جوادی

وطنده آغلادیم، وطنده گولدوم
سیلدیریم قایالار کولگه لرینده
وطنده یاشادیم، وطنده اولدوم
شانلی ائللرینده اولکه لرینده

سولارکیمی آخا-آخا دورولدوم
داغلار کیمی اوجالاندیم حورولدوم
اوجالدیقجاق، آنجاق آلچاق گورولدوم
کلله گوز مانقوردون بَلگه لرینده!

پالیدیدیم قابیغیمی سویدولار
قارغا اولوب گوزلریمی اویدولار
آرخام یئره گلمز، بونو دویدولار
یئنی دن دیکلدیم دینگه لرینده

هره اوز آتینی بیر یانا چاپیر
قارغانی آللادیر پئندیرین قاپیر
تندیری ایستیکن فطیرین یاپیر
شرفین گیزله دیر، کوممه لرینده

دوزگوننوکله یالانچینی اَزیرَم
انسانلیغی ایکی شئی ده سَزیرَم
صداقت دی، شرافت دی، گَزیرَم
بوز آتیمین، چییلپاق یئلکه لرینده

https://t.me/Adabiyyatsevanlar

🔹تیراختور2
🔹الخلدیه بحرین 1

https://t.me/Adabiyyatsevanlar

‌
جمهوریت غیبتچی‌لرینه بداهتن جاواب
✍یازان: آزاد قارا دره‌لی
کؤچورن: سحرخیاوی
حاضیرلایان:ادبیات سئونلر

"پروفسور نصیب نصیب‌لی‌یه"

