میسمیریغینی ساللایان کیریاکوو باخیشلارینی یئره زیلله‌ییر. سونراکی ایکی دقیقه بویو تکلیف باره‌ده دوشونور، سونرا قطعیّت‌له: «یوخ!»  جاوابی وئرمک‌له، کوچه‌یه چیخیر. حئیرت و چاشقینلیق حسّینه قاپیلان ماماچا، قاپینی اونون آردینجا اؤرتوب، اؤز یاتاق اوتاغینا اوز توتور.
یئرینه گیررکن فیکریندن کئچیر: «یاراشیقلی و جدّی آدام‌دیر، آمّا داورانیشینا باخ بونون. اؤزو بیلن مصلحت‌دیر».
آرادان هئچ یاریم ساعت کئچمه‌میش قاپی زنگی تکرار چالینیر و قادین کانداردا یئنه کیریاکووو گؤرور.
او، دئییر:
-حئیرت‌آمیز اؤزباشینالیق‌دیر ها!  ماماچالارین یاشادیغی عنوان‌لاری نه عجزا‌خاناداکی‌لار بیلیر، نه پولیس، نه ده سوپورگه‌چی‌لر. بو سببدن ده بایاقکی تکلیفینیزله باریشماقدان باشقا بیر چارام قالمیر. او اوچ ماناتی سیزه اؤده‌یه‌جیم. آمّا… بیر خیدمتچی و خیدمتیندن یارارلاناجاغیم هر هانسی بیری‌سینی توتدوغوم‌دا اولدوغو کیمی، بو سفر ده بری باشدان بیلدیرمه‌لییم کی، اؤده‌مه واختی مندن چای‌پولو و سایر علاوه‌ مبلغ ایسته‌میه‌جکسینیز. چونکی هر کس ساده‌جه حاق ائتدیگینی آلمالی‌دیر.
مارییا پئتروونا دوروب اوزون-اوزادی کیریاکووو دینله‌میر. چونکی آرتیق اوندان تامامی‌له بئزدیگی‌نین فرقینده‌دیر. بو کیشی‌نین تمکینلی و آهنگدار دانیشیغی قادینین قلبینه آغیر بیر یوک کیمی چؤکمکده‌دیر.
اگنینی گئیینن قادین کیشی ایله بیرگه کوچه‌یه چیخیر. هاوا ساکیت اولسا دا، سویوقدور، هم ده نئجه توتقوندورسا  فنرلرین ایشیغی گوجله سئزیلیر. ماماچا یاخین اطرافا باخسا دا آراباچی-فیلان گؤره بیلمیر...
ماراقلانیر:
-یقین یاخیندا اولورسونوز.
کیریاکوو قاشقاباق‌لا دیلله‌نیر:
-هه، یاخیندا اولوروق.
اوّلجه بیر، سونرا ایکی، آردینجا اوچ دالانی گئریده قویورلار... کیریاکووون  حتی یئریشیندن ده معيّن جديّت و نجیبلیک اوخونور.
ماماچا صحبته جهد ائدیر:
-عجب، اییرنج هاوا وار!
تمکینینی قورویاراق سوسان کیشی‌نین  قالوشلاری آشینماسین دئیه، ایللاه شومال داشلارین اوستویله یئریدیگی قادینین دقتینی چکیر.
خیلی یول گئتدیکدن سونرا، ان نهایت  ماماچا بیر آرتیرمادان ایچری کئچیر. اورادان بویلاندیغی زامان قارشیسیندا ایری و سلیقه‌لی قوناق اوتاغی گؤرور. اوتاقلاردا، حتی یاتاق اوتاغیندا بئله، زاهی‌دان باشقا بیر کیمسه گؤزه دگمیر... یاشادیغی شهرده دوغوما حاضرلاشان قادینین باشینا، عادتاً قوهوم-اقرباسی و آغ‌بیرچک قادینلار ییغیلیر، بورادا ایسه هئچ کس یوخدور. بیرجه آشپاز قادین الی میاندی‌دا اورا بورا وورنوخور، اونون دا اوزونده تلاش ایفاده‌سی دونوب. قفیل اوجا ناله‌لر یوکسه‌لیر.

