسوب قلیاندان ایکی قوللاب آلاندان سونرا یئنه ده اونون اوزونه باخمادان تام ساکیت و ملاییم سسله:
- دایانماق لازیم دئییل. تئزدن ماشین گلیب سنی تهرانا آپاراجاق. آرالیق ساکیت اولانا کیمی گئدیب اورادا عمین گیلده قالارسان، گؤره‌ک سونرا نه اولور...
- من هئچ بیر یئره گئتمیه‌جم‌.
بایاقدان بری بیرینجی دفعه اولاراق مشه‌دی تاغی باشینی قالدیریب قیزی‌نین گؤزلری‌نین ایچینه باخاراق:
- نئجه؟! سن بو دفعه ده منیم اوزومه آغ اولورسان؟- دییه قورخونج بیر گؤرونوشله سوروشدو.
- من خالق معللیمه‌سی‌یم.
- دئمک بوغازدان آسیلماق ایسته‌ییرسن.
مشه‌دی تاغی آیاغا قالخدی.
- خالق نه جور، من ده ائله..‌. پیس گونده من اونو قویوب دوشمن قرارگاهینا قاچا بیلمه‌رم.
مشه‌دی تاغی یئنه ده ساکیت بیر ایفاده ایله:
- عاغلینی باشینا ییغ قیز.
اونلار سنین اوجباتیندان منی ده حؤرمتسیز ائدرلر.- دئدی.
- من هئچ بیر یئره گئتمیه‌جم آتا- معللیمه چئوریلیب چیخماق ایسته‌دی.
‐دایان- دییه آتاسی آرخادان قیشقیردی و اونون اوزو قورخولو شکیل آلدی.
آلنی‌نین دامارلاری قیزاریب شیشدی. گؤزلری تهلوکه قارشیسیندا اولان جاناوار گؤزلری کیمی وحشی و کوت ایفاده پارلادی.
- بو گئجه‌دن سونرا منیم سن آدلی اولادیم یوخدور. آللاه سنه لعنت ائله‌سین! چیخ منیم ائویمدن! بو ساعات چیخ!- او، کوبود حرکت‌له معللیمه‌نی ایته‌له‌ییب باییرا سالدی.
کیشی‌نین سسینه قیزین اؤگئی آناسی گلدی:
- آی کیشی، بو گئجه واختی، سویوقدا- قیامتده یازیغی هارا قووورسان؟
- کئچ بئله!- دییه کیشی قیشقیردی.
معللیم یئریندن قوپوب آغیر آددیملارلا قاپی‌یا طرف گئتدی.
اؤگئی آنا قیزین پالتوسونو گتیریب دروازانین آغزیندا اونا وئردی.
معللیمه پالتوسونو گئییب آتا قاپیسیندان چیخدی...
- گئت. عاقبتینی گؤره‌ریک!
قارانلیقدان گلن بو سس قیزین توکلرینی اؤرپتدی.
گؤز- گؤزو گورمه‌ین ظولمت گئجه ایدی. قار قاریشیق کولک اوغولداییردی. معللیمه بودره‌یه- بودره‌یه گئدیردی. آمما هارا گئتدیینی بیلمیردی. قصبه‌ده یاخین بیر کسی یوخ ایدی. مهمانخایا می گئتسین؟ مومکون دئییل، پولو یوخدور..سویوق دئکابر کوله‌یی قاری سوورور، قودوز جاناوار کیمی اوغولداییر، معللیمه ایسه گئدیردی...
- سالام معللیمه خانیم.
قیز دیکسینه‌رک باشینی قالدیریب، بئلینده اودون شله‌سی، قارشیسیندا دایاناراق، قارانلیقدا ایشیلدایان گؤزلرینی اونا زیلله‌میش ایلدیریمی گؤردو و اوغلانین جینگیلتی‌لی سسی‌نین شَن آهنگی اونون قلبینی بیردن- بیره یونگوللشدیردی.
- بئله گئج واختدا مئشه‌دن گلیرسن می؟!- دییه معللیمه اؤز دردینی بیر آن اونوتموش کیمی تعجوبله سوروشدو...
- بلی، مئشه‌دن گلیرم. بس سیز بو واخت هارا گئدیرسینیز؟
معللیمه بو دهشتلی گئجه‌ده تک- تنها مئشه‌دن اودون ییغیب گتیرن و اَینینده ایستی بیر پالتاری بئله اولمایان بو 14یاشلی اوغلانین سسینده کی حیات قیغیلجیمی‌نا، شَنلیک و جسارتینه حئیرت ائده‌رک جاواب وئرمه‌دی.