عؤمرونون گنج‌لیک ایللری ساوئت دؤرونه دوشدویو اوچون اؤزونو شانسسیز آدام ساییردی.
" نئینه‌مک اولار؟ والدین‌لرینی، بونون آردینجا ملیتی‌نی، دینی‌نی و دوغولدوغون اؤلکه‌نی سئچمک حقوقون یوخدور. دئمک، هر بیر آدامی دوغولوش آنین‌دا شانسسیزلیق گؤزله‌یه بیلر. قالیر، سونراکی مرحله‌ده موباریزه آپاریب، سنه سیرینانلاردان جانینی قورتاراسان، تامام آیری بیر یول سئچه‌سن. بو دا هر آداما مومکون اولمور...
آغیر، اوزوجو بیر یول وار قارشیندا..."  ( اونون سونرالار یازاجاغی اثرلریندن دیر بو سطیرلر.)
اورتا مکتب ایللرینده، عالی مکتبده امتحان وئرنده، امتحاندان کسیلیب بیر ایل باکی‌دا فهله ایشله‌ینده، ائله عالی مکتب‌ده اوخویاندا دا اونون حیاتی روان کئچمه‌میشدی.
هر دفعه بیر معللیم‌له یوخسا بیر وظیفه‌لی آداملا آرالاریندا مباحثه دوشوب، تحقیر اولوندوغو اوچون جاواب قایتاریردی کی، بو دا اونون حیاتیندا سیلینمز ایز قویوردو. ان باشیلجاسی ایسه موجود قورولوشا قارشی نیفرتی داها دا آرتیردی.
هئچ یادیندان چخمیر سکگیزی اوخویوردو. تاریخ معللیمی، استفان رازین‌دن دانیشارکن، رازینی بیر قهرمان، پادشاهلیغا قارشی آمانسیز موباریز کیمی نمونه گؤسترنده او دا یئردن فخرله دیللنمیشدی:
- قاچاق فرضعلی کیمی...
پَه، معللیم ایتین باشینی آلمیشدی آغزینا، باباسی‌نین سؤزو اولماسین.
- نه؟! قاچاق فرضعلی؟! او قهرمان دئییلدی، قولدور ایدی! ساوئت حکومتینه قارشی ووروشوردو.
بونو سنه کیم اؤیره‌دیب؟‌! بابان می؟! ائله سنین بابان دا اونون قویروغو ایدی..‌. اسوُلیچ کوپَی اوشاغی! انگل‌لر! وحشی‌لر!
داها نه‌لر دئمه‌دی او تاریخ معللیمی؟!
اوغلان قولاقلاریناجان قیزاردی و معللیمدن انتقام آلماق اوچون فورصت آختاردی.
نوبتی درسده مکتبین خیدمتچیسی گولناز آروادین حیه‌طده اوتلایان هشترخانی‌نین تزه پوخونو دوه دابانی یارپاغی‌نین آراسینا بوکموش، گتیریب قویموشدو معللیم ایستولونون اوستونه. قوجا تاریخ معللیمی گلیب ایستولدا اوتوران کیمی صدرالدینی چاغیرمیشدی کی درسی‌ باشلاسین. صدرالدین ده ایت اوینادانین بیری ایدی. درس دانیشماق عوضینه پیققیلداییب گولدو. کیشی‌نی شوبهه‌لندیرمیشدی. یقین کی یاواش- یاواش آدامین یوخا یئرینه یاییلان هشترخان پوخونون قوخوسو دا اونو ووردوغوندان، تئز آیاغا قالخیب الی ایله دالینی سیلنده الی پوخا باتدی،" بییی...سیزین نسیلینیزین آغزینی...." دئییب دالینی گتیرمه‌دن چیخیب معللیم‌لر اوتاغینا گئتدی. آز سونرا مودورله قاییتدی. ائله ایلک حمله‌ده اونون قولاغیندان یاپیشیب قاباغا چکیب، باغیردی: هه، هه بو وحشی بالاسی ائله‌ییب. الیمین ایچی کیمی بیلیرم!- دئدی.
مودورو ده گولمک توتموش، اونو تاریخ معللیمی‌نین الیندن آلماغا چالیشاراق دئدی:
- اَششی، بو یازیق هاردان وحشی بالاسی اولدو؟! کاسیب عائیله‌نین اوشاغی دیر آخی...اؤزو ده آی کیشی آلتمیش سکگیزینجی ایلدی ائی، ایندییه یام- یام قالار؟!
مودورون سوروشدورماسینا ائله ده احتیاج قالمادی. " یام-یام بالاسی هر دفعه 5 آلاندا 4دن آرتیغینا گوجو چاتمایان قارا دورنا الینی قالدیریب پوخو ایستولا او قویدوغونو دئدی.
مودور اوغلانا بیر یاغلی شیلله چکیب، گئتدی.
درسدن سونرا معللیم‌لر اوتاغیندا محکمه قورولدو.
تاریخ معللیمی اصرار ائتدی کی بو یام- یام بالاسینی مکتبدن قوووماق لازیم دیر.
اینصافن مودور طرفینی توتدو:- قوواق دئییرسینیز، قوواق. آمما بیر ایش ده وار آخی... سحر- بیریسی‌گون رایون مرکزینده تور اولاجاق... بو اوشاغی قوووساق، اولمپیادا کیمی گوندره‌جه‌ییک؟ گئنه بو گئدیب اوزوموزو آغ ائله‌ییر...
بئله‌جه، اونا شیددتلی تنبیه وئرمک‌له کفایت ائتدیلر.
***
اینستیتودا اوخویاندا تاریخ درسینده "4" آلدی.( بونون دا کؤکونده آیری مطلب دایانیردی. تزه‌جه باشلادیغی ایلک حیکایه‌لریندن بیرینده دمیر یوللاری ایله بؤیوک واگن- چن‌لرده داشینان باکی نفتی باره‌ده یازمیشدی و یازینی اوخویان معللیم‌لریندن بیری معللیم‌لر اوتاغیندا اونون حیکایه‌سینی تعریفله‌میش، اوستو اؤرتولو شکیلده او واگن- چن‌لره ده ایشاره وورموشدو.

و کنفرانس زامانی همین سیاسی تاریخ معللیمی " بعضی طلبه‌لرین آغزینا گله‌نی یازماسیندان" اؤتری بحث ائتمیش، بونو تروتسکیچی ماده‌لری تاثیرینه دوشمک آدلاندیرمیشدی. سونرا دا همین قوشا ساعاتدا تمامن تروتسکی و تروتسکی‌چیلردن دانیشیب، اونون آنتی‌ساوئت فعالیتینی اؤز عالمینده افشاء ائتمیشدی. گنج "یازیچی" تروتسکی‌نین بالتا ایله اؤلدورولدویونو گئتدییی ادبیات درنک‌لرینده ائشیتمیشدی- دوغرودور، هله ساوئت رژیمی‌نین داغیلاجاغی گونه آزی 20 ایل وار ایدی، آمما آرتیق امپراطورلوغون ستونلاری لاخلامیش، 15 جمهوری‌نین هامیسیندا آیدین‌لار امپراطورلوق سیاستینه قارشی اساسلار یازمیش، چیخیشلار ائتمه‌یه باشلامیشدیلار