آرادان اوچ ساعت اؤتور. دوغموش قادینین یاتاغی‌نین بؤیرونده اوتوران مارییا پئتروونا اونا نه‌لرسه پیچیلداییر. قادینلار تانیشلیق قورماغا آرتیق فرصت تاپیبلار، غیبت‌لشیر، دردلشیرلر... ماماچا هردن:
-سیزه دانیشماق اولماز ائی! - دئیه خبردارلیق ائله‌سه ده، زاهی‌یا فاصله‌سیز سواللار یاغدیرماغیندان دا قالمیر.
بودور، قاپی آچیلیر و کیریاکوو اؤزونه‌ خاص تمکین‌له یاتاق اوتاغینا داخل اولور. کئچیب استول‌دا اگلشه‌رک  باکئنباردلارینی سیغاللاماغا باشلاییر. اوتاغا سکوت چؤکور...  مارییا پئتروونا اورکک باخیشلارلا ائو یییه‌سی‌نین یاراشیقلی، تمکینلی و دونوق صیفتینه گؤز قویور، اونون نه دئیه‌جه‌گینی گؤزله‌ییر. عنادلا سوسان کیشی نه باره‌ده سه دوشونور. صبری دارالان ماماچا اؤزو صحبته آیاق قویماق نيّتینه دوشور و صحبته اورالاردا آلیشیلمیش بو گیریش جمله‌‌سی‌یله باشلاییر:
-تانرییا شوکورلر اولسون، داها بیر اینسان دا دونیامیزا قدم‌ قویدو!
اوزونده‌کی دونوق ایفاده‌نی قورویان کیریاکوو دیلله‌نیر:
- -هه باخ، بو خوش خبردیر. دیگر طرفدن ایسه، بیر چتن اؤولادا باخماقدان اؤترو آدام گرک پولا دا پول دئمه‌یه. آخی اؤولاد دونیایا گلنده اونون قارین توخلوغو و اگین-باشی‌یلا باغلی سنه هر هانسی تأمینات وئریلمیر.

زاهی قادینین چؤهره‌‌سینده گوناهکار بیر ایفاده پئیدا اولور: سانکی او، بو دونیایا ایذن‌سیز و یا صرف اؤز شیلتاقلیغی اوجباتیندان جانلی بیر مخلوق گتیریب‌
کؤکس اؤتورن کیریاکوو یئریندن قالخاراق، تمکین‌له اوتاغی ترک ائدیر.
ماماچا زاهی قادینا دئییر:
-عجب آدام‌دیر بو، تانرییا آجیق گئتمه‌سین... نئجه جدّی‌دیر سه  هئچ گولومسه‌یه ده بیلمیر.
زاهی قادین ارینین همیشه بو جور اولدوغونو اعتراف ائله‌ییر...  او، دوروست، عادیل، دوشونجه‌لی و بللی منطق چرچیوه‌سینده قناعت‌جیل‌دیر.  آنجاق بوتون بو اؤزللیکلر ایندی فانی بنده‌لرین آنلامایاجاغی بیر حدّه چاتیب‌دیر. قوهوم-اقربا بو عائله‌‌دن اوزاقلاشیب خیدمتچی‌لر بیر آیدان چوخدور ائوی ترک ائدیب. تانیش بیلیش‌لری یوخدور، هر آددیم‌دا سهو ائده‌جکلر دئیه، ائوین خانیمی و اوشاقلار دایما قورخو-هورکو ایچینده یاشاییرلار. اری داوا-شاوا سالمیر، چیغیریب-باغیرمیر. اوستون جهت‌لری ده قصورلاریندان قات-قات چوخدور.