اونلار بیر نئچه دقیقه سوکوت ایچینده گئتدیلر. بیردن معللیمه آیاق ساخلاییب قطعی ایفاده ایله:
- ائوینیزده کیم وار؟- دییه سوروشدو.
- بیر من، بیر ده آنام. باشقا کیمسه یوخدور.
- منی بو گئجه قوناق ساخلایارسینیزمی؟
- نییه ساخلامیریق معللیمه. لاپ ایسترسینیز بیر ایل قالین.
- گئدک.
- همیشه اودونوموزو ائرکن گئدیب گتیریردیم...بو گون باشیم درسیمه قاریشیب، گئجیکمیشم- دییه اوغلان هوسله دانیشیردی.

- بس بئله قارانلیقدا مئشه‌یه تک گئتمک‌دن قورخمورسان؟
- نه‌دن قورخاجام. اوغلان قارانلیقدا دیشلرینی آغاردیب گولومسه‌دی. سونرا بیردن قاش‌قاباغینی تؤکه‌رک:- آتامین خنجری یانیمدا اولاندا هئچ نه‌دن قورخمورام- دئدی.
اونلار قصبه‌نین اوزاق و دار کوچه‌لریندن بیرینده، بالاجا دروازانین قاباغیندا دایاندیلار. اوغلان توخماغی ووردو.
آز کئچمیش قاپی آچیلدی...
- هارداسان آی بالا؟ دئمیرسن قورد- قوش سنی باسار یئیه‌ر؟
قاپینی آچان آرواد اوّلجه اوغلونا، سونرا ایسه معللیمه‌یه باخیب تعجوب ائتدی:
- یئری ائوه پالتار سال. معللیمه بیزه قوناق گلیب- دییه اوغلان سئوینجله دیللندی.
آنا حؤرمتله گئری چکیله‌رک:
- بویورون معللیمه خانیم- دئدی.
اونلار کیچیک بیر اوتاغا گیردیلر. اوتاق چوخ یوخسول آمما تمیز ایدی.
اورتادا دمیر سوبا وار ایدی. سوبانین یانینا کؤهنه بیر پالاز سالینمیشدی.
آنا ائوین آرخا طرفینده ییغیلمیش یوک‌دن، کؤهنه آمما تمیز دؤشکچه چیخاریب خجالت چکه- چکه پالازین اوستونه سالدی:
- بویورون اَیله‌شین خانیم معللیم.
معللیمه اوتوردو. ایلدیریم سوبانی قالادی. آنانین اوزونده پریشان و هیجانلی بیر ایفاده وار ایدی. او اومیدسیز و مایوس سسله:
- بو نه ایش‌دیر باشیمیزا گلیر خانیم معللیم؟- دئدی.
- قونشوموزون اوغلو فدایی حوسئین بیرآز بوندان قاباق زنگاندان گلیب. دئییر شاهین قوشونلاری جاماعاتا بیر دیوان توتوب کی، قان سو یئرینه اخیب..‌.
معللیمه دینمه‌دی. آرالیغا سوکوت چؤکدو.
- تئزلیک‌له یقین بوردا اولارلار ،- دییه آنا واهیمه ایچینده اوغلونا باخیب، سونرا سودابه‌یه دؤنه‌رک- شهرده قالمایین معللیمه. چیخین بیر طرفه گئدین.
- یوخ، من هئچ یئره گئتمیه‌جم- دییه سودابه آنانین اوزونه باخمادان جاواب وئردی و بونو ائله بیر ایفاده ایله دئدی کی، ائله بیل قادینا دئییل، اؤز آتاسینا جاواب وئریردی.
