زررین رزندی(طنناز)
فروغ فرخزادین(آفتاب میشود)شعرین دن آلینمیشدیر.

باخ گوُر یئنه گوُزوم ده غم

سویا دوُنور دامجی-دامجی

گونش الینده دیر اسیر

قارا کوُلگه م،چوخ عینادجی

آلوولو اود دیرلیییمی

گوُر کی نئجه ویران ائدیر

روحوم یانیر توستو اولور

بولودلاردان اوجا گئدیر

گوُیون گوُلو سالخیم-سالخیم

قاش گوُز ائدن اولدوز اولور

گئجه نین ایپک یولونا

اولدوزلارین عطری دولور

روُیالاریمدا سنیله

یئتیشمیشم کهکشانا

ملک لرین قاناد سسی

لرزه سالیب آسمانا

قیرمیزی بیر بالیق اولوب

اولدوز یولوندا اوزورم

آل لاله نی پر-پر ائدیب

دوداقلاریمی بزیرم

سحیر دولو قلمینله

سینه مده اولدوز چکیسن

ایشیقلی اولدوزو دریب

منی یئرینه اکیسن

گئجه قاراسی نین مومو

داملا-داملا شئهه دوُنور

گونش تئللرین داراییر

ساچلارینا ایشیق هوُرور

گونشله گل صاباحلاردان

ایشیقلیقدان،شافاقلاردان

قورتار منی،باتاقلاردان

قارانقولوق اتاقلاردان

گوُتور منی اوزاقلارا

کولک لره،سازاقلارا

گونش لره،بوزاقلارا

یئتیر سئودامی اوجلارا

تاپشیر هوسلی موجلارا

بورو اوُپوش ایپه یینه

سورو خیال اته یینه.

https://t.me/Adabiyyatsevanlar

یعقوب_نیکزاد

یولا وئرین بالا اوستو
یوواسینا گلن قوشو !
یاراسینی ایستی، ایستی
قانادیندان سیلن قوشو !

دیمدییی بیر نغمه بویلو
ییخیلیبدیر اوزو قویلو
داشلاما سنله هر زامان
اوخوماغین بؤلن قوشو !

آسیلیب دار آغاجیندان
توتاق کی اؤلور آجیندان
بیر ده گلمز قیناماغا
قول، قانادسیز اؤلن قوشو

یارا درین، عؤمور دایاز
آغریسی توختامیر بیر آز
سوپوروب هاردا باسدیریم
آغاجدان تؤکولن قوشو ؟

بلکه ده قوشدو بو آدام
قادام بو حایاتا ، قادام!
هاردا یازیب سال قفسه
بیر، ایکی دیل بیلن قوشو...

آرزو اوووجومدان اوچدو
نه ایدی سه، بیزدن کئچدی
ایلاهی سن باس باغرینا
هاوادا دینجه‌لن قوشو !

https://t.me/Adabiyyatsevanlar

خبر
ادبیات سئونلر عاییله‌سی‌نین سئویملی اویه‌سی، تانینمیش شاعیر، یازیچی «ثریا خانیم خلیق‌ خیاوی»نین ایلک تورکجه رومانی «قفس‌ناز» ایشیق اوزو گؤردو.

ادبیات سئونلر، اوخوجوسو بول اولسون دئیه، خانیم خلیق خیاوی‌نی تبریک ائدیر:
خانیم خلیق اوغورونوز بول اولسون، قلمینیز آخار!..

