امیل_زولا

اری_به_زندگی

اگر از من بپرسید که
برای انجام چه کاری
به این دنیا آمده ام،
من،
به عنوان یک هنرمند،
به شما پاسخ خواهم داد که :
من اینجا هستم تا
با صدای بلند زندگی کنم


https://t.me/Adabiyyatsevanlar

واله قوجا

عوض ائله فصیل‌لردن بیرینی،
ایلده بیرجه دفعه سن ده قاییت گل!
باهار اول، پاییز اول، نه اولورسان اول،
ایلده بیرجه دفعه سن ده قاییت گل!

قوربانام سنینله قیش گلن گونه،
قار، یاغیش عؤمرومه خوش گلن گونه.
قوشول یاشیم اوسته یاش گلن گونه،
ایلده بیرجه دفعه سن ده قاییت گل!

یئنه ده بیر داغین اتک یئرینده،
سنی گؤزله‌ییرم چیچک یئرینده.
گیزلن بیر چیچه‌یین لچک یئرینده،
ایلده بیرجه دفعه سن ده قاییت گل!

دردینی سینه‌مده بیتیرن گون‌تک،
سنی گؤزلریمدن ایتیرن گون‌تک،
ائله گئدیشینی گتیرن گون‌تک،
ایلده بیرجه دفعه سن ده قاییت گل!

قاییت کی، عؤمرومده توی بایرام اولسون،
گلدییین او هفته، آی بایرام اولسون،
منه ده بیر دفعه قوی بایرام اولسون،
ایلده بیرجه دفعه سن ده قاییت گل!

«والئه»ام، گئتدییین فصیل ده گلیر،
دونیایا بیر یئنی نسیل ده گلیر،
وطنسیز عؤمرومه بیر ایل ده گلیر،
ایلده بیرجه دفعه سن ده قاییت گل!...

https://t.me/Adabiyyatsevanlar

(نزار قبانی)

دلم‌ می‌خواست‌ در عصر دیگری‌ دوستت‌ می‌داشتم‌
در عصری‌ مهربان‌تر و شاعرانه‌تر
عصری‌ که‌ عطر کتاب
عطر یاس‌ْ و عطر آزادی‌ را بیشتر حس‌ می‌کرد.

دلم‌ می‌خواست‌ تو را
در عصر شمع‌ دوست‌ می‌داشتم‌
در عصر هیزم‌ و بادبزن‌های‌ اسپانیایی‌
و نامه‌های‌ نوشته‌ شُده‌ با پَر
و پیراهن‌های‌ تافته‌ی‌ رنگارنگ‌
نه‌ در عصر دیسکو
ماشین‌های‌ فراری‌ و شلوارهای‌ جین.

دلم‌ می‌خواست‌ تو را در عصر دیگری‌ می‌دیدم‌
عصری‌ که‌ در آن‌
گنجشکان‌ ، پلیکان‌ها و پریان دریایی‌ حاکم‌ بودند
عصری‌ که‌ از آن نقاشان‌ بود
از آن موسیقی‌دان‌ها
عاشقان‌
شاعران‌
کودکان‌
و دیوانگان‌.

دلم‌ می‌خواست‌ تو با من‌ بودی‌
در عصری‌ که‌ بر گل ، شعر بوریا و زن‌ ، ستم‌ نبود
ولی‌ افسوس‌
ما دیر رسیدیم‌
ما گل‌ِ عشق‌ْ را جستجو می‌کنیم‌
در عصری‌ که‌ با عشق‌ْ بیگانه‌ است‌...
https://t.me/Adabiyyatsevanlar

کریم گول اندام

باخیشلاریندان دویدوم
کؤنلومده قارا خرمن چاتدیغینی!
و اوزونو دؤندردیگیندن
گنج ایکن منی قوجالتدیغینی!

من بو حیاتدا کاچ کره گؤردوم گولوم
قوجامان گیردکان آغاجیمیزین
بوداقلاریندان جوجه‌رن یارپاقلارینی
تام سن باخدیقین یئردن؟!
آمما نه بوداق او بوداق ایدی
نه یارپاق او یارپاق!
یئنی‌لری یئر آلمیشدی اسکی دال‌لاردا!
سن نردن قالارسان اولدوغون حاللاردا؟
من ده او من دئییلم آرتیق!
باشقا بیر من، بیر باشقا سن قارشیسیندا.
باخما اؤتن گونلر هله یادیمیزدادیر!
اونلار بیرر- بیرر آغیز دادیمیزدادیر!
۲۰ خرداد ۱۴۰۴ – اورمو

https://t.me/Adabiyyatsevanlar

اوچ آدامین قیرمیزی گونو
✍یازان: واقیف نصیب
کؤچورن: سحرخیاوی
حاضیرلایان: ادبیات سئونلر

تقویم‌لرده بایراملارین رمزینه چئوریلمیش آل قیرمیزی رنگ‌لری، هم ائللرین- اوبالارین آرزولاری‌نین آچیلمیش آل غنچه‌لرینه، هم ده بایرام مراسیملرینده بویانان یومورتالارین جوجه‌لرینه ده بنزتمک اولار.
آمما آداملارین اؤزلری‌نین ده یاشادیقلاری عؤمورده اؤز بایراملاری اولور کی، بیر تک اونلارین اوره‌ییندن تیکان چیخاریب وارلیقلارینی ظفرلری‌نین آل قیزمیزیسینا بویاییر.
بنده‌لری‌نین سایینا گؤره ائللرین، عؤمورلری‌نین ایللرینه گؤره بنده‌لرین بایراملاری بارماقلا ساییلا بیله‌جک قدر آز اولدوغوندان، طبیعت‌ده ده اونلارین رمزینه چئوریلمیش آل قیرمیزی‌نین اَن طبیعی رنگینی اؤز نادیر داشلاریندان بیرینه بخش ائتمیشدی،- یاقوتا.
بو دفعه اوچ عادی بنده‌نین دئییل، بیر مملکتین اوچ اَن بؤیوک منصب صاحیبی‌نین، اوره‌کلریندن تیکان چیخارمیش قیرمیزی گونوندن دانیشاجاغیق.

