ادبیات سئونلر

- بیری ایتمه‌سه، بیری بیتمز، منیم بالام. بونو یادیندا ساخلا.
یاسی لاییقینجه یولا وئریب، یاسا گلن سونونجو قوناغی دا یولا سالاراق، گئجه یئرینده اوزانان آروادممیشین، اوغلونون گؤزونه یوخو گئتمیردی.
گئجه یاریدان کئچسه ده، کند میشیل- میشیل یوخویا گئتسه ده او، یئرینین ایچینده ائله هئی او طرف- بو طرفه چئوریلیر، داغی آرانا، آرانی داغا داشیییردی.
بیردن موللانین گوندوز یاس چادیریندا دئدییی سؤز یادینا دوشدو:
" بیری ایتمه‌سه، بیری بیتمز!"
گوره‌سن بو نه سؤز ایدی؟ بو فیکیر موللا ولی‌نین هاردان عاغلینا گلمیشدی؟ آروادممیشین اوغلو یاتاغیندا بیر خیلی قورجالاناندان سونرا نه دوشوندوسه بیردن آیاغا قالخدی. قارانلیقدا اَل هاواسینا دولابین اوستونده کی اَل فنارینی تاپیب آشاغی دوشدو. پیلله‌کنین قارشیسیندا باشینی قاباق پنجه‌لرینین اوستونه قویاراق مورگولوین آلاباش دا آددیم سسیندن دیکسینرکن تئز باشینی قالدیریب، گلیب اونون یانیندا دایاندی. مونجوق کیمی پارلایان قارا گؤزلرینی صاحیبی‌نین اوزونه زیلله‌دی. آروادممیشین اوغلو اوره‌یی دؤیونه- دؤیونه ارکک خدیجه گیل له آرالاریندا کی چپره یاخینلاشدی. فناری او طرف- بو طرفه فیرلاداراق دیققت‌له چپره باخدی. کول- کوسون ایچریسینده کؤهنه قوز آغاجی‌نین کسیلدییی یئرده، بالاجا بارماق بویدا شوو گویَریردی. داها دوغروسو پارپار پاریلداییر، ایشیق ساچیردی. آرواد ممیشین اوغلو گؤزلرینی شوودن چکنمیردی، باخدیقجا باخیردی. سان کی کندین اوستونه چؤکموش قارا چادیر قارانلیق دا، قارا چادیر قارانلیغین آراسیندان بویلانان یاریم دیلیم ای دا، اوستو ساخسیلی داملار دا، هر شئی یوخا چیخمیشدی.
بو دونیادا تکجه آروادممیشین اوغلویلا، چپرده‌کی کول- کوسون آراسیندان عارسیز- عارسیز پارلایان قوز آغاجی‌نین شووی قالمیشدی.
سونرا بیردن بیره ایلدیریم چاخدی، کنده پاییز گلدی. یاغیشلار یاغدی‌ سونرا فصیل‌لر دورمادان دییشدی، هاوا آچیلدی، گونش کندین اوستونه اود اَله‌دی. باپ- بالاجا شوو گؤزونون قارشیسینداجا بؤیودو، اوستو پیتراق کیمی قوزلا دولو آغاجا چئوریلدی.
آرواد ممیشین اوغلونون باشیندان سان کی توستو چیخدی، نبضی برک- برک ووردو، آز قالدی دلی اولسون.
هؤوله‌سک حیه‌طه قاییتدی، ائوین قارشیسیندا کی، کنده گلندن- گله‌نه ماشینی‌نی ساخلادیغی کؤهنه گاراژا یاخینلاشدی. ایچی بنزین‌له دولو، پلاسماس قابلاردان بیرینی گؤتوروب چپره، دوز شووین اوستونه قاچدی‌.
قویروغونو قیساراق اؤز سئیرک عاغلیندا نه‌یه سه سئوینن، شَن- شَن آتیلیب دوشَن آلاباش دا در حال اونون آرخاسینجا گؤتورولدو‌.

https://t.me/Adabiyyatsevanlar