ادبیات سئونلر

اوشاق ادبیاتی

ایستی دن گئنیشلنمه قانونو
یازان : علی صمدلی (« ژنرالین اوشاقلیغی » کتابیندان
کؤچورن : علی آغ گونئیلی ـــ ابرازی
بیز اوچوموزده بیر مکتبده اوخویوروق . آنام آتام ومن . اینانمیرسینیز، اینانمایین .من یالان دانیشان دئییلم . یالانچیلار آنجاق ناغیللاردا اولار.منیم دانیشیغیم اصل حقیقت دیر.منیم آتام اینشیعات چی دیر.اؤزوده قاباقجیل اینشیعات چی . ائله قاباقجیل اولدوغونا گؤرده ،بیزه یئنی میکرو رایوندا تزه ائو وئریبلر. بیز بیرینجی مرتبه دن بیردن ـ بیره اون دؤردونجو مرتبه یه قالخمیشیق. من کهنه ائویمیزده هئچ واخت نه گونشین چیخماسینی ، نده گونشین باتماسینی گؤروردوم .ایندی ایسه گونش بیزیم بیر اوتاغیمیزدا چیخیر ، بیر اوتاغیمیزدا باتیر.
من سحرلر باغچایا گئدیرم .اوزاغا یوخ ائویمیزین حیطینده کی ایکی مرتبه لی باغچایا .بیزیم قوروپ کئچن ایل بیرینجی مرتبه ده ایدی. بویایدان بیزی یوخاری مرتبه یه چیخاریبلار. آتام باغچانین طرفینده کی تیکینتیسینده ایشله ییر. هر گون تیکدییی بینانین دامیندان منی سالاملاییب ، ال ائدیر. قوروپپامیزین اوشاقلاری دا اونو تانییر. من اونو گؤرمه یینده اوشاقلار اونو منه گؤستریرلر.
ــ اودئی آتان ، سنه ال ائدیر. ـــ اوساعات آیاغا قالخیب منده ال ائدیر ، سونرادا بارماقلاریمی دوداقلاریما آپاریب اونو اؤپورم .
آناملا ، آتام ایشه سحر تئزدن گئدیرلر. آنام صبح تئزدن گئدیر. او، تراموای سورور. آخی او ، بؤیوک لری ایشه اوشاقلاری مکتبه آپاریر. استراحت گونلری من آتاملا ، آنامین سوردویوقیرمیزی تراموایلا سیاحته چیخیریق . نئچه - نئچه کوچه لردن کئچیر، پارک لاری آدالاری ، سونرا بیرهوندور تپه یه چیخیریق. بو تپه چوخ هوندوردئییل . آنجاق بورادان باخاندا دنیز گؤرونور. تپه نی آشان کیمی ، دنیز یوخ اولور . سونرادا آنام تراموایی دوز بیزیم ائویمیزین یانیندا ساخلاییر. بیز دوشوروک .
کئچن ایل سحرلر باغچایا منی آتام آپاریردی. بوایلدن اؤزوم گئدیرم . ائله بیلمه یین بو منه چتیندی . یوخ ، آخی دئدیم کی ، باغچا حیطیمیزده دی.
بیرگون من آتامدان سوروشدوم : ــ سن اوردا نه تیکیرسن ؟
او :
ــ سنین اوچون مکتب تیکیرم ، ــ دئدی.
ــ آخی من مکتبه گئتمیرم .
ــ گلن ایلدن گئدجک سن .
بونو معلمه میز ده منه دئمیشدی. آنجاق هئچ اینانمیردیم. اونا گؤره ده آتاما :
ــ آخی منیم بویوم بالاجادی ، ــ دئدیم .
آتام گولوب دئدی :
ــ مکتبه بویا گؤره یوخ ، یاشا گؤره گؤتورورلر. گلن ایل سنین یئددی یاشین اولاجاق .
من چوخ سئویندیم .سونرادا آغلیما هاردانسا بئله بیرفیکیر گلدی .
ــ من بئله یاخین مکتبده اوخوماق ایستمیرم ، ــ دئدیم .
آتام تعجب ائتدی :
ــ نییه ؟
ــ من مکتبه آنامین تراموای ایله گئتمک ایسته ییرم .
صحبته آنام قاریشدی.
ــ من سنی هر گون درسدن سونرا تراموایلا گزدیره رم .
استراحت گونوایدی. عادتا بوگونلری آتام منیم له کئچیریردی.آنجاق بوگون ندنسه ایشه حاضیرلاشیردی.
ــ آیدین، دئدی ــ بوگون تک قالمالیسان من ایشه گئتمه لییم .
من فاغیر ـ فاغیر اونون اوزونه باخدیم .ائله بیل اونون منه یازیغی گلدی. اوزومه باخیب : ــ بیلیسن کی ، اؤزونو ساکیت آپاراجاقسان ، سنی ده آپاراردیم اؤزومله ، ــ دئدی.
من اونا سؤزوئردیم ، اؤزومو ساکیت آپارارام . او منیم الیمدن توتوب تیکینتییه آپاردی.
مکتبین بیرینجی مرتبه سی آرتیق حاضیرایدی. صینیف اوتاقلاریندان بیرینی اؤزلرینه چیخمیشدیلار. بوردا سویونوب – گئیینیردیلر. آتام تمیز پالتارلارینی سویونوب سلیقه ایله شکافدان آسدی. اینینه ایش پالتارلارینی گئیدی ، باشینا یانغی سؤندورنلرین دمیر پاپاغیندان قویدو :
ــ هله لیک گل یوخاری چیخاق .
بیز تاختا پیله کن لرله اوچونجو مرتبه یه چیخدیخ . بوردان باغچامیزین حیطی آیدین گؤرونوردو . او، بوم بوش ایدی. آخی بوگون باغچا باغلی ایدی. بورادا آتاملا یاناشی جاوان خالالاردا ایشله ییردی. اونلاردا آتام کیمی ، شالوار و پئنجک گئیمیشدیلر.باشلاریندا دا یانغین سؤندورنلرین دمیر دبیلقه سیندن وارایدی. آنجاق اوز ـ گؤزلرینه سیغال چکمیشدیلر. اگر بوسیغال و بیرده دمیر دبیلقه لرینین آرخاسیندان چیخان ساچلاری گؤرنمه سیدی اونلاری کیشیلردن آییرماق اولمازدی. آتام منی بیرکونجده اوتورتدو قارشینا چکیج ، تاختا قیریقلاری و چوخلو میسمار تؤکدو .
ــ باخ نه باجاریسان ، دوزلت ـ دئدی. آنجاق بارماقلارین ازمه .
بوچوخ یاخشی ایدی . من فیکیرلشه ـ فیکیرلشه قالمیشدیم کی ،نه دوزلدیم . بیر تاختا گؤتوروب باشقا بیر تاختایا چالین – چارپازینا میخلادیم فیکیرلشدیم بو نیه اوخشاییر . تاپدیم بو « ایکس » حرفی ایدی. بس « آ » نی نئجه دوزلدیم . بونون اوچون تاختانی کسمه لی ایدیم . میشار ایسه یوخ ایدی.یاخشیسی بودورکیچیک اوتوراجاق دوزلدیم. دوزلتدیمده . بلیرسینیز نئجه ؟ ایکی تاختانی باشی آشاغی قویوب اوستونه بیر ائنلی،هامار تاختا میخلادیم. اولدو اوتوراجاق .