کی، بو آذربایجاندان دا یان کئچمه‌میشدی و یاتاقخانایا قاییدان کیمی  " واگن‌لاردا داشینان روحوموز شکلی" جمله‌سینی ایشلتدییی حیکایه‌سینین یگانه ال‌یازماسینی یاندیرمیش، قورخودان همین گئجه خسته‌لنمیش، قیزدیرماسی قالخمیش، دوداقلاری اوچوقلامیش، خسته‌خانایا دوشموشدو.)
عالی مکتبده اوخودوغو ایللرده یگانه "5" آلمادیغی محض همین سیاسی تاریخ درسی ایدی.
قالان بوتون امتحانلاردا نومره‌لری اعلا ایدی. اصلینده بو درسی هئچ سئومیردی. ائولرینده باباسی، ننه‌سی، دایی‌لاری قاچاق فرضعلی‌نی، اونون باجیسی اوغلو صالح کیشی‌نی، تاریخ معللیمی دئمیشکن موباریز چیخارتمیشدیلار. فرضعلی‌نی گولله‌لمیش، صالحی ایسه قزاقستاندا سورگون ائتمیشدیلر. باباسی ایله ننه‌سی اوتوروب- دورار استالینی، ساوئت حکومتینی سؤیردیلر...
او همین درسده 4 آلدیغینی هله اؤز عالمینده آرتیق حساب ائدیردی...
همین سیاسی تاریخ درسی کئچن معللیمین چوغوللاماسی ایله آز قالا اینستیتودان قووولاجاقدی...‌
(‌تقاعد آلان گونو ییغیشیب بیر بالاجا مجلس قورماغیمیز واریدی‌. بیر دفعه ده بئله بیر گونده یئییب- ایچمیش، ترس‌لیکدن درسه گئتمیشدیک. و من درسده شلوغ سالمیشدیم. مسئله بؤیویوب اینستیتونون رهبرینه‌دک گئدیب چیخمیشدی... حتا اخراج امریم ده حاضیرلانمیشدی. یاخشی کی معاونین  ایشه قاریشماسی ایله حل اولموشدو. " بو اوشاق فاکولته‌نین اوزونو آغ ائله‌ییر. ایندی بیر سهو دیر، اولوب‌ گلین بیر تنبیه وئرک، باغیشلایاق"،- دئمیشدی. البته یازیق آنامین دا نه قدر رشوه وئرمه‌سیندن سونرا، اخراجدان خلاص اولموشدوم... و سونرادان بیلمیشدیک کی، سیاسی تاریخ معللیمی‌میز ده او کافه‌ده ایمیش و بیزیم یئییب- ایچمه‌ییمیزی او معاونه خبر وئریب." بو سطیرلر ده اورداندی.)
***
- بیز " تورکچولوک چالیشمالاری" آدلی بیر کنفرانس دوزنله‌میشیک.
دوزدور، اساسن اشتراکچیلار تاریخچی‌لر دیر، آمما سیزین کیمی آیدینلارین دا اورادا اشتراک و چیخیشی بیزی ممنون ائدر...
اسکی تاریخچی دوستلاردان ایدی زنگ ائدن. چوخ مدنی، یئر بیلن، سؤزو واختیندا، یئرینده دییه‌ن، ساوادلی و وجدانلی تاریخچیلردن ایدی‌.
اوسته‌لیک ده، شؤهرتی بو ایللر عرضینده کیرلنمه‌میشدی. بئله زاماندا بئله تمیز قالا بیلمک هر آدامین هونَری دئییل. هر معنادا بو آداما رغبت وار ایدی. " آخی من تاریخی موضوعلاردا یازمیرام..." سؤزونو دیلیندن قایتاردی و راضیلاشدی.
بیرینجی: او صرف تاریخی رومانلار یازماسا دا، بیر چوخ رومانلاریندا پارالئل موضوعلارا- تاریخی موضوعلارلا معاصرلییین قارشیلاشدیریلماسینا جهدلر ائتمیشدی و دییه‌سن، پیس ده آلینمیشدی. ایکینجیسی ایسه بعضی حیکایه‌لری وار کی، صرف تاریخی موضوعلار اوزرینده قورولوب. دوغرو کی اونلاردا دا معاصرلیک عنصرلری وار، آمما هر حالدا او عنصرلر بیر باشا محمود کاشغرلی‌نین، علی بی حسین‌زاده‌نین، بکیر چوبان‌زاده‌نین و بو تورکچولوک فدایی‌لرینین گیزلی قالمیش حیات دفترلرینی اوخوجولارلا بیرگه ورقله‌مه‌یه چالیشمیشدی...
حتا رسولزاده‌یه، ائلچی بَیه آیریجا کیتاب حصر ائتمیشدی...
او حیکایه‌لر کیتابی‌نین اوخوجوسو آز اولسا دا، او، آزلارا گؤره و حیکایه‌لره گؤره اؤزونو همیشه چوخ شانسلی حساب ائدیب...
***
کنفرانس بیر اؤزل اونیورسیته‌ده کئچیریله‌جکدی. بورا گئتمک اونون اوچون بیر قدر چتین اولسا دا، سؤز وئردییی اوچون گئتمه‌لی ایدی. اوسته‌لیک، بیر نئچه گونونو صرف ائتدییی اون‌بئش صحیفه‌لیک مقاله‌سی ده وار ایدی آخی...