- حئییف‌سینیز معللیمه خانیم.‌ دئییرلر اونلار آرواد- اوشاغا دا رحم ائله‌میرلر.
کیمدن بیرآز شوبهه‌لنیرلر بوغازیندان آسیرلار...
- نه ائده‌ک باجی. بو شهرده تک من دئییلم.
ائله بو زامان قاپی دؤیولدو. آنا قورخموش حالدا معللیمه‌یه باخدی‌. معللیمه سویوق قانلی و ساکیت سسله:
- گؤر کیم دیر؟- دییه اوغلانا مراجعت ائله‌دی.
ایلدیریم یویوروب قاپینی آچدی. چادرایا بورونموش بیر قادین ایچری گیردی، او اوزونو آچدیقدا، معللیمه آنالیغی زرین‌تاج خانیمی گؤردو.
قادین گؤز یاشلاری ایچینده قیزلیغینا دئدی:
- بایاقدان بری سنی آختارمامیش یئر قویمامیشام. بو حیه‌طه گیردیینی بیر اوشاقدان ائشیتدیم. عیناد ائتمه قیزیم. سحر تئزدن گرک بورادان چیخاسان. اؤزونه یازیغین گلسین. دئییر، اونلار سنین کیمی‌لری سورغوسوز- سؤالسیز آسیرلار.
- سن نئجه بیلیرسن آنا، یئددی آی دیر من جاماعاتین اوشاقلارینا تربیت وئریرم. اونلارا دوشمنه نیفرت ائتمک اؤیره‌دیرم. ایندی تهلوکه اونلارین باشی‌نین اوستونو آلاندا، قاچیب همین دوشمنه پناه گتیرسم، منه نه دییرلر؟!
اوگئی آنا مات- مبهوت قالیب جاواب وئرمه‌دی.
ایلدیریم ایری آچیلمیش گؤزلری ایله معللیمینه باخیردی.
بیردن معللیمه بیر شئی‌دن قورخموش کیمی دیکسینه‌رک:
- یوخ،- دئدی. بو مومکون دئییل. من هئچ بیر یئره گئتمیه‌جم. قوی منیم 7 آی درس دئدیییم شاگیردلر، منی گله‌جکده لعنت‌له یاد ائتمه‌سین‌لر.
بو سؤزلر غیب‌دن گلن فوق‌العاده بیر سس کیمی آنالارین قلبینی عظمت و ایلهاملا دولدوردو.
اؤگئی آنا آیاغا قالخیب:
- آللاه سنه یار اولسون قیزیم- دییه ووقارلا اوتاقدان چیخدی.
معللیمه‌نین اوزو دهشتلی عذاب و چتینلیک‌لردن خلاص اولوب، نهایت آغ گونه چیخان آداملارین اوزو کیمی آیدین و خوشبخت بیر حیس‌له ایشیقلاندی و او، اوره‌ک آچان عادی، خوش حادیثه‌لری باره‌ده دانیشماغا هوسلندی. شاگیردینین بایاقدان بری اونا زیلله‌نیب قالمیش و چیراق کیمی ایشیغیندا شوه کیمی قاپ- قارا بیر مایع کیمی قاینایان پارلاق گوزلرینه باخاراق، شَن تبسسومله:
- ایلدیریم سیزی اینجیتمیر کی خالا؟- دییه آنادان سوروشدو...
اونون بو غریبه نشئه‌سی بیر آندا آنا ایله اوغلونا دا سرایت ائله‌دی. آنا گولومسه‌دی و بو تبسسوم اونون ائرکن قوجالیق شاختاسی وورموش اوزونه آنی بیر گنج‌لیک گتیردی.

