ادبیات سئونلر

اوشاق ادبیاتی

اوشاق ادبیاتی

ميمون لا تمساح

چئویرن: "منیژه جم‌نژاد"

بیر زمانلار، بیر ميمون واریدی، چایین قیراغیندا بیر آغاجدا یاشاردی. ميمونون نه دوستو واریدی، نه ده عائله سی، تک یاشاردی. آما خوشبخت ایدی، چونکو آغاجین چوخ شیرین قیزیلجیق ( زغال اخته) میوه‌لری واریدی، اونون قارنینی دویوروردو، آغاج دا اونو گونش دن، یاغیشدان ساخلیردی.

گونلردن بیر گون، بیر تمساح چایی اوزه-اوزه گلدی و ساحیلده دینجلمه‌یه اوتوردو.
– «سالام!» – دئیه ميمون اونو سسله دی، چونکو میمون چوخ ادبلی، سئویملی حیوان ایدی.
– «سالام» – دئیه تعجب‌له جاواب وئردی تمساح.
– «بیلیرسن بوردا یئیه‌جک نمنه تاپا بیلرم؟» – دئیه سوال ائله‌دی. – «گون بویو هیچ نه یئمه‌میشم و چوخ آجام!»

آدام بئله سانیر تمساح ميمونو یئمک ایستیر. آما بو تمساح چوخ یاخشی ایدی و بیله شئی عاقلیندان دا کئچمه‌دی.

مهربان ميمون جاواب وئردی:
– «منیم آغاجیم چوخ یئمه لی میوه‌لر گتیرر، ایسترسن، سنه آتا بیلرم» – دئیه جواب وئردی.

بیر نئچه میوه آتدی. تمساح چوخ آج اولدوغوندان هامیسینی یئدی. تمساحلار بئله وقتلر ده میوه یئمزلر، آما بو میوه‌لری چوخ بَیَندی. یئییب قارنینی دویوردو.
مهربان میمون دئدی:
– «یئنه ایسته سن، گلیب آلا بیلرسن.»

بئله‌لیک‌له تمساح هر گون گلیر، ميمون‌لا صحبت ائلیر، میوه یئیردی. اونلار بیر بیرینه یاخشی دوست اولدولار.

بیر گون تمساح ميمونا قادینی، اوشاقلاریندان دانیشدی. ميمون دئدی:
– «قوی بیر اووج میوه ده آتیم قادینیوا گوتور.»

تمساحین قادینی بو میوه‌لری چوخ بَیَندی، چونکو بئله شیرین شئی یئمه‌میشدی. آما او اری کیمی یاخشی دئییلدی. دئدی:
– «بو میوه‌لر بئله شیرین‌دیرسه، میمون دا همشه بونلاردان یئدیینه گوره، اوزو ده حتماً چوخ لذت‌لی اولار!»

تمساح، قادینینا اؤز دوستونو یئیه بیلمه‌یه‌جه‌ینی دئییب آنلاتدی.
– «او منیم اؤزومدن ده یاخشی دوستومدور!» – دئدی.

آما قادینی اونون سؤزونه قولاق آسمادی. اوزونو خسته گؤستررک دئدی:
– «من اولورم! منی تک قورتاران شئی بیر ميمونون اوره‌گی‌دیر! اگر منی سئویرسن، دوستونو گتیر!»

بئچارا تمساح یوخوسوز قالدی – نه ان یاخشی دوستونو قوربان وئره بیلیر، نه ده قادینی اؤلسون ایسته‌ییردی. سونوندا فیکرینه ميمونو آلداتماق گلدی.

گلیب ميمونا دئدی:
– «قادینیم سنه شخصن تشکر ائتمک ایسته‌ییر. گل منیم‌له، سیزی تانیشدیراجاغام.»

ميمون چوخ سئویندی. آما دئدی:
– «من اوزه بیلمرم، نئجه گله بیلرم؟»
– «قورخما، من سنی داشیارام!» – دئدی تمساح.

ميمون تمساحین کوره‌یینه مینیب، ایکی دوست چوخ گئنیش چایین اورتاسینا طرف یولا دوشدولر.

چایین اورتاسینا چاتاندا تمساح بیر دن دئدی:
– «باغیشلا دوستوم، آما قادینیم چوخ خسته دیر. دئییر کی آنجاق ميمونون اوره‌گی اونو ساخلایا بیلر. سنینله صحبتلریمی چوخ اوزله‌یه‌جه‌ییمه رغمن، سنی اؤلدورمه‌لییَم.»

ميمون بیر آن دوشوندو، عقلی له جواب وئردی:
– «آی دوستوم، من چوخ اوزولدوم! من حاضیرام اوره‌گیمی قادینینا وئرم. آما او منیم اوزومده دئییل، آغاجدا قالیب! گئدک، من اونو گؤتوروم سنین قادینیوا وئریم.»

تمساح اوزونو چوخ آخماق گؤردو. عزیز دوستونو، اونونلا دردلشمه‌لری، شیرین میوه لری دادماغی اؤزله‌یه‌جه‌یینی دوشوندو. گئری دونوب ساحیلا چاتدیلار. ميمون آغاجا چیخدی، اوز ذکاوتی له اوزونو نجات وئردی، آما بیرده هئچ بیر تمساحا گوونمه دی!.

قیزیلجیق میوه‌سی بؤیوک اوزوم، یا دا کیچیک ارییه اوخشاییر. یئتیشینجه اوست رنگی قارا، اتی پنبه اولور. شیرین‌دیر، آمّا آزاجاق آجی‌مزه لی دیر. اونو یئینده، رنگی چوخ قارا اولدوغو اوچون دیلین رنگی بیرآز قارالیر.

https://t.me/Adabiyyatsevanlar