آمّا او، ائودن چیخان کیمی هامی‌نین ایچینی حضور و یونگوللوک حسّی بورویور. بونون نییه بئله اولدوغونو ایسه هئچ، ائوین خانیمی دا آنلامیر‌.
تکرار یاتاق اوتاغینا باش چکن کیریاکوو خاطیرلادیر:
-او، لین‌لری یاخشیجا یویوب-تمیزله‌مک و آنبارا قویماق لازیم گله‌جک. بو فلاکونلاری(داوا شیشه‌سی) دا بیر یئرده گیزلدین البت، لازیم اولار.
دئییلن سؤزلر سون درجه‌‌ بسیط و عادی خصوص‌لاردیر. بونونلا یاناشی، ماماچانین جانینا نه‌دنسه بیر اوشوتمه دوشور. قادین آرتیق بو کیشیدن قورخماغا باشلاییر و هر دفعه‌ اونون آددیم سسلرینی ائشیدینجه سکسه‌نیر.
سحر چاغی ائوینه گئتمه‌گه حاضرلاشاندا او، کیریاکووون گیمنازییادا(یوخاری سویه‌ده اورتا مکتب) اوخویان  قیرخیق‌باش و رنگی سولوخموش کیچیک اوغلونون مطبخ‌ده چای ایچدیگینی گؤرور... اونون قارشیسین‌دا دایانان کیریاکوو اؤزونون او آهنگدار  عامیرانه سسی‌یله اوشاغا بونلاری دئییر:
-اگر یئمه‌گی باجاریرسان سا،  ایشلمه‌گی ده باجار. باخ! آز اوّل ایچدیگین او بیر قورتوم چایین دا پول‌لا ساتین آلیندیغی باره‌ده، پولون ایسه زحمت باهاسینا قازانیلدیغی باره‌ده سن، یقین هئچ دوشونمه‌میسن. اودور کی، یئیرکن ده دوشون...
اوغلانین کوتله‌شن صیفتینی سوزن ماماچایا ائله گلیر کی، اوتاقداکی بو بنزرسیز کیشی‌نین اؤز وارلیغی‌یلا اطرافینداکی هر شئیه گؤستردیگی باسقی اوجباتیندان مطبخده‌کی هاوا دا گرگینلشیب، سانکی آز سونرا دیوارلار اوچوب-داغیلاجاق. قورخودان اؤزونو ایتیرن و بو کیشییه گؤرونمه‌میش نیفرت بسله‌ین مارییا پئتروونا بوغچاسینی الینه آلماقلا، ال‌اوستو ائودن چیخیر.
یولو یاری ائدینجه یادینا دوشور کی،  کیشیدن او حالالجا اوچلویونو آلماغی دا اونودوب. آیاق ساخلاییر، بیر آز دوشوندوکدن سونرا الینی یئلله‌مک‌له  یولونا داوام ائدیر.
 

https://t.me/Adabiyyatsevanlar

بهروز صدیق
• چادیر

گؤزومدن یوخوم دا دوشوبدور قاچاق
او بوم-بوز چادیرا دوشندن گؤزوم
اود توتوب آلیشیرکلمه-به کلمه
یاندیریر اؤزومو یاندیریر سؤزوم
کوله ک لر اؤنونده دایان غورورلو
یاناجاق اود توتان اوره یین اولسون
صاباحین عشقیله آل شیرین یوخو
کؤنولده یاشایان دیله یین اولسون
گؤزله ییر یولونو کتده کی باغچا
سؤيله‌ییر گول بالام گله جک بوگون
باریمدا اولماسا بوداق‌لاریمدا
گؤیلردن بیر اولدوز دره‌جک بوگون
داریخما-داریخما منیم جئيرانيم
او دوغما دیارا قاییداجاقسان
بو گونده اولماسا اینان کی صاباح
یاغی لار قورغوسون داغیداجاقسان

https://t.me/Adabiyyatsevanlar

عدالت دومان

من الی قابارلی ایشچی یم  آخی
بیلیرسن یوللاری نئجه گلمیشم؟
سحر  گون چیخمامیش  چیخمیشام  ائودن
گورورسن  ؟گون باتیب گئجه گلمیشم


دئمدیم  قادینلار  یئیب یاتاندی
بیر آزجا  نازلی دیر عشوه ساتاندی
قادینسیز کیشیلر  ایتیب باتاندی
سانما کی  قادیندان  اوءجه گلمیشم


باشیمدا قار  وارسا  یاشیم اوتوشوب
آخیب  چایلارینان  یاشیم  اوتوشوب
اوووم الدن چیخیب  قوشوم  اوتوشوب
  دومان گلمیر سه ده وئجه  گلمیشم

https://t.me/Adabiyyatsevanlar

اوشاق ادبیاتی
اوشاق ادبیاتی هر هفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

اوشاق ادبیاتی

✅ ۱۳۸ میلیون کودک کار در جهان

🔹سازمان ملل متحد در گزارشی اعلام کرد نزدیک به ۱۳۸ میلیون کودک در سراسر جهان در سال ۲۰۲۴ هنوز کار می‌کردند.

🔹این سازمان هشدار داد اگرچه پیشرفت‌هایی حاصل شده است، اما ریشه‌کنی کار کودکان می‌تواند «صدها سال» به تأخیر بیفتد.

https://t.me/Adabiyyatsevanlar

اوشاق ادبیاتی
گوندرن اوستاد نقابی

سلام.
اوشاق ادبیاتی ایچون حافظه سیندن سویله ین "فاطمه ال طه" :
-سلام حاجی ستّار آغا!
بو قویونو که دونن بیزه ساتمیسان ،بیر گوزو  کوردور.
-شبسترلی حاجی ستّار:
منیم باجوم!قرآن اوخومویاجاخ که کوردو-کوردو دا!