بو اونیورسیته اؤلکه‌نین ایلک اؤزل عالی مکتب‌لریندن ایدی.
رادیودا چالیشدیغی ایللرده بیر نئچه دفعه بورادا اولموش، هم مودوردن هم ده طلبه‌لردن مصاحبه آلمیشدی، وئرلیش‌لر حاضیرلامیشدی. سونرا ائله اولدو کی اونیورسیته‌نین یانیندا اورتا مکتب ده آچیلدی و بو مکتبین شاگیرد و معللیم‌لری اونون وئرلیش‌لرینین دایمی اشتراکچیلاری اولدولار...
آمما حاق سؤزون قولو اولدوغو اوچون همیشه باشی آغرییان بو آدام یئنه دوز سؤزون گودازینا گئتمیشدی...
" گؤزوم سایتلارین بیرینده غریبه اعلانا ساتاشدی. داها دوغروسو، اعلاندان چوخ خبره اوخشاییردی. نه یازیق کی، ایندی کی سایتلارین چوخوندا خبرله اعلانی قاریشیق سالیرلار. نه ایسه اورادا یازیلمیشدی کی: استانبولدا آذربایجان ادبیاتینا داییر کنفرانس کئچیریلیب. کنفرانسدا فلانکس شعر موضوعسوندا، بهمانکس رومان موضوعسوندا، همین بو اؤزل یونیورسیته‌نین رئییسی ایسه آذربایجاندا حیکایه موضوعسوندا مقاله اوخویوب.‌..
گؤزلریمی اووشدوروب، یازینی بیر ده اوخودوم. تام- تامینا بئله ایدی!
آی باشینا دؤنوم، بو رئیس‌له سلام- کلامیم اولسا دا، اونون نه‌دن بئله بیر ایش توتدوغونو آنلایا بیلمیرم! سن ریاضیات اوزه‌ره عالیمسن، بیر اؤزل اونیورسیته‌نین یارادیجیسان، دوغرو کی هردن شعر- زاد دا یازیرسان، آمما بو آخی حیکایه دیر! سنین حیکایه ایله نه ایشین وار؟! اوردا دئمزلر کی نییه آتین قاباغینا سوموک، ایتین قاباغینا اوت

