ادبیات سئونلر

افروز خانیمین خبر آگنتی🗣
✍:افروز خانیم

الینی اوزونه وئریب، بیر واراق آغ کاغیذ ماسانین اوستونه قویوب، بیر نئچه آد ساغدا، بیر نئچه‌سینی سولدا یازیب، اَیری خط‌لرله بیربیرینه پاپیشدیریر.
- یئنه نه فیکیره دالیبسان افروز خانیم؟! گمی‌لرین غرق اولوب می؟!
باشینی واراقدان قووزاییب فیکیرلی اوزومه باخیر:
- بیلیرسن سحر خانیم؟ منجه ایندیکی زاماندا هر بیر یاخشی‌لیغین، بؤیوتمه‌نین، خیدمتین آرخاسیندا بیر منفعت یاتیب.
- یاخشی، فلسفه درسی دئمه گوره‌ک، منظور؟!
- جانیمچون، یعنی ایندیکی زاماندا بیر کیمسه دئسه کی من بیر خیدمتی بیری اوچون تمناسیز ائدیرم، من اینانمارام. اَششی ایندی اینستاگرامین لایکی، تلگرامین کامنتی بئله تمناسیز دئییل ننه قوربان، طرف قارشیلیق گوزله‌ییر.
یعنی خولاصه‌سی مثل دیر: بو زمانه‌ده ائششک، ائششگین بوینونو موفته قاشیمیر، حتمن سنه بیر خیدمت، بیر یاخشی‌لیق، بیر باشینی شیر باشینا اوخشادان وارسا، سندن ده قارشیلیق انتظاری اولور و بو قارشیلیق‌لی انتظارین بوگون ده سسی چیخماسا، صاباح حتمن طبیلی دؤیوله‌جک. نئجه دییرلر، کهلیک باشینی قارا قویلاییر دئییر بلکه هئچ کیمسه اونو گؤرمور، آمما گؤتو ائشیک‌ده قالیب قویروغو هاوالانیر.
ایندی اَتین کیلوسونو بیر میلیونا یئیه‌ن آدامدان، بوگون یاتیب، صاباح قیمت‌لری دَوه بئلینده گؤره‌ن آدامدان، ریال‌لا قازانیب دلارلا خرجله‌ین آدامدان داها هئچ نه‌یی گیزلتمک مومکون دئییل، او جهنمین دیبینه‌دک گئدیب و نه‌یین نه اولدوغونو یاخشی بیلیر. بو اینترنت عصری‌نین آداملاری کیمین قویروغونون کیمه و هارا باغلی اولدوغونو گؤیده سَزیرلر".
سوندا، داها ماجرانین بوراسینی اوخوجولارا سانسور ائدیرم_دئییب_، منیم قولاغیما ماجرانین نه اولدوغونو پیچیلدادی.
ایندی بیز پته‌نین سووآ دوشمه‌سی‌نی و کیمین کیمه، نه‌یین نه‌یه ایلگیسی اولدوغونو گوزله‌ییریک. امین اولون هامیسی عیان اولاجاق.
خبرلرین آردینی افروز خانیمین خبر آگنتیندن گؤزله‌یین.

https://t.me/Adabiyyatsevanlar