بویازینین آردینی ادبیات سئونلر کانالیندا اوخویون.

https://t.me/Adabiyyatsevanlar

‌
اوچ آدامین قیرمیزی گونو
✍یازان: واقیف نصیب
کؤچورن: سحرخیاوی
حاضیرلایان: ادبیات سئونلر

تقویم‌لرده بایراملارین رمزینه چئوریلمیش آل قیرمیزی رنگ‌لری، هم ائللرین- اوبالارین آرزولاری‌نین آچیلمیش آل غنچه‌لرینه، هم ده بایرام مراسیملرینده بویانان یومورتالارین جوجه‌لرینه ده بنزتمک اولار.
آمما آداملارین اؤزلری‌نین ده یاشادیقلاری عؤمورده اؤز بایراملاری اولور کی، بیر تک اونلارین اوره‌ییندن تیکان چیخاریب وارلیقلارینی ظفرلری‌نین آل قیزمیزیسینا بویاییر.
بنده‌لری‌نین سایینا گؤره ائللرین، عؤمورلری‌نین ایللرینه گؤره بنده‌لرین بایراملاری بارماقلا ساییلا بیله‌جک قدر آز اولدوغوندان، طبیعت‌ده ده اونلارین رمزینه چئوریلمیش آل قیرمیزی‌نین اَن طبیعی رنگینی اؤز نادیر داشلاریندان بیرینه بخش ائتمیشدی،- یاقوتا.
بو دفعه اوچ عادی بنده‌نین دئییل، بیر مملکتین اوچ اَن بؤیوک منصب صاحیبی‌نین، اوره‌کلریندن تیکان چیخارمیش قیرمیزی گونوندن دانیشاجاغیق.
هم ده تصادوفن هر اوچ اوره‌کدن تیکان چیخارما مراسمی‌نین عنوانی بیر مکان- آذربایجان اولموش. قیرمیزییا بورونموش بیر اؤلکه‌نین کلّه‌چارخیندا کی کورسوده اَیله‌شن استالین( باکی دؤرونده کُبا)‌ تهران کنفراسینا یولا دوشمه‌ییندن بیر گون اوّل ائله باکی‌دا، اؤز کُبا دؤرونون بیر انتقامینی آلیب، اؤزونون ان بؤیوک فردی بایرامینی یاشایا بیلمیشدی.
اوجسوز- بوجاقسیز بیر مملکتین هر کونج- بوجاغیندا، چشمه‌یی آرخاسیندان" خالق دوشمن‌لرینی" گؤره بیلن لابرئنتی بئرییادا، باکی‌دا، بیر زامانلار ایکیجه کلمه‌سی ایله اونون باشینی یوخا چیخارمیش بیر آدامین کاخت چارخی ایله باشیندا تورپ اکیب، اؤز باشینی گئری قایتارمیش، همین شراب رنگینده شخصی بایرامینی یاشامیشدی. اونو ایلک محبتی اؤنونده ایکیجه کلمه‌سی ایله خوروزا یوکله‌میش
بئله‌جه بلکه‌ ده عؤمرونون، اونون باهاسینا باشا گله‌جک خوروزونو بوراخمیش بیر بنددن ده سید اولادی میر جعفر اؤزونه‌مخصوص حئیفینی آلیب، اوستدن خوروز قویروغو چای ایچه- ایچه باقیروف عؤمرونون رنگی نوروز یومورتاسینا چالان بایرامینا قووشموشدو.

قارا "بَهَر"

ایشی‌نین باشینا یئنی‌جه چاتیب، وظیفه‌سینین ان اوجا کورسوسوندن مملکتده بویلانماغا حاضیرلاشدیغی زامان، هر دفعه نظر سالاندا ایچیندن قورخونون هم قارا قیزدیرمایا، هم قیروو اوشوتمه‌سینه بنزه‌ین بورکوسو و سازاقی کئچدی( قارشیسیندا کی ال آلتیلاری‌نین حاضیرلادیغی معلوماتلار واسطه‌سی ایله او باشدان اولکه‌نین دؤرد سمتینه دؤرد گوز بویلانماغی وردیش ائتمیشدی. بو معلوماتلار دا جومله رایونلاردا کی گؤزدن- قولاقدان ایتی‌، اینصافدان، مروّتدن کوت خبرچیلری‌نین آداملارین تویونا، وایینا چالدیقلاری زورلانار اساسیندا حاضیرلانیردی و همین گوزگودن صابیرآباد بوستانیندان نئچه قارپیز اوغورلاندیغینی،‌چئیران‌چؤل فرماسیندان نئچه توغلو چیخداش ائدیلدیینی، تالیش زوناسیندان نه قدر کورو کوروندویونو گؤرور، اونلاری تالایان کاتیب‌لرین، فرما مودیرلری‌نین، قارا تاجیرلرین گؤزونه آغ سالماغا حاضیرلاشیردی).
سحر- سحر رهبرین اؤزونون زنگ ائله‌مه‌سینین آرخاسیندا یئری- گؤیو تیتره‌ده بیله‌جک بیر سبب اولا بیلردی. اونون باکی‌دان تهرانا گئده‌جه‌یینی بیلیردی. گؤندردییی قوناغی راحاتلاییب یولا سالماق اوچون بوتون تدبیرلر گؤرولموشدو. هیجان فیت‌لرینین ان زیلینه بنزر بو زنگ هاردان چیخیردی؟ آیاغا دوروب فراغت وضعیتی آلدی. بوغازینی آریتلاییب خیریلتیدان تمیزله‌دی. و ایلک ایکی کلمه‌نی سؤیله‌دی:
- ائشیدیرم اییوسیف ویساریونوویچ...
همین کی کلمه‌نی بیرینجی آدامدان قاباق اونلارین دئمه‌یینه خطین ساز، ناساز اولدوغونو یوخلاماق اوچون ایجازه وئریلدی.( تئلفون ایشلمه‌دییندن رهبره اَل‌اوستو جاواب وئرمه‌دیکلرینه گؤره خیلی آدام جزالاندیریلمیشدی).
رهبرین سالام سونراسی کلاملاری فاراغات دوران آدامی چاش- باش سالیب آز قالا اؤز هئیکلینه دؤندردی. نه موددتدی مرکزه یاپیشدیریلمیش جمهوریلرین باشچیلاری همین تئلفون اؤنونده عینی وضعیت آلیب، اؤزلرینی باشلاری اوسته اوچا بیله‌جک یاراسالاردان، بایقوشلاردان قوروماغا چالیشیردی. اونلارین هامیسینا ائله گلیردی کی، رهبر اونلاری نئجه وار ائله گؤرر، اوزلریندن، گؤزلریندن دوشوندوکلرینی اوخویا بیلر. (تک اونلار یوخ اوجسوز- بوجاقسیز بیر اؤلکه‌نین بوتون وطنداشلاری دا هاردا اولسالار اؤزلرینی اونون گؤزلری اؤنونده ساییردی.
یئری گلدیک‌ده لاپ ائولرینین ایچینده لازیم اولاندا باشقالارینداکی بورشون، شوربانین، سامسانین، خاراچونون ایچیندن بیغینین توک‌لری چیخا بیلیردی).