بو کیتاب ایکی یوز اون صحیفه‌دن عبارت‌دیر.
عنوان: قفس‌ناز
تورکجه رومان
یازار: ثریا خلیق خیاوی
ناشر: آیدین ساو نشری/تبریز
ائدیت: نورالدین مقدم(آیدین دومان)
طرح جلد: زهرا پیشکار
قطع: رقعی،۲۱۰ صفحه
چاپ اول: ۱۴۰۴/ اردیبهشت
تیراژ: ۵۰۰
قیمت ۲۸۰۰۰۰ تومان
بو کیتابی تبریز ده ناشردن، اردبیل‌ده، مشکینده معتبر کیتاب ساتیش ائولریندن وادبیات سئونلر کانالیندان الده ائده بیلرسینیز.
ثریا خلیق خیاوی ۱۳۵۳ هجری شمسی ایلین‌ده خیاو (مشکین‌شهر) ده دونیایا گؤز آچیب. خانیم خلیق خیاو، تبریز و واردبیل شهرلرینده تحصیل ائدیب، ادبیات رشته‌سین‌ده یوکسک لیسانس آلیب، ایللردی ادبیات اؤیره‌تمن‌لییی یاپیب. خانیم خیاوی‌دن کئچن ایللرده ایکی شعر کیتابی نشر اولوب کی، سونونجوسو «دختر شهر یئری»( شهر یئری قیزی) آدی‌یلا یایملانیب. بو کیتاب فارسجا یازیلیب، آنجاق قونولاری تام آذربایجانا عاییددیر. خانیم خلیق اوچ کتاب دا ترجمه ائدیبلر...
خانیم خلیق خیاوی یه  یئنی قلم نائلییتی آرزو ائدریک.
ادبیات سئونلر1404,2,9

https://t.me/Adabiyyatsevanlar

اسکله شهیدرجایی بندرعباس از لنز دوربین یک کوادکوپتر

https://t.me/Adabiyyatsevanlar

هر زامان سنی سئودیم !


🖌:عیسی نظری

من هر زامان سنی سئودیم ، اوجا داغلارین
باشیندا ، قالا داغیندا ، اوشگون ، گوبلک ها بئله ایت بورنودان گول سئچنده ، داوارلارا
یونجا،  یئم وئرنده ، من هر زامان سنی سئودیم !
قرآن  اوخویوب ،آغلییاندا ، گئجه لر ،چولده
قالیب،  بویوک ننه می قوردلاردان قورویاندا
هپ سنی سئودیم ، کنددن قاچان زامان ،
ائواوغلو دا گیزلنن زامان ، اورمودا راحات
اولان زمان ، هپ سنی سئودیم  !
تهران دا ، سرهنگ لرین وردوغو زامان ،
تهران - قم - شیراز ، اصفهان دا اوارا اولان زامان هپ سنی سئودیم
منیم گوزل اورموم  من هر زامان سنی سئودیم !
ائو صاحیبی ده اولسام ، قوناق دا اولسام
من هر زامان سنی سئودیم !
من سنده حاکیم اولان زامان دا ، اولمیان  زماندا ،  هپ سنی سئودیم !
نازلی اورموم ، من هر زامان سنی سئودیم !
https://t.me/Adabiyyatsevanlar

خیرالدّین قوجا  
حیکایه‌لر
کوچورن:ویدا حشمتی
حاضیرلایان:ادبیات سئونلر

«آدامین گرک عاغلی اولسون...»
 
دوز دئییرم واللاه! عاغلین اولمادی ها، بو دونیادا آدام کیمی یاشایامازسان، گرک عاغلین اولسون، دوشونه‌سن کی، آیه  نئجه اولور؟ سنین ده ایکی الین-آیاغین، بیر باشین، ایکی قولاغین و س. وار، او بیریلری‌نین ده. نئجه اولور، او بیریلر جاه-جلال ایچینده یاشاییر، سن همیشه لوت-عریان‌سان. قپییه گولله آتیرسان.  بئله چیخیر کی، او بیریلری‌نین عاغلی وار، یعنی سنین کیمی عاغیلسیز دئییللر. 
آ کیشیلر، هئچ اولا بیلمز کی، عاغیللی آدامین پولو-پاراسی اولماسین! عاغیل دئییلن شئی کی، وار. گرک او مطلق آدامدا اولسون. اولمادی هاااا، باتدین!
لاپ اوشاقلیقدان الیمه پول دوشن کیمی  گئدیب، وئریردیم آخماق-آخماق شئیلره. اوره‌گیینیزه پیس فیکیرلر گلمه‌سین، اوشاق، سیز دوشوندویونوز شئیلره پول خرجله‌مز. دئمه‌ییم اودور کی، گئدیب خیردا-خوروش آلیردیم، او بیری گون ده خوشوما گلمیردی، آتیردیم بیر کنارا...