نوه سینه :
"میترا"منیم بالامدیر!
شافتالیلار تالاندیر.
هامی چیخیب گئدندیر،
بالام منه قالاندیر.
۱۳۸۱
گونش ایلی.

قاشین اولا بیلمه رم،
گو`زون اولا بیلمه رم،
دونیا دونیادان اولسا،
آنان اولا بیلمه رم.

چیخایدیم داغ باشینا،
یازایدیم سال داشینا
گَلن -گئدن اوخوسون
نه لرگَلمیش باشیما.
ه،۸،۱۳۸۶    -۶۶ ساله.

شفتالی یام کالام من،
دیلیم یوخدور لالام من
"وایقان"دا بیر قیز سئودیم،
پولوم یوخ که آلام من.
۱،۷، ۱۳۹۰
وایگان،بوگن گوزل بیر شهر اولموش وشبسترین آشاغاسیندا یئرلشمیشدیر .
وجه تسمیه سی(وی،پیلله لی و دایاز سو قویوسو. گان:مکان ،یئر،زمی.)
باخ:برهان قاطع

کاش من الک اولایدیم،
ائله گَره ک اولایدیم.
یاریم ائوه گَلنده ،
اونا (بَرَک)اولایدیم.

دو بیتی مذکور مربوط بهیکصد سال واندی است که در آن زمان،مردان بومی و مهاجر اغلب شالکمر سفید و یا رنگی به میان می بستند.

https://t.me/Adabiyyatsevanlar

اوشاق ادبیاتی

ایستی دن گئنیشلنمه قانونو2
یازان : علی صمدلی (« ژنرالین اوشاقلیغی » کتابیندان 
کؤچورن : علی آغ گونئیلی  ـــ ابرازی