قویموسونوز؟!
من نادینج آدامام آی بالام! من حتا منه مین دفعه یاخشیلیق ائله‌میش بیر آدامین گوناها باتدیغینی گؤردومسه، دؤزمورم، اونون او گوناهینی اوزونه وورورام...
بئله‌جه گؤتوروب یازدیم کی بو سونونجو معلوماتی اوخویوب سارسیلدیم.
عجبا آنادولولو تورکلری دئمزمی کی سیزین اؤلکه‌ده حیکایه‌نی آنلایان بیر ادبیات‌شناس، یا دا بیر حیکایه یازاری یوخدورمو کی، ریاضیات عالمینه بئله اذیت وئرمیسینیز؟!
ایندی من بو یونیورسیته‌یه گئدرکن او رئیس‌له اوز- اوزه گلنده نه ائده‌جه‌یم؟ منه نه وار کی؟! هئچ نه اولمامیش کیمی داورانارام. بس او؟!
باخ، منیم حیاتدا بئله شانسسیزلیقلارلا بوغوشماغیم وار..." ( یئنه و یئنه ده اوردا!)
***
" سؤز اونا وئریلنده اوّلجه یازیب حاضیرلادیغی مقاله‌سینه باخماق اوچون گؤزلویونو تاخماق ایسته‌ینده، گؤزو سالوندا ایله‌شن بیر تاریخچینی آلدی. سون واختلار بو آدامین جمهوریتچی‌لر علیهینه سؤیله‌دییی فیکیرلر یادینا دوشدو و مقاله‌سینی بیر کنارا قویوب عصبی حالدا بداهتن چیخیشا باشلادی:
"- آدینی تاریخچی قویموش بیر قافار واصیف اُو وار، تاریخدن دانیشاندا بیزیم چایپارانین تندیر اوستو صحبت‌لرینی ائله‌ین کوپه گیرن قاریلار کیمی غیبته داها چوخ اوستونلوک وئریر، نه اینکی علمه. علم ده دئییرم، بیزیم تاریخ علمی هله کی، علم اولوب علم‌لره قوشولا بیلمه‌ییب، اوندان کی دائیم ایدئولوژی باسقیسی آلتیندا اولان بو علمی یارادان عملسیز عالم‌لر یازیبلار کی، گویا اونلارین آناسی اؤز آتالاری ایله دئییل، غیر میللت‌لردن اولان آتالارلا یاتیب- دوروب کی او زنا عملدن ده اونلار کیمی بیج- ولدالزنا تاریخچی‌لر دوغولوب. ایندی بو آدی آغیزا آلمالی اولمایان غیبتچی ده، تخمینن او بیج- ولدالزنالرین رد‌ّینی توتور. بو یئرده رحمتلیک دوستوم ائلدار باخیشین میصراعلاری یادیما دوشدو:
باخیرام ائله‌جه زوغلاللاییرسان
کشیش زورنا چالیر
سن ده کشیشین
قارا زورناسینی سیغاللاییرسان...

هه. بیر مسئله قالدی. آتانین اوزونه آغ اولان اوغوللاری قدیملرده مملکتدن چیخارداردیلار کی، باشینا قورد- قوش ییغیلماسین، یا دا گؤزونه میل چکیب بیر زندان کونجونه آتاردیلار. چون کی اؤز حالال آتاسی اولا- اولا اجنبی آتا آختارانلارین عار- ناموس قانمادیغینی یاخشی بیلیردیلر.
تاریخ علمی‌میزین ساققالسیز آغ ساققاللاری ادگار ساسان اُو بیزی جنوبا، فلیکس مدودف شمالا چکسه ده بیزیم بیر آغیرلیق مرکزیمیز وار- تورک اوغلو کیمی، قفقازین آبورگن اهالیسی کیمی مین ایللردیر بورداییق! شمالدا ایسه دربندیمیز، جنوبدا تبریزیمیز وار.
19- جو عصرین بؤیوک غزلخوانلاریندان اولان تبریز اهلی ابوالحسن راجی‌نین بو میصراعلاری رسولزاده‌نی سؤیمک‌له پول قازانانلارا جاوابدیر سانکی:

هجوم اشک چشمیم‌دن غمیم یوخدور فراقیندا
منه نئیلر بو داشقین سئل، کی دریا تک کناریم وار

سوندا بونو دا دئییم. یوز ایل دیر رسولزاده‌نی آذربایجان تورکو، میللت آتاسی کیمی قبول ائدیبسه، سنین کیمیسی‌نین وزاریت اوخوماسی اولسا- اولسا آری ویزیلتیسینا بنزر..."
گورولتولو آلقیشلار سالونو بورودو. باخدی کی ال چالانلار اؤن سیرادا کی قوجامان تاریخچی‌لر دئییل، اورتا و آرخا سیرالاردا اَیله‌شن تاریخ فاکولته‌سینین طلبه‌لری دیر. هر زامان تاریخه " اؤلو علم" دییه‌ن یازیچی، نهایت بو علمین ده اصل صاحیب‌لرینین گلدیینی و اونلارین همین اؤلو علمی دیریلده‌جه‌یینه امین‌لیک حیسی ایله گولومسوندو، اوستونده ایری حرفلرله " جمهوریت سئودالیلاری" یازیلمیش مقاله‌سینی کنفرانسین کاتیب‌لیینه وئریب سالوندا کی یئرینه قاییتدی."

