«تورک اوغلو»

هانسی صاباح بیز اوز اوزه گلنده
یامان دئییب خاطیریما دیمه دین؟
گیزلی گیزلی ایزله ییرم بیلنده
منه ساری سن آغزینی ایمه دین؟

سن قیزیدین شار نه یینه گره کدیر؟
ایسته میشدیم وئرمه میشدین مازینی!
خبرین یوخ اؤزون نه دجل ایدین
هله ده وار چکنمیرم نازینی!

طومار وئریم ساچلارینا دئیه من
حسرت اولان بو اوره ییم اسردی
یوخ دئینده آرزولاریم پوزولوب
آجیغیمدان حیرس دیلیمی کسردی

یاشاییشدا سنینله اولانمادیم
نه گزیرم اولدوزلاری اوزایی؟
قوللاریمی بوینونا سالانمادیم
بیرگون هیجران آشیریبدیر یوز آیی!

خوش حالینا یئنه ده سن گؤرورسن
چرپلنگی ، آرزولاری ، یوخودا!
ایلک سئوگیمی ایتیرندن بیلیرسن
یاتمامیشام دویونجا بیر ، یوخودا!!

گنجلیگیمی ایتیرمیشم داها من
سن گؤردوگون طراوتده دگیلم
ساچلاریما ، ساققالیما دوشوب دن
گوجوم یوخدور قارشینیزدا اگیلم!

آرزولاریم چین اولمایان زاماندان
سئوینجیمی شنلیگیمی ایتیردیم
آیریلیغا توش اولدوغوم او آندان
چرپلنگین دویغولارین بیتیردیم

ساچلارینی طومارلاییب هؤرمه ییم
اوره گیمده سانکی اولوب بیر آرزی
قولچاغینی ائو جیگینی گؤرمه ییم
دوغرو دئسم اولوب منه تامارزی

https://t.me/Adabiyyatsevanlar

تره‌زی
طنز:«بؤیوک‌آغا افندی»


بیزیم تره‌زیمیز، چوخدان خراب ایدی؛ بعضا پرسنگ آپاریر، بعضا اسگیک چکیر، گاهدان دا آرتیق چکیردی. دوزلتمک اوچون نئچه نفره ده گؤسترمیشدیم، هره‌سی بیر سؤز دئییب، باشلاریندان ائله‌میش‌دی‌لر. دوغرودان دا الی قولتوق قالمیشدیم. نهایت بیر گون آرواد دئدی: « اشی، آپار تره‌زی اداره‌سینه! بلکه اوردا دوزلتدیلر.»
تره‌زینی قولتوغوما ووروب دوشدوم یولا. تره‌زی اداره‌سینه داخیل اولوب موشگولومو دئمک ایسته‌دیم. بیر نفر قارا عینک‌لی، قول‌لارین چیرمالاییب، بوغلارین ائشیب، یوخاری صندلده اوتورموشدو. یانیندا بیر گوپون، بیردئیلم، بیر چکیش قویوب، بورنونون اوجوندا یئرلشدیردییی عینکی‌نین اوستوندن باخیردی. تره‌زی دوزلدندن چوخ داش کسنه اوخشاییردی. ایسته‌دیم سالام وئرم. آغزیمی آچمامیش سسلندی:
– اؤزون خراب ائیله‌میسن. سنه کیم دئییردی تزه‌زینن ایشله‌یه‌سن؟ آغیر شئی چکمیسن؛ خرجی چوخ اولار. بوردا هرجوره تره‌رینی دوزلدیریک، اما بعضاً بئش ایل، بعضاً اون ایل، بعضاً اون بئش ایل چکر. آنجاق دوزلده‌ریک.
دئدیم:
– حاج‌آغا، بیز محله اوشاغی‌ییق. موشتری‌ییک، بیزیم دده بابالاریمیزدا تره‌زی‌لرینی بوردا دوزلدردی‌لر. بیزی بیر آزگؤزله، یاخچی دوزلت، تئز دوزلت.!
دئدی:
– هله شوکر ائیله سنین تره‌زین گوپون آ لتیندا سینماسین.
گؤردوم بو سیندیراندی تا دوزه‌لدن. دوزلتمه‌میشدن پولونو وئردیم. نه موکافات‌لا تره‌زی اداره‌سیندن قورتولدوم.
گینه من قالمیشام بو نحس تره‌زی. دیشیم بوغارساغیمی کسیر. نییه گره‌ک بیزیم تره‌زیمیزی دوزلدن اولماسین؟ گؤتوروب تره‌زی اداره‌سینه بیر مکتوب یازدیم: «والله گوپون‌لا تره‌زی دوزلتمزلر. مچید حقی تره‌زی دوزلتمه‌یین اؤز یول- یولاغی وار.» چوخ یازاندان سونرا بیر ایکی دوعا دا یازدیم. آمین دئیین قورتاراق!
– خدایا خداوندا! سنه آند وئریرم اؤز بؤیوکلوگویه، اؤز دوزلوگووه، اؤز میزان- تره‌زیوه! بیزیم ده تره‌زیمیزی میزان ائله! تره‌زی‌نین نگهبانین اویاق ساخلا! اونون بوغلاریندان قان دامیزدیرما!
– الله سنه آند وئریرم تره‌زی اداره‌سی‌نین یئکه تره‌زی‌سینه، بو اداره‌نین داش- تره‌زی‌سین پرسنگ‌سیز ائله! تره‌زی اداره‌سی‌نین رئیسی‌نین عینکین بورنونون اوجوندا گؤتوروب، گؤزلرینه قوی!
– یا قادر متعال، سنی آند وئریرم اؤز عظمتیوه، هئچ کسین تره‌زی‌سین سیندیریب الی قولتوق ائله‌مه! هئچ کیمی تره‌زی اداره‌سینه محتاج سالما! سالسان دا ائله تقدیر گؤر کی عؤمرو قورتارمامیش تره‌زیسی دوزلسین!
آمین!