آپاریب آتاما گؤستردیم . آتام بیندی. ناهار فاصیله سی باشلاندی . آتام گیل گئیینیب سؤیوندوقلاری اتاقدا شالوارلی خالالار استول آچدیلار . کیمین چانتاسیندا نیی وارایدی قویدی اورتایا . هامینین اوتورماغا استولو وارایدی. من آیاق اوسته قالمیشدیم. 
آتام : 
ــ هانی بس دوزلتدیین استول ؟ 
من قاچیب کیچیک اوتوراجاغیمی گتیردیم. دوغرودو ،بویوم استولون اوستوندکی یئمکلره چاتمیردی. آنجاق هردن آیاغا قالخیب شئی گؤتورور و یئنیدن اؤز استولومدا ایلشیردیم. 
آخشام تیکینتی ده گؤردوکلریمین هامیسینی آناما دانیشیردیم. آتامین تئز ، تئز ایشلمه یینی ، اؤزومه ایستول دوزلتمه ییمی ...
آخشام یاتاندا آتام دان سوروشدوم : ــ هرگون بئله تئز ـ تئز ایشله ییرسن ؟ 
ــ هرگون ــ دئدی. 
ــ نییه ؟ 
ــ اونا گؤره کی ، مکتبی تیکیب سئنتیابرین بیرینه چاتدیرماق لازیمدی. 
ــ سئنتیابرین بیرینده نه اولاجاق  کی ؟‌
ـــ بوتون مکتب لر آچیلاجاق یئنی درس ایلی باشلایاجاق ، سنده همین مکتب ده اوخویاجاقسان منده ،آنان دا  . 
من دوروخوب قالدیم . نئجه یعنی منده ، آنانم دا 
ــ سیزده بیرینجی صینفه گئدجک سینیز ؟ 
ــ بیرینجی یه یوخ ،  دوقوزونجویا . 
ــ نییه دوقوزونجویا ؟ 
ــ  بیز سککیزینجی صینیفی بیتیرمیشیک . 
ــ بس سونرا ؟ 
ــ سونرا ایشلدیک . 
ــ بس ایندی اوخویاندا ایشله مییجیک سینیز
ــ  ایشله یه  جیییک . بیز گئجه مکتبینده ، آخشاملار اوخویاجاییق.   
ــ بس سونرا ؟ 
ــ  سونرادا اینیستیتودا . 
بیرنئچه گون سونرا ، آتاملا اولان بو صحبت منیم یادیمدان تمامی ایله چیخدی. بیرده گؤزومو آچیب گؤردوم کی ، آنام  منیم مکتبلی گئییملریمی اوتوله ییب سلقه ایله استولون باشیندان اسیب . آتام ایسه تزه کتاب – دفتریمی ، تزه چانتاما ییغیر.سحرمن تزه مکتبلی فورماسیندا، تزه چانتامی گؤتوروب ، اتامین تیکیب باشا چاتدیردیغی تزه مکتبه یوللاندیم. مکتبین قاباغی اوشاقلارلا ، بؤیوکلرله دولوایدی ، اونون گیره جک قاپیسی تای با تای اولسا دا ایچری هئچ کیمی بوراخمامیشدیلار. قاپی یا اوزون قیرمیزی لنت چکیلمیشدی. تزه پالتار گئیمیش ، اوجا بویلو ، باشی دمیر دبیلقه لی بیرکیشی ، تاختادان قایریلمیش ایری بیر آچاری گتیریب مکتبین دیکپئتورونا تقدیم ائتدی. هامی ال چالدی. سونرا قیرمیزی پودنوسدا قایچی گتیردیلر. من آداملارین آراسیندان سیوشیب اؤزومو قاباغا وئردیم. گؤردوم کی دمیر دبیلقه لی کیشی پودنوس داکی قایچینی گؤتوروب قیرمیزی لئنتی کسدی . یئنه هامی ال چالدیلار . سونرا او، اوزونو اوشاقلارا توتاراق : 
ــ یئنی مکتبینیز،  یئنی درس ایلینیز موبارک اولسون ! ــ دئدی. 
آنجاق بوندان سونرا من همین عمی نی تانیدیم. بو منیم اتام ایدی. من دابانلاریمی قالدیریب ، بیرده اونا دیقت له باخدیم. یوخ یانیلما میشدیم ، بو منیم آتام ایدی . من اوشاقلارین ایچریسیندن بویلانیب قیشقیرماق ایسته دیم : 
ــ آتا من بوردایام !
آنجاق گئج ایدی. اوشاقلار سئل کیمی ایچری آخیشدی. و من ده بو سئله قاریشیب ایچری دوشدوم وآتامین گؤزوندن ایتدیم. آتام ایسه ... یوخ بونا اینانمایا جاقسینیز . اونا گؤره کی ، هئچ من اؤزومده اینانمیردیم. آتام و آنام تله سیک ناهار ائدیب پالتارلارینی دیشدیلر.دفتر ـ کتابلارینی گؤتوروب آخشام مکتبینه گئدنده آتام : 
ــ گلسن ،  آیدینی دا اؤزوموزله آپاراق ،- دئدی . 
موعلیمنن ایزن آلاریق دالدا اوتوروب درسلرین یازار.آنام راضی اولدو . من چوخ سئویندیم . بیز بیر ـ بیریمیزه قوشولوب ، تزه مکتبه یوللاندیق .من لاپ آرخاداکی پارتادا تمتک اوتورموشدوم . قارشیمدا الفبا کـتابی ، دفتر ، قلم واریدی. آنجاق نه « آ » یازابیلیردیم نه ده  « ب » . آتام – آنامین موعللیمی بوتون درس جین سیملرین ایستی دن گئنیشلمه سیندن   ،سویوق دان ایسه ییغیلماسیندان اوزون ،اوزادی دانیشیر وتجربه گؤستریردی. یاتاندا من بوتون گئجه نی اؤز ، اؤزومه بوحاقدا فیکیرلشیردیم. 
ــ آها ، آداملار برک برک ایستی اولاندا یاخالارینی آچیرلار. آخی اونلار ایستی دن گئنیشلنیرلر.سویوق اولاندا ایسه عکسینه  یاخالارینی دویمه له ییب بوزوشورلر. آخی اونلار سویوقدان ییغیلیرلار. 
۱۹۸۷

https://t.me/Adabiyyatsevanlar

اوشاق ادبیاتی

    م. صفا

   ژئنرال؛ گَل الجک‌سیز دانیشاق...