سون.
https://t.me/Adabiyyatsevanlar

سن
https://t.me/Adabiyyatsevanlar

علی رشتبر قاییب

بئش گون اولدو کوسدویون،
بئش ایل کئچیر ائله بیل.
زامان سنین الیندن ،
سویون ایچیر ائله بیل‌.

قصدین کی یوخ گلمگه،
باخیشینی بؤلمگه،
ایچیریمدن اؤلمگه،
کروان کؤچور ائله بیل.

کسر یوخدور سؤزومده،
یالانیمدا دوزومده،
اوز چئویریب اؤزوم ده ،
مندن قاچیر ائله بیل.

باهار تک دولدوغومو،
پاییز تک سولدوغومو،
و سنسیز قالدیغیمی،
هامی سئچیر ائله بیل.

https://t.me/Adabiyyatsevanlar

زرین رزندی(طناز)

استاد کریمی مراغه ای
1310-1401
اوستادین ابدی خاطیره سینه عشق اولسون.


بویو بسته،گولر اوز،سئومه لی بیر دوزلو کیشی
کَهلییی درده سالیر،(میرزه)نین اوُ خوش یئریشی
زشت وزیبا،اخوی،شعرینه عقل حیران اولور
طنزیله عالمی شَن حاله گتیرمک دیر ایشی
بای بایی دادلی،مینی ژوپ مزه لی،مرسی شیرین
تورپاغی جان یاشاسین،بهلولا وار بنزریشی
ائشیدندن کی گئدیب سئوگیلیسی ایران اره
یووا قویموش دامینا،یوز قادینین کوُنول قوشی
(میرزه)دیش مرثیه سین،آخ نه گوُزل طنزه چکیب
گوُره سن اصل دیر آغزیندا،یا قوندارما دیشی؟

(میرزه)قلمان دیر،حایات یولداشی ساکینه حوری
قال ماقالسیز یاشاماق،ایندی دئییل هر نر ایشی
توتوب آوازه سی،شان-شهرتی ایران-تورانی
سوُزلری ایچلی بادام،سیندیراناجیب یئمیشی
اولماسین رهن وگرو(طناز)ا تای شش ده بئشی
قوشما مندن سنه پای،ای اوره یی سوُزلو کیشی
شعر طنز وغزلین،قدرینی(طناز) بیلر
بئله بیلمه آییران یوخ دی قیزیل دان گوموشی.

https://t.me/Adabiyyatsevanlar

اوشاق ادبیاتی
اوشاق ادبیاتی هر هفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

اوشاق ادبیاتی
نورالدین_مقدم (آیدین دومان)

آجالمێشام آی آنا!

گۆن اوْرتا مدرسـه‌دن
تر – تله‌سیک چاتێرام
سوْیونمامێش ایستیرم
بیر یئر تاپام اوْتورام

آنام دئیینیر آنجــاق
اوْغلان گئت اوْتاغینا
سؤزۆن کسیرم... نئیلیم
آجالمێـــشام آی آنا!

آنا نه بیشـــیریرسن؟
بیر آز وئر دادێم گئدیم
ائله چاش باش اوْلموشام
هئچ بیلمیرم نه ائدیم

آنام گۆلور یاواشجــا
ائله جانێندان... دئییر
بیشیردیڲی کۆفته‌دن
قاشێقدا بیر آز وئریر