بو یازی نین آردینی ا دبیات سئونلر کانالیندا اوخویون.

https://t.me/Adabiyyatsevanlar

خیرالدّین قوجا  
حیکایه‌لر
کوچورن:ویدا حشمتی
حاضیرلایان:ادبیات سئونلر

«آدامین گرک عاغلی اولسون...»
 
دوز دئییرم واللاه! عاغلین اولمادی ها، بو دونیادا آدام کیمی یاشایامازسان، گرک عاغلین اولسون، دوشونه‌سن کی، آیه  نئجه اولور؟ سنین ده ایکی الین-آیاغین، بیر باشین، ایکی قولاغین و س. وار، او بیریلری‌نین ده. نئجه اولور، او بیریلر جاه-جلال ایچینده یاشاییر، سن همیشه لوت-عریان‌سان. قپییه گولله آتیرسان.  بئله چیخیر کی، او بیریلری‌نین عاغلی وار، یعنی سنین کیمی عاغیلسیز دئییللر. 
آ کیشیلر، هئچ اولا بیلمز کی، عاغیللی آدامین پولو-پاراسی اولماسین! عاغیل دئییلن شئی کی، وار. گرک او مطلق آدامدا اولسون. اولمادی هاااا، باتدین!
لاپ اوشاقلیقدان الیمه پول دوشن کیمی  گئدیب، وئریردیم آخماق-آخماق شئیلره. اوره‌گیینیزه پیس فیکیرلر گلمه‌سین، اوشاق، سیز دوشوندویونوز شئیلره پول خرجله‌مز. دئمه‌ییم اودور کی، گئدیب خیردا-خوروش آلیردیم، او بیری گون ده خوشوما گلمیردی، آتیردیم بیر کنارا. بو خاصيّتله بؤیودوم، گؤزومه یاخشی نه گؤروندوسه، لازیم اولدو-اولمادی، آلدیم.  یئکه کیشی اولدوم، عاغلیم باشیما گلمه‌دی کی، گلمه‌دی. نه‌یه گؤره؟
دئیین گؤروم، آدام دا نقد پولونو الیندن‌ وئرر؟ دئمه‌لی وئرمز. اؤلنلرینیز اولدو رحمتلیک! آمّا من نقد پولومو آپاریب قویموشام اؤزل بیر بانکا، اؤزو ده نه قدر اولسا یاخشیدیر؟ آلتمیش مین مانات!  ایللر کئچیب، اوتوروب سئوینه-سئوینه گؤزله‌میشم کی، باشقا اؤلکه‌لرده اولدوغو کیمی بانکا قویدوغوم پولون فایزی ده اوستونه گله‌جک، گئدیب ماشین آلاجاغام، ویلا تیکدیره‌جه‌یم، دونیانی گزه‌جه‌یم، «سن سایدیغینی سای، گؤر فلک نه ساییر».
بیر گون خبر چیخدی کی، پوللار ديیشیر، گئتدیم بانکا کی، آلتمیش مین ماناتی، اوسته‌لیک فایزینی ده آلیم. گؤتوروب منه نه وئرسه‌لر یاخشیدیر؟ آلتی مین مانات! ائله اورادا ایکی الیمی ایلیشدیردیم تپه‌مه، اؤز-اؤزومه دئدیم: «کول سنین عاغیلسیز باشینا، آدام دا بانکا پول قویار!؟ پولون وار، قوی ائوه یاواش-یاواش خرجله ده!»
ائله بیلیرسینیز، بو احوالاتدان سونرا عاغلیم باشیما گلدی؟ آی گلدی ها!.. «قویویا سو تؤکمکله سولو اولماز کی!» زمانه ديیشدی، اؤزل بانکلار چوخالدی.  آپاریب اولان-اولمازیمی قویدوم همین اؤزل بانکلاردان بیرینه. منیم حسابیم‌لا بیر نئچه ایلدن سونرا میلیونئر اولمالییدیم. بیر ده ائشیتدیم بانکی باغلادیلار، بانکئری ده توتدولار باسدیلار ایچری. هئچ دئمه، فیریلداقچی‌نین بیری ایمیش. «ایت ده گئتدی، ایپ ده».  قالدیم «لوت مادرزاد».
ایندی اؤزونوز دئیین، عاغیللی آدام دا نقد پولونو الیندن وئرر؟