- او ایللرجه اوتونو، علفینی وئردییین اؤکوز دورورمو؟
جینقیرینی چیخارماییب هله‌لیک اونون اوچون مجهول قالان اؤکوز رهبرین اؤزونون سؤز دامغاسینی وورماغینی گوزله‌دی. رهبر ده دامغاسی اؤنجه‌سی گولوب قارشیسینداکینی یونگوللشدیریردی.
- باییرداکی کامئرانین گؤزتچیسی‌نی دئییرم. همین کلمه‌لر یئلپی‌یه دؤنوب صیفتی تومورجوقلامیش آدامین دادینا چاتدی. باشا دوشدو کی اونلاردان قارا مراسیم‌لرین دفنه یارپاقلاری آچیلمایاجاق.
ایندی رهبره جاواب وئره بیلردی.
- اؤکوزلویوندن چیخیب بوغایا دؤنوب.
- دئمک بوینوزلارینین قیریلماق واختی چاتیب. بیر- ایکی گون باکی‌دا دینجله‌جه‌یم، اونو حاضیرلا.
رهبرله دانیشاندان سونرا ایله‌شیب تامام- کامال اؤزونه گلمه‌یه چالیشدی.
گله- گله ده بیر خیلی اوزاقلارا، اؤتن ایللرین آرخاسینا گئتمه‌لی اولدو. رهبر او زامان هله آغیرلیغی قدر زهمی ایله یوکلنمه‌میشدی.
کؤهنه دوست- تانیشلاری ایله اینسان طبیعتی‌نین زینتی- طبیعی‌لییی ایله داورانیر، زارافاتلاریندان دا قالمیردی.
همین زامان کی زنگ ده گورجو دوستلاری واسطه‌سی ایله ایش باشینا کئچمیش سید اولادینی تعجوبلندیرمیشدی.
- سنه چوخ مسئولیت‌لی بیر ایش تاپشیراجاغام، اونو یئرینه یئتیره بیلسن، آذربایجانین داغلارینی، مئشه‌لرینی قاچاقلاردان تمیزله‌دییینه ایناناجاغام.
کُبالیغیندان قابیق قویوب استالینه چئوریلمیش اژدهانین تاپشیریغی دا بیر نوع قارانلیق اوتاقدا قارا پیشیک یاخالاماق کیمی بیر شئی اولموشدو:- عصرین اوّل‌لرینده باییلدا یاتدیغیم دؤره‌لرده بیر ناتاراز بیغلی نظارتچی وار ایدی. دییه‌سن داغیستان لزگی‌لریندن ایدی. گؤیون یئددی قاتیندا، یئرین یئدی آرشین درین‌لیینده ده اولسا، اونو تاپیب منه شکلینی گؤندرمه‌لیسن.
سید اولادی دا بو دفعه رهبرلیک ائله‌دییی مملکتین ان قانسیز آداملاری‌نین آختاریش جیدیری اوچون رهبرین اونا باغیشلادیغی اوستو یازیلی توفنگدن آتش آچمالی اولموشدو و نهایت، بوتون چتینلیک‌لرین سددینی یارا- یارا همین آدامی داغستانین بیز داغیندا تاپیب یاخاسیندان یاپیشا- یاپیشا، باغیندان چکه- چکه سید اولادی‌نین یانینا گتیرمیشدیلر( ساوئت‌لر قورولاندا باییل تورمه‌سینین ضابیط‌لرینین چوخونون " باشی یئییلمیش"، نظارتچی‌لرین چوخو دا باشینی گؤتوروب قاچمیش، گیزلنمک اوچون اؤزلرینین اعتبارلی سیچان دئشیینی تاپمیشدی. اونا گؤره ده رهبرین سفارش‌لرینی یئرینه یئتیرمکده خیلی چتین‌لیک چکیلیب، واخت خرجلنه‌نیلمیشدی).
رهبر نظارتچی‌نین اونون ایسته‌دییی آدام اولدوغونو تصدیقله‌ییب یئنی گؤستریشینی وئرمیشدی:
- منیم موزئی- کامئراما همین بیغی بئیی تعیین ائدیرسن. اؤزونه ده هر جور شرایط یارادیرسان. نئجه دئیرلر یولوم باکی‌یا دوشه‌نه کیمی همین بیغی بئیین بیغ یاغینی بول ائله‌ییرسن.
سید اولادی نه قدر چالیشیب چابالامیشدیسا رهبرین همین سیرری‌نین اوجوندان- قولاغیندان بیر شئی اؤیره‌نه بیلمه‌میشدی.
هله دوستو لابرئنتی‌نین ( بئریانین) باکی سفرلری‌نین بیرینده، کئفی‌نین کؤک واختیندا اؤزونو همین مطلب اوسته کؤکله‌میشدی.
لابرئنتی ده سوز وئرمیشدی:
- مسکودان دونن کیمی اییی بیلنلریمین ان اوزون‌بورونلارینی قیسقیردیب اؤیرنمه‌یه چالیشاجاغام.
بیز موددت سونراسا جاوابی ایله دوستونو سئویندیره بیلمه‌میشدی.
- سیزلردن بیرجه محمد امینه رغبتینی اؤیرندیم.اونا دَییب- دولاشما. بو آداملا علاقه‌سینی بیلن تاپیلمادی. بلکه بیر زامانلار همین نظارتچی ایندی کشیک چکدییی کامئرادا یاتان کوبامیزا یاخشیلیق ائله‌ییب. بو آدام اصل قفقاز عنعنه‌سی ایله کیچیک مقاملاری بئله اونوتمور.
سید اولادی همین گون یولونو باییل تورمه‌سینه سالمیشدی. استالین‌ین اساسن کامئرا موزئیینه دئییل، اونون جانلی تمثیلچی‌سینه باش چکمک ایسته‌میشدی.
یول‌بویو داخیلن اؤزونو دانلامیشدی دا. نئجه اولوب کی سون ایل‌لر بو بیغی‌بئیی یانیندان چیخاریب؟
آخی رهبر دؤنه- دؤنه تاپشیرمیشدی کی من باکی‌یا گله‌نه کیمی اونو اؤلمه‌یه قویما...
سید اولادی آللاهینا یالواریردی کی چوخدان باش چکمه‌دییی بیغلی‌بئی ساغ- سالامات یئرینده اولسون. و جیددی کؤمه‌یینه چاتدی.
کامئرانین یاریسینی توتان اؤکوزو گؤردو. سئوینجیندن اونا بیغ یاغی دا وئردی. تورمه رئیسینه تاپشیردی دا:
- منیم وئردیییم اؤز حقوقومدان دیر. سن ده گونو صاباح بونو آپاریب اَیین- باشینی تزه‌له‌یرسن. دلله‌یینیز ده اوزونه- باشینا، بیغینا ال گزدیرسین. رهبر یقین کی اؤز موزئیینه ده باش چکه‌جک. بونو آدام بالاسی کیمی گؤرسون. سونرا ماشینا مینیب مرده‌کانا، عزیزآغانین باغینا تشریف آپاردی. بو دفعه اونون هیجانینی جانیندان خوروزقویروغو چایین کیفی، دنیزین مئهی چیخارا بیلردی...