دادلانێــر دوْداقلارێم
گۆل دۆشور  یاناغێما
بیر گؤز ووروب،گۆلورم
قاچێــــرام اوْتاغێما

https://t.me/Adabiyyatsevanlar

اوشاق ادبیاتی

آلما آغاجی‌نین احوالی

يازان: رشید بَی افندیئو
كؤچورن: احد فرهمندی

مئشه‌ده زوربا بیر جیر آلما آغاجی بیتمیش ایدی. پاییز فصلینده بو آغاجدان بیر آلما دوشوب یئرده قالمیش ایدی. قورد-قوش بو آلمانی دیمدیکله‌ییب هم اؤزونو و هم توخومونو یئمیش ایدیلر. آلما توخوموندان بیر دهنه‌سی سیچراییب یئرین جادارینا دوشموش و اورادا قالمیش ایدی. قیش اؤتدو، یاز آچیلان زامان گونون حرارتی یئره تأثیر ائله‌مگه باشلادی، بو توخوم دا او واخت گؤیرمگه باشلادی؛ تورپاغین ایچینه ساری کؤک آتدی، هاوایا ایکی یارپاق آچیب باش چیخارتدی.
بو دئدیگیمیز اوّلينجي ایکی یارپاغین تن اورتاسیندان بیر زوغ گؤیرمگه باشلادی. بو زوغ اوزونو خیردا-خیردا دویمه‌لر دوزولموش ایدی و بونلاردان دا  تزه یارپاقلار و زوغلار چیخماغا باشلامیش ایدی. بو مینوال ایله زوغ آتا-آتا توخوم گیزله‌نمیش یئرده بیر گؤزل آلما آغاجی عمله گلمیش ایدی. بیر نفر باغبان الینده دمیر بئل مشه‌ده گزرکن بو شومال اونون گؤزونه ساتاشدی و درحآل بو آغاجی قازیب یئردن چیخارماغا باشلادی. آلما آغاجی بو حالی گؤروب دئدی:
— وای، وای. عؤمروم بورادا تامام اولدو، داها یاشاماق منه ممکن اولماز، تلف اولدوم گئتدی.
اما باغبان کمال-احتیاط ایله اطرافینی قازیب، ریشه‌لرینه خلل یئتیرمه‌یرک، بو جاوان آلما آغاجینی مشه‌دن چیخاریب باغینا کؤچوردو و راحات یئره باسدیردی. تزه باسدیریلمیش آغاج اطرافینا باخیب گؤردو کی، قونشولوغوندا گؤدک-گؤدک گؤیرتیلر یئره باسدیریلیب، باشلاری کسیلیب و كسیک یئرلره جیریق-جین‌دیر باغلانیب‌دیر. اؤزونه اولان حؤرمتی گؤروب خیلی مغرورلاشدی. آنجاق یازیق بیلمیردی کی، کؤک توتاندان سونرا باغبان اونو دا اطرافینداکیلارین حالینا سالاجاق‌دیر. او بیری ایل باغبان الینده ایتی دهره گلیب بو آغاجین بوغازیندان کسیب آتدی، قالدی بیرجه کؤتویو. بو دفعه آلما آغاجی اؤزو-اؤزوندن ال گؤتوردو و دئدی کی، لاپ هلاک اولدوم. من بیر داها عمله گلمه‌رم.
باغبان الینده‌کی دهره ایله گؤتویون تپه‌سیندن ووروب باشی آشاغی جیردی. همین یاریغا باشقا بیر جینس آلما آغاجی‌نین زوغونو سالیب ووردوغو یارانی ملحم ایله باغلادی. آلما آغاجی جاوان اولدوغو و قوووتلی یئرده بیتدیگیندن، گؤتوردویو یاراسی تئزلیکله ساغالیب باشقا جینس آغاجین بوداغی ایله قاینادی. بو جالاق اوچ ایل عرضینده قول-بوداق آتیب میوه گتیرمگه باشلادی.
میوه، نئجه میوه. اؤزو ایری، رنگی آل-قیرمیزی، عطری خوش، دادی تورشا شیرین، اؤزو یوپ‌یوموشاق. خلاصه، بو آلما آغاجی ائله بیر شهرت قازاندی کی، هر یئردن گلیب اوندان قلم آپاریب جالاق جالاییردیلار.

https://t.me/Adabiyyatsevanlar

اوشاق ادبیاتی


هاشیم ترلان

یئنه کوًرپه بالا دوغدو، آنا وطن آذربایجان
داشلاری لعل داغلاری سیخ تورپاغی شن آذربایجان.

وجده گلديم گليشينله، قوی اوجالسین باشین سنين,
قیزیل‎باشلار سایاغیندا هاوالانسین مارشین سنين.