«میصراعلار کیمیندیر؟»

قزئت رئداکتورو سالمان موتریف اوغلو رئداکسییادا لؤوبر سالیب یازی-پوزو ایله مشغول ایدی. قاپی دؤیولدو، ادبيّات شعبه‌سی‌نین مودیری کابینئته داخیل اولدو. ماسانین اوستونه بیر حئکایه‌ قویوب دیللندی:
-سالمان معلّیم، استعدادلی گنج یازیچیلاردان بیری‌نین اثریدیر. اوخوموشام، پیس دئییل، مصلحت بیلسه‌نیز، چاپا وئره‌ریک.
-یاخشی، بیز ده اوخویاریق، گؤرک نه یازیر!؟- دئیه رئداکتور موتریف اوغلو تشخّوصله بیلدیردی.
شعبه مودیری اوتاقدان چیخان کیمی، سالمان معلّیم حئکایه‌نی اوخوماغا باشلادی. گؤردو پاهو، شعبه مودیری‌نین گنج یازیچی آدلاندیردیغی ناشوکور بَی اؤلکه‌ده نه قدر وظیفه‌‌ صاحبی وار،  هامیسینی بی‌آبیر-روسوای ائدیب. آخیردا دا ایکی میصراع ایله فیکیرلرینی بئله تاماملاییب:
«ویجدانی سؤنوک باشچیلارین غفلتی آنجاق،
ائتمیش، ائده‌جک میللتی اللرده اویونجاق».
بیرینجی میصراعداکی «باشچیلارین» سؤزو موتریف اوغلونو عصبی‌لشدیردی،  دوشوندو کی، «بو گده لاپ آغ ئدیب!  یقین اجرا باشچیلارینی نظرده توتور  هامینی اؤزومله دوشمن ائده بیلمه‌رم کی!». اودور کی، بیرینجی میصراعداکی «باشچیلارین» سؤزونو پوزوب، بئله یازدی: «ویجدانی سؤنوکلرین غفلتی آنجاق...»
سحری گون قزئتی اوخویان بیر ادبيّات‌شوناس عالیم، رئداکتور سالمان موتریف اوغلونا زنگ ووروب تعجبونو بیلدیردی:
-آ کیشی، سیز نه ائتمیسینیز، او بویدا یازیچی‌نین میصراع‌سینی نییه ديیشدیریب بو گونه سالمیسینیز؟
رئداکتور موتریف اوغلو جاواب وئردی:
-اشی، ناشوکور بی جاوان یازیچیلارداندیر، آدیندان دا معلوم اولدوغو کیمی، ناشوکورون بیریدیر! اؤلکه‌ده وظیفه‌‌ صاحبی قالماییب، هامیسینا ساتاشیب. هله اونون حئکایه‌سینی چاپ ائله‌میشم، گرک سئوینسین...
پروفسور عصبی‌لشدی:
-آی سالمان معلّیم، ناشوکور بی کیمدیر؟ همین میصراع‌لار حسین جاویدیندیر ائی، باشا دوشدون!؟
گون عرضینده رئداکتورا یوزلرله بئله زنگ وورولدو، زنگ وورانلار بیلمیردیلر کی،  موتریف اوغلو عؤمرونده حسین جاویدی اوخوماییب. «یازیق» هارادان بیله‌یدی کی، میصراعلار کیمیندیر؟

 
«یورغان-دؤشکده قالدی...»
 