اطرافینداکی‌لارا رهبرین اؤزو ده شخصی نمونه گؤستره بیلیردی. او، اؤلکه‌نین ان اوجقارینداکی آداملارین‌کینا بنزر ساده تیکل، شالوار گئیینیز، اوشاقلارینی پیاده عمومی تحصیل مکتب‌لرینه گؤندریر، محاریبه‌نین ایلک گونلریندن جبهه‌یه سفربر ائدیردی.
او، هئچ بیر اینستودا عالی تحصیل آلمامیشدی. آللاهین اونا وئردییی فطری استعدادی اؤز حیاط تجربه‌سینده سیناقدان کئچیرمیشدی.
و بونون نتیجه‌سینده حیات مکتبی‌نین سرکرده‌سینه، دیپلماتینا، حقوق‌شناسینا چئوریله بیلمیشدی.
پولاد لقبی داشییان بو آدام اؤز حیات تجربه‌سی و دَمیر منطقی ایله ان چتین آنلاردا دوزگون قرارینی وئریب. اطرافینداکی عالی دیپلوملو دیپلماتلاری، سرکرده‌لری حئیرتلندیره بیلمیشدی.
1941-جی ایلین نوامبریندا، اکتبر انقلابی‌نین ایل دؤنومو مناسبتی ایله مسکودا حربی پاراد کئچیرمک ایسته‌دیینی بیلدیرنده، سیاسی بورو عضولری‌نین هامیسی‌نین اوزرینه سو سپیلمیشدی. رهبر اؤز یانیقلی منطقی ایله هامیسینی قورودا بیلمیشدی:
- بو بیزیم گوجوموزون توکنمه‌دییی‌نین ، حربی قوه‌میزین یئنیلمزلییی‌نین نمایشی اولاجاق.
تدبیره بیر هفته قالمیش کشفیات اداره‌سی خبر وئرمیشدی.
- آلمانلارین ساوئت پلیسی فورماسیندا بئش‌مینه یاخین جاسوسو نمایش زامانی تخریبات تؤرتمه‌یه حاضیرلانیر. قارشیسینی آلماق اوچون فیکرینیزی بیلمک ایسته‌ییریک.
او دا بیغ‌آلتی گولومسه‌ییب زارافاتیندان دا قالمامیشدی:
- من تدبیریمی نمایشه ایکی ساعات قالمیش بیلدیره‌جه‌یم. ایندی سؤیله‌سم، بوندان دوشمنلریمیز ده خبردار اولا بیلر. کیم بیلیر، بلکه سیزلرین ده آراسیندا اونلارین آدامی وار.
نمایشه ایکی ساعات قالمیش اؤنونده اعتبار ائتدییی ایکی آدام دایانمیشدی. اوزونو بیرینجی داخلی ایشلر ناظرینه توتموشدو:
- او کئچمیش‌ده رومانوولارین آت طؤله‌سی اولموش یئره بئش‌مین آدام سیغیشا بیلر می؟
- گئنینه- بولونا، یولداش استالین.
- اوندا همین طؤله‌نین گیره‌جه‌یینی قئیدییات اوچون حاضیرلایین، آرخاسینی تورمه‌یه چئویرین. گئت ایشین‌له مشغول اول...
سونرا اوزونو تهلوکه‌سیزلیک اداره‌سینین باشچیسینا توتموشدو:
- لابرئنت، بیزیم پلیس‌لره، پلیس پالتاریندا یوخ، مولکی گئییمده خیدمته چیخماسینا اؤزون گوستریش وئر.
بئریانین حیرت نیداسی ائشیدیلمیشدی.
- دئمک همین گؤستریشدن خبرسیز، پلیس فورماسیندا قیدییاتدان کئچمه‌یه گلن‌لرین هامیسی آلمان جاسوسو اولاجاق.
- اونلارین هامیسینی سنه تحویل وئریب، جاسوس ساریدان بئش ایل‌لیک پلانی‌نی یئرینه یئتیرمه‌یینده دادینا چاتیرام.
استالین حربی طیاره مئیدانی‌نا، اونو گؤزله‌ین طیاره‌نین اؤنونه گلنده بیر ژنرال اؤنونده فاراغات وضعیتی آلدی. بو دفعه ده بیغ‌آلتی گولومسه‌ملی اولدو:
- سیزین عاغلینیزجا رهبرین طیاره‌سینی آنجاق ان آزی ژنرال سوره بیلر؟
سونرا اوزونو هم هیجان، هم ده شاختانین حسابینا دونموش ژنرالا توتدو:
- آخیرینجی دفعه نه واخت طیاره سورموسن؟
- بئش- آلتی آی اوّل. یولداش مولوتوفو لنینگرادا چاتدیرمیشام.
- هر گون بو طیاره‌نی سورن پیلوتو تاپیب گتیرین...
سونرا باشقا تدبیرینه کئچمیشدی:
- لابرئنت، منی باکی‌دا هانسی هاوا لیمانیندا قارشیلایاجاقلار؟
- مرکزی فرودگاهدا.‌‌ میر جعفر دونندن اوردا طمطراقیلا یولونوزو گؤزله‌ییر.
- تعجیلی خبر وئر ناسوسنیکادا کی حربی طیاره لیمانی‌نی حاضیرلاسینلار.
سید اولادی، حاضیرلادیغی اَلی چیچکلی اوشاقلار، دوز- چورکلی گوزل‌لر گؤزله‌یه- گؤزله‌یه قالدی.
رهبرین طیاره‌سی ناسوسنیدا ائننده میرجعفره خبر وئردیلر:
"استالین تعجیلی ایش باشینا قاییتماغینیزی ایسته‌ییر. سیزینله اوردا گؤروشه‌جک..."
میرجعفرله گؤروشنده ده بیغ‌آلتی گولومسه‌دی. رهبرین همین وردیشینه دوستو لابرئنتی واسطه‌سی ایله بلد اولموش سید اولادی اونون بیغلاری‌نین بیر نئچه‌سینین تیکانا دؤنوب وارلیغینا سانجیلا بیله‌جه‌یینی آنلادی:
- بلکه سنی یئنی‌دن مئشه‌لرینیزه داراشمیش قاچاق- قولدورلاری توتماغا گؤندره‌ک...
سید اولادی داخلینه سسله‌نیب جددینی کؤمگه چاغیردی. اونا یگانه اوره‌ک- دیرک وئرن رهبرین کئفی‌نین کؤک اولماغی ایدی.
- دوستون لابرئنتدن حقوقشناسلیق اؤیرنمه‌میسن. بیلمیرسن کی اطرافینیز ایراندان آتلامیش آلمان جاسوسلاری ایله دولودور؟ حال- حاضیردا بلشویک‌لر یاندیرماسین دییه نفت بوروقلارینیزین کئشیکینی ده اونلار چکیر.
سید اولادی قورویوب قالمیشدی. هله‌لیک سهوینین نه‌دن عبارت اولدوغونو آنلامیردی.
- منی قارشیلایان بئش آدامدان ان آزی ایکیسی اونلاردان اولا بیلردی...

