ادبیات سئونلر

بالاجا آغ بالیق / ائلمان موغانلی

قارا ناققانین دیش لری آراسیندان یاشاما قاییتمیش بالاجا آغ بالیق، ساحیلین دینج یئرینده قوم لارین اوستونه سپلنمیش آغ یومرو داش لارین آراسیندا آلا جان دوشدو، آغیر بیر یوخودان آییلاندان سونرا، یاواش-یاواش جانلانیردی، آنجاق هله ده قورخو جانیندایدی. داش لار اونون اؤز رنگینده اولدوغونا اونو دوشمان گؤزوندن ایتیریردیلر، اونا گؤره ده کیمسه سیز بالیغین گؤزونده او یومرو داش لار دنیز دیبینین ان سئومه لی شئی لری ایدیلر. گونو گونوندن، بالیق اونلارا آرتیق اورک باغلاییردی، اونلارین آغ بویاغی بالیغین تکجه دیلخوشلوغو ایدی اون اوچون ده سحردن آخشاما بالیغین ایشی دالغالار قوندوران توز-تورپاغی داش لارین اوزوندن سیلمک ایدی، بالاجا آغ بالیغین قولاغی سانیردی آغ داش لار دانیشیرلار، یازیق بالا بالیق سئوینجدن اوچماغا قانات چیخاردیردی، و او سس لر هر گون داها آرتیق گوجله نیردیلر، بالاجا بالیق یاواش-یاواش قورخونو اونوتموشدو و یئنی بیر یاشام یاشاماقدایدی، قولاغینی توتوردو داش لارین قارنینا، اونلاری ائشیدیردی اونلارلا دانیشیردی و گون لری گؤز قیرپیمی کیمی باشا ووروردو.
آنجاق بیر گون، گون اورتاغا چاغی دونیا اوچماغا باشلادی بالیغین باشینا، یومورتالار بیر-بیر سینیردیلار و بالاجا بالیغا تانیش گلمه ین قورخونج حئیوان لار چیخیردیلار دنیزه، بالاجا بالیق گؤزلرینه اینانا بیلمیردی، آغ یومرو داش لارین ایچیندن چیخان چیرکین حئیوان لار بالیغین بورنوندان گتیریردی آغ داش لارین یانیندا داددیغی آغ گون لری، یازیق بالیق گؤردوگو هر بیر شئیین ایچینده نه اولدوغونا فیکیرلشیردی اوره یینده دئییردی باشقا داش لارین ایچینده کی لر ندیر؟ قوم لارین ایچ بویاسی نه؟ دنیزده کی تپه لرین ایچی نئجه؟ و بالیغین بئینینه جومموش بونلارا تای فیکیرلر، اونو دلی ائتمکده ایدیلر، هر بیر ساعات بیر ایل کئچیردی آغ بالیغا، گئجه یارییا چاتمیشدی، آی دنیزین دیبینی ائله ایشیقلاندیرمیشدی سانکی آی دا بالیغین ایچینده کی فیکیرلری بیلمک ایستیردی، پلمه آیین قاباغینی کسن همن، بالاجا بالیق یورغون گؤزلرینه دینجلیک وئرمه میش، اؤزگه لشمیش ساحیل قیراغی نین داشینی بیر یوللوق آتیب و لئی کیمی سیخدی دنیزین اوره یینه.

https://t.me/Adabiyyatsevanlar