   ناپلئونون اوردوسو روسییه‌نی ایشغال ائدرکن اصلینده، غلبه‌یه دوغرو گئتمه‌یردی. روس عسگرلری سیبری‌یه دوغرو گئری چکیلرگن، اوجسوز-بوجاقسیز چؤل‌لری دوشمنه یوخ، آمانسیز قیشا بوراخیردیلار. دیگر طرفدن ده، بوغدا ساحه‌لرینی یاندیراراق، کندلرده‌کی ارزاق احتیاجلارینی اؤزلری ایله آپاریردیلار.
   فرانسیز اوردوسو آجلیغا و دوندوروجو سویوغا، یعنی اؤلومه دوغرو گئدیردی. عسگرلر اوزون ایل‌لر سورَن موحاریبه‌دن یورولموش، آج قالمیش، سویوقدان خسته‌لنمیشدیر. غَلَبه سرخوشلوغوندا اولان ناپلئون هوندور بیر یئره چیخیب، عسگرلره موراجعت ائتمک ایسته‌ییردی. مقصدی‌ایسه عسگرلرده روحیّه- احوالی یوکسلتمک ایدی.       «دایان، غلبه یاخیندیر. سن ده، سویوق گونلرده ...» عسگرباشی، ناپلئونون اؤنونده دایاناراق، ساکیت‌جه دینله‌ییردی. ناپلئون بیر آنلیق سوساندا، اون‌باشی قیشقیردی: -«ژئنرال، گلین الجک‌سیز دانیشاق.»
   ناپلئون اللرینه باخادی...
   اللرینده باهالی یوندن توخونموش خز الجک لر واریدی. او عسگرلرینه باخدی، هامیسی سازاق وشخته‌لی سویوقدا قالمیشلار و لازیم اولان سوییه‌ده، قورویان البسه‌لری ده، یوخ‌ایدی. پوتونلاری و گئییملری ده جیریلمیش‌ایدی...
   تاریخ، ناپلئونون عاغیللی آدام اولدوغونو سؤیله‌میش.
   او، اوتاناراق سوسدو...

https://t.me/Adabiyyatsevanlar

اوشاق ادبیاتی
ادبیات سئونلر
ویدا حشمتی
«هانانین ماجرالاری»
بئشینجی بؤلوم
اونودولموش خیاللارین قورتولوشو

قارانلیقلار آیناسی‌نین سینماغیندان نئچه گون سونرا، باغ ایشیم-ایشیم ایشلداییر، هر طرف الوان-الوان اولموشدو. اما «گئجه‌یاریسی» یئنی بیر خبرله گلدی. او دئدی:
-اوزاقداکی دونیالاردا اولان بعضی اوشاقلارین خیاللاری اسیر اولوبدور. اونلار آرتیق خیال قورا بیلمیرلر چونکی هئچ کس اونلارا اینانمیر... یا بئله بیلیرلر، خیال‌قورماغین فایداسی یوخدور. بیز او دنیالارا گئدیب، یاردیم ائتملی‌ییک.

سئحیرلی آغاج باشقا دونیالارا بیر قاپی آچدی. هر قاپی، بیر اوشاغین سیمگه‌سی ایدی.
هانا، اوستونده پارچالانمیش‌اوچورتما شکلی اولان قاپینی آچدی. قاپی‌نین بویالاری سولوق ایدی و آرخادان سیزیلتی سسی گلیردی.
قاپیدان کئچدیلر، کول رنگینده بیر دونیایا کئچدیلر. اورا رنگ‌سیز ایدی. هئچ حیوان یوخویدو و سس‌سیزلیکده‌یدی. سکگیز یاشیندا اولان بیر اوغلان‌اوشاغی یئرده اوتورموش، توپراقدا جیزیق چکیردی.
هانا یانینا گئدیب، دئدی:
-سنین آدین نه‌دیر؟ نییه بوردا اوتوروبسان؟
اوشاق باشینی قالخیزمازدان دئدی:
-منیم آدیم آتابای‌دیر. مدرسه‌ده خیالی نقاشی چکردیم، اما اوشاقلار لاغا قویوب، نقاشی‌لاریما گولوردولر. من ده، آرتیق خیال قورماماغا قرار وئرمیشم.
هانا دئدی:
-من ده اوّل بئله بیلیردیم خیال قورماق یاخشی دییل، آما سونرا بیلدیم کی، خیال قورماق منیم دونیامین لاپ گوجلو بؤلومودور.
باریش نقاشی دفترینی آتابایا گؤستریب، دئدی:
-بیر شئی چک. هرنه اولورسا اولسون، بیر نقطه ده چکه‌بیلرسن.
آتابای بیر جیزیق چکدی، سونرا بیر نقطه قویدو. اوندان سونرا اوچورتما شکلی چکیب، الوان بویادی. ائله او آن، اونون دونیاسینا رنگ گلدی و گؤی اوزو ماوی‌لشدی.
هر نقاشی چکدیکده، اطرافی ایشیقلانیردی. اونوتدوغو حیوانلار، بیر-بیر گلدیلر. کاغاذ قوشلار، بؤیوک قولاقلاری اولان بالاجا سیچان، شکیلدن شکیله گیرن بولودلار.
آتابای گولومسه‌دیکده، باغدا یئنی بیر قاپی آچیلدی.
«گئجه‌یاریسی» اونلاری گؤزله‌ییردی. او دئدی:
-سیز بو گون بیر خیالین جانینی قورتاردیز و اومودو پای گتیردیز.

