ادبیات سئونلر

شَكلنمیش قولاقلاری دروازانین او اوزوندن گَله بیله‌جک هَنیره كؤكلەنسه ده، آغیرلاشمیش باشینی پَنجەلَرینین اوستونه سؤیکَه‌ییب اوزاندیغی یئردن قَملی گؤزلرینی سونو مَسجیده دیرەنَن كؤچَه‌یه زیللَمیشدی.
آسفالتدا اَزیلمیش كنسرو قوتوسونو فوتبول توپو كیمی بیری-بیری‌نه اؤتوروب اَیلَه‌نَن، بَعضن بیلَرَكدَن اونو نیشان آلیب فاغیر-فاغیر میریلداماقدان، باشینا، سیر-صیفَتینه یوغورت، كچاپ، خَردَل سورتوب، ایشکنجَه وئرمكدَن لَذت آلان، سون واقتلارسا، باخیمسیز كوچه ایتلَری كیمی اییلَن‌دیگین‌دن یاخینلارینا بوراخماییب اونو داشا باسان اوشاقلار اوچون ده داریخدی. اونا گاه قایغی گؤستَرَن، گاه دا ایشکنجَه وئریب ایت یئری‌نه بئله قویما‌یان انسانلار اوچون بورنونون اوجو گؤینه‌دی. بیر آزدان، آخشام دوشَنده، ظولمَتین واهیمَه‌سینی دويدوقجا، بایاق ایسلاناندا لَعنتله‌دییی یاغیشین – شَهَرین كوچَه و دام‌لارینا چیرپیلاراق سُكوتو پوزان لئیسانین شیریلتیسینا سوسادی. دیلینی اوزادیب بؤیرونه قیسیلمیش پیشیک بالاسی‌نین ایسلاق صیفَتینی شَفقتلَه یالادی.
گؤزلَرینی بَرك-بَرك یومدو. یومدو كی، ننئچه ساعَتدی دام‌لاری دانقیلدادا-دانقیلدادا یاغان لئیسانین اویادا بیلمَه‌دییی بو ساكینسیز شَهَری بَلكه یوخوسوندا گؤردویونَه اینانسین. یومدو و...
كوچَه‌لَردَه سیگنال وئره-وئره او یان-بو یانا شوتویَن آوتوموبیل‌لَری، پارك و خیابان‌لاردا قایناشان اینسانلاری، ایشَه، ماغازایا، ائوه، تئاترا، اَلین‌دَه بیردَستَه زانباق گؤروشَه تَلَه‌سن سئوگیلی‌لری گؤردو، سمادا اوغولتویلا اوچان طیارَه‌لَرین هاوادا بوراخدیغی ایزه باخدی، موسیقی صدالاری یاییلان، اوشاق، بؤیوك سَسی گَلن بوتون بینالارین پَنجَره‌لَرین‌ده گور ایشیق یاندی، مَحَلّه‌لردَه بوشالدیلمیش، یویولوب تَمیزلَنمیش یاشیل زیبیل قوتولاری گؤزون‌دن یایینمادی، حاصاریندا اوتوردوغو قاپینی گوله-گوله اوزونَه آچان صاحیبینی، اونون دائیما گولومسَه‌یَن قوللوقچوسونو، سَسه ییغیشان قونشولارین اولمازین مِهریبانلیقلا اونو سَلاملاماسینی گؤردویونَه امین ایدی و بو، هیچ ده یوخویا بَنزه میردی...

https://t.me/Adabiyyatsevanlar