سید اولادی اؤلکه‌نی آنجاق بئله بیر آدامین قورویا بیله‌جه‌یینه دوباره لاپ مین باره اینانیب گوناهکار گؤرکمی آلدی:

-یاخشی، گلن دفعه عزیز آغانین مَرده‌کاندا کی باغیندا کونیاکلایاندا لابرئنتدن بیرآز امکداشلیق اؤیره‌نرسن، اگر اؤیرنمه‌یه بیر شئیی وارسا.
سؤزونه، قارشیسیندا‌کینین اؤزونه گلمه‌یی خاطیرینه بیرآز آرا وئردی.
- صاباح تهران یولونو توتاجاغیق... بیلیرسن، بو گون بیرآز دینجله‌جه‌یم. دئدیییم آدامی حاضیرلامیسان‌می؟
- دونَندن آپاریب اقامتگاهینیزین اوتاقلارینین بیرینده یئرلشدیرمیشم.
- اقامتگاهیم هاردادیر؟
- ان گوزل قوناق ائویمیزدیر. یام- یاشیل آغاجلار آراسیندا. اطرافی دا آغاجلاردان چوخ آداملاریمیزلا سارینیب...
- همین آدامی اوردان چیخاردیب ایچری‌شهرده بیر اعتبارلی ائوده یئرلشدیر.
اوردان دا محافظه‌نی چیخار. هاردا قالاجاغیمی اؤزوم سئچه‌جه‌یم. بیلیرسن کی من اؤزوم ده کؤهنه باکی‌لییام. اونون آلتینا دا اوستونه‌ ده سندن یاخشی بلدم.
سید اولادی‌نین عاغلینا گلدی کی رهبرین قالاجاغی یئردن جاسوسلار چوخدان خبر توتموش اولارلار. دوستو لابرئنتی‌نین نوبتی تشریفینه قدر رهبردن دیپلماتلیق، امکداشلیق اؤیرنمه‌یه چالیشدی.
یالنیز آخشام اوستو رهبرین بیر گونلوک عنوانیندان خبردار اولوب، فهمینه حئیران قالدی. اؤز فیکرینین انکشافینی دایاندیریب خرچنگ کیمی دال‌دالا گئتدییینه گؤره اؤزونو تهمت‌لندیردی.
بای‌باک اوفون قیز قالاسی قونشولوغوندا منزلی اولدوغونو نئجه ده اونوتموشدو. همین عنوانا بیر تک اؤزونون دعوت اولدوغوندان دا غرور دویدو. اونو دا باشا دوشدو کی رهبرین تهلوکه‌سیزلییی نامینه بورا ان اعتبارلی آداملار توپلانیب.
رهبرین تاپشیریغی ایله کؤهنه باکی‌لی بای‌باکوف اؤزو یاخین آداملاری واسطه‌سی ایله ائوی ان عالی قوناغا لاییق سلیقه- سهمانا سالمیشدی. سید اولادی سالونا داخل اولاندا رهبری اوسته آذربایجان خالچاسی سالینمیش دیواندا بارداش قورموشدو. مولکی پالتاردا و همین گؤرکمده او، هم ده اؤزونون کؤهنه باکی‌لی اولدوغونو اثباتلاییردی. ائله سؤزلری ده منظره‌سینین بیر نوع قوه‌سینه چئوریلدی.
- گرگین تهران گؤروشلری عرفه‌سینی بوگون باکی‌دا کؤهنه باکی‌لی کیمی دینله‌یه‌جه‌یم....
سونرا میرجعفره وئرمه‌دییی سالامی عوضله‌یه بیلن بیر ایکی کلمه سؤیله‌دی:
- هه، سنین آنجاق ائوین، یا بای‌باکوفون کی خودمانیدی؟
- سید اولادی‌نین جاوابینی گؤزلمه‌یی لازیم بیلمه‌ییب سؤزونو داوام ائتدی- باکی‌دا باشیندا قاراگول پاپاقلی اوچلوک‌لر واریدی.
چالیب- اوخویوردولار. سایه‌نده هامینین پاپاغی بوش قالماییبسا، بیر دسته‌سینی گتیر. آرادا موغاما دا گؤز آغارتدیغیندان خبریم واردی.
چوخدان پاپاقلارینی میخچادان آسمیش خواننده و سازنده‌لردن عبارت اوچلویو رهبرین ذوقونه اویغون بزه‌ییب اؤنونده منتظر ائتدیلر. رهبر تنبل‌لیک ائتمه‌ییب اونلارین قنشرینه گلدی.
ساریسی‌نی اودموش اوچلویو خوش سوزلریله هم کؤکله‌مک، هم اوزلرینی سامان رنگین‌دن خلاص ائتمه‌یه چالیشدی:
- ماشاللاه، ائله بیل عصرین اوّلیندن آغزینیزی آچیب موغام اوسته اوستالیب، اؤزونوزدن گئتمیسینیز. میرجعفر سیزی اویادیب گتیریب؟
اوزونو میرجعفره توتدو:
- بونلاری یوخودان اویاتدیغینا گؤره کؤنوللرینی آلمالیسان. هر اوچونه فخری آد وئرمه‌لیسن.
فخری آدلاردان عبارت نمرینی اؤنجه‌دن وئریب موسیقیچی‌لری روحلاندیراندان سونرا رهبر سفارشلری‌نین آغزینی آچدی، نه آچدی. چوخو آز قالا اونودولان خالق ماهنیلاری رهبرین خاطیره بحرانینا دوغرو صفینی چکمه‌یه باشلادی( خواننده‌یه بعضن، بعضی ماهنیلارین یادیندا قالان یئرلریندن سؤیله‌ییب هم یادداشینی برپا ائدیر، هم ده نغمه قانادی ایله گنج‌لیینین باکی دؤرونه پروازلانیردی).
سید اولادی نغمه‌لری دینله‌یه- دینله‌یه رهبرین سیرری‌نین آچیلماسینی گؤزله‌ییردی. کامئرا- موزئیینه قوندوردوغو لزگی ایله علاقه‌دار علاقه‌سینی.
مراسمین ان دراماتیک سونلوغونون همین سیرر اولاجاغینی اوزون ایللر حسابی قازاندیغی، بولوولیوب ایتی ساخلاماغا چالیشدیغی حیسیاتی ایله دویوردو.
نهایت رهبرین سفارشلری سونا چاتدی. قان تره باتمیش موسیقیچی‌لره گولومسه‌دی:
- اؤزونوزو خوروزقویروغو چایی ایله سویودون. بیز باشماق سئیرینه چیخاجاغیق. دؤننده کنسرتیمیزین ایکینجی حیصه‌سی باشلایاجاق. سونرا اوزونو میرجعفره توتدو:
- دئییرم بیر باییلی پیاده گزک. یوخودا تئز- تئز گؤردویوم یئرلرله جانلی- جانلی گؤروشمک ایسته‌ییرم.
میرجعفری آغزینی آچماغا قویمادی.