قایینانامدان یامان قورخوردوم. آروادین بوز صیفتینی گؤره‌نده جانیما اوشوتمه دوشوردو. نییه؟ عائله‌‌ ایشیمه قاریشیردی. گونده قیزینی قیزیشدیریب ائویمیزه داوا-دالاش سالیردی. دؤزوردوم، بو بیر. آنامی، خالالاریمی، بی‌بی‌لریمی قاتیردی بیر-بیرینه، اوندان-بونا، بوندان-اونا دئمک‌له آرا قاریشدیریردی،  بو ایکی. «خالقین کوره‌کنلری قاز ووروب، قازان دولدورور، منیم کوره‌کنیم قوروجا معاشا باخیر، آجیندان اؤلور»  دئمک‌له منی قوهوم-قونشو یانیندا حؤرمتدن سالیر، آبریمی تؤکوردو، بو اوچ. سایماقلا قورتاران دئییل، بالالاریمین خاطیرینه عائله‌‌می داغیتماق ایسته‌میردیم. «قایینانام بو گون-صاباح‌لیقدیر»، دوشونجه‌سی ایله بیرتهر دؤزوردوم. بئله-بئله عؤمرومون یاریسی آه-وایلا کئچدی...
بیر گون ائشیتدیم قایینانام دوشوب یورغان-دؤشه‌یه. دئدیلر وضعيّتی آغیردیر، «او طرفلیکدیر». سئوینجیمدن نذیر-نیاز پایلادیم، آمّا بوروزه وئرمه‌دیم.  قایینانامین یانینا گئدیب، باشلادیم یالتاقلانماغا:
- آی آرواد، قورخما، خسته‌لیکدیر ده،  کئچیب گئدر. نه لازیمدیر دئ، یئرین دئشیییندن تاپیم گتیریم.  هله کی، ساغام قویمارام سنه بیر شئی اولا.
قایینانام چنه‌سی اسه-اسه دیللندی:
-سنین هئچ نه‌یین منه لازیم دئییل! گئت قوهوم-قارداشی یانیما چاغیر.
آغزیم نه ایدی اونون امرینی یئرینه یئتیرمه‌یه‌یدیم. هامییا خبر وئریب ییغدیم قایینانام‌گیله. ائله کی، قوهوملار جمع اولدو، قایینانام دیللندی:
-من اؤلورم. کیمه نه وئرمیشم، گئدین گتیرین.
او یاستیغین آلتیندان بیر سییاهی چیخاریب، «وئردیکلریمی باخ، بورا یازمیشام، گیزله‌دیب ائله‌مه‌یین»، دئیه گؤزلرینی قییدی.
هامی مات-معطل بیر-بیرینه باخدی.  علاجلاری اونا قالدی کی، قایینانامین گؤستریشینه عمل ائله‌سینلر، ائله‌دیلر ده. کیمی قایینانامین پای وئردییی پالتارلیق پارچالاری گتیردی، کیمی کریستال قاب-قاجاغی، کیمی ده بورج پوللاری گئری قایتاردی. قایینانام بونونلا کیفایتلنمه‌ییب، اؤزونون گئییم پالتارلارینی دا اوست-اوسته ییغدیردی. سونرا ایکی یئکه کریستالی بیر-بیرینه ووروب، سیندیردی. بالدیزیم قیشقیردی:
-آی آرواد، نئینیرسن، دلی اولموسان؟
قایینانام اونون سؤزونه محل قویمادی،  گئییم پالتارلارینی دا جیریق-جیریق ائله‌ییب، یانان پئچه آتدی.
قایینیم دؤزه بیلمه‌دی:
-پالتارلارینی نییه یاندیریرسان، آی آرواد؟
قایینانام قیشقیردی:
-من اؤلندن سونرا نه‌ییمه لازیمدیر!؟
باجاناغیم باشلادی دیل تؤکمه‌یی:
-آی آنا، ائله هر خسته‌له‌نن اؤلور کی؟ اللّه قویسا بو گون-صاباح ساغالیب دورارسان آیاغا. پالتارسیز گزه‌جکسن؟
بو سؤزلر قایینانامین قولاغینا گیرمیردی، ائله هئی سیندیریب-یاندیریردی. او، سون کیبریت چؤپلرینی ده یاندیریب دیللندی:
-والسالام! ایندی او دونیایا راحت کؤچه بیله‌رم!..
بدبختلیکدن دوز بیر هفته دن سونرا قایینانام ساغالدی. آمّا یورغان-دؤشکدن قالخا بیلمه‌دی. چونکی اگنینه گئیمه‌یه بیرجه پالتاری دا قالمامیشدی...
 