سن بوی آتـیب اوجالسان دا گوًبه‎یينده بو دوٍنیانین
یاساق اولوب قووما دوًندوٍن کله‎یينده بو دوٍنیانین.

گل! بو یوردون شفق ساچان، داغلار چاپان، فرهادی اول!
سوسوز قالان داغ- داشیمین سئللنديرن گوٍرشادی اول!

آرزوم بودور شعله ساچیب شاهه قالخسین شوخ قامتين
دامغالاسین دار گوًزلري، قدرتين‎له سوًز حيکمتين.

آمان‎سیز اول! دوًیوٍشلرده، یوٍروٍشوٍنه وئرمه آرا,
من‎ليیينه بوًهتان دئیَن، گوًزدن سوٍرمه قاپانلارا.

اوجال، بوی آت، قدملرين، قانادلارین قوی برکيسين،
سن اوچدوقجا خار اویناسین گوًزلرينده هر ناکسين.

قیغیلجیملار قان یئرينه، داماریندا آخسین گره‎ک،
اينامینی زيروه‎لرين یاخاسینا تاخسین گره‎ک.

سن بابکين حاققام دئیَن آند ايچديیي ايلغاری‎سان,
عنوان سئچيب، مطلب یازان اوًنجوٍل‌‌‎لرين سرداری‎سان.

ايلهامینی ائلدن آلان، مصلحتی قلميندن،
ديليمدن یاز! یارا سالار قوی تيتره‎سين تمليندن.

بئل باغلاما اوًز قینیندان آیریلمایان قیلینجا سن،
آییردینسا، هنرله باخ دان یئرينه دویونجاسن.

سن یوردومون گوًیلرينده نغمه‎لشن سحری‎سن،
ديليميزين اوجاغینی گوٍر یاندیران «آذری»سن.

https://t.me/Adabiyyatsevanlar

اوشاق ادبیاتی
کارتون
تپه گوزون ناغیلی

اوشاق ادبیاتی هر هفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

"غروب درگیسینده "دونیا آنا دیلی مناسبتی ایله یاخین گله جکده،

https://t.me/Adabiyyatsevanlar

مجید تیموری فر (م.صفا)
گوللر سولوب...

کؤنلومون گؤزونده سن،
دورمادین سؤزونده سن.
گئدیب سن سه، قارمونومون؛
سیزلایان سؤزونده سن...
       
اوره ک دولوب،
گوللر سولوب،
گؤز یاشلاریم عوممان اولوب.
       
البت دئدین گئتمک ایله،
اؤلکه نی ترک ائتمک ایله،
سئوگیلینی درده سالیب،
اوزگه یه سوز وئرمک ایله،
عاشیقینین آهی توتماز؟
تانری سانماز؟!
رقیب ائوی اوددا یانماز؟
                                            ☆☆☆   
آمان کؤنول چاشما، اویان.
کیمدور گئده نلری سایان؟!
"صفا" اؤیره ن او کسلردن،
وفاسین ائیله ییر عیان...
    تبریز-1380

 https://t.me/Adabiyyatsevanlar

رحیم گوزل

بایرام آیی نین ایکیسی؛
قوتلو اولسون دئیه
- بو گون  -
گووه نیرم
خاقان بابالاریما...
مین ایلدن چوخ
سوز یییه سی اولسالار دا بو اولکه ده،
قویمادیلار
هئچ بیر خالقین
دیلی قالسین کولگه ده..‌.

2

شاما بنزر بیر اینسانام؛
اریسم ده یاندیقجا..‌.
دونیا ایشیقلاندیقجا؛
داد آلیرام وارلیغیمدان‌.
منی، یاخان یوخ،
آنجاق؛
قارانلیقلار آیدینلیغا چیخسین دئیه
آلیشماغی من سئچمیشم
بیله - بیله.
اولدوزلارلا، گونشله
بیر بولاقدان سو ایچمیشم
گیله - گیله.
شام، آغلایا - آغلایا یانار
آما
من، یانیرام گوله - گوله!
آخی،
قارامسارلارا دا
اومود وئرمک بیر ایشیم دیر.
شئعیرلریم، نغمه لریم
ایشیق ساچان
آتشیم دیر.

https://t.me/Adabiyyatsevanlar