- یامان نادینج دیر خانیم معللیم- آنا اوغلونا باخدی. آمما اونون باخیشی مذمت دئییل، محبت و فرح ایفا ائدیردی.- آنجاق سیزی چوخ ایسته‌ییر. ائوده سیزدن دانیشیر. نئچه دفعه ایسته‌میشم گلیب سیزدن تشککور و راضی‌لیک ائده‌م.
اونلار گئجه یاریسینادک اوتوروب صؤحبت ائله‌دیلر. ائو صاحیبه‌سی اؤز دردینی دانیشدی. اَری خالچا کارخاناسیندا ایشله‌ییرمیش. آچیق فیکیرلی دمکرات ایمیش. دؤرد ایل بوندان قاباق حبسه آلینمیش و خبرسیز- اترسیز یوخ اولموشدو...

- تبریزه گئدیب پیشه‌وری‌نین اؤزونه دئدیم،- دییه قادین درد ایله یانان قورو گؤزلرینی یئره تیکیب نقل ائدیردی.
- هر طرفی آختاردی، هئچ یئرده گؤردوم دییه‌ن اولمادی.
- بئله سویوق بیر گئجه‌ده گلیب آپادیلار...- دییه آنا آه چکیب گؤزلرینی یئره تیکدی.
- آژان بؤیویو چوخ بیشرف آدام ایدی. قاپیدا آنامی ایته‌له‌ییب یئره ییخدی. گؤرسم بو ساعات تانییارام. اوزو قیرمیزی بیر کیشی ایدی. ،- دییه ایلدیریم، باخیشی هله ده یئرده اولان آناسینا باخدی و اونون قارا گؤزلری کین‌لی، آمانسیز بیر آتش‌له پارلادی.
او گئجه معللیمه اوزون زامان یاتا بیلمه‌دی. قیسا و پریشان بیر عؤمرون کدرلی خاطیره‌لری، سون یئددی آیلیق حیاتی‌نین عزیز خیاللاری اونون یوخوسونو عرشه چکیردی. او، بو یئددی آیلیق حیاتی‌نین ایندی آرتیق چوخ اوزاق  و یئتیشمز اولان سعادتی ایله وداعلاشیردی.
گؤزل و مایوس وطنی آذربایجان حاققینداکی نغمه‌نی سون دفعه شاگیردلرینه اوخوتماق اوچون سحرین آچیلماسینا تله‌سیردی...
سحر آچیلدی..‌. معللیمه گئیینیب ایلدیریملا مکتبه گئدرکن اهالی آراسیندا بیر قارغاشالیق گؤردو‌. تاجیرلر یازیلمیش لوحه‌لری گؤتوروب، یئنه فارسجا یازیلانلاری آسمیشدیلار.
مرتجع تاجیرلر- صاباح- سحرینیز خئییر آغا. گؤزونوز آیدین دئییر، گلیرلر.- دییه بیربیرینی تبریک ائدیب و گولومسه‌ییردیلر.
اصنافین، یوخسوللارین، خیردا آل- وئرچیلرین اوزلری ایسه توتقون و کدرلی ایدی. اونلار سالاملاشمادان بو نه ایش‌دیر داداش؟!- دییه هیجانلی پیچیلتی ایله بیربیریندن خبر آلیردیلار.
معللیمه مکتبه چاتیب، زنگی ووردوردو و پالتوسونو چیخاریب صینیفه گیردی. آمما اوشاقلارین یاریدان چوخو گلمه‌میشدی‌.