https://t.me/Adabiyyatsevanlar

اوشاق ادبیاتی

ویدا حشمتی
«هانانین ماجرالاری»

بئشینجی بؤلوم
اونودولموش خیاللارین قورتولوشو

https://t.me/Adabiyyatsevanlar

حمله به کشورمان و کشتن مردم بی دفاع توسط هرکس ،هر کشوری را محکوم می کنیم،
1404,3,23
https://t.me/Adabiyyatsevanlar

محرم پریزاد "سورگون"
آنامين ياخدانی

ياديمدايركي:
كيچيك چاغلاريمدا، 29- 1328شمسي ايل‏لرينده، مكتبه آياق قوْيمادان اؤنجه بيرگون آتام پاشا اوْغلو علیمدد جلالی، آليش- وئريش سفري‌نين سوْنوندا ائوه قاييدان باش، سوْيوق‌بولاق‌دا، دللالابازارین، حراج بوساطيندان آنام فرنگيز اوچون اوزو الوان تَنيكه واراقدان ايشلنميش، نيمداشت بير تاختا ياخدان آليب، اوزون قولاغين بئلينه ساريتلاييب سولدوز بؤلگه‏سینده یئرلَشَن كنديميز فرقوزادا، گتيرميش‏دير.
آنام سئوينجك آزدان- چوْخدان بوخچا پالتارلاريني و باشقا قيوير- زيويرلاريني كؤهنَلمیش تاختا صاندیق‏دان تازا گلميش ياخدانا بوْشالديب، كؤهنه‌ني گؤزدن سالدي! داهي اوّل‏لرتك‌ موغايات اوْلمادي، بلكه تؤر- تؤكونَك حاجات‏لاري دوْلدورماق اوچون، اَل‌دامي‌نين بير بوجاغيندا اوْنو يئرلشديردي. جاغ- جاغدان آرالانميش بو صاندیق، سوْنرالاردا تنديره اوْدونلوق اوْلدو! 
تازا گلدی بازاردان، کؤهنه دوشدو نظردن. دئمیش‏لر.
تازا آلينميش ياخدان، آنامين عؤمرونون سوْن چاغلارينادَك ( 1374شمسي ايلي‌  ) قاليردي، اوْنون قاپاغي‌نين حالغا- رزه‌سيندن ساري توژدان دوزه‌لميش بير آلمان قيفيلي كئچيريب قيفيللایاردي، آچاريني‌دا بير قيطان بوْیونباغي‌لا بوْينوندا گئجه- گوندوز آسيلي ساخلاردي، آرخایین اوْلمادان اونو،گؤزونون ايشيغينادا تاپشيرمازايدي! 
آنامين بو ياخدانينا هر واخت گؤزوم ساتاشاندا، ذئهنيمده سيلينمز بير سوْرغو تيكرارلانیردی: گؤره سن بونون آجارليغي بير جاهاز كيمي هانكي گلين‌له برابر، بخت ائوينه كؤچموشدور؟ و یا، سوْنرالاردا قوْجاليقلا يوْخسوللوقلاري بير يئره دوشوموش دوننكي خوشبخت و، قوْشا قاريميش اَر- آرواد، بوگون اوْنو سيمسارا، دَيَر- دَيمزينه وئريب، باهاسي قَدَري، طبق‌لري‌نين بوْشلوغونو بير نئچه چوره‌كله دوْلدورموشلار؟ ندنسه كؤهنه‌لميش و ايندي‌كي كيمي گؤزدن دوشموش بو ياخدان، دللابازاردان باش چيخارتميشدير؟ 
بو آچيلماز سيرر، آنام ياشاديغي قَدَري منله ياشادي! آنام بيزدن ابدي آيريلاندان سوْنرا، ياخدان ائوده‌كي‌لرين گؤزوندن دوشدو! هارايا قوْيدوم يئري دئييشيلدي! ياواش- ياواش ائودن اوزولوب آنامين گؤزوندن ايراق، حيه‌طين بير بوجاغيندا يئرلشدي! اوستونه كؤهنه و اَمدن دوشموش حاجات‏لار تلله‌ندي، توز- توْپراق بورودو، تَنیکه‏ واراقلاری پاسلاندی. دئمك ياخدان ائوده‌كي‏لرين يئرسيز ميرتا- ميرتينا و تيكرارلي دونقولتولارينا سبب اوْلموشدور.و... 
تاكي بيرگون ياخداني بؤيرو اوستونده قاپاغي آچيق كوچه قاپي‌سي‌نين آرخاسيندا گؤرركن سوْروشدوم: ياخدان بورادا نه گزير؟ 
دئديلر: كوچه‏يه قوْياق زيبيل‌چي آپارسين‌ دا ! ‏
بو دا، منه آغير گلدي! چكيلمز و اوْنودولماز نيسكيل اوْلدو! بير هانداكي دوزونه باخسايدين ياخدان ‌دا، بو گونكو مودلارا گؤره وئجه گلمز و موددان دوشموش بير حاجات ساييلا بيلردي. امّا منيمچین آنا ياديگارينا گؤز يوْمماق چتين‏ايدي! چوْخ فيكيردن سوْنرا، ياخداني سؤكدوم، بوْياسي گئتميش تَنيكه واراق‏لاري آتديم، قالان ايچري تاختالاريندان، چيخار- بيچر ائديب، كيچيك، ايكي طبقه‌لي، ييرمي جيليد يئرله‌شن بير كيتاب قفسه‏سي قوْشدوم، بئله‌ليك‏له هم ياخدان ائشييه آتيلمادي، هم ده‏، ائوده‌كي‏لر دينجلدي‏لر، همده كي آنام عزيز توتدوغو و اوْنون سيسررلاري‏نين صانديقچاسي اوْلان نيمداشت ياخدان‌دان دوزه لميش كيتاب قفسه‌سي، عزيز و اوْنودولماز بير نيشانه كيمي آنامدان منه ياديگار قالدی!

