شبسترلی ،یازیچی،معجزشناس اوستاد "محمدعلی نقابی"  ادبیات سئونلر گوزگوسونده

بیرینجی بولوم 2

سه شنبه1404,5,28

چکیلش: ادبیات سئونلر

آپاریجی :کریم قربان زاده

https://t.me/Adabiyyatsevanlar

شبسترلی ،یازیچی،معجزشناس اوستاد "محمدعلی نقابی"  ادبیات سئونلر گوزگوسونده

بیرینجی بولوم 3

سه شنبه1404,5,28

چکیلش: ادبیات سئونلر

آپاریجی :کریم قربان زاده

https://t.me/Adabiyyatsevanlar

معجز شبستری نین دست خطی
"ال یازماسی"

https://t.me/Adabiyyatsevanlar

اوستاد نقابی نین اثرلری

https://t.me/Adabiyyatsevanlar

شبسترلی یازیچی،معجزشناس اوستاد "محمدعلی نقابی"  ادبیات سئونلر گوزگوسونده
بو وئرلیشین ایکینجی بولومونو سه شنبه گونو ادبیات سئونلر کانالیندا گورون

زمان:سه شنبه1404,6,4
ساعات:9
چکیلش: ادبیات سئونلر

آپاریجی :کریم قربان زاده

https://t.me/Adabiyyatsevanlar

"دییرمان دا"
یازان :آنتوان چخوف
ترجومه:مختار کاظم اوغلو
کوچورن: ویدا حشمتی
حاضیرلایان :ادبیات سئونلر

بو یازینی چرشنبه گونو ادبیات سئونلر کانالیندا اوخویون.

https://t.me/Adabiyyatsevanlar

"دییرمان دا"
یازان :آنتوان چخوف
ترجومه:مختار کاظم اوغلو
کوچورن: ویدا حشمتی
حاضیرلایان :ادبیات سئونلر