قایناق:«ایشیق سایتی»

https://t.me/Adabiyyatsevanlar

یاشیتلاریم
«زکریا قوربان اوو»

https://t.me/Adabiyyatsevanlar

«یعقوب_نیکزاد»

گئجه؛
اؤرتوک و بورونجک
گئجه یانمیش گونشین کؤلگه‌لری.
گئجه
ایسلاق اوره‌یین چنلی گؤزو
دویغولاردان کال اویانمیش رؤیا
شیمشه‌یین گؤیده آجیقلانمیش ایزی
کلمه‌نین قانچیل اوزو
جانی، کئچمیشلره باغلی قارا هئیکل بنیزی
بیر طرفدن ائوه چیرپیلمیش آی، اولدوز دنیزی
چیمیر آغ دونلو گلین‌لر
یویونور سئوگی گؤزللیک‌لری سربست‌لییین
داشینیر داغلارا پیغمبرلر
یازیشیر اویخولو ایلهام پری‌لر
یارانیر شئعر.
آمما بوردا
گؤیریر چیرکه‌لییین چیمخیراغی
وولکان آچیر
کور دومان چؤسکو چالیر پنجره‌ده
دیکه‌لیر کوللوک‌لر
قیسیلیر داشلی قوجاقلاردا یاتیر هؤنکورتو.
قارا گون گؤزلوجم ائئیی!
سن بورو، بوک جانیمی سئوگی‌یه
اووفف
ساچی گوندوز، نامازی گیزلی‌جم!
آ...ه
کئفی نرگیزلی باخیش سؤزلوجم!
اووی
باشینی ائلچی قاتان نازلیجام!
آ...خ
هارالاردان یوخوما یول تاپدین؟
هانسی بیر اؤلکه‌نی چاپدین، گلدین؟
گؤزون اولسون منده!
کؤنلومو پای وئریرم کئفلی‌لره.
ائله یالقیزلیغا یولداشلانیرام
یوخودا داشلانیرام.
سنه هر گون داریخان آخشاملار،
گؤزلریمدن تؤکولور.
گئجه اؤرتوک
گئجه قبریستانلیق.

https://t.me/Adabiyyatsevanlar

✍:« نبی خزری»

سنی سئون وارسا...

سن یئری، سن گؤیو قلبین‌له دینله!
سنی سئوَن وارسا، دونیا سنین‌دیر.
سئون یوخسا، باریش اؤز طالعین‌له!
آغریلی، آجیلی رؤیا سنین‌دیر.

اونوتما، سئوگیدن قاچا بیلمزسن!
سنی سئون وارسا، حیات سنین‌دیر.
سئون یوخسا، قوش‌تک اوچا بیلمزسن،
او سینمیش، یارالی قاناد سنین‌دیر.

چؤکسه ده یولونا قاپ‌قارا بولود،
سنی سئون وارسا، جاهان سنین‌دیر.
سنی سئون یوخسا، دنیزه اۆز توت!
اوردا جوشوب-داشان توفان سنین‌دیر.

اگر سئون وارسا، سئو اوره‌یینله،
یازدیغین هر دردلی میصراع سنین‌دیر.
سئون یوخسا، باریش اؤز طالعین‌له!
مجنون تک آتش‌لی صحرا سنین‌دیر.

https://t.me/Adabiyyatsevanlar

«رسول رضا»

او گئجه

گئجه‌دیر،
کیمسه یوخ،
بیر سن، بیر ده من.
ظلمات آسیلمیشدیر پنجره‌لردن
اوتاغیمدا سکوت،
گؤی‌لردن دَرین،
بیر منم،
بیر سکوت،
بیر ده گؤزلرین...

https://t.me/Adabiyyatsevanlar

نبی خزری
من بیر دنیزم کی، عشقیم سحردیر،

سنی دوشونورم، عزیزیم، یئنه.

منیم دالغالاریم خاطیرلردیر،

قوی چاتسین قلبینین ساحیللرینه.



اصیل محببت کی، بؤیوک هونردیر،

جوشار عوممان کیمی تزه آرزولار.

منیم دالغالاریم خاطیرلردیر،

اوردا توفان دا وار، بورولغان دا وار.



دنیزم، عشقیمدن قاچماق هدردیر،

من کی، آدلاییرام چؤلو، چمنی.

منیم دالغالاریم خاطیرلردیر،

گئجه ده، گوندوز ده تاپاجاق سنی.
https://t.me/Adabiyyatsevanlar

شعیر «حسن رحمانی (آیاز)

دیکلمه؛«مینا پورعبدالله»

https://t.me/Adabiyyatsevanlar

اوستاد شهریار

غم باسدی قلیانیمی
قیشین قره قئییدی ، آلیب منیم جانیمی
خورتدان دئییب قوجالیق ، کسیب منیم یانیمی

بوسیگار دا زه‌لی تک ، دوشوب منيم جانیما دوداق - دوداغه قویوب ، سورور منیم قانیمی

سازاق سازین قوراراق، قولاقدی سانکی بورور چکیبدی ایپلیگیمی ، قیریبدی قیطانیمی

یئنه قیشین قوشونو ، پاییز مارشین چالاراق کردیده و ارسا بیچیر ، لاله‌می ، ریحانیمی

اوشودوم ، ها اوشودوم ! » دئيير ، منیم دردیمی
کورسوتووين ايتیريب ، آختاریر درمانیمی

پاییز لامیش زمییم ، وریان منه نه گرک
دونرگه دوندره.جک ، دوندیکجه وریانیمی

قوی چالخاسین بیزی بو ، زمانه نئهره کیمی منیم سودوم چورویوب ، تور شاتسین آیرانیمی

دئیر دیلیم ، قلمیم ، ایشدن سالان منیده
ایشدن سالیب ایتیریب پاک آدیمی ـ سانیمی

حیدر بابا يولى تك ، يول باغلانيب أوزومه
آوچی فلک آولاییب ، سورویله جئیر انیمی

نازلی یاریم گئده‌لی ، سؤنوب منیم چیراغیم خان‌وار سادا نه کاری ، ائوین کی یوخ خانیمی

مریم » کؤچوب گئدیبن «شهرزاد» یم دا گئدیری
فلک الیمدن آلیر ، دررومو - مرجانیمی

یئتیم تک اوز گؤزومی نیبت با سیب ، باساجاق
یامان قاریشدیراجاق ، سلقه‌می ، سهمانیمی

نه دیزوار کی سورونوم ، نه اوزواركي قايیدیم نه یوک قالیب، نه یابی ، سویو بلا کروانیمی

ائلدن منی قوجالیق، آزقین سالیب ، سالاجاق
ایتیردی تبریزیمی ، او دوزدو تهرانیمی

بیزیم چایخانامیزدا ، تؤکنده چای قوناغا
دو لدوردو زرداب ایله ، منیم ده فینجانیمی

قلیانلا « شهریار يم غمى قالدير باقاليم منده خورولدادیرام ، غم باسدی قلیانیمی

https://t.me/Adabiyyatsevanlar

میرحسین دلدار بناب

«قارا باسما»