یاخدان: یخدان. صندوق.

https://t.me/Adabiyyatsevanlar

‍ • آغری‌سی‌وار
• بهزادبیات‌فرد


بورا یارغاندی قاییت، گئت سره‌نین آغری‌سی‌وار
بورا کول‌_کوس لا تیکان ،داغ دره‌نین آغری‌سی‌وار

نه تیفان دیر یاپیشیب,خیرخالاییر پرده لری
نه دی یئل چیرپیشاغی!پنجره‌نین آغری‌سی‌وار

چوخ‌آغیر درد دی‌چئکن, ایسته‌یه‌نی یوخدور عجب؟
هامی نین دردی آزیب،باخ هره‌نین آغری‌سی‌وار

بونه اوتلاق دیر اوراق, باش قولاغین پرپی له ییر؟
بونه یئردیر زمی نین, بت_بره‌نین آغری‌سی‌وار

دوشوب‌آرغین قانادی‌,سینمیش‌آهئی اوندا نه سوچ
اینانیلمیر نه‌چارا..! قوش فره‌نین آغری‌سی‌وار

زیروه گؤیلوم گئری دؤن,گلمه قاییت گلمه قاییت
بورا یارغاندی اوچور, گئت سره‌نین آغری‌سی‌وار...

https://t.me/Adabiyyatsevanlar

محمد_شهریاری_مقدم

ترجومه

اورتادوغودا دونیایا گلمک:
عاجیل خبرلرین ایچینده یاشاماق،
ساواش گؤزله‌مک،
باریشدان بیر داها اومیدینی کسمک،
آتش‌کس اوچون آن‌به‌آن و سورکلی اومیدینین آزالماسی دئمک‌دیر.

بو جوغرافیادا یاشاماق،
«راکئت‌یاغدیران گؤیون آلتیندا اؤپه‌جه‌یم سنی» دئمک‌دیر.

قایناق : شعر اوجاقی

https://t.me/Adabiyyatsevanlar

حیدر بیات

یوخ
آی ایشیغییلا کوسوشمه‌میشیک
بیربیریمیزی دوشونه بیلمیریک
اونو دوشونمه‌یه باغا گئتدیم
یارپاقلار آراسیندان باخیشدیق
بیر بیریمیزین آدینی حتی بیوگرافیسینی بیلسک ده
من ایشیق دیلینی او اینسان دیلینی بیلسه ده
یئنه
چوخ غریبه گلدیک بیر بیریمیزه
یارپاقلارین یاری سایار یاری سایماز
اومورسار اومورساماز
حئیرتله‌نر حئیرتلنمز باخیشی ایچینده
آیریلدیق
فقط اونوتدوم یارپاقلارا دئیه‌م
بیر گون سیز ده آی ایشیغینی دوشونمه‌یه‌جکسیز
و او زامان چوخ چوخ گئج اولاجاق بو گئجه‌نی خاطیرلاماغا

https://t.me/Adabiyyatsevanlar