 
 

«قورخورام»
 
 
هئچ نه‌دن قورخمورام. قزئتدن، تنقیددن، دئدی-قودودان، سؤز-بئزدن قورخمورام. یوخوسوزلوقدان، اذيّتدن، کاسیبلیقدان، قورخمورام، وظیفه‌‌سیزلیکدن، وظیفه‌‌دن چیخماقدان قورخمورام. بیرجه شئیدن مسلمانلارین اؤز دیللرینی اونوتمالاریندان قورخورام.
او گون حیه‌طه چیخمیشام، قونشولوقدا یاشایان مسلمان اوشاغی منی گؤروب دئییر:
- زدراوستوویتئ!
سوروشورام کی، بالا سن روسسان؟
جاواب وئریر:
-نئت.
دئییرم، بس منه نییه روسجا سلام وئریرسن؟
دئییر:
-اوتئتس، مات پو روسسکی قوووریات...
هئچ کیمدن قورخمورام، هئچ نه‌دن قورخمورام. خسته‌لیکدن، حکیملردن، ییخیلیب قولومو-قیچیمی سیندیرماقدان، یالانچیلاردان، روشوت خورلاردان، یالتاقلاردان، ایکی‌اوزلولردن قورخمورام. بیرجه شئیدن قورخورام: مسلمان‌چیلیغی ایتیرمکدن. بعضی مسلمان مغنّی‌لر گول کیمی ماهنیلاریمیزی قویوب باشقا اؤلکه‌لرین ماهنیلارینی اوخویورلار، عئیبه‌جر شکیلده رقص ائدیرلر، ایلان کیمی قیوریلیب، آچیلیرلار، آداما دئیرلر بالا  سن مسلمان‌سان یوخسا مولتانی؟ هر اؤلکه‌نین، هر میللتین ماهنیلاری گؤزه‌لدیر، بونا سؤزوم یوخ. سنه نه دوشوب کی، اونلارین ماهنیلارینی اوخویورسان، اؤزو ده، نئجه دئیرلر قولونو-قیچینی سیندیرا-سیندیرا؟ بئله ماهنیلارا داها چوخ قولاق آسیرلار، کاسئتلر چوخ ساتیلیر ائله‌می؟ بس بیلمیرسن کی، بو دا بیر سیاست‌دیر.  ایسته‌ییرلر کی، مسلمانچیلیغا بو طرفدن ده ضربه‌‌ وورسونلار؟ یعنی مسلمان اولدوغونو سنه اونوتدورسونلار! باخ، من ده ائله اوندان قورخورام. قورخورام کی،  بیر تیکه مسلمانچی‌لیغیمیز قالیب، اونو دا اونوداق!