یوخولار یاخامدان، ال چکن دئییل
هر گئجه یوخومدان، یوخولار دوغور
یوخومدا دنیز وار، قیز وار، پاییز وار
یوخومدا کؤلگه‌لر، کؤلگه‌می بوغور

گؤيلرده بیر قارتال، دارا چکیلیر
یوخومو؟ گرچک‌می؟، بیله بیلمیرم
گؤزلریم اسیردیر، دیلیم دیدرگین
اؤلمك ايسته‌ییرم، اؤله بیلمیرم

اودادا اوجاق یوخ، اوجاقدا اود يوخ!
چیراقلار سؤنوكدور، قاپیلار باغلی‌
کوچه‌لر توزلودور، سو سپن یوخدور!
یارا قورشون دییب، اورک‌لر داغلی‌

دنیز آدلی بیر قیز، جان اوستونده‌دیر
کؤکسونده یارالار، درین_ درین‌دیر
گؤز تیکیب گؤیلره، تانرینی گزیر
سؤیله‌ییر گل آتا، قیزینی دیندیر

گل بو گؤزلریمی، آپار دولاندیر
گؤزلریمده بیر قیز، باهار آختاریر
ساچلارین داراییب یئللره وئریر
هامی یار آختاریر، او دار آختاریر

پاییزدان چکینمیر، بوراندان قوخمور
آنا تومروس یاغیر، باخیشلاریندان
دنیزین باشینی، آلیب قوینونا
جانينا جان قاتیر، گؤز یاشلاریندان...

https://t.me/Adabiyyatsevanlar

قار یاغماسین
✍:«واریث»
کؤچورن:«سحرخیاوی»
حاضیرلایان:«ادبیات سئونلر»

" دونیانین ان یاخشی نسنه‌لرینی گؤرمک و اونلارا اَلین‌له توخونماق مومکون دئییل. اونلاری یالنیز حیس ائتمک مومکوندور".
هلن کلر

گئجه‌نین بیر عالمینده N.i- نین یوخودان قان- تر ایچینده اویانماسی وار ایدی.
اوستونه شیغییان نهنگ تانک، قاباغینا قاتیب، اونو باغری یاریلینجا قوودوغوندان، اؤزونو سالامات گؤرنده"شوکور" دئییب آللاها دوعا ائدردی. آمما بو گئجه‌کی یوخوسو داها دهشتلی آلینمیشدی، اوغولتو قوپاران زِرِه‌لی ماشین اونو حاقلاییب آلتینا آلمیش، تیکه- پارچا ائتمیشدی، همین بو تیکه- پارچالار هاوادا قان آخیدا- آخیدا اوچوشور، سانکی رقص ائدیردیلر.
آییلاندان سونرا داها یاتا بیلمه‌میشدی. پنجره‌نین ظولمت قارانلیق رسمی،  ایشیق  ناخیشلاری ایله، نهایت کی عوض اولوندو.
ایشدن بیر گونلوک ایجازه آلمیشدی. مودیرینه دئمیشدی:" صاباح رحمته گئده‌نیمین ایل دؤنومودور، رایونا گئدیب قبرینی زیارت ائتمه‌لی‌یم".
مودیر بیر کلمه" کیم‌دیر؟" سوالینی وئرنده: " دوغمام دیر" جاواب وئرمیشدی...

بو یازینین آردینی ادبیات سئونلر کانالیندا اوخویون.

https://t.me/Adabiyyatsevanlar

قار یاغماسین
✍:«واریث»
کؤچورن:«سحرخیاوی»
حاضیرلایان:«ادبیات سئونلر»

" دونیانین ان یاخشی نسنه‌لرینی گؤرمک و اونلارا اَلین‌له توخونماق مومکون دئییل. اونلاری یالنیز حیس ائتمک مومکوندور".
هلن کلر