آخیرینجی درسده او، شاگیردلرینه آذربایجان نغمه‌سینی اوخوتدوردو. دونَن قلبی فرحلی، خوش دویغولارلا قانادلاندیران بو نغمه ایندی اوندا حسرت و هیجران دوغوروردو‌. ائله بیل کی اونون وطنی حاققیندا اولان بو ماهنی ایندی اوزاقلاردان، چوخ اوزاقلاردان گلیردی.
او، یاشارمیش گؤزلرینی اوشاقلار گؤرمه‌سین دییه، اوزونو پنجره‌یه چئویردی. ائله بو زامان آیاق سسلری ائشیدیلدی. بیر فارس ضابیطی ایله ایکی سرباز ایچری گیردی. ماهنی اوشاقلارین بوغازیندا قیریلیب قالدی. اوجا بویلو فارس ضابیطی:
- آذربایجان حاققیندا نغمه اؤیره‌دیرسینیز خانیم؟- دییه استهزالی بیر تبسسومله سوروشدو.
- بلی آغا. آذربایجان حاققیندا نغمه اؤیره‌‌دیرم. بس سیز نییه سیلاحلی عسگرله صینیف اوتاغینا گیریرسینیز؟
- جناب سرهنگین امرینه اساسن بیز سیزی ناراحات ائتمه‌لی اولاجاغیق خانیم. بویورون بیزیمله گئدک.- ضابیط قاپینی گؤستردی.
معللیمه دانیشماغین معناسیز اولدوغونو حیس ائتدی.
ضابیط بو دفعه سَرت حالدا:
- بیزی لنگیتمه‌یین–دئدی.
معللیمه چئوریله‌رک قورخموش گؤزلری اونا تیکیلیب قالان اوشاقلارا باخدی. ایلدیریم آیاق اوسته دایانمیشدی. ایندی اونون گوزلری ماریتا یاتیب اؤز اُووی اوزه‌رینه آتیلماغا حاضیرلاشان پلنگ بالاسی‌نین گؤزلرینه اوخشاییردی.
- ساغ اولون، اوشاقلار. منی یادینیزدان چیخارمایین. بلکه بیر داها گؤروشمه‌دیک.‌‌.. بؤیوک اوغلانلار اولاندا وطنی‌نیز اوغروندا موباریزه ائدین.هئچ بیر زامان اونوتمایین بونلار بیزیم ان غدّار دوشمنیمیزدیر.
- رد کن- دیبه ضابیط فارسجا سربازلارا قیشقیردی. آمما معللیمه اونلارین اؤزونه توخونمالارینا یول وئرمه‌مک اوچون جَلد پالتوسونو گئییب قاباغا دوشدو. اونلار کوچه‌یه چیخاندا ایکی- ایکی فارس سربازلارینین قاباغیندا قولو باغلی آپاریلان تانیش دمکراتلاری گوردو. اونلارین آردینجا گؤزو یاشلی آروادلار، اوزلری آغاپپاق آغارمیش اوشاقلار گئدیردیلر.
قصبه آغیر و دهشتلی بیر سوکوت ایچینده ایدی. بو قورخونج سوکوت ایچینده آداملارین ائولریندن چیخاریلیب قولو باغلی آپاریلماسی، معللیمه وارفولومئی گئجه‌سینی خاطیرلادیردی. او گئجه‌ده ده اینسانلاری بئله‌جه قیریردیلار. قصبه‌ ایله مئشه‌نین آراسیندا‌کی آچیقلیغا چاتاندا، معللیمه مئیداندا قورولموش دار آغاجلارینی گؤردو. دار آغاجلاری‌نین یانیندا ایسه بیر دسته قولو باغلی دمکرات دورموشدو.