محافظه لازیم دئییل. بو فورمادا یقین کی منی کوچه- باجادا چتین تانییان اولار...
میرجعفر بو دفعه‌ده نه‌سه سؤیله‌مک ایسته‌دی. بو دفعه ده رهبر اونون نه دییه‌جه‌یینی بیلیب جاوابینی وئردی:
- سنی تانییان اولار. اونا گؤره ده بوردا قالاجاقسان. بیز دؤننه کیمی بیغی‌بئیی گتیره‌جکسن.

سیاحت‌لرینی باشا ووروب گئری دؤندولر. میرجعفر نهایت، رهبرین سیررینی اؤیره‌نه‌جه‌یینی یقین‌له‌ییب هیجانلانماغا باشلادی.
رهبر ایللرله بسله‌دییی " قوربانی‌نین" قارشیسینا گلدی. اونون گؤزلرینه باخیب اوره‌ییندن کئچیردی:- نئجه وار ائله‌جه ده قالمیسان. بیرآز ظالیم‌لیغین قوجالیب ‌آمما قالیب.
سوالی بیغی‌بئیی چاش‌باشا سالدی:
- منی تانییا بیلدین می؟
- سیزی کیم تانیمیر کی ائللرین آتاسینی...
- بس قارمون چالان لزگی طئییوبو نئجه، خاطیرلاییرسانمی؟
قارمونی ایله ان چوخ سنین قوللوغوندا دوروب سفارشلرینی یئرینه یئتیریردی.
باییل سمتی‌نین مخصوصی گیله‌واری گئت- گئده آیازینی آرتیریردی. کیشی‌نین آغارمیش بیغلارینی بوز سالخیمینا اوخشادیر، جانینی، قانینی سویودوردو.
هله‌لیک بیر شئی آنلاماسالار دا تاماشاچیلارین آز قالا اوره‌کلرین دؤیونتوسو ائشیدیلیردی.
اییرمینجی ایللرین اوّللرینده هیس- پاسیندان قورتارماغا چالیشان کؤهنه باکی‌نی بیر خبرین دومانی بوروموشدو:
گورجو یوسقا مرکزی بانکی یاریب آرادان چیخا بیلمه‌ییب، اَله کئچیب. بو گون نیکلایوسکی کوچه‌سی ایله، جاماعاتین گؤزو قارشیسیندا باییل تورمه‌سینه آپاراجاقلار.
قوچو نجفقولونون اؤزو ده بو خبره اینانماق اوچون آیاغینی ماشتاغادان شهره قویموشدو.
قوچو نجفقولو ایله گورجو بالاسی‌نین خوش مناسبتی واریدی. اوّل‌لر آرالاریندا سوز چکیشمه‌سی اولموش، تئزلیک‌له ده بیربیرینی باشا دوشوب برکیمیشدیلر.
دولاشیق بیر مسئله‌نین باره‌سینده نجفقولو بیر گورجونون باکی‌دا آت اویناتماسینا سون قویماق ایسته‌میشدی.
- سن یا آدینی اییوسیف‌دن دؤندریب یوسف ائله‌مه‌لی، مسجیده تشریف آپاریب دینیمیزی قبول ائله‌مه‌لیسن، یا دا قیرمیزی کؤرپونو کئچیب لوتولوغونا اوز اؤلکه‌نده باشلامالیسان.
- بیر شرط‌له راضی اولارام.
- اونو پای- پوشله، زورنا- بالابانلا یولا سالا بیله‌ریک.
- سن ده آتانین، آنانین قویدوغو اصل آدینا قاییداسان. یعقوب پیغمبرین اوغلونون شرفینه قویولموش روستمه قاییداسان. مقدس نجف‌ده دوغولدوغونا گؤره، سونرالار نجفقولو چاغریلمیسان.
قوچو نجفقولو کوچه‌نین گؤرکملی یئرینده کؤچونو سالیب او آداما آرخاسیندا اولدوغونو بیلدیرمه‌یه حاضیرلاشمیشدی.
نهایت یوسقا بره‌سینه یاخینلاشدی. اوندا یئرلی قوچو گلمه قوچونون نه‌یه گؤره ائله کئچه بیلدیینی باشا دوشدو. دئمه اوچونجو مرتبه‌دن آتلانیب قاچماق ایسته‌یرکن یوسقانین آیاغی عمللی- باشلی بورخولموشدو.
آغریلار حسابینا زورلا آددیملادیغی بیلینیردی.
قوچو نجفقولو دوستونا ایلک خیدمتینی ائتدی.
محافظه‌چیلرین باشچیسینا تَپیندی:
- بوراجان یورغالاماغی بس دیر. نمرینیز مندن، بوردان دار آیاغینا فایتونلا، یورغا آتلارلا آپارین.
فایتوندا آغریسی دینن آدامین، نجفقولونون گؤزوندن ایراق، قنیمی تاپیلمیشدی. شر- شور دوستاقلارین عزازیل کئشیکچیسی لزگی نظم‌الدین چالاغان کیمی اوستونو آلمیشدی.
- طییوب، قارمونونو سینه‌نه باس گؤروم...بو کینتونون موسیقی واسطه‌سی ایله آیاغی‌نین معالجه‌سی ایله مشغول اولاق.
یوسقانین آدی بورداکی آداملارا بللی ایدی. هئچ بیری اونون غضبینه گلمک ایسته‌میردی. نظارتچی‌نین باغیرتیسی ائشیدیلدی.
- شالاکو چال، کوپئی‌اوغلو، یوخسا اؤزونو ده، قارمونونو دا دئشیک- دئشیک ائده‌جم.
ائله بیل بوینو بوکوک دییه‌نه طالع پیچیلدادی: سن هاوانی چال، اونسوز دا بو زیررامانین یوسقانی اویناتماغا گوجو چاتمایاجاق.
عینی هاوا دفعه‌لرله چالینسا دا، طالعی‌نین پیچیلدادیغی سؤزلر یئرینی آلدی. آمما عینادی کینتویا باها باشا گلدی. نظارتچی‌لر بیرلشیب بدنی‌نین سالامات یئرینی قویماییب یوسقایا آیاغی‌نین آغریسینی اونوتدوردولار. نه قدر الدن دوشسه ده گؤزلرینی دیری ساخلایا بیلمیش گورجو، اونلاری کینی ایله دولدوروب بیغی‌بئیه توشلادی:
- منه " شولوخو" اوینادا بیلمه‌دین. آمما سؤز وئریرم کی سنه " لزگینکا" اویناداجاغام.
رهبر قارشیسینداکینی سانکی گؤزلری ایله یئمک ایسته‌ییردی. اونو معاینه‌سیندن کئچیریب یالان، یا دوغرو دانیشدیغینی معین‌لشدیرمک ایسته‌ییردی. کیشی‌نین گوزونون اطرافی‌نین دوز، گیله‌لرینین بوز باغلادیغینی گؤروب مشاهده‌سینی دایاندیردی. هئچ زامان اونو یانیلتمایان حیسیاتینی ایشه سالیب سون سوالینی وئردی:

- سنه " لزگینکا" اویناداجاغینی سؤیله‌ین آدامی نئجه یادینا سالا بیلمیرسنمی؟
قارشیسنداکی دییه‌سن اؤتن ایللره دؤنوب هم اونو تانییان آدامی گؤرموش، هم ده سسینی ائشیتمیشدی. اودور کی دانیشماق عوضی آغلاشماسی ائشیدیلدی:
- ایکی اوغلومون قارا کاغیذینی آلاندان سونرا هوشوم، باشیم خاراب اولوب. باشیمی یئره سوخماغا حاضیرلاشیرام...

رهبر، اونون هر شئیی خاطیرلادیغینی آنلادی.
-اوشاقلارین هاردا تلف اولوب؟
- مازدوکدا...
- اونلارین مزارینی قونزوکا گتیره‌جه‌یم.
تاپشیراجاغام اوست‌لرینی گؤتورسونلر.
گؤز یاشلاری ایکی اوغلونون دوغما یئرلره آچیلان مزار یولو عوضی‌، بیغی‌بئیین اوزونده قوشا جیغیر آجدی.
آمما یاسدان چیخماغین اوچون بو گون بیزیم اوچون " لزگینکا" اوینایاجاقسان.
چالغیچیلار همین هاوانی دفعه‌لرله چالاسی اولدو. ناتاراز آدام ییخیلیب اؤزوندن گئده‌نه کیمی...
تعجیلی یاردیم ماشینی باشی‌نین اوستونو کسیب، باشینی یئره سوخماق ایسته‌ین آدامی هله‌لیک بیر خسته‌خانانین اؤرتویو کفنی خاطیرلادان چارپاییسینا یئرلشدیردی.
لزگی هاواسی بلکه ایلک دفعه اؤز قارا بهرینی وئردی. تهران سفری اؤنجه‌سی میرجعفر رهبره پیچیلدادی:
" کیشی عؤمرونو سیزه تاپشیردی".
او دا تاپشیریغینی پیچیلدادی:
" اوغلانلارین بؤیرونده تورپاغا تاپشیرسینلار. بئله‌ده اوره‌کلرین تیکانینی چیخمیش حساب ائله‌مک اولار..."

https://t.me/Adabiyyatsevanlar

ویدا حشمتی
«تبریز»




تییه‌لرین شرابی‌دیر تبریز
ارکین بیر داملاسیندان
آخیرلانیر گؤزلریم
خیاللاریم ائوین بیر بوجاغیندا،
ائوین بیر بوجاغی داریخمالاردی
تهراندان
تبریزه...
اوزاق یارالارین ایزی،
ساعاتین دایانیلمیش زامانیندا
آت چاپدیریر.
بیر قاتار فیشنگ
چکمه‌لی آتلی گلیر
قاشلاری چاتلی گلیر
باشینی دیم‌دیک توتوب....

اورمونو بوغور نمکوو
تبریزدن کؤرپو سالیر احوازا
جمدک قوخویور توپراق‌لا سو
سو ایله باغیرتی
باغیرتی ایله قورشون
آخیرلانیر گؤزلریم...

https://t.me/Adabiyyatsevanlar

🎙:شریف مردی

#گؤزه‌لر پادکستینین ایکینجی فصلی‌نین آلتینجی ائپیزودوندا #حسن_ثمودی_قلعه‌لر یازدیغی #گون_چیخان_یئر_تئز_قارالار رومان اله‌شتیریلمیش

https://t.me/Adabiyyatsevanlar

اوشاق ادبیاتی
اوشاق ادبیاتی هر هفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

اوشاق ادبیاتی
«هانانین ماجرالاری»
ویدا حشمتی

آلتینجی بؤلوم
ائوه دؤنوش

اونودولموش خیاللار دونیاسینا یولجولوق ائتدیکدن سونرا، هانایلا باریش وظیفه‌لرینی یئرینه یئتیرمیش و سئوینجلی‌ ایدیلر.
او گئجه خیالی وارلیقلار بیر یئره ییغیشدیلار. گوللر همیشه‌کیندن پارلاق ایدی و قوشلار شعر اوخویوردو. سئحیرلی آغاج آستاجا تیتره‌ییردی. ائله بیل دانیشماغا کؤنوللویدو.
«گئجه‌یاریسی» یئره قونوب دئدی:
-سیز باغین جانینی قورتاردیز، خیاللاری دیریتدیز، لاپ یاخشی‌سی، بونو اؤیرتدیز کی، گوجلو اورکلر، خیال قوران اورکلردیر، باشقا جور دوشونمه‌گه جسارت ائدن اورکلر...

بیردن سئحیرلی آغاج چیچکلندی. آنجاق معمولی چیچک دییل، هر چیچک بیر خاطره ایدی. آتابایین گولوشو، قارتوپونون ایلک دفعه هانانین بورنونو اؤپدوگو، باریشین سئوینج‌له نقاشی‌لارین اوستوندن آتیلدیغی خاطیره‌لر...
هانا باریشا دئدی:
-بیر گون بو باغا گلمه‌سک، نئجه اولار؟
باریش گولومسه‌یه‌رک دئدی:
-بیز بو باغی اؤرگیمیزده ساخلایاجاغیق. بو باغ بیزیم‌دیر.

ائوه قاییتدیقدان سونرا، هانانین دفتری، نقاشیلارلا دولویدو. او، بو نقاشی‌لاری نه زامان چکدیگینی خاطیرلامیردی. اما بیلیردی، چکدیگی هر جیزیق-هر رنگ اونون خیال دونیاسینا بیر کؤرپودو. او دونیانی، اؤزو یاراتمیشدی.
ایل‌لر کئچدی. هانا آدلیم بیر رسام اولموشدو. اونون نقاشی‌لاری، الوان رنگلری ایله تانینیردی. اوشاقلار اونون نقاشی‌لارینی چوخ سئویردیلر، خصوصاً بیرینه باخاندا دا -همان باغ کی، بؤیوک قاپیسی واریدی- اورکلری ایشیقلانیردی.
بلکه بیر گون اونلار دا بو قاپینی آچیب، او باغا گئتدیلر.

سون
https://t.me/Adabiyyatsevanlar

اوشاق ادبیاتی

✍️شاعر: رامین_جهانگیرزاده
تَکم

ایکی بوینوزلو کئچی
آی بیزیم دوزلو کئچی

هر نه واردی یئییرسن
هئچ نه‌یه یوْخ دئمیرسن

تکم – تکم دئدیم من
آتێلیب اوْینادێن سن

بوْزاردێن دان یئری تک
بیر آز یئمکدن ال چک

توْرپاغا نفس گلدی
سنه هئچ هوس گلدی؟!!

گۆل اوْلدو، بۆلبول اوْلدو
تکم رنگین دۇرولدو؟!!

بوینوزلادێن هر یئری
آتێلدین لاپ مین سئری

دێرماشدین داغ داشلارا
گئتدین لاپ اوْ باشلارا

بوینوز چالدێن گۆنشه
مات قالدێم من بو ایشه

تکم بسدی دۆش یئره
بوینوزلاما بوْش یئره

گۆنش گؤیۆن اۆزونده
ایزی قالار گؤزۆنده

گؤزۆندن نور اله‌نَر
بیردن ایشێق گؤرۆنر

آی گؤزۆ ایشێق تکم
تۆکو یاراشێق تکم

ساققالێ آت قویروغو
حیات یئنی بیر قورغو

گل اوْیناقلا گۆل اوْلسون
قلبیمیزه نور دوْلسون

https://t.me/Adabiyyatsevanlar

اوشاق ادبیاتی

پلاستیلین ۱  اینه یینین ناغیلی
یازان : علی صمدلی (« ژنرالین اوشاقلیغی » کتابیندان )
کؤچورن : علی آغ گونئیلی  ـــ ابرازی
 
آتاسی کامرانلا اورخانا پلاستیلین آلمیشدی. اونلار مختلف فیگورلار دوزلدیب اویناییردیلار. اورخان دئدی : 
ــ  کامران ،  گل پلاستیلین لریمیزی بیر یئره قاتیب نهنگ بیر حیوان دوزلدک .
کامران راضی اولدو . 
اونلار پلاستیلین لرینی بیر یئره قاتیب یوغوردولار. 
اورخان دئدی : ــ  گل فیل دوزلدک . 
کامران : 
ــ  فیل لر چوخ یئییر. اونو دویدورا بیلمریک ــ  دئدی . 
اورخان : 
ــ  گل اوندا دوه دوزلدک.
کامران : 
ــ ائح ،‌ هئچ بیلیرسن ده وه لر نقدر سو ایچیر، ــ دئدی . 
اونون هئچ سویونو چاتدیرا بیلمریک . 
ــ  بس نه دوزلدک ؟ کئچی نئجه اولار؟ 
ــ  ائح ،‌کئچی لر آغاجا دیرماشیب پؤهره لری یئییرلر. 
ــ  بس نه دوزلدک ؟
اورخان :
گل  ائله حئیوان دوزلدک کی ، سودونو ساغا بیلک .
کامران : 
ــ  اینک نئجه ، اولار. 
ــ اینک لاپ یاخشی . 
اونلار اینک دوزلتمگه باشلادیلار. اول بدنینی ، آیاقلارینی دوزلدیب ، باشینی قویدولار .سونرا گؤزلرینی ،آغزینی ، بورنونو دوزلتدیلر .
اورخان : 
ــ  بس اینک نییه یئریمیر؟ ــ دئدی .
ــ گؤرونور، نیین سه اونوتموشوق .
اورخان قیشقیردی : 
ــ  قویروغو! قویروغو یادان چیخیب .  
اینه یین قویروغون دا دوزلتدیلر. 
اینک حرکته گلیب قویروغونو بوللادی.اوشاقلار سئوندیک لریندن آتیلیب دوشدولر. 
اورخان دئدی : 
ــ  گل اینه یی ساغاق ، چوخلو سودوموز اولسون .
کامران مطبخدن قازان گتیردی. اونلار اینه یی ساغماق ایسته یینده حئیوان دیله گلیب :
ــ سیزمنه  اول  یئمه یه بیر شئی وئرین یئییم ، سونرا ساغین ، ــ  دئدی. 
اوشاقلار اوت دالینجا باغا یولاندیلار.باغدا چوخلو اوشاقلاشلار وارایدی ،فوتبال اویناییردیلار. کامرانلا اورخان اونلارا قوشولدو.هر شئ یاددان چیخدی.
آخشام ائوه گلنده گؤزلرینه اینانمادیلار. اوستونه گون دوشدویوندن  « اینک »‌یوموشالیب پنجره نین تاختاسینا یاپیشمیشدی. اینه یی آج قویدوقلارینا پئشمان اولدولار. اونلارا ائله گلدی     کی ،اینک لری آجیندان اؤلوب . 
۱ــ  بیر نوع اویون خمیری
۱۹۸۶
https://t.me/Adabiyyatsevanlar

اوشاق ادبیاتی
کارتون

اوشاق ادبیاتی هر هفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

اوشاق ادبیاتی
شاعر: یاشام
بایراق

بیر سؤز دئییم اوشاقلار
 
چوخ گؤزل دیر بایراقلار.
 
قیراق سرحد میللرین
 
دویاق اوشاق دیللرین.
 
آددیم-آددیما قویاق
 
یوکسک سسله اوخویاق.
 
آغ بیر بایراق اَسدیرَک
 
اوندا گونَش کسدیرَک.
 
آغ بویا اولسون باریش
 
گونَش ده تام قورتاریش.
 
بایراق اولسون بیر نشان
 
چوخدور اوندان یاپیشان.
 
اؤلکه لری گزَک بیز
 
آغ بایراغی دوزَک بیز!
https://t.me/Adabiyyatsevanlar