ادبیات سئونلر

چونکی سیزین‌له دوستلوق ائدن، چؤرک کسن آداملار گونلرین بیر گونو سیزه آرخا چئویره بیلر. گؤو‌وَندیینیز آدام سیزی ائله بیر دار مقامدا تک قو‌یار کی، دوشدو‌یونوز چتین وضعیتده طالعینیز‌له باش‌-باشا قالارسینیز.
– جاوانشیر معللیم چیخیشینا بیر آز آرا وئردیکدن سونرا اؤزونو توپارلاییب یئنی‌دن سؤزو‌نه داوام ائتدی:
– یَقین هامینیز منیم‌له راضیلاشارسینیز کی، انسانلیق پول‌لا، وار-دؤولت‌له اؤلچولمه‌ییر. چونکی انسانلیغین اساس معیاری پول دئییل، معنَوی دَیَرلَردیر.
قوناقلار باشلاری‌یله جاوانشیر معلّیمین دئدیکلرینی تصدیق ائتدی‌لر.
– اینسان پول‌لو دا اولا بیلَر، پولسوز دا. اینسان بیر گون توخ، بیر گون آج دا یاشایا بیلَر. اساس اودور کی، اینسان اوز "منلیینی"، شرفینی ایتیرمه‌سین. من بو سؤزو دئمَه‌یه ده بیلَردیم، آنجاق یئری گَلیب، دئیه‌جه‌یَم. دوست-دوستا هانسی گوندَه لازیم‌دیر؟!
دعوت ائتدیک‌لریمین هامیسی بو مَجلیسده ایشتیراک ائدیر، یالنیز بیر نَفَردن باشقا. یَقین کی بیلدینیز صؤحبَت کیمدن گئدیر. پولا پول دئمه‌ین، گونلری عیش‌-عشرتده کئچَن، بیزیم هامیمیزدان دَفعه‌لرله یاخشی یاشایان، هر گؤروشَنده باغرینا باسیب، منه "قارداش" دئیه‌ن ساوالان بَی ذات-عالی‌لَری بوگون‌کی یوبلئی تَدبیرینه قاتیلمادی. بیزیم‌له بیر ماسا آرخاسیندا اوتورماغی اؤزونه عار بیلدی.
اؤزو ده قاپیلارینا‌جان آیاغینا گئدیب، اوز بَه‌ اوز دعوت ائتمیشم. نه اولار، آللاه جانینا دَیمه‌سین. آنجاق اونوتماسین کی، بیر واخت اونوُن آتاسی منیم بابامین نؤکَری اولوب. اونلارین عاییله‌سی منیم بابامین چؤرَه‌یی‌له دولانیب‌لار. آللاه بؤیوکدور، گئج-تئز هر شئیی یئری‌نه قو‌یور.
اودور کی، من بو باده‌لری ایچیرم شَخصن سیزین ساغلیغینیزا!
بو چیخیشدان ناراضی قالانلار اولسا دا، هئچ کیم سَسینی چیخارمادی:
"اؤزلَری بیلَر، بیزه نه دوشوب کی؟!"
"یَقین ایچکیلی دیر، اونا گؤره دانیشیر"،
"گَلر‌دی، گؤرونور، آرالارین‌دا نه‌سه وار"، – دئیه دۏشونَن‌لر ده اولدو.
بو واخت بیر نفر یئنی‌یئتمه اوغلان تامادایا یاخینلاشیب، قولاغینا نَه‌سه پیچیلدادی. فامیل معلّیم اوزونو تئز جاوانشیر معلّیمه توتوب دئدی:
– قارداش، اوشاقلاردان کیمسه سَنی تبریک ائتمَک اوچون ایجازه ایسته‌ییر. نه دئییرسَن؟
جاوانشیر معلّیم تَردید ائتمَه‌دن:
"گَلسین، گَلسین. یَقین باجی‌اوغلودور. نَدَنسه آتاسی دا گؤزه دَیمیر. یَقین هاوا سیاحتیندن گَلمه‌ییب"، – دئیَه تئز سَسلَندی.
بو سؤزلَری ائشیدن کیمی قاپی آرخاسیندا گؤزلَه‌یَن جاوان بیر اوشاق سالونا داخیل اولدو. چِخولون(کاورین) اوستونده‌کی یازیلاردان اَلینده توتدوغو کاستیومون خاریجی و باهالی مال اولدوغونو سئزمَک چَتین دئییل‌دی. دؤشَمَه‌یَه توخونماسین دئیه، اوشاق کاستیومو باشی‌نین سَوییه‌سین‌ده توتاراقدان جاوانشیر معلّیمَه یاخینلاشدی:
– جاوانشیر بابا، عائیله‌میز آدیندان سَنین دوغوم گونو‌نو تَبریک ائدیر، ساغلاملیق و خوش گونلَر آرزو‌لاییر‌یق. بابام یوکسَک حرارت ایچیندَه اولدوغوندان گَلَه بیلمَه‌دی. اونا گؤره سیزدَن عوذور ایسته‌ییر. دئدی:گئتسَم، مَجلیس عوضولَرینین اوقاتینی کورلایا بیلَه‌رَم. جاوانشیر بابا، بابام دئدی کی، ساغالیم، اونوُن اوچون بیر یوبلئی مَجلیسی ده من کئچیره‌جه‌یَم.
جاوانشیر کیشی‌نین صبری چاتمادی. اوشاق سؤزونو بیتیرَر-بیتیرمَز تئز سوروشدو:
– بالا، سَن کیمین نَوه‌سی‌سَن؟
– ساوالان کیشی‌نین.
قوناقلار داغیلیب گئتمیشدی.
صاباح کَند‌ده هانسی صؤحبتلَر گَزه‌جَک‌دی، اونو بیر آللاه بیلیر‌دی. آنجاق جاوانشیر معلّیمین بو گئجه ده یاتا بیلمه‌یه‌جه‌یی شَکسیز ایدی.

https://t.me/Adabiyyatsevanlar