اونلاردان دا اون آددیم کناردا اییرمی نفر فارس سربازی و اوچ ضابیط دایانمیشدی.
جاوان ضابیط یوغون و قیپ- قیرمیزی اوزو اولان سرهنگه تعظیم ائدیب، معللیمه‌نی گتیردییینی و اونون رفتارینی عرض ائله‌دی. سرهنگ گوزلرینی قییاراق قیزا دیققتله باخیب جاواب وئرمه‌دی. بئش دقیقه‌دن سونرا بیری قوجا، دیگری جاوان و گوزل بیر اوغلان اولان ایکی نفر ده گتیردیلر.
اونلارین آردینجا کؤهنه کلاغاییسی آلتیندان قار کیمی آغ ساچلاری داغینیق حالدا چیخمیش‌، گونشدن یانیب قارالمیش آریق سینه‌سی و اوزو دیرناقلاری ایله جیریق- جیریق ائدیلمیش بیر قاری گتیریلدی‌.

قاری سرهنگین قاباغیندا - اونو اؤلدورمه- دییه تزه گتیریلن جاوانی گؤستردی.
- آللاه درگاهیندا جاواب وئره بیلمزسن. اونون گوناهی یوخدور.
" آنا"- دییه اوغلان قیشقیردی.
آنا اونو ائشیتمه‌دی.
سرهنگین قولوندان یاپیشیب دئدی:
- بو ساچلاریمدان، چالین- چارپاز داغ چکیلن بو سینه‌مدن قورخ. یئددی اوغولدان بیرجه بو قالیب.
- بو کؤپه‌یی سوسدورون- دییه سرهنگ اوز- گوزونو تورشوتدو. ایکی جاوان ضابیط آنانین قولوندان یاپیشیب کنارا چکدیلر‌. آنا، اوزونده قورخولو بیر تبسسومله اوغلونا باخدی.
- سیاهه‌نی چیخار، اوخو- دییه سرهنگ یاورینه امر ائتدی. معللیمه‌نین آدینا چاتاندا سرهنگ یئنه ده گوزلرینی قییاراق اونا باخدی.
- بو هانسی مشه‌دی تاغی‌نین قیزی دیر؟ صراف مشه‌دی تاغی‌نین؟،- سوروشدو.
- بلی- دییه یاور جاواب وئردی.
- اونو تاپین بورا گتیرین.
یاور مشه‌دی تاغی‌نین آردینجا ایکی سرباز گؤندره‌رک سیاهه‌نی اوخویوب قورتاردی.
- داها قالان یوخدور کی؟- دییه سرهنگ ساکیتجه سوروشدو.
- خیر، دییه ضابیط جاواب وئردی.
بو واخت مشه‌دی تاغینی دا گتیردیلر.
- سن نه واختدان کمونیست اولموسان مشه‌دی؟! - سرهنگ گوزلرینی قیییب اونا باخدی‌.
- نه سببدن بئله حؤکم وئریرسینیز جناب سرهنگ؟! - مشه‌دی تاغی ساکیت و مغرور بیر گؤرونوشله جاواب وئردی.
- بو کیمین قیزی دیر؟- سرهنگ معللیمه‌نی گؤستردی.
مشه‌دی تاغی سودابه‌یه باخمادان، منفور ساکیتلیک‌له جیبیندن بیر کاغیذ چیخاریب تقدیم ائله‌دی.
سرهنگ کاغیذی آچیب بو سطیرلری گوزدن کئچیردی:
" من قیزیم سودابه‌نی اوزومه آغ اولوب منیم اراده‌مین خلافینا حرکت ائتدییی اوچون، آشاغیدا امضاء ائدیلن شخص‌لرین شهادتی ایله بو دقیقه‌دن اعتبارن اولادلیق شرفیندن محروم ائدیرم..‌. نه اؤلوسونه، نه ده دیریسینه صاحیب دئییلم. اونون هئچ بیر حرکتینده اؤزومو جاوابده بیلمیرم.
سرهنگ مکتوبو آخیرا قدر اوخومادی، سربازلارا الی ایله باشلاماق ایشاره‌سی وئردی.
قاباق جرگه‌ده دورانلاردان معللیم‌له برابر گتیریلن قاری‌نین اوغلونو و قوجا کیشی‌نی دار آغاجی‌نین آلتینا گتیردیلر.
- کیمین بونلاردان شکایتی وار- دییه سرهنگ گوج ایله اورا ییغیلان جاماعاتا مراجعت ائله‌دی. بو غریبه سؤال هامینی تعجوبه سالدی.
- منیم شکایتیم وار.- جاماعاتین آراسیندان بیر گنج سسی ائشیدیلدی‌ و بونون آردینجا ایلدیریم ایره‌لی چیخیب سرهنگین یانینا گلدی.
سرهنگ اونو باشدان- آیاغا سوزوب:
- شکایتین هانسیندان دیر؟
اوغلان سودابه‌نی گؤستره‌رک:
- باخ او معللیمه‌دن،- دئدی.
- سن بونون شاگیردی اولموسان؟
- بلی،- دییه اوغلان ساکیت و نزاکتلی سسله جاواب وئردی.
- هه بو چوخ ماراقلی دیر. دئه گوروم شکایتین نه دیر؟ قورخما.
سونرا یاورینه مراجعت‌له:
- بو اوشاغین دئدیکلرینی یازارسان.
- من آنجاق اونو سیزین قولاغینیزا دئمک ایسته‌ییرم- دییه اوغلان پیچیلدادی.
- چوخ ماراقلی دیر- دییه تکرار ائله‌دی. سونرا اوشاغا دؤنه‌رک:
- گَل، دئه گؤروم نه دئییرسن.- دییه قولاغینی اونا طرف توتدو.
اوغلان یاناشی اونون قولاغینا پیچیلدادی کی:
- من سنی تانیییرام. دؤرد ایل بوندان قاباق منیم آتامی دا توتوب آپاران سنسن.
سؤز آغزیندان قورتارمامیش قولونون ایچینده گیزلتدییی خنجری وار گوجو ایله اونون خیرتده‌یینه سوخدو.
سرهنگ‌دن بوغوق خیریلتی ائشیدیلدی و او، سیلکه‌له‌نیب ییخیلدی. آداملار گوزلرینی سرهنگدن چکیب اونا باخانا قدر، ایلدیریم ازدحامین آراسیندان کئچیب مئشه‌یه قاچدی.
دؤرد ضابطین تاپانچاسی اونون آردینجا گورلادی. آمما سونرا معلوم اولدو کی گولله‌لرین هئچ بیری اونا دَیمه‌ییب. مئشه‌نی نه قدر آراییب- آختاردیلارسا، اوغلاندان هئچ بیر نیشانه تاپمادیلار.
سون.
https://t.me/Adabiyyatsevanlar

