ادبیات سئونلر

«پیانو» حئکایه‌
یازان«کنعان حاجی»
کوچورن:" ویدا حشمتی"
حاضیرلایان:" ادبیات سئونلر"

قیزین اینجه، ظریف بارماقلاری پیانونون دیل‌لری اوزه‌رینده آخیب گئدیردی، موسیقی ایسه نه‌دنسه قفسده‌کی قوش کیمی چیرپینیردی، بوغولوردو.
اونلار آیاق ساخلادیلار. بو نه قریبه سس ایدی بئله؟ اوجقار داغ کندینده، توزلو-تورپاقلی یولدا هانسی واختلارین‌سا، دومانلی خاطیره‌سینه بنزه‌ین بو سسه، ائله‌بیل نارین قوصّه‌ ده قاریشمیشدی؛ گؤرونن منظره‌یه تامامی‌له یاد اولسا دا، اطرافا، سویوق هاوایا، لاپ ائله انسان قلبینه آزجا ایستی‌لیک، دوغمالیق گتیریردی. شهردن گلن‌لری آیاق ساخلاماغا مجبور ائدن ده بو محرم جاذیبه ایدی.
سس گلن سمته دوغرو ایرلیله‌دیلر، آمّا عاغیللارینا هئچ جور سیغیشدیرا بیلمیردیلر کی، پیانو سسی گؤردوکلری قازمادان گله بیلر. داغیدیلمیش مزاری آندیران اویوغا یالنیز سوکونت یاراشیردی. باشلارینی قالدیریب توتقون سمایا باخدیلار، زنجیرلنمیش سسی عبث یئره اوردا آختاردیلار. هاراسا تلسن بولودلاردان باشقا گؤزلرینه هئچ نه دگمدی. مبهم آنلاشیلمازلیق دویغوسو اونلاری قازمایا دوغرو چکیب آپاردی.
هاوادان چورونتو قوخوسو گلیردی. اونلار اؤز آرالاریندا مباحثه ائدیردیلر. قادین بو سسین هئچ ده پیانو سسی اولمادیغینی، هانسی‌سا اوشاغین ملاحتلی سس‌له نغمه اوخودوغونو اصرارلا بیلدیریردی. کیشی ایسه عنادیندان ال چکمیردی هارداسا: پیانو چالینیردی، والسالام!
قازما ایله اوزبه‌اوز دایانمیشدیلار. آدامین سومویونه ایشله‌ین رطوبت چؤله ووروردو. باخیشدیلار، قادینین باخیشلاریندان حاقلی اولدوغونا امین‌لیک حسّی اوخونوردو، کیشی‌نین‌سه اوزونده تردّودون شکلی حکّ اولونموشدو. نغمه‌نین بیر آددیملیغیندا ایدیلر. یوخ، نمیش‌لیک قوخویان بو قازمادا پیانو اولا بیلمزدی. کیشی آروادینین ظنّین‌ده یانیلمادیغینی اوره‌گینده اعتراف ائتدی.
قیزین سسی کؤکدن دوشموش پیانونو آندیریردی. بوردا یاشایان انسانلارین حیاتی دا کؤکدن دوشموشدو، کیشی‌نین بئینیندن بو فیکیر کئچدی، قهر بوغازیندا دویونلندی. قازمایا یاخینلاشماغا اورک ائله‌مه‌دی. قادین قاباغا دوشوب هر آن قوپماغا حاضر اولان کؤهنه، تاختا قاپینی آستاجا دؤیجه‌لدی. سینیق شوشه‌سینی کاپرون(مصنوعی الیاف) عوض ائدن چوروک پنجره آرخاسیندان انسان کؤلگه‌لری گؤزه دگدی. سانکی سسین «ایپی‌نی» کسدیلر، قویویا دوشوب «گومب» ائله‌دی. هاندان هانا قاپی جیریلتی ایله آرالاندی، ایچریدن ساچ-ساققال ایچینده ایتیب-باتمیش اورتا یاشلی بیر کیشی‌نین باشی گؤروندو. تعجب هئیکلینه بنزه‌ییردی.
-سیزه کیم لازیمدیر؟ - دئیه سوروشدو.
قادین کیشی‌نین ناراحاتلیغینی سوووشدورماق اوچون گولومسه‌دی و اونو انتظاردان قورتارماق اوچون تئز مطلبه کئچدی:
-هر واختینیز خئییر. ناراحات اولمایین، بیز خئیريّه‌ جمعيّتیندنیک. ایمکانسیز عائله‌‌لرین وضعيّتی ایله ماراقلانیریق و مقصدیمیز سیزه کؤمک ائتمکدیر.
کیشی آزجا توختادی، لاکین تردّود ایچینده هله ده نسه فیکیرلشیردی.
-هه؟ نه یاخشی... ایندییه‌جن هئچ بیزی ایتیریب-آختاران اولماییب آخی. آنجاق... سیزی ایچری دعوت ائده بیلمیرم. منی دوزگون باشا دوشون. ائله وضعيّت‌ده یاشاییریق کی... آرواد-اوشاقلا هامیمیز بیر اوتاقدا قالیریق.
قادینین اری ملایم‌جه‌سینه گولومسه‌ییب ایره‌لی یئریدی:
-هئچ ناراحات اولمایین. همیشه بئله وضعيّت‌ده یاشامایاجاقسینیز کی. حؤکومتیمیز چالیشیر کی، سیزین سوسیال دورومونوز یاخشیلاشسین. سیزه هر جور شرایط یارادیلاجاق.

-اللّه بدنام قونشولاریمیزین بلاسینی وئرسین! کندده توپ داغیتماز ائویم واردی. حیاط-باجامدا نه آغاج دئسن اکمیشدیم. گلن، گؤرن حئیران اولوردو. بیر گئجه‌ده بیزی یوردوموزدان-یووامیزدان ائله‌دیلر.

بئلی درد یوکوندن اگیلمیش کیشی قهرلندی، سؤزونون آردینی گتیره بیلمه‌دی.
ایچری کئچدیلر. گؤردوکلری منظره قارشیسین‌دا هر ایکیسی دونوب قالدی. بورا هم مطبخ ایدی، هم یاتاق اوتاغی، هم قوناق اوتاغی... آمّا هئچ بیری دئییلدی. سککیز-دوققوز یاشلاریندا بیر قیز اوشاغی اوزون‌سوو کارتون قوتوسونون اوزه‌رینه کارانداشلا(مداد) پیانو دیل‌لری چکمیشدی و اونون اوزه‌رینده موسیقی آلَتی کیمی «ایفا» ائدیردی. بو ظریف، چلیم‌سیز قیزجیغازین ایچینده جیلوولانماز بیر گوج واردی کی، اونو رطوبت قوخولو قازمادا اؤز الوان موسیقیلی دونیاسینی یاراتماغا سؤوق ائدیردی. بو دیبسیز قارانلیقدا قیزجیغاز او ایشیغی، گؤره‌سن هاردان تاپمیشدی؟ کیشی بو سوالا جاواب آختارا-آختارا قیزین باشینا سیغال چکدی.
-سن موسیقینی چوخ سئویرسن؟
قیز گولومسه‌دی:
-هه...
-بؤیوینده کیم اولاجاقسان؟