گئجه‌نین بیر عالمینده N.i- نین یوخودان قان- تر ایچینده اویانماسی وار ایدی.
اوستونه شیغییان نهنگ تانک، قاباغینا قاتیب، اونو باغری یاریلینجا قوودوغوندان، اؤزونو سالامات گؤرنده"شوکور" دئییب آللاها دوعا ائدردی. آمما بو گئجه‌کی یوخوسو داها دهشتلی آلینمیشدی، اوغولتو قوپاران زِرِه‌لی ماشین اونو حاقلاییب آلتینا آلمیش، تیکه- پارچا ائتمیشدی، همین بو تیکه- پارچالار هاوادا قان آخیدا- آخیدا اوچوشور، سانکی رقص ائدیردیلر.
آییلاندان سونرا داها یاتا بیلمه‌میشدی. پنجره‌نین ظولمت قارانلیق رسمی،  ایشیق  ناخیشلاری ایله، نهایت کی عوض اولوندو.
ایشدن بیر گونلوک ایجازه آلمیشدی. مودیرینه دئمیشدی:" صاباح رحمته گئده‌نیمین ایل دؤنومودور، رایونا گئدیب قبرینی زیارت ائتمه‌لی‌یم".
مودیر بیر کلمه" کیم‌دیر؟" سوالینی وئرنده: " دوغمام دیر" جاواب وئرمیشدی. مودیر ده داها دَرینه گئتمه‌دن:
" گئت، آللاه رحمت ائله‌سین" سویله‌میشدی. آمما هر حالدا، آردینجا" مکتوبلاری چوخ دا نظارتسیز قویما" تاپشیریغینی دا وئرمیشدی.
حقوقو آشاغی اولسا دا، ایشیندن راضی ایدی، شرکته گلن مکتوبلاری صاف- چوروک ائدیب، اوچ یئره بؤلوردو، سونرا دا، ان اهمیت‌لی اولانلارین خلاصه‌سینی مودیره چاتدیریردی‌. مودیر ده کئفی چکنده دؤرد قات بوخاغینا سیغال چکه- چکه تعریف و تکلیف‌لرین بعضی‌لرینه، اؤز عالمینده اَن توتارلی‌لارینا جاواب وئریردی. شیکایت‌لر ایسه اوزو قارا حالدا زیبیل قابینا توللاناردی.
نN.i.نین فیکرینجه مکتوبلار سؤزلردن آرتیق کَسَرلی ایدیلر. سؤزو دئیه‌نده کئچیب گئدیر‌. توتالیم، بیری سنی سؤز ایله یامانلادی، بیر تَرس شیلله کیمی دَییب گئتدی‌، مکتوب سا، داها اوزون موددتلی تاثیر گوجونه مالیک دیر. تا کی محو ائتمه‌یینجه دفعه‌لرله گؤزونه سوخولوب سنی اینجیده بیلر.
ایشینی چوخ سئویردی، نئجه ده اولماسا  چؤره‌ک آغاجی ایدی. محاریبه قورتاراندان بورا دوزه‌لیب، بیر قولو اولمادیغیندان بو جور یونگول ایش لاپ اونوچون گؤیدن دوشمه ایدی.
تکجه ناراحاتچیلیغی بیر دیلی قوروموشدان ائشیتدییی " الکترون مکتوبلار کاغیذ مکتوبلاری سیرادان چیخاراجاق" کلمه‌لری ایدی.
" گؤره‌سن هاچان؟" معماسی ایله باش- باشا قالدیقجا اوزولوردو.
ائودن ائرته‌دن چیخمالی ایدی، بئش یاشلی اوغلونون باشینی تومارلادی، نوبتی دفعه ایچیندن اینیلتی قوپدو. ایتیریردیسه ده، باری آز ایشلک اولان سول قولونو ایتیره‌یدی!
نه ائتمک ایسته‌ییرسه، غیراختیاری، اون ایکی سانتی‌مترلیک چیخینتیدان عبارت ساغ قولو ایره‌لی آتیلیر... 
حیات یولداشینا بیرآز خرجلیک وئردی. دئدی: " رایونا ایل مراسمینه گئدیرم، ائوه آیین- اویونو اؤزون آلارسان، آغ کؤینه‌ییمی ده اوتوله.
نهایت یولداشی اونون عصبی اولوب، بعضن بوش یئردن بومبا کیمی پارتلاماسینا عادت ائتدییندن، کیمین یاس یئرینه گئتدیینی سوروشمادی. "بلکه ایش یولداشلاریندان کیمینسه نه‌یی اؤلوب" دوشونه‌رک " ساغ- سالامات گئت" سویله‌دی‌. و پالتار دولابیندان آغ اوزون قول کؤینه‌یی گؤتوروب، اونا اوتو چکمه‌یه باشلادی. کؤینه‌یین ساغ قولونا کئچنده قادینین دولوخسونماسی، دوداغینین سَیریمه‌سی، کیشی‌نین گؤزوندن یایینمادی. کدر بعضن اینسانین اوزونده اولور، بعضن ایچینده. اوزده کی آنی دیر، ایچده کی ایسه داییمی.
او، اصلینده حیات یولداشی‌نین خاطیرینی ایسته‌ییردی، اوستونه قیشقیرماسی دا اؤزوندن آسیلی دئییلدی. بیر صینیفده اوخوموشدولار، ائله ایلک درس گونونده اسمر بنیزلی بو قیزدان خوشو گلمیشدی. ائوله‌ننده لیلی و مجنون سئوگیسی ایله ائولنمیش، محاریبه‌یه‌دک تک بالالارینی بخته‌ورلیک ایچینده بویوده‌رک، بیربیرینه جان دئییب، جان ائشیتمیشدیلر. ائله کی محاریبه‌یه گئتدی، آغیر یارالانیب ، قولونو دا ایتیریب گئری دؤندو، سانکی تامام باشقا بیریسی اولدو. عصبی، صبیرسیز، دئیینگن...
اوغلو سالامات قولونو دارتیردی. " منه آوتومات آلارسان" دییه آرزوسونو دیله گتیریردی.
- آوتومات؟ ائله بیل کیشی‌نین اوزونو گارسیا- گارسیا بیر آلاو بورودو." یوخ، آوتامات یوخ، سنه ماشین آلاجام!"- دئدی. چوخ اوجادان دئدی. تعمیرسیز دیوارین سوواغیندان بیر پارچانین قوپوب، دوشمه‌سی ایله تئلفونون مئساژ سیگنالی بیربیرینی نئجه تاماملادیسا تعجوبلنمه‌یه ماجال تاپا بیلمه‌دی.
امین ایدی، یازان همین او اجنبی آراشدیرماچی ژورنالیست خانیم دیر، او قیر- ساققیز بیری دیر.
" آخی نئجه بیر حیس‌دیر ساپ- ساغلام گئدیرسن، بیر اعضانی- اؤزو ده ان واجیب اعضانی ایتیریب گلیرسن و هئچ شیکایتلنمیرسن؟! بونون پسیخولوژی شرحینی آچین، چوخ خواهیش ائدیرم. طوطو قوشو کیمی تکرارلامایین آمما، " وطن بورجونو وئرمیشم". بو کلمه‌لر منه اصلا صمیمی گؤرونمور".