اوشاق ادبیاتی
هرهفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین

https://t.me/Adabiyyatsevanlar

اوشاق ادبیاتی

  حیاتی آنلایان کپَنَک
     آهو گؤلچو اوغوللاری قارا گولّه، 
     گون مطبعه چیلیک، استانبول 2017 
    چئویرن: م. صفا
 

(بوحکایه‌نی اوخوماقدان آماج نه دیر؟)  
* اوشاقلار جانلی‌لارین بعضی عمومی خصوصیّتلره و بعضی فرقلی خصوصیّتلره مالیک اولدوغونو باشا دوشه بیلرلر.    
* اوشاقلار فرقینده اولا بیلرلر کی، فرقلریمیزه باخمایاراق، عمومی خصوصیّتلریمیزی کشف ائتمکله مناسبت‌لریمیزی یاخشی‌لاشدیرا بیله‌ریک.  
* اوشاقلار مختلف خصوصیّتلره مالیک اولان دوستلارینا قارشی مثبت فیکیرلر و مناسبت انکشاف ائتدیره بیلرلر.  
    ..........................................
ساری بیر کپنک، یاشیل یارپاغین کناریندا اوتوروب اطرافی سئیر ائدیردی. نه ائتمه‌لی‌دیر؟ او، چؤللرده اوچا بیلر و گیزلن-قاچ اوینایا بیلردی، لاکین بو اویونو اویناماق اوچون بیر دوست لازیم ایدی. تأسف کی، هئچ بیری یوخ ایدی.  
   بو زامان بیر بنؤوشه رنگینده اولان کپنک قارشیداکی بوداغا قوندو. او، ساری کپنکی سسله‌دی: « هئی، ساری کپنک! اورادا تک باشینا نه ائدیرسن؟» ساری کپنک دئدی کی، من هئچ نه ائتمیرم، ساده‌جه اوتوروب اطرافا باخیرام.  
   « بیرلیکده اویون اوینایاق؟» – بنؤوشه‌یی کپنک سوروشدو. ساری کپنک اوزون مدّت دوشوندو، سونرا « بنؤوشه‌یی کپنکه‌ باخیب جاواب وئردی: « یوخ! من ساری کپنکم، سن ایسه بنؤوشه‌یی کپنک. بیز بیر-بیریمیزدن فرقلی ییک.»  
بنؤوشه‌یی کپنک اوچاندان سونرا، بیر ماوی کپنک ساری کپنکین یانینا گلدی.       
   « سلام، ساری کپنک! یاخشی بیر فیکریم وار. گل تارلالارداکی چیچکلر آراسیندا اوچاق، نه دئییرسن؟» تکلیف ائتدی.  
   ساری کپنک اونا دئدی: « یوخ! من ساری کپنکم، سن ایسه ماوی کپنک‌سن. بیز هئچ بیریمیز عینی دئییلیک.»  
   ماوی کپنک، ساری کپنکین اونونلا گزیب دولاشماقدان امتناع ائتدیگینه بیر آز اوزولسه ده، بیلیردی کی، هئچ نه ائده بیلمز. بو، ساری کپنکین اؤز سئچیمی ایدی.  
   ساری کپنک ده، ماوی کپنکین یانینا قونان آغ کپنکله چوخ دا، مهربان دئییلدی. ساده‌جه آغ اولدوغو اوچون اونونلا گیزلَن‌قاچ اویناماقدان امتناع ائتدی. غضبلی بیر سسله سوروشدو: « آغ کپنک اولدوغونو باشا دوشمور‌سن‌می؟».  
زامان کئچدیکجه ساری کپنک چوخ سیخیلدی.       
"آرتیق بسدیر! بوتون گونو تک اوتوراجاغام؟" بیر سس ائشیدنده، کدرله دوشوندو.      
  « نه اولوب، ساری کپنک؟ نیه بئله کدرله‌نیرسن؟» چُهره‌یی کپنک سوروشدو.
  « کدرله‌نیرم، چونکی بورادا اوتورماقدان بئزمیشم» دئیه ساری کپنک جاواب وئردی.
   چُهره‌یی کپنک اونا تبسّومله باخاراق سوروشدو:
   « نیه ایلنجه‌لی بیر شئی ائتمیرسن؟» ساری کپنک جاواب وئردی:
   « اصلینده، من ده، گیزلن-قاچ اویناماق ایسته‌ییرم. اما منیم بو اویونو اویناماغا دوستوم یوخدور». او جاواب وئردی.      
   «ایسترسن، بیرلیکده اویون اوینایا بیله‌ریک» دئدی چُهره‌یی کپنک.
   «اویون اویناماق ایسته‌ییرم، اما من ساری کپنک، سن ایسه چُهره‌یی کپنکسن. دئمه‌لی، بیز بیر-بیریمیزدن فرقلی‌ییک».  
چُهره‌یی کپنک: «دوغرو دئییرسن، رنگلریمیز فرقلی‌دیر، اما ایکیمیز ده، کپنکلریک.       
ایکیمیزین ده، قانادلاری وار.     
ایکیمیز ده اوچا بیله‌ریک.     
ان اساسی، ایکیمیز ده، عینی شئیی ائتمک ایسته‌ییریک: اویون اویناماق.      
فرقلی اولان یگانه شئی رنگلریمیزدیر» دئدی.     
   ساری کپنک چُهره‌یی کپنکین دئدیکلرینی دوشونرکن قارشیلاریندان اوینایان بیر قروپ کپنک کئچدی. ساری کپنک گؤردو کی، چوخ ایله‌نیرلر.     
   اونلارین بعضیلری ماوی، بعضیلری آغ، بعضیلری بنؤوشه‌یی ایدی، اما هامیسی دا، کپنک ایدی. اونلارین مختلف رنگلری دوست اولماغا مانع اولموردو.    
   ساری کپنک چُهره‌یی کپنکه:
   «ایندی باشا دوشدوم. رنگلریمیز فرقلی اولسا دا، دوست اولوب اوینایا بیله‌ریک» دئدی. سونرا، هرایکی کپنک بیرلیکده دیگر کپنکلره دوغرو اوچدولار.
   ساری کپنک دیگر کپنکلره یاخینلاشاندا اونلارین رنگارنگ بولودا بنزه‌دیگینی گؤردو. اونلار بیرلیکده طبیعتی گؤزل‌لشدیریردیلر.  
   او، دوستلارینا دئییردی: « چوخ گؤزل گؤرونورسونوز. یاخشی کی، بوتون کپنکلرین رنگلری فرقلی‌دیر». ساری کپنک او گوندن بری، دوستلارینی رنگلرینه و خاریجی گؤرونوشلرینه گؤره تصنیف (چئشیدلمه) ائتمه‌گی دایاندیردی...
     .................................  
اوخویاندان سونرا قیمت‌لندیرمه سوال‌لاری؛
* اوخودوغوموز حکایه‌ده‌کی کپنک‌لرین فرقلی خصوصیّتلری نه ایدی؟  
* ساری کپنک-ین داورانیشی حاقّیندا نه دوشونورسونوز؟ 

