ادبیات سئونلر

اوشاق ادبیاتی

آذربایجان افسانه لری

سؤیله ین:«صمدبهرنگی - بهروز دهقانی»
چئویرن:«منیژه جم‌نژاد»

قاراشین کچل ممی۲

🧑🏾‍🦲 قاراشین کچل ممی اؤز - اؤزونه دئدی: آغزیندان چیخانی قولاغین ائشیدیر؟ هئچ بیلیرسن منی نه گتیرمه یه گؤندریرسن؟ قیرخ مادیان نه دیر؟ آما او٘زونه گتیرمییب دئدی: بو ساعات یولا دو٘شرم. قاراشین کچل ممی ائوه گئتدی. دئدی: ننه دور بیر آز چؤرک باغلا، گئتملی اولدوم. ننه سی دئدی: هارا گئدیرسن؟ دئدی: پادشاه منی قیرخ مادیان سو٘دو گتیرمه یه گؤندریر. قاری دئدی: اوغول، او سنی اؤلومه وئرمک ایستیر، گئتمه. چوخلو پهلوانلار، جوانلار بو ایشه ماراقلانیب، هامیسی اؤلومه گئدیب؛ سن نئجه قیرخ مادیان سو٘دو گتیرمک ایستیرسن؟ اوغلان دئدی: باشیمی دا بو یولدا وئرمه لی اولسام، گئتمم گرکیر، چارام یوخدو. قاری دئدی: ایندی کی تویوق بیر قیچلی دی، گئت پادشاها دئ سنه قیرخ تولوق شراب، قیرخ یوک آهاک، قیرخ یوک پانبیق وئرسین. سونرا گل، من یولونو بیلیرم. قاراشین کچل ممی گئتدی ننه سینین دئدیکلرینی پادشاهدان آلیب گتیردی. ننه سی دئدی: اوغول، شرابی، آهانگی، پانبیغی گؤتوروب گئدرسن. یولون اوزاقدی، آما سونوندا دنیزه یئتیشرسن. ائله اوردا آهانگ لا، پانبیق لا بیر حوض دو٘زلدیب، شرابی ایچینه تؤکرسن. اؤزون بیر جولا قازیب اوردا گیزلنرسن. بیردن گؤرجکسن گؤی قارالدی، گورولدادی، دنیز شپه لندی، سو شاقالاندی. سویون ایچیندن داغ بویدا بیر حیوان چیخدی، او٘زونه باخماغا آدام قورخور؛ اوتوز دوقوز بالاسی دا دالیسیجا. هامیسی گئدیب چیمنلیکده اوتلاییب، سوسوزلایاندا، سو ایچمه یه دؤنجکلر. اولمایا سنی گؤرلر، یوخسا وای حالیوا!... قیرخ مادیان شراب حوضونا یئتیشیب اییله ییب، قاییداجاق. گئنه سوساییب حوض باشینا گلجکلر. بو گز ده اییله ییب قاییداجاقلار. او٘چونجو گز، دا سوسوزلوق تابدان سالاجاق، باشلارینی سالیب شرابدان دویونجا ایچه‌جکلر. بو آندا سن قوش کیمی بؤیوک مادیانین او٘ستونه قونوب، یومروغونلا دوز آلنینین اورتاسیندان ووراجاقسان، اؤزو یئل کیمی اوچوب، بالالاری دا دالیسیجا گلجک. قاراشین کچل ممی چؤره یین بئلینه باغلییب، دابانلارین چکیب، یوللارین آمانینی کسدی. یئل کیمی دره لردن کئچدی، سئل کیمی تپه لردن آخدی، باشی یاسدیق، گؤزو یوخو گؤرمه دی. توفاندان ایتی، گئتدی گئتدی، گئنه گئتدی، سونوندا دنیز قیراغینا یئتیشدی. یئکه بیر حووض دو٘زلتدی، شرابی تؤکدو، اؤزو بیر چوخوردا گیزلندی. گؤزله دی، گؤزله دی، بیردن گؤردو گؤی قارالدی، گورولدادی، دنیز شپه لندی، سو شاقالاندی، آراسیندان داغ بویدا ائله بیر جاناوار چیخدی کی دئمک له باشا گلمز. اوتوز دوقوز بالاسی له او٘ز قویدو چمنلییه. اوتلادیلار، سوسادیلار. حوض باشینا گلیب اییله ییب، قاییتدیلار. ایکینجی گز ده گلیب قاییتدیلار. آما او٘چونجو گز ائله سوسادیلار کی دؤزه بیلمدیلر، باشلارین شراب حووضونا سالدیلار، دویمایینجا باشلارین قووزامادیلار. قاراشین کچل ممی فرصت بو فرصت آتیلیب اؤنده کی مادیانین سیرتیندا اوتوردو. قیرخ مادیان زیر کئفلنمیشدیلر. قاراشین کچل ممی یومروغون برکدن مادیانین آلنینا ووردو. مادیان نریلده ییب قوش کیمی هاوایا اوچدو، اوتوز دوقوز بالاسی دا دالیسیجا. گلیب شهره یئتیشدیلر. قاراشین کچل ممی قیرخ مادیانی ائوه چکیب، ساغدی. سو٘دونو پادشاها گؤندردی. ائشیت او قاری دان کی قاراشین کچل ممی‌نی قیرخ مادیانلا گلنده گؤروب، گئتدی پادشاهین یانینا چوغوللادی: آی پادشاه نه اوتورموسان، قاراشین کچل ممی قیرخ مادیانین اؤزونو گتیریب ائوینه بوراخیب. قیرخ مادیان پادشاهین طؤیله سینه یاراشار. قاراشین کچل ممی نین قارا سوواق داخماسی هارا، قیرخ مادیان هارا؟ پادشاه امر ائله دی قاراشین کچل ممی قیرخ مادیانی گتیریب