هئچ نه‌دن قورخمورام. اؤلومدن، او دونیادا قورولاجاق میزان-تره‌زیدن، جنّت-جهنّمدن، قیل کؤرپوسوندن قورخمورام، آمّا بیر شئیدن قورخورام: مسلمانلارین وطنی، تورپاغی اونوتمالاریندان، کیمی دیندیریرسن، دئییر: «خاریج‌ده یاشاماق ایسته‌ییرم. نه وار آخی، بو خاریجده، خاریجده یئل اسیب، قوز تؤکولوب؟ آدام دا وطنینی  آنا دیلینی، آنا لایلاسینی اونودار؟
خلاصه‌‌ من هئچ نه‌دن، هئچ کیمدن قورخمورام. بیرجه مسلمانلارین دیلیمیزی برباد حالا سالماقلاریندان، آنا لایلاسی کیمی ماهنیلاریمیزا یاد خاللار قاتماقلاریندان، وطنی، تورپاغی اونوتماقلاریندان قورخورام. واللاه-باللّه قورخورام!

https://t.me/Adabiyyatsevanlar

مای بایرامی آذربایجانین زحمتکش لرینه، وطنیمیزین زحمتکش لرینه قوتلو اولسون.

https://t.me/Adabiyyatsevanlar

اول ماه مه روز جهانی کارگر گرامی و خجسته باد.
1404,2,11

https://t.me/Adabiyyatsevanlar

در استقبال از ماه مه روز جهانی کارگر

مای بایرامینی دونیا نین زحمتکش لرینه ،آذربایجانین ایشچی لرینه خصوصیله ادبیات سئونلرده اولان زحمت کش لره قوتلو اولسون دئییریک .
اول ماه مه روز جهانی کارگر را به همه زحمتکشان جهان ،به کارگران آذربایجان بویژه به زحمتکشان قلم وکاردر گروه وکانال ادبیات سئونلر از صمیم قلب تبریک و تهنیت می گوئیم.
ادبیات سئونلر1403,2,11

https://t.me/Adabiyyatsevanlar

بیر مای دونیا ایشچی لر گونو وطنیمیزین زحمتکش قادینلارینا قوتلو اولسون.
1404,2,11

https://t.me/Adabiyyatsevanlar

مای بایرامی دونیا زحمتکش لر ینین گونو قوتلو اولسون.

« حجت آزاده »

ای دست های در تلاش
به کارِ آبادانیِ جهان
که آفریده اید
معجزه ی شگرفِ اندیشه را
کزو
روشن گشته چراغِ زندگی

متهورانه
به هر مانعِ شتافته اید
گاه
مرگ را به جان خریده
گاه
از زخمی عمیق بر پیکر
عمری را با رنج وُ محنت
بسر برده اید

از سیری ناپذیریِ
خداوندگارانِ زر وُ زور
تلاش تان نا دیده
تا
از دسترنج
تهی
و رسوبِ حسرت های دیرین
بر دل
دوام وُ قوام یابند

کی بُوٓد
دستان شوید
به برادری و همبستگی
تا
بمیرد
سروری و بندگی
تا
قرار گیرد
توازن وِبرابری
بر
زندگیِ بشری

            https://t.me/Adabiyyatsevanlar     

مای بایرامی قوتلو اولسون
صدیار وظیفه" ائل اوغلو"
ایشچی گونو

منیم ایشچی دوستوم ال – اله وئره ک
بایرامین موبارک گونون موبارک
بیر عؤمور گؤروشوب الویدا دئدیک
بیرده گلن بایرام گلن یازا دک

گلن مای گونونده گؤروشدوک بیرده
قالدی سینه میزده سؤز کیتاب کیتاب
باغلی گؤزوموزله بو اویوندا بیز،
باری چاغیرمادیق یولداش منی تاپ

نئچه اویونلاردا قورد آپاراندا
آه ایتن یولداشلار، باتان یولداشلار
یولداشین اوره یین ایسیندیرمه یه
اؤزونو اودلارا آتان یولداشلار

