ادبیات سئونلر

جعفر پورقاسم
اتگی لاله لی کمکی

یئنه قویموش باشینا آغ پاپاغین
سئومَلی کمکی
یای گونونده قارینان قول بویون اولموش
دَلی کمکی
سینه سی جیلوَلی کمکی
اَتَگی لاله لی کمکی
بیزه قالمیش بابالاردان
اولو ، افسانه لی کمکی
بیر اَلینده کاساسی گویدن آلیر پای
سو وئریر گول چیچگه بیر اَلی کمکی

***
دوغودان ؛
دان سؤکولندهَ اوزادار اَل سنه کامتال
سندهَ ،
قارداشجا دؤنوب دوست اَلینی آل
بوینونا ساغ قولووی سال
بویون اوخشا ؛
دئنن :
آی لبلری شیرین ،دوداغی بال.
گؤزلری آهو باخیشلی ، یاناغی آل
دور دانیش سن قارا داغ لهجه سینی
آی ساچی سونبول

قارا باغ سیموولی آچسین ،
خاری بولبول

*
باتیدا ،
گون باتاراق ساخلا قیلینجی
داشی آلتون ، قومو اینجی
سینه سیندن جوشوری ،
آغ سو ، کینَنجی
***
بیر گؤزوندهَ دولو حسرت باخیسان گؤرسه نه تبریز
اوردا مینلرجه ایگیت دن ،
توتاسان ایز
سوروشورسان گؤزو یاشلی ،
قالالاردان ، قالان اولدی؟!
گؤزلرینده آخاراق یاش
دئییسن : اَرکه نه اولدی ؟!
اورداکی باغ گولوستان نییه سولدی ؟!
بابکین گؤزلری یادلار سیتمیندن قانا دولدی ؟!
ستتارا گؤر نه لر اولدی !!
ستتارا گؤر نه لر اولدی!!

هاردا قالدی ائلیمین ایستی قان اوغلی
تبریزین مئهریبان اوغلی
بیر قوجاق دفتر الینده
دولانیر کتلری بیربیر
تا بیزیم دردیمیزی ائیله یه تفسیر
قارا خیردا بالیغی هی جان آتیر
تا
یاشایش طرزینی گؤلده وئرهَ تغییر

هایقیریر سان هلهَ قورخما
گینه مینلر جه بالان وار
باشینا سایه سالان وار
هم سهند ، هم ساوالان وار
واردی مینلر، ایگید اوغلون
قوچ نبین واردی ، کوراوغلون
اینتقامین یاغی دوشمندن آلان وار
اسکیلردن یاشییان یاشلی قالان وار
هله مین دردین آلان وار
قئیدینه چوخلو قالان وار
گونده مینلرجه سنی ، یادهَ سالان وار

سال سسین قوی اوجالانسین
همی سولدان ، همی ساغدان
قارا داغدان ، قارا باغدان
شاه داغیم!
قورخما یاساغدان
***
بیر گؤزون آغری داغیندا
اولو قافقاز دایاغیندا
خان آراز سا آیاغیندا
هر سؤزون وار خزرهَ یوللا آرازدان
قویما دوشمنلری یول سالسین،
آرازدان
*
آی قوجا اؤلکه میزین سیمگه سی کمکی
آغزی باغلی ائلیمین ، سن سسی کمکی
نه ذکا صاحیبی اولموش آدینی کمچی قویانلار
دورنا گؤزلو بولاقیندان سو ایچینلر
و
دویانلار
سنی قیمتلی سایانلار
آرخایین لیق یاشامین سنده دُویانلار
**
هر بولود گئچسه، دؤشوندن سود اَمَرسن
اونو سینندهَ گؤمَرسن
بیر بویوک خومره سن آی کمچی ،
ایچین سو
مین بولاق آخسا جانین وار
دوننوجان ، چشمه خانین وار
یایلاقین وار ، آرانین وار
گونئیینده ، قوزئیینده دارانین وار
اولو داغلار آراسی آد و سانین وار
سندن ایلهام آلاراق ، آدلانانین وار

بو قارانلیق گئجه دن آز قالیر اولدوز درَسَن ، سن
یوللارا آی سَرَسن ، سن
گونشین ساچلارینی هم داراییب ،
هم هؤرَسن ، سن
گلجک گونلری آیدین گؤرَسن ، سن

آز قالیر کؤنلونو سیخما
آز قالیر گؤزله داریخما
آز قالیر کؤنلونو سیخما
آز قالیر گؤزله داریخما

۱۴۰۴,۷,۱

https://t.me/Adabiyyatsevanlar