سس یوللادی:" من تام صمیمی‌یم".
حیات یولداشی‌نین " یئنه اودور؟" سؤالینا باشینینی ترپتمک‌له جاواب وئردی. قاپیدان چیخا- چیخدا گؤزو دیوارا وورولموش رسمه ساتاشدی. ائو صاحیبی‌نین دئدیینه گؤره، رسمی رسسام عمی‌اوغلوسو چکمیشدی. قیشین بیاض قار اؤرتویونون حؤکمرانلیغی آلتیندا داخما و بیر نئچه شام آغاجی اولدوقجا بخته‌ور گؤرونوردو.
گونشین شافاقلاری قار حدودسوزلوغوندا عکس- صدا وئرمکده ایدی...هر کیمدیرسه، بارک‌الله، گوزل چکمیشدی. دریندن دوشوندوکجه آنلاییرسان کی،سئودیک‌لریندن باشقا، هانسی‌سا بیر جانلی اولمایان اشیاءنی دا سئویرسن. او دا قاری سئویردی. بلکه ده دونیایا قارلی گونده گلدیییندن، بلکه ده بیر واختلار قارین اوزرینه اوزانیب سمانین حدودسولوغونا باخدیقجا خوشبختلیک دویدوغوندان ایدی بو ایستک.
قار یاغدیمی، هئچ نه اونو قهوه‌‌ای رنگلی الجک‌لرینی تاخاراق قاری توپلاییب قار آدامی دوزلتمک‌دن، قار توپو اویناماقدان ساخلایا بیلمزدی. حتا محاریبه زامانی دا، قارلی اراضی‌دن کئچنده هامینین تعجوبونه رغمن قارین اوزرینه آتیلیب قار آدامی دوزلتدییی، عسگر یولداشلارینا قارتوپو آتدیغی اولموشدو...
کسیک قولو سیزیلدادی. قاراباغ سمته گئدن آوتوبوسلار چوخ سئیرک حرکت ائدیر، واغزالا چاتیب خئیلی گوزله‌دی، سونرا داها گوزله‌یه بیلمه‌ییب بدخرجلیک ائتدی: بیر بوش یئری قالمیش یول ماشینی‌نا میندی. گؤزلرینی یومدو. اؤتن ایل بیرینجی ایل دؤنومونده قبریستانلیغا گئتمه‌سینی خاطیرلادی. اوندا گئتمک داها مشقّتلی ایدی. نئجه چتینلیک‌له ایجازه آلمیشدی، نئچه ساعات نَقلیات گوزله‌میشدی، یوخلامالاری نئجه ظولومله آدلایاراق منزیل باشینا چاتمیشدی. مزارین سینه‌داشی عوضی قویولموش میشار داشینی سیلیب تمیزله‌میشدی، اوت- علف، تیکانلاری یولوب بیر کنارا آتمیشدی...
گئجه یوخوسوزلوغو اؤزونو گؤستریردی. بیر آنلیق مورگوله‌دی. یئنه اوستونه زرهلی ماشین شیغییاندا، نئجه دیک آتیلدیسا، یانیندا اوتورموش اورتا یاشلی کیشینی ده سکسندیردی.
باشینی قاتماق، یولون اوزونلوغونو گودلتمک اوچون یول یولداشی ایله صؤحبتلشمک ایسته‌دی. ظالیم اوغلونون صیفتیندن زهریمار یاغیردی. گؤره‌سن اونونلا کلمه کسمک اولار؟ فیکریندن داشینیب گله‌جک حاقدا دوشونمه‌یه باشلادی. اؤزو هئچ، اؤزو یازیلیب قورتارمیش، نوقطه‌سی قویولموش مکتوب کیمی دیر. اوغلو ایله باغلی دوشوندو.اونو ماهیر بیر گولشچی ائتمک، چمپیون کورسوسونده گؤروب غرورلانماق ان بؤیوک آرزوسو ایدی‌. آرزو چوخ بؤیوک اولمالی دیر کی اؤزونه ده یئتمه‌سن، باری هنده‌ورینده دالدالانا بیله‌سن.
اؤزو واختی ایله چوخ اومید وئریجی گولشچی اولموشدو. ایچ یاریشلاری دا قازانمیشدی، دیش یاریشلاردا دا، اوغورلاری آز اولمامیشدی. میداللارینی، جاملارینی، دیپلم‌لارینی ائوین بیر کونجونه دوزوب فخرله نمایش ائتدیرردی. محاریبه‌دن یاریجان قاییداندان سونرا هامیسینی دولابا باسیب گیزلتدی. بدبخت اولدوغو دوزنگاهدان، خوشبخت اولدوغو زیروه‌یه باخماق اینسانی چوخ اینجیدر.
" ناشوکور اولما. بونا دا شوکور دئه. اؤزوندن یاخشیلاری گؤروب درد چکمکدن سه، اؤزوندن بترلری گؤروب اوون." تترا آملیا" دئییلن بیر خسته‌لیک وار، اینسان آنادان گلمه اللرسیز و آیاقلارسیز اولور..." حیات یولداشی بیر دفعه اونو زورلا پسیخولوق یانینا آپارمیشدی، بونلاری پسیخولوقدان ائشیتمیشدی.
  " بریتانیالی ریک آلن تک اَل‌له ماهیر ضرب آلت‌لری ایفاچیسی، آلمان شاتوفن برگ تک گؤزله مشهور سرکرده، روس آلکسی مرسه یئو، هر ایکی آیاغی اولمازدان طیاره سوروب. استرالیالی نیک وویچی‌چی ایسه هر ایکی آیاغی و هر ایکی اَلی اولمازدان خارجی اؤلکه‌لری گزیب، کیتابلار یازیب، اوزوب، دونیانین ان اوغورلو اوجالیقلارینا اَل تاپیب...".
اوچ یولدا دایاندیلار. سوروجو اعلان ائتدی کی: کیم ایسته‌ییر چای ایچسین، گئدیب طلباتینی اؤوده‌سین، آمما اییرمی دقیقه‌یه چیخاجاییق. بیر طرفی بوروشموشدو، ماشیندان دوشدو، وار- گَل ائله‌دی. سوسوزلامیشدی اصلا، سو ساتان اوغلانین سویو شیرین گلدی، اونو عینن رحتملیک قارداشینا اوخشاتدی. هر ایکیسی محاریبه‌یه کؤنوللو گئتمیشدیلر. بو یالنیز محاریبه قورتارا- قورتاردا یارالاندی، اورا کیمی گئدیب چیخا بیلدی. او یازیقسا، اون گونون عسگری اولدو، سنگردن چیخارکن گولله‌یه توش گلدی. محاریبه‌نین اؤز قانونلاری وار. سیلاح آچیلماغا بیر آن یوبانسا، داها عسگر الینده دئییل، تورپاقدا شهید یانیندا آتیلیب قالاسی دیر.

سو ساتاندان سویو آلاندا یئنه سالامات سول قولو گؤزونه دؤیوب قالدی، توپال ساغ قولو اوندان قاباق ایره‌لی آتیلدی.

بو قدر بنزرلیک می اولار؟ نه سبب‌دن سه قارداشی ایله آداش- اولوب- اولمادیغینی یوخلاماق اوچون، سو ساتانین آدینی دا سوروشدو. یوخ، آداش دئییلدیلر.
قارداشی طلبه ایدی. فیزیکانی مکمل بیلیردی. حتا اختراعلار ائدیردی. دئییردی؛" فیزیکا ایله متافیزیکا آراسیندا بیر قیرمیزی خط وار، او خطین هنده‌ورینده بوتون قانونلار استثناسیز اولاراق اینسانلیغین خئیرینه چالیشیر".
دئییردی:" اوردا، حتا آرزولارین گرچکلشمه‌سی آدلی بیر قانون دا وار دیر.
نN.iنین یئنه اولادی وار، داوامچیسی وار. یازیق قارداشی هئچ ائولنمه‌یه بئله ماجال تاپمادی. عائیله قورمادان اؤلن‌لر تک اؤزلری اؤلمور کی. دونیایا گتیرمه‌لی اولدوقلاری اولادلاری دا، اؤزلری ایله تورپاغا گؤمولور. حیات دئییلن نسنه اصلینده ان بؤیوک زوردور، دوغولاندا دا سنین ایسته‌یین نظره آلینمیر، اؤلنده ده. هر شئیی سنین عوضینه حل ائدیرلر. بیرینی والدین‌لرین حلّ ائدیر، دیگرینی اَجَل.
" سیز صمیمی دئییلسینیز بو جاوابینیزلا.  نئجه یعنی وطنه جانیم دا قوربان دیر؟ بو طمطراق، بو دولاشیق نه‌یه لازیم دیر آخی؟! اینسان جانینی- ان عزیز وارلیغینی نییه وئرسین؟ بیر واقعه دئییم: ایکینجی دونیا محاریبه‌سیندن سونرا ساوئت شهرلری محاریبه‌دن شکست قاییتمیشلارلا دولدو. اللرینی، آیاقلارینی ایتیرمیش، بو اینسانلارین چوخو موجود حاللاری ایله داها هئچ کسه لازیم اولمایاجاقلارینی سانیب ائولرینه قاییتمیر، دیدرگین حیات سوروردولر. مداللارینی سینه‌لرینه دوزوب کوچه‌لرده دیله‌نیب، غنیمت الده ائتدیکجه ایچکی‌یه وئریردیلر. پوللاری آزلیق ائدنده وُدکا و ساماگون عوضینه،" توروینوی" اودکلن ایچیردیلر. اونلاردان کثیف تر، چیرک، سودوک قوخوسو گلیردی..."
یولا دوزلدیلر.
... دولت مخفی قرارلا بیر گئجه‌ده بوتون اؤلکه بویو اونلارین هامیسینی ییغیب پاسپورتالارینی، حربی بلیط‌لرینی، درجه و مداللارینی اللریندن آلاراق، خاکووادا کی، کریمدا کی، ایرواندا کی، بارنائولدا کی، سیبری ده کی عمومی یاتاق ائولرینه دولدوردو.‌‌ اونلاری هم محاریبه قهرمانیلیغی حقوقو، هم ده عمومن اینسان حقوقوندان محروم ائتدیلر. بوجور عاقبت‌دن قورخمورسوز یعنی؟...
بیر کلمه" خیر، قورخمورام" سسینی آتدی.
آز کئچمیش اشغال ائدیلمیش اراضی‌لره- دوشمن‌له تماس خطینه چاتدیقجا آددیم باشی پُستلار باشلادی، یوخلانیشلار سنگیمک بیلمه‌دی. اوتوز ایل دوشمن اسارتینده قالمیش یورد یئرلری‌نین چوخ دهشتلی و مسکین گؤرونوشلری وار ایدی، دامسیز، قاپی- پنجره‌سیز دیوارلار، اَلسیز، آیاقسیز، گؤزسوز عسگری ایدی سانکی...
قبریستانلیق شوسه یولدان آزاجیق آرالیدا یئرله‌شیر، ماشیندان دوشَن کیمی تورپاق یوللا اورا سمت آلدی. تئز ده صبیرسیزلنیب کول- کوسون آراسی ایله کَسه گئتمه‌یه باشلادی. بئله باخاندا اون آددیم دا، اون آددیم دیر.
چاتدی...
قارا قارغالار" قار- قار" ائده- ائده قیریلداشیر، یئره جوموب تزه‌دن فضادا قاناد چالیردیلار.
اطرافا نظر سالدی. اوندان باشقا داها بیر نفر وار ایدی، هارداسا، اییرمی آددیم آرالی‌دا، بیر مزارین قارشیسیندا علیل آغاجلارینا دیره‌نیب دایانمیشدی.
بوردا مزارلار هامیسی بیربیرینین ائکیز قارداشی‌دیر سانکی. بوردا سردابه‌لر، باهالی- اوجوزلو مرمرلر،گرانیت‌لر، دکوراتیو حصارلار، آغاجلار، گول- چیچک فرقلی‌لیک یاراتمیر اصلا. بوتون قبیرلر بیربیرینین اوخشاری دیر: کیچیک بیر قوم تپه‌سی، اوزرینده دیک قویولموش میشار داشی، داشین اوزرینه ده صاحیبی‌نین جیزیلاراق یازیلمیش آدی.
بو قادین اوسانمادی می یازماقدان؟!
"فلسفی اینسان شناسلیق مرتبه‌لری آراسیندا، قوربان وئرمه تظاهری خصوصی چکی‌یه مالیک‌دیر. عمومن اینسان جمعیتینده کی مدنی اینستیتولارین منبع‌سیز پرابلئم‌لری داییم اولوب و اولاجاق. چون کی معنوی و مادّی دونیالار آراسیندا کی واسطه‌چی کیمی تک گؤزلو، تک آیاقلی و تک قوللو عجاییب و قورخونج قهرمانلارین یارادیلماسی..."
گئریسینی اوخومادی. یادینا تپه گؤزون ناغیلی دوشدو. زیارت ائده‌جه‌یی قبرین یانینا چاتان کیمی داشی اؤپدو، سونرا دیز چؤکدو.
قهرلی سس‌له خطاب ائتدی:
- خوش گؤردوک. نئجه‌سن؟ بیزسیز نئجه یاشاییرسان؟ داریخمیرسان کی؟ بیز هامیمیز بیر یئرده‌ییک، آمما سنی بوردا یالقیز قویموشوق. وفاسیزیق بیز. چوخ وفاسیزیق.
سول قولونون بارماقلارینی ساغ قولونون کسیک یئرینه سورته- سورته، سان کی او یئری اووداراق خیلی دایاندی.
قهوه‌ای رنگلی الجه‌یین ساغ تایینی جیبیندن چیخاریب قبرین اوستونه قویدو،" الجه‌یینی گتیردیم، قیشدا اوشومه‌یه‌سن دییه" سؤیله‌ینده قهر اونو نئجه بوغدوسا، ظولوم- ظولوم آغلاماغا باشلادی.

هئچ کئچن ایل گلنده بو قدر دردلنمه‌میش، بو قدر گؤز یاشی تؤکمه‌میشدی. بلکه کئچن ایل ایلک ایل ایدی، هله تزه ایدی، ایستی- ایستی ایدی دردی.
باخیرسان، بعضن یارالار زامان کئچدیکجه ساغالماق، قایساق باغلاماق عوضینه داها دا قوور ائدیرلر...
چیینینه ال توخوناندا امین اولدو کی، همین او دیگر زیارتچی دیر. مِئه اونون کسیلمیش آیاغی‌نین بوشلوغونا ساریلمیش شالواری‌نین بالاغینی یئلله‌مکده ایدی.
- سنین قولوندور، ائله؟ گلن سوروشدو. او باشینی ترپتدی. گلن باشی ایله آیاغینا دئییل، اییرمی آددیم آرالیدا کی قبره ایشاره ائله‌دی:
- منیم ده آیاغیم دیر.
سونرا دا ایچینی چکیب:
" بیلمیرم، قولا- قیچا رحمت دوشورمو؟ آللاه بوتون اؤلن‌لره رحمت ائله‌سن"- سؤیله‌دی.
کیشی‌دن چوخ شئی‌لر سوروشاجاقدی، کیمسن، نه‌چیسن؟ هارالیسان؟ هانسی دؤیوشده قولونو ایتیرمیسن؟ و...
اؤزو باره‌ده دانیشاجاقدی، اطرافدا کی بعضی قبیرلر باره‌ده ده معلوماتلی ایدی، بیربیر آنلاداجاقدی،" بو فلان کسین ساغ آیاغینین قبری دیر، بو بهمان کسین سول قولونون.‌‌ بو نیسبتن ائنلی قبیرده سه، فلان بدبختین هر ایکی آیاغی یاتیر...".
کیشی آنی‌دن یادینا سالدی، ساغ قولونو بوکردی، عضله‌لری قاباراردی، اوشاقلار گلیب بارماقلارینی باساراق" دمیردیر، دمیر" دییردیلر. حیات یولداشی دا اونو اوخشاماغی چوخ سئوردی... اوره‌یی نئجه غبار ائتدی. الینی گئت- گئده هامارلاماقدا اولان قبیر تپه‌لی‌یه سورتوب، پیچیلدایاراق سوروشدو:
- عضله‌‌لرین یئرینده دیر؟
آردینجا لاپ قارا فیکیر باشیندا دولاندی. یقین، ایکی ایله قولونون اَتی ده چورویوب، تک سومویو قالاجاق.
همدردی دانیشماقدایدی:
- سن ایلده بیر کره گلمه‌یینه باخما، من تئز- تئز گلیرم. نه ایشدی سه، کسیک آیاغیمین یئری یای- قیش بوز کیمی اولور، تکجه بورا گلنده قیزیشیر.
اونونسا ایندی فیکری بوردان چوخ- چوخ اوزاقلاردا ایدی. یئددینجی صینیف‌ده اوخویوردولار، همین قیش دیزه‌جن قار یاغمیشدی. حیاتیندا گؤردویو ان بول قار ایدی. ائولر هم آشاغیدان، هم یوخاریدان قارلا اؤرتولدویوندن نازیک زولاق کیمی گؤرونوردولر.
قیزلی- اوغلانلی هامیسی درسه گیرمه‌ییب مکتبین حَیَطینده، قار توپو اویناییردیلار. او، هامیدان چئویک ایدی، اللرینی تام آرالاییب قارا دیره‌یه‌رک بیربیرینه یاخینلاشدیردیقجا بؤیوک قار توپاسی یارادیب، خیشمالاییب ایری- ایری قارتوپولاری دوزلدیب، صینیف یولداشلارینی نیشان آلیب ووروردو. و اسمر بنیزلی بیر قیز اوچون ده قارتوپو  دوزلدیب وئرمه‌یه ماجال تاپیردی...
دریندن آه چکدی. ایندن بئله قار آدامیمی دوزلتسه‌یدی، قارتوپومو اویناسایدی؟
" هر حالدا، من بو سیرری آچماقدان عاجیزم. قهرمانی‌مین پرتره‌سینی تام یاراتماق اوچون، حتا سیزین اورتا مکتبده کی صینیف رهبرینیزله ده دانیشمیشام. او خاطیرلاییر کی، بیر دفعه درسده، کؤنوللو اعضا پیوندیندن سؤز دوشدو. سیز دئمیسیز کی: " اینسانین هر بیر اعضاسی اونون اوچون او قدر دگرلی دیر کی، نه‌یین سه خاطیرینه اونلاردان امتناع ائتمک آغیلا سیغماز گؤرونور." یوز مین نه‌دیر، میلیون اولسون، میلیارد اولسون، من هئچ بیر اعضامدان امتناع ائتمه‌رم. " دئییبسیز. بس نئجه اولدو، جمعی بیز نئچه ایلدن سونرا؟!
یانیندا کی شخص یاسین اوخویوردو‌. اوخویوب بیتیردی. اونونلا ساغوللاشیب گئتمه‌یه باشلادی. بیر قدر گئتمیشدی، دایاندی، قبیرلردن بیری‌نین قارشیسیندان گئری‌یه قانریلاراق سویله‌دی:
- ناشوکور اولما. بیزه شوکور. بو بدبخت اوغلو بدبختین یانیندا مرمی نئجه پارتلاییب سا، گؤزو پیرتلاییب یئریندن چیخیب. گؤزونون قبری دیر. اوشَندی. توک‌لری بیزبیز اولدو. نوبتی مئساژ گلدی:
" جناب قهرمان، ایسته‌ییرسینیزمی، سیزه ان باهالی بیونیک پروتز هدیه ائدیلسین؟ بانک حسابی آچیلیب سیزه پول یاتیردیلسین؟ نه ایسه بیر ایسته‌یینیز وارمی؟"
قارغالار لاپ فعاللاشمیشدیلار، جمعله‌شیب یئرده نه‌یی سه دیمدیکله‌مکده‌یدیلر. اوشاقکن ننه‌سیندن ائشیتمیشدی کی، قارغالار آشاغیدان اوچوشاندا، بیر یئره توپلاشاندا قیش سَرت اولار.
گؤره‌ن، بو قیش قار یاغاجاق می؟...
گؤزو "نه ایسه بیر ایسته‌یینیز وارمی؟" سؤزلرینه ایلیشیب قالدی. بیر چوخ کئچندن سونرا آرتیق یاواش- یاواش چیخیشا دوغرو گئتمکده ایدی- جاواب یازدی:" بلی، ایسته‌ییم وار. بیر ایش گؤرون بو قیش قار یاغماسین..."
شوسه یولونا چاتدی. یول ماشینی ایله راستلاشماق فیکری ایله بیر خیلی اوزو آشاغی پیادا ایره‌لیله‌دی. تپه‌نی آشاندا قارشیسینا ایلگینج بیر منظره چیخدی. اینسانلار، تکنیک بیربیرینه قاریشمیشدی. نهنگ بیر اراضیده تیکینتی ایشلری گئدیردی. خارابالیقلارین یئرینده سیرایلا، آغ آپ آغ، اوستو قیرمیزی داملی ائولر تیکیلیردی.

بیردن هارادان سا، ایچینه اومید آخینی دولماغا باشلادی. سان کی قانادلاندی، سمانین انگین‌لیک‌لرینه قالخدی. فیزیک ایله متافیزیک آراسیندا بیر قیرمیزی خط وار. او خطین هنده‌ورینده بوتون قانونلار استثناسیز اینسانلیغین خئیرینه چالیشیر. اوردا، حتا آرزولارین گرچکلشمه‌سی آدلی بیر قانون دا موجوددور. باخ اورا سمت آلدی.
19iyul,2023, şabran


https://t.me/Adabiyyatsevanlar

قلم سوسدو ائل آغلادی
«کاظم عاشیقی» کازیم عاشیقی حیاتا گوز یومدو.
باش ساغلیغی

آلدیغیمیز آجی خبر اساسیندا تانینمیش یازیچی «کاظم عاشقی»(کازیم عاشیقی) کانسئر ختسه ‌لیگی سببیندن
دوشنبه گونو 1402/5/23آنایوردو «عجب‌شئر» شهرینده ابدی اولاراق حیاتا گؤز یومدو.  
ائل عاشیقی،وطن عاشیقیندن بو واخت‌سیز- وعده‌سیز آیریلیق هامیمیزی اوره‌کدن سارسیتدی،
«کازیم عاشیقی»1344_جو ایل عجب‌شئر شهرینده حیاتا گؤز آچمیشدی.اونون دیرلی قلمیندن ائلیمیزه 8 اثر یادیگار قالیب:

1-نگاهی به فرهنگ عامیانه در شهرستان عجب‌شیر
2-آن روزها
3-خاطرات کاظم عاشیقی
4-عجب‌شیر هم آوای قالا چای
5-خنده های تلخ
6- برفراز کوهستان
7- اتوبوس (در دست تالیف)
8- روزی روزگاری...
ادبیات سئونلر عزیز قلم داشیمیزین یاندیریجی آیریلیغین حؤرمتلی عاشیقی عاییله‌لرینه، یازیچی‌نین، سئونلرینه، قلم داش‌لارینا، هئروانن، عجب‌شئر اهالی‌سینه تسلیت دئییب، باش ساغلیغی وئریر.
آرتیرمالییق شاعیرین آنما مراسیمی 1402/5/23عجب‌شئرده آذربایجان شاعیرلری، یازیچی‌لاری، ادبی انجمن‌لرین نوماینده‌لری‌نین حضورو ایله چوخ طمطراقلی کئچیریلدی،
ادبیات سئونلر1402/5/25

https://t.me/Adabiyyatsevanlar

«حسن بابایی» عجبشئرلی

حورمتلی کانالداشلاریمیز

کازیم عاشیقی جنابلاری نین دفن مراسیمیندن
قیساجا دا اولموش اولسا بیر گزارش.
آخشام ساعات ۵هنده ورینده عجب شئر شهری نین مزارلیغی بویوک بیر توپلومون شاهیدی اولدو. دئمک عجب شئرلی لر ییغیلمیشدیلار شهرین ایگید اوغلونو، فولکلور ساحه سینده، مدنی ایش لرده هامی دان اونده گئدن نجیب یازارلارینی توپراغا تاپشیرسینلار. بیگ لر، بایان لار اوزاق دان، یاخین دان دعوت سیز گلن قوناقلار تکجه کازیمی دئیب گلمیشدیلر.
قاتیلان قوناقلار سون گوروش اولاراق بو مراسیمده اشتراک ائتمگی بیر بورج اولاراق متعهد بیر اجتماعی خادمه اوءده مک نییتینده چالیشمیشدیلار.
آذربایجانیمیزین گوز ببه گی ساییلان تبریز شهریندن سایسیز، اوزوده آدلیم شاعیرلر، یازارلار بومراسیمه قاتیلدیقلاری حالدا اوءز هم یئرلی لریمیز بیناب، ماراغا، ملیک کندی، توفارقان ،قوشاچای،اورمو،تهران دان دعوت سیز کونوللو بو مراسیم ده شرکت ائتمیشدیلر. بونلاردان باشقا عجب شئر ین ۴۵پارا کندین دن آخینیب گلنلر کازیمین نئجه اورک لرده یئر آچماسیندان خبر وئریردی. بو عالی جنابین دفن مراسیمینده اشتراک ائدن لرین چوخ حیصه سی.اوءزلرینه وظیفه آنیب گلمیشدیلر. بیر مشهور دئیم وار،ًائله دونیادان گئت، دونیایا گلمه یین کیمی سسلنمه سین. هامیمیزا آیدین دیر اینسانلار دونیایا گلرکن ان یاخین قوهوم لار خبردار اولوب سئوینرلر، آنجاق بعضی لری ائله دونیادان گئدنده ده تکجه یاخین آداملار بیلیب کدرلنرلر، دئمک سوزون جانی بوراسیندادیر اینسانین اوءلومو؟ اولومو؟ کیمی سسلنمه مه لیدی. کازیم یولداشیمیزین دفن مراسیمی هر نه یی چوخ آغزی گویچک لره آنلاتدی! !!!!!.
کازیم بیگین یاخین یولداشلاری، داغچی لار، قلم اهلی،
اینجه صنعت آداملاری، عموم خالقین صمیمیتینی بوقیسا یازی دا بیان ائتمک آزجا چتین دیر. آنجاق قنبری جنابلاری چوخ ییغجام اولاراق دانیشیق لاریندا بیزیم اورک سوزلریمیزی کازیم حاقدا مجلیس اشتراک چی لارینا وورغولادی، مسجده ایسه شاعیر میرزه شهرک جنابلاری یازدیغی شعردن نئچه پارچا اوخویوب داها آردینجا بیلمم نه اولدو باشقا شاعیرلردن، یازارلاردان پای آلینمادی؟ ؟؟؟؟.هله به قول کازیم گئده حسن سنه نه..........
بوقدر رپورتاژا کفایت لنیب ساغول لاشیریق


قوی سنی ائل دئسین، ائل تعریف لسین
هئچ زامان اؤزونو اؤیندن اولما

۱۴۰۲.۵.۲۴

https://t.me/Adabiyyatsevanlar

کازیم عاشیقی نین ابدی خاطیره سینه عشق اولسون.

https://t.me/Adabiyyatsevanlar