ائله آلیشدیق کی اؤز ایچیمیزده
کول اولدوق ساوریلدیق گرزوموزه بیز
یئسه ده چاققاللار یولداشسیز بیزی
یئنه ده گلمه دیک اؤزوموزه بیز

https://t.me/Adabiyyatsevanlar

بیر مای دونیا ایشچیلر گونو
الی خمیر،  قارنی آج‌‌لار
حسن ریاضی ( ایلدیریم )

ایل اوزونو
سحر آخشام
جوان، قاری
هیسلی ائوده ایلمک چالیپ، دفه دؤیدوک؛
ایستک‌لری، آرزو‌لاری قینا‌لادیق قینا- قینا؛
بوتا- بوتا ناخیشلارین یاناغینا
دزگاه بویو الوان- الوان خالی هؤردوک.

گلدی تاجر
یاریم آرشین قولتوغوندا؛
حاجی آلدی یاریلیغین،
او آغانین جیبی دولدو.

قانیمیزلا هؤردوگوموز الوان خالی
زنگین‌‌لرین سارایینا بزه‌ک اولدو.

کؤهنه‌ گیلیم، جیریق پالاز
بیر چوخ ائوین دؤشه‌نه‌یی،
بارماقلاردا بالیق آغزی یارا‌لاردا بیزه قالدی.
یایی، یازی ال آیاقدان فیلیق چیخدیق
ایلان‌کیمی سوروندوک بیز،
چؤل- باییردا توز- تورپاغا بوروندوک بیز؛
 باغ- بوستاندا بار بسله‌ییب، بیچینک‌ده بیچین بیچدیک،
یونجا بیچدیک، خشه بیچدیک.
سارس سونبول دنیزینده گئجه گوندوز اوزه‌ر اولدوق،
اتلیک‌لری بئجرمک‌چون یاشیل داغ‌لار اته‌یینده
مال- داوارلا گزه‌ر اولدوق.
امه‌ییمیز
میوه اولدو، تاخیل اولدو،
مال- قار ایله قویون اولدو
ایشلریمیز اویون اولدو.
قول چیرمادیق
نه آپاردیق؟!
اغاج‌‌لارین شیرین بارین
 یئشیک- یئشیک، ماشین- ماشین دلال آلدی.

باغ- باغچادا ‌سیغیرچین‌لار
بوستان‌لاردا تؤر- تؤکونتو دئم قارپیزی
              بیزه قالدی.
بورجوموزون دالی دوشموش قیسط‌‌لارینی اؤده‌مک‌چون
آغ بوغدانی، اتلیک‌لری پول ائله‌دیک،
قوتور‌کئچی ساغمالیمیز
قاراجالی بیت‌لی بوغدا قیش زوماری اولدو، یئدیک.
باشینیزی نه آغریدیم
گئن گؤز سبد چووالیمیز
روزو داری؛
الی خمیر، قارنی آج‌لار
بئله سووار روزگاری!

https://t.me/Adabiyyatsevanlar

بوردان ائندیرین: https://ishiq.net/kitab/36850

یوردومون سیرلری(جلد ۲)
▪️ مولف: رضا براهنی
▪️ مترجم: زکیه ذولفقاری شرف‌آباد
▪️ ناشر: ترجمه‌چی
▪️ نشر تاریخی: 1404
▪️ صحیفه سایی: 462 صحیفه
▪️ دیل: آذربایجان تورکجه‌سی
▪️ رسم‌الخط: عرب الفباسی

بو کیتابین فایلی ترجمه‌چی طرفیندن ایشیق سایتینا گؤندریلیب. کیتابین اوخوجولاری راضی و کؤنللو اولدوقلاری صورتده آشاغیداکی حساب نومره‌سینه ترجمه‌چی‌نین آدینا بیر مبلغ کؤچوره بیلرلر.
6274121154983001
زکیه ذولفقاری شرف آباد.
بانک اقتصاد نوین

https://t.me/Adabiyyatsevanlar