* ساری کپنک-ین بنؤوشه‌یی، ماوی و آغ کپنک‌لره قارشی داورانیشی حاقّیندا نه دوشونورسونوز؟
* چهره‌ایی کپنک، ساری کپنک-ه، باشقا کپنک‌لرین هانسی عمومی خصوصیّتلرینی سؤیله‌دی؟  
* اینسان‌لارداکی فرقلر حاقّیندا نه دئیه بیلرسینیز؟ 
* اؤزوموزدن فرقلی اولان اینسان‌لارا قارشی نئجه داورانمالی‌ییک؟

https://t.me/Adabiyyatsevanlar

اوشاق ادبیاتی

مرتضی مجدفر
ایشیق- کولگه اویونو

ساچدی گونش ساچاغین
بیزیم ائوه شوشه‌دن
ایشیقلاندی هر بیر یئر
لاپ اوللی گوشه‌دن.
                                          🌈
دوشدو کولگه‌م دوورا
اولدوم یئکه آدام تک
بویوموشدوم دوواردا
اوجا بویلو آتام تک.                  
                                          🌈
تاپمیشدیم من بیر اویون
"ایشیق-کولگه" اویونو
الده اولان هر نه‌یین
اوخشاییردیم بویونو.                                                      https://t.me/Adabiyyatsevanlar
      

اوشاق ادبیاتی

« ده وه »
یازان : علی صمدلی
 کؤچورن : علی آغ گونئيلی  -  ابرازی
کتاب :‌ ژنرالین اوشاقلیغی  - ناغیللاربؤلومو

یازیغیم گلدی سنه ده وه ، یازیغیم ، گؤرنده حؤیوانلار پارکیندا سنی . مئیمون کیمی سالیبلارسنی قفسه . یول چکن گؤزلرین ماددیم – ماددیم باخیردی اوزومه . نئینییم ، الیمدن نه گلر آی یازیق ، تسللی دن باشقا . حؤرمت ائدیب لر آدینا ، جانینا اوجا بؤیونا سنین . خیرمان بویدا یئر آییریبلار سنه کی ، وار – گل ائده سن ایچینده ، آیاقلارین آلتینا ساری کهربا کیمی صحرا قومو تؤکوبلر کی ، ایسیتسین هردن سنی .داها نه ایسته ییرسن ، یئمینده وار، چَللَکده سویوندا . 
نه یئمه یه باخیرسان ، نده سویا . ائله بیل سنی وله قوشوبلار ، دولاشیرسان خیرمان بویدا یئرده . سحردن آخشاما کیمی ، آشاغی ، یوخاری . دولاناجاقسان عؤمرون بویو . بو ایمیش سنین قیسمتین ، طالعین ، آی ده وه . 
سنینکی اوجسوز – بوجاغسیز صحرا ایدی . بیرده زینقیرولو کاروان . گونه باتاندان گونه دوغانا . گون دوغاندان گون باتانا گئدیدین سحر ، آخشام . اوزانایدی یولارین گونلرله هفته لرله ، آیلارلا . آرخاندا دا ، اؤزون بویدا چاتما چوواللار ، یادا کی ، گلین کجاوه سی . یادینا نه یئمک دوشوردو ، نده ایچمک اوندا ...ایندی یوخودا گؤره رسن اونو. ساغین اوجا مرتبه لر ، سولون اوجا مرتبه لر ... گؤی تاغی بیر قوببه کیمی دایانیب باشین اوسته . حسرتسَن  اوزاغی گؤرمه یه . نه گئجن وار، نده گوندوزون . قارانلیق گئجه یه ده حسرت قالمیسان . کوچه لرین ، ائولرین گور ایشیقلاری ،گئجه نی ده آلیبلار سنین الیندن . بلکه اونا گؤره یوخو نه اولدوغونو بیلمیرسن هفته لرله ،آیلارلا ، آی یازیق . قیزاران اوفوق اومیدین ایدی ، دوغان گونش سئوینجین بیر زامانلار سنین . یوللارین اوزونلوغو قورخوتموردو سنی ، اومیدله چاتیردین منزیله .ایندی اومیدینی ده آلیبلار الیندن ، سئوینجینی ده ، اوزاق منزیلینی ده . آددیمینی آتدینمی ، چاتیرسان منزیل باشینا . نه اومیده احتیاج قالیر ، نده سئوینجه .
یازیغیم گلیر سنه ده وه ، یازیغیم . « صحرا گمیسی » دئییردی لر آخی سنه . ایندی هيچ یئلکنلی کیچیک قاییق دا دئییلسن . 
یازیغیم گلیر سنه ، عزیزیم یازیغیم . هانی سنین کاروانین ، هانی سنین ساروانین ، ده وه ، آی ده وه !    
۱۹۸۴

https://t.me/Adabiyyatsevanlar