 
دییرمانچی «آلکسی بیریوکو» بوی-بوخون و سیر-صیفتی ماتروسلارا-  ژول ورنی اوخویاندان سونرا اوشاقلارین یوخودا گؤرمه‌یه باشلادیقلاری قاییش‌بالدیر و باتمان‌یئریش ماتروسلارا اوخشایان یئکه‌پر، ائنلی‌کورک و اورتایاشلی بیر کیشی داخمانین قاپیسی آغزین‌دا اوتورموشدو و سؤنمک‌ده اولان قلیانینی آرام-آرام سوموروردو. اگنینده جود عسگر ماهوتوندان بوزومتول شالوار، آیاغیندا ایری‌-آغیر چکمه واردی، ائشیک‌ده کئفین ایسته‌ین قدر رطوبت‌لی و سویوق بیر پاییز هاواسی اولسا دا، دییرمانچی پئنجک‌سیز و پاپاقسیز ایدی. رطوبت گتیرن چن-چیسکین ژیلئتین آچیق یاخاسیندان راحتجا کئچیب بدنینه هوپوردو. آمّا دییرمانچی‌نین یئکه و دمیر کیمی مؤحکم بدنی سویوغو حسّ ائله‌میردی. اونون قیرمیزیم‌تیل و اتلی صیفتی همیشه‌کی کیمی دونوق ایدی. بالاجا، سوزگون گؤزلر، قاش-قاباق و شوبهه ایله گاه چایین بندینه، گاه قاباغی چارداقلی ایکی آنبارا، گاه دا قوجا و یؤنتم‌سیز سؤیود آغاجینا باخیردی.
موناستیرا(راهب‌لرین قالدیغی یئر-صومعه) آخیر واختلاردا گلمیش ایکی موناخ(راهب) آنبارلارین یانیندا او یان-بو یانا وورنوخوردو: اونلارین بیری عباسینا پار-پالچیق سیچرامیش، باشینا کؤهنه کئشیش پاپاغی قویموش، هوندور بوی، چال‌ساققال، «کلیوپا»، او بیری ایسه عادی کندلی کورکو گئیمیش، چوخ گومان کی، اصلیّتی گورجو اولان قاراساققال، قارابوغدایی «دیودور» ایدی. اونلار اویوتمک اوچون گتیردیکلری چوودار دولو کیسه‌لری آرابادان یئره دوشوروردولر. بیر یوکووون خدمتچی‌سی یئوسئی جیریق، گؤدک کورک گئین و تام سرخوش حالدا اولان بیغسیز جاوان اوغلان، بیر آز اونلاردان آرالی‌دا، چیرکلی اوتون اوستونده اوتورموشدو. خدمتچی الینده بالیق تورو توتموشدو، اؤز عالمین‌ده تورو سلیقه-ساهمانا سالماقلا مشغول ایدی.
دییرمانچی، اورا-بورا بیر خئیلی گؤز گزدیریب دینمز-سؤیلمز دایاندی. سونرا کیسه‌لری داشییان موناخلارا گؤزونو زیلله‌ییب یوغون و بوغوق بیر سسله دیللندی:
-بو چایدا نییه بالیق توتورسوز حؤرمتلی موناخلار؟ کیم سیزه اختیار وئریب بوردا بالیق توتاسیز؟
موناخلار نه جاواب وئردیلر، نه دؤنوب دییرمانچییا باخدیلار. دییرمانچی بیر آز آرا وئردی، قلیان چکدی و سؤزونه داوام ائله‌دی:
-اؤزونوز گلیب بالیق توتورسوز، هله اوسته‌لیک آل‌-وئر‌چی‌لری ده بورا داداندیریرسیز. من بو چایی سیزدن اجاره‌یه گؤتورموشم. سیزه پول وئریرم‌سه، دئمه‌لی، چایین بالیغی دا منیمدی، هئچ کیمین بوردا بالیق توتماغا اختیاری یوخدو. اللّها عبادت ائله‌ییرسیز، آمّا اوغورلوغو اؤزونوزه گوناه سایمیرسیز.
دییرمانچی اسنه‌دی، بیر آز سوسوب تزه‌دن دئیینمه‌یه باشلادی:
-بونلارا بیر باخ، اؤزلریندن حوققا چیخاریرلار! فیکیرلشیرلر کی، مقدّس ایش‌لره قول قویورلارسا، دای بونلاردان اؤترو قایدا-قانون یوخدو. گؤتوروب محکمه‌یه وئره‌رم، محکمه‌ سنین کئشیش عبانا-فیلانا باخماز. نئچه ایل سویوق زیرزمی‌ده یاتارسان، عاغلین باشینا گلر.  او دا اولماسا، اؤزوم محکمه‌سیز مسئله‌یی یولونا قویارام. دوشه‌رم چایا، بوینوندان ائله باسارام، قیامته‌جن یادینا بالیق دوشمز.
-ناحاق بئله دانیشیرسیز، آلکسی!دوروفئیچ کلیوپا آستادان دیللندی -  اورگینده اللّه خوفو اولانلار بئله سؤزو هئچ الل‍ّه‌ین ایتینه دئمزلر، حال‌بوکی بیز موناخیق!
-موناخیق! -دییرمانچی موناخین آغزینی اگدی.- سنه بالیق لازیمدی؟ هه؟ گل بالیغی مندن آل، آمّا اوغورلوق ائله‌مه.
-ایلاهی!.. به‌یم بیز اوغورلوق ائله‌ییریک؟ -کلیوپا- اوز-گؤزونو تورشوتدو. -بئله دانیشماق نه‌یه لازیمدی؟ دوزدو بیزیم طلبه‌‌لر چایدا بالیق توتوبلار، آمّا اونلارین آرخیماندریت(یوکسک مقاملی) آتادان ایجازه‌سی اولوب. آرخیماندریت آتا بئله حساب ائله‌ییر کی، پول سیزدن آنجاق اونا گؤره آلینیب کی، چایین قیراغیندا تور آتیب بالیق توتاسیز. هئچ ده بوتون چای سیزه وئریلمه‌ییب. چای نه سیزیندی، نه بیزیم. چای اللّه‌یندی...
-آرخیماندریت ده ائله سنین تاییندی. - دییرمانچی قلیانینی چکمه‌سینه چیرپا-چیرپا دئییندی. -او دا آداما توربا تیکمه‌یین اوستاسی‌دیر! آمّا من آرخیماندریتین یانینا گلیب مسئله‌یی آییرد ائله‌مک فیکرینده دئییلم. مندن اؤترو آرخیماندریت‌له سنین، لاپ ائله یئوسئیین ائله بیر فرقی یوخدو. چایا ائنیب، سیزی گؤیه ویزیلدادارام...
-دئیه‌سن  موناخلاری دؤیمه‌یه حاضرلاشیرسیز، اؤزونوز بیلن مصلحت‌دی.
بیزدن اؤترو او دونیا بو دونیادان داها یاخشیدی. «ویسساریون»لا «آنتیپی»یی دؤیموسوز. ایندی ده باشقالارینی دؤیون  اورگیینیز سویوسون.

الیندن توتوب کلیوپانی بیر کنارا چکن دیودور دئدی:
-اونا توخونما!
کلیوپا ایشین نه یئرده اولدوغونو باشا دوشدو و کیسه‌لری داشیماغا باشلادی،  دییرمانچی ایسه دئیینمه‌یینه داوام ائله‌دی. دییرمانچی هر کلمه‌دن سونرا قلیاندان بیر قولّاب آلیب، یئره توپوروب تنبل‌جه‌سینه سؤزون دالینی گتیریردی.  بالیق صحبتی بیتن‌ده دییرمانچی اؤزونون ایکی کیسه‌سینی، گویا نه واختسا موناخلارین حیله‌‌ ایله اله کئچیردیک‌لری ایکی کیسه‌نی یادا سالدی و همین کیسه‌لره گؤره دئیینمه‌یه باشلادی. سونرا سرخوش یئوسئی‌ین بیر ایشه ال وورمادیغینی گؤروب، موناخلاردان ال چکدی و خوروز سسی ائشیتمه‌میش یاغلی سؤیوشلر یاغدیریب خدمتچی‌نین اوستونه دوشدو. موناخلار اوّلجه اؤزلرینی ساخلاییب کؤکس اؤتوردولر، آمّا بیر آزدان کلیوپا دؤزمه‌دی. او، اللرینی بیر-بیرینه ووروب آغلار سسله دیللندی:
-مندن اؤترو بو دییرمانا گلمکدن مشقّتلی ایش یوخدو. مقدّس یئپیسکوپ!  جهنّم عذابی‌دی. عمللی-باشلی جهنّم عذابی‌دی.
دییرمانچی:
-ائله‌دیر گلمه! - دئدی.
-کاش گلمه‌یه‌یدیک، آمّا بورا گلمه‌ییب هانسی دییرمانا گئدک؟ اؤزون فیکیرلش  آخی بورادا باشقا بیر دییرمان یوخدو! دییرمانا گلمه‌ییب یا آجیندان اؤلملی‌سن  یا اویونمه‌میش بوغدا یئمه‌لی‌سن.
دییرمانچی ساکیتلشمه‌دی و دؤرد بیر یانی سؤیوشه غرق ائله‌دی. گؤرونور،  دئیینیب سؤیوش سؤیمک ده اوندان اؤترو قلیان سومورمک کیمی بیر وردیش ایدی.
-شیطانی شئی‌لری دیلینه گتیرمه! -  کلیوپا چاشقین-چاشقین گؤزلرینی دؤیوب یالواردی.
-الله خاطرینا دینمه باری!.
دییرمانچی کیریدی، آمّا کلیوپانین یالوارماغینا گؤره یوخ، اونا گؤره کی،  بندین اوستونده بالاجا بوی، یومرو خوش‌صیفت، مای بؤجه‌یی‌نین قانادلارینا بنزر زولاقلی پالتو گئیمیش بیر قاری گؤروندو. او، اؤزو ایله چوخ دا ایری اولمایان بیر باغلاما گتیرمیشدی و بورا بالاجا بیر ال آغاجی‌نین کؤمگی ایله گلمیشدی.
قاری ضعیف سسله:
-سلام قارداشلار- دئدی و موناخلارا تعظیم ائله‌دی -اللّه کؤمگینیز اولسون! سلام آلیوشئنکا! سلام یئوسئیوشکا!..
-سلام آنا- دییرمانچی قارینین اوزونه باخمادان دیل‌اوجو جاواب وئردی و قاش-قاباغینی تؤکدو.
قاری گولومسونوب نوازیش‌له دییرمانچی‌نین اوزونه باخدی و:
-سنه قوناق گلمیشم، آلیوشئنکا -دئدی.
-نه واختدی گؤرمورم سنی. ائله بیلیرم  دوز مریم آنانین اؤلوم گونوندن بو یانا گؤروشموروک. گلمیشم، خوش-ناخوش  قبول ائله! دئیه‌سن بیر آز سینیخمیسان!..
قاری دییرمانچی‌نین یانیندا اوتوردو و بو یئکه‌پر آدامین یانیندا اونون پالتوسو مای بؤجه‌یی‌نین قانادلارینا داها چوخ اوخشادی.
-هه، مریم آنانین اؤلوم گونوندن!-  قاری سؤزونه داوام ائله‌دی- داریخیردیم بالا، اورگیم سنی ایسته‌ییردی ییغیشیردیم یانینا گلم، یا یاغیش یاغیردی، یا اؤزوم ناخوش اولوردوم...
-ایندی سن بو آیاقلا قصبه‌‌دن گلیرسن؟-  دییرمانچی قاش-قاباقلا سوروشدو.
-قصبه‌‌دن گلیرم... ائودن...
-جان-جثّه‌نین بئله ضعیف واختین‌دا سنه ائوده اوتورماق لازیمدی. دای قوناق گئتمک یوخ... باخ نه‌یه گلمیسن؟ اؤزونه یازیغین گلمیر، هئچ اولماسا  باشماقلارینا حئیفین گلسین.
-سنی گؤرمه یه گلدیم... ایکی اوغلوم وار-  قاری اوزونو موناخلارا ساری توتدو، -بیری بودو، بیری ده واسیلی‌دی. قصبه‌‌ده اولور، ایکیجه‌دیلر. اونلاردان اؤترو منیم اؤلوب-قالماغیمین بیر فرقی یوخدو. اونلار منیم اورگیمین بیر پارچاسی‌دی، عومروم-گونومدو. اونلار من‌سیز یاشایا بیلیرلر، آمّا من اونلارسیز، یقین کی، بیر گون ده یاشایا بیلمه‌رم. قوجالمیشام قارداش. قصبه‌‌دن دوروب اونون یانینا گلمک یامان چتین اولوب.
بیر مدت هئچ کیم دینمه‌دی. موناخلار آخیرینجی کیسه‌نی آنبارا گتیردیلر و آرابادا اوتوردولار کی، دینجلرینی آلسینلار. سرخوش یئوسئی هله ده تورلا قوردالانیردی و مورگو دؤیوردو.
دییرمانچی:
-پیس واخت‌دا گلمیسن آنا. -دئدی- من ایندی کاریاژینویا گئتمه‌لییم.
-گئت! اللّه اوستونجه گئتسین!- قاری کؤکس اؤتوردو. -ایشیندن قالما... من بیر ساعت دینجیمی آلیب دالا قاییدیرام... آلیوشئنکا، واسیایلا اوشاقلار سنه سلام-دوعا گؤنده‌ریردیلر...
-او، یئنه ایچیر؟
-چوخ دا اولماسا، ایچیر. آدام گرک دوزونو دئیه. ایچیر... چوخ ایچمک، اؤزون بیلیرسن کی، بعضا یاخشی آداملاری دا یاخالاییر... اونون دولانیشیغی یاخشی دئییل آلیوشئنکا! اونون حالینا یانیرام... ائوده یئمه‌یه بیر شئی یوخدو، اوشاقلار جیر-جیندیر ایچینده‌دی. اؤزو کوچه‌یه چیخماغا خجالت چکیر، شالوارلاری اله گله‌سی دئییل. گئیمه‌یه باشماق تاپمیر... آلتی نفر بیر اوتاقدا اولوروق. بیر کاسیبچیلیق‌دی، بیر کاسیبچیلیق‌دی کی، اللّه گؤسترمه‌سین... ائله کاسیبچیلیغا گؤره یانینا گلدیم... آلیوشئنکا، بو قارینین خاطرینا واسیلی‌یه ال توت... آخی قارداشیندی!

دییرمانچی سوسدو و گؤزونو یاییندیریب بیر کنارا باخدی.
-او، کاسیبدی. آمّا سن- اللّه‌ا مین شوکور! هم دییرمان اؤزونوندو،  هم باغ-بوستان بئجه‌ریرسن، هم ده بالیق توتوب ساتیرسان... اللّه سنی هامیدان عاغیللی یارادیب، سنی هامیدان اوجایا قالدیریب. ایلاهی سنه هر شئی وئریب، اؤزو ده تک‌سن... آمّا واسیانین دؤرد اوشاغی وار، اوسته‌لیک  من باشی باتمیش دا اونا بیر یوکم. جمعی-جوملاتی یئددی مانات آیلیق آلیر. بو قدر آدامی یازیق نئجه دولاندیرسین؟  کؤمک ائله آلیوشئنکا.
دییرمانچی دینمه‌دی و جدّ-جهدله قلیانا تنبکی دولدورماغا باشلادی.
-بیر شئی وئریرسن؟-  قاری سوروشدو.
دییرمانچی آغزینا سو آلمیش آدام کیمی لال-کار دایاندی. قاری جاوابی گؤزله‌مه‌ییب آه چکدی، موناخلارا و یئوسئ‌یه باخیب آیاغا قالخدی و دئدی:
-اللّه کؤمگین اولسون، وئرمه، من بیلیردیم کی وئرمه‌یه‌جکسن... سنین یانینا ان چوخ دا نازار آندرئیچه گؤره گلمیشم... گؤزونون یاشینی تؤکوردو. آلیوشئنکا! اللریمی اؤپوب یالواریردی کی، من سنین یانینا گلم، خواهیش ائله‌یم کی...
-او، نه ایسته‌ییر؟
-خواهیش ائله‌ییر، سن اونون بورجونو قایتاراسان، دئییر. اویوتمه‌یه چوودار آپارمیشدیم. آمّا او، منه بیر چؤپ ده وئرمه‌دی.
-باشقاسی‌نین ایشینه قاریشماق سنین ایشین دئییل آنا. -  دییرمانچی ناراضی‌لیق‌لا دیلله‌ندی- سنین ایشین اللها دوعا ائله‌مکدی. اؤز ایشین‌له مشغول اول.
-دوعا ائله‌ییرم، آمّا نه ایشدیرسه، اللّه منیم دوعالاریمی ائشیتمیر. واسیلی دیلنچی گونونده‌دی. من اؤزوم باشقاسی‌نین پالتوسونو گئیینیرم،  آمّا سن، ماشاءاللّه یاخشی یاشاییرسان. اللّه اؤزو سنه وئریر. اللّه اؤزو بیلیر سنین نئجه قلبین وار. آخ، آلیوشئنکا پیس آداملار سنی پیس یولا چکیب‌لر! آخی سن منیم هر اوزونه یاخشی بالامسان: هم عاغیللی‌سان، هم یاراشیقلی‌سان، هم ده تاجیرلر تاجیریسن. آمّا آدام اولا بیلمیرسن! قاراقاباقسان، اوزون گولمور. خوش سؤز دئمه‌یین یوخدو، نا اینصافسان. وحشی حئیوانا اوخشاییرسان... گؤر نه گونده‌سن؟ اوزوندن زهریمار یاغیر! جاماعت سنین باره‌نده نه‌لر دانیشیر، دردین آلیم! سوروش بو آداملاردان. دانیشیرلار کی، سن جاماعتا دیوان توتورسان، جاماعتین قانینی سورورسان، قولدور ایشچی‌لرین‌له بیرلشیب گئجه‌لر یولدان اؤتن‌لری سویوب-تالاییرسان، آت اوغورلاییرسان...  سنین دییرمانین اللّه‌سیز بیر یئر کیمی تانینیب... قیزلار،  بالاجا اوشاقلار اورا یاخین دوشمکدن قورخورلار. هامی سندن قاچیر. کاین(قابیل)دن، ایرود(هرود)دان باشقا سنه نه آد وئرمک اولار!؟* (قابیل قارداش قاتیلی، هرود سا ظالیم، بونلاردان ساوای سنه نه آد وئرمک اولار؟)
-عاغیل‌سیز آدامسان آنا!؟
-هارا آیاق قویورسان، اوردان آیاق کسیلیر، هاردا نفس آلیرسان، اوردان اینس-جینس قاچاق دوشور. سنین باره‌نده آنجاق بو سؤزلری ائشیدیرم. دئییرلر: «کاش بیری چیخیب بونو اؤلدوره‌یدی، یا دا توتایدیلار بونو،  جانیمیز دینجله‌یدی». هانسی آنا بونا؟دؤزر، هانسی آنا؟ آخی سن منیم دوغما بالامسان، جانیم-جییریم‌سن...
دییرمانچی آیاغا قالخیب:
-واختدی، من گئتمه‌لی‌یم - دئدی. -خوداحافیظ آنا!
دییرمانچی آرابانی دیییرله‌دیب آنباردان چؤله چیخارتدی، آتی گتیردی، اونو ایت کیمی ایته‌له‌ییب، قوشقونون آراسینا سالدی و آرابایا قوشماغا باشلادی. قاری اوغلونون یانینجا آددیملادی، اونون اوزونه باخدی و گؤز یاشیندان ایسلانمیش کیرپیک لرینی آرام-آرام قیرپدی.
اوغلو کؤینه‌یی تلم-تلسیک اگنینه کئچیرنده قاری:
-خوداحافیظ - دئدی. -ساغ-سلامات اول! اللّه کؤمگینده دورسون، بیزی یاددان چیخارتما. دایان، سنه پای گتیرمیشم-  قاری سسینی ائندیریب دویونچه‌نی آچا-آچا دیللندی -دونن کئشیشین آروادینا باش چکمه‌یه گئتمیشدیم، اوردا وئردیلر... من ده سندن اؤترو ساخلادیم...

قاری الینده‌کی نانه‌لی قوغالی اوغلونا ساری اوزاتدی...
-گئری دور! -  دییرمانچی قیشقیریب قارینین الینی کنارا ایته‌لدی.
قاری پرت اولدو، قوغالی الیندن یئره سالدی و ساکیتجه چایین بندینه ساری گئتدی... بو صحنه‌‌ آغیر بیر تأثّرات عمله گتیردی. دهشته گلیب قیشقیریشان موناخلار بیر یانا، حتی سرخوش یئوسئی ده یئرینده قورویوب قالدی و قورخو ایچینده گؤزلرینی آغاسینا زیلله‌دی. موناخلارین و خدمتچی‌نین صیفتینده‌کی ایفاده‌نین نه دئمک اولدوغونو آنلادیمی، سینه‌سینده چوخدان مورگویه گئتمیش هانسی سا دویغو اویاندیمی، نه باش وئردی‌سه، دییرمانچی‌نین دا اوزونده قورخویا بنزر بیر شئی گؤزه دگیب یوخا چیخدی...
-آنا! -دییرمانچی اوجادان.سسلندی.
قاری سکسندی و بویلانیب باخدی.  دییرمانچی تلسیک الینی جیبینه سالدی و جیبیندن پول کیسه‌سی چیخارتدی...  کیسه‌دن بیر توپا کاغیذ پول و بیر خئیلی ده گوموش پول چیخاریب:

-گؤتور - دئدی.
دییرمانچی پول تورباسینی الینده ائشه‌له‌ییب ازیشدیردی، نه‌دنسه دؤنوب موناخلارا باخدی و بارماقلاری ایله پولو تزه‌دن بیر ده ازیشدیردی. کاغیذ و گوموش پوللار بارماقلار آراسیندان بیر-بیر سوروشوب تزه‌دن کیسه‌یه دولدو و الده آنجاق بیر ایگیرمی‌ قپیک‌لیک قالدی... دییرمانچی همین پولا باخدی، اونو بارماقلاری آراسیندا سورتدو،  شاققیلتی ایله گولوب، قیپ-قیرمیزی رنگ آلیب پولو آناسینا وئردی.

https://t.me/Adabiyyatsevanlar

 

👍🏿 سکانسی از فیلم جنایت بی‌دقت به کارگردانی شهرام مکری

https://t.me/Adabiyyatsevanlar

اوشاق ادبیاتی
هرهفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین

https://t.me/Adabiyyatsevanlar

اوشاق ادبیاتی

📌 وقتی تشویق ناشناخته_تر از تنبیه است...در سکانسی از فیلم مستند مشق شب،  از کودکان ابتدایی دربا...

https://t.me/Adabiyyatsevanlar

اوشاق ادبیاتی

 « مجلیس ده یئرینی تانی »
یازان : علی صمدلی 
کؤچورن : علی آغ گونئيلی  -  ابرازی 
کتاب :‌ ژنرالین اوشاقلیغی  - ناغیللاربؤلومو
 
آیی مئشه نین حئیوانلارینی قوناق چاغیرمیشدی . اونون ماغاراسی باشدان ـ باشا بزنمیشدی . سال داشدان یونولموش اوستوللارین اوستونه دادلی یئمک لر دوزولموشدو . آیی کاهادان بئش – اون متر آرالی دایانیب ، گلن قوناقلاری حؤرمتله قارشیلاییر و ماغارایا دعوت ائدیردی. دووشان قوناقلیغا بوتون حئوانلاردان تئز گلمیشدی . آیی اونونلا گؤروشوب  ، ماغارانین آچیق قاپیسیندان ایچری سالدی . 
دووشان سیرا ایله دوزولموش اوتوراجاق داشلارین اوستوندن هوپپانا – هوپپانا مجلیسین لاپ یوخاری باشینا گئتدی . یئرینی راحاتلاییب سفره یه دوزولموش یئمک لره باخدی . آز قالدی آغزینین سویو آخسین . الینی - الینه سورتره ک :
ــ  بیرجه قوناقلار تئزگلئیدی – دئدی .
ائله بو واخت  آلا بزک پالتار گئیمیش زئبر ( چؤل ائششگی )ماغارایا داخل اولدو . او ، مئشه نین نادر حئیوانی اولدوغو اوچون آیی اونا : 
ــ  بویور ، بویور ، ــ دئیه ـ دئیه مجلسین لاپ یوخاری باشینا گتیردی و اوزونو دوشانا طرف توتاراق : 
ــ  دووشان قارداش ،  بیر بالاجا اؤزونو بوطرفه سوروشدور ، دئدی .
دووشان کیریمیش جه ، بیر از آشاغییا طرف اوتوردو . زئبر یوخاری باشدا یئرینی راحاتلادی. 
زئبردن سونرا مجلیسه فیل داخل اولدو . اونون گلیشینی آیی گؤزله میردی . آیی اونودا سئوینجله قارشیلاییب حؤرمتله ماغارایا دعوت ائتدی . فیل ماغارانین داش قاپیسیندان اؤزونو زورلا ایچری سالا بیلدی . اونون گلیشی ایله زئبر اؤزو آیاغا قالخدی : 
ــ  فیل جنابلاری بورایا بویورون ، - دئیرک اؤز یئرینی اونا وئردی. 
دووشان ایسه بیر قدر ده آشاغییا طرف سوروشمه لی اولدو . او، یئریمی  یئنیجه راحاتلامیشدی کی ، ماغارانین ایچینه بیر بویون اوزاندی . بو زورافه ایدی . او ، بوینونو ایه – ایه گلیب زئبرین یانیندا دایناندی . زئبر دووشانی قولوایله دومسوکله دی . دووشان اؤزونو آشاغایا طرف سوروشدوردو . 
آراندان بیرآز کئچمیش ماغارانین قاپیسیندا جاناوارین ایتی دشلری پاریلدادی . فیلدن باشقا بوتون حئیوانلار قورخوب آیاغا قالخدیلار. دووشانین آیاقلاری اسیردی . مجلیسه گلمه یینه ده پئشمان اولموشدو .یاخشی کی جاناوار دووشانا گؤزونون اوجویلادا باخمادی . اونا فیلین یانیندا یئر وئردیلر . دووشان بیر آزدا آشاغی طرفه سوروشمه لی اولدو . 
چاققاللا تولکو مجلیسه ایکی سی بیر یئرده گلمیشدیلر. اونلارین گلیشینی دووشاندان باشقا حیس ائدن اولمادی . دووشان قورخوسوندان ایکی یئر آشاغا طرفه هوپپانیب چاققاللا تولکویه یئر وئردی . 
شیر بوتون حئیوانلاردان آخیردا گلیب چیخدی . اونون گلیشی ایله بوتون سس – کوی کسیلدی . حتی فیلده آیاغا قالخدی . شانینه آلقیشلار سؤیلندی . آنجاق شیرین گلیشینی هامیدان چوخ دووشان حیس ائله دی . چونکی ،  او ، آرتیق ماغاردان چؤلده ایدی . اوتورماغا یئر قالمامیشدی . ایندی او ، ماغارانین آچیق قاپیسیندان ایچری باخیر . وهامینی آیدین گؤره بیلیردی . قوناقلیق صاحیبی آیینین مجلیسه داخیل اولماسی اونو بونداندا محروم ائتدی . چونکی آیینین اؤزونون اوتورماغا یئری یوخ ایدی . او ، ماغا رانین آغزیندا آیاق اوسته دایانیب ساغلیقلار دئدیییندن دووشان ایچرینی گؤره بیلمیردی .  او ، توللانا – توللانا آیی نین کاها سی نین باشینا فیرلانیردی. هردن قولاقلارینی کاهانین داشلارینا توتاراق هئچ اولماسا مجلیس ده دئییلن لری ا ئشیتمک ایسته ییردی . ایشین ترسلیییندن  ، کاهانین دیوارلاری چوخ قالین ایدی . هئچ نه ائشیده بیلمیردی . 
۱۹۸۴

https://t.me/Adabiyyatsevanlar

اوشاق ادبیاتی
متن و ترجمه آهنگ

Roar از Katy Perry
I used to bite my tongue and hold my breath

من همیشه زبونم رو گاز میگرفتم و نفسم رو حبس میکردم

Scared to rock the boat and make a mess

از تکون دادن قایق و خرابکاری بعدش ترس داشتم

So I sat quietly, agreed politely

پس آروم و بیصدا نشستم و مودبانه موافقت کردم

I guess that I forgot I had a choice

فراموش کرده بودم که یک انتخاب داشتم

I let you push me past the breaking point

خودم اجازه دادم به تا پرتگاه ببریم

I stood for nothing, so I fell for everything

پای هیچ چیز ایستادم و همه چیز رو باختم

You held me down, but I got up

پرتابم کردی ، اما خودمو بالا کشیدم

Already brushing off the dust

حالا دیگه عوض شدم

You hear my voice, your hear that sound

اون صدای منه ، میشنوی؟

Like thunder, gonna shake the ground

مثل ساعقه ، زمین رو خواهم لرزوند

You held me down, but I got up

پرتابم کردی ، اما خودمو بالا کشیدم

Get ready cause I've had enough

آماده باش چون طاقتم سر اومده

I see it all, I see it now

همشو میبینم

I got the eye of the tiger, the fire, dancing through the fire

چشمایی مثل ببر دارم , آتش خالصم ، توی آتش میرقصم

Cause I am a champion and you're gonna hear me roar

چون من بهترینم ام و صدای غرش منو خواهی شنید

Louder, louder than a lion

بلندتر از غرش شیر

Cause I am a champion and you're gonna hear me roar

چون من بهترینم ام و صدای غرش منو خواهی شنید

Oh oh oh oh oh oh

You're gonna hear me roar

صدای غرش منو خواهی شنید

Now I'm floating like a butterfly

حالا دیگه مثل یک پروانه روی آب شناور هستم

Stinging like a bee I earned my stripes

مثل یک زنبور راه راه نیش میزنم

I went from zero, to my own hero

از صفر شروع کردم تا به قهرمان درونم رسیدم.

https://t.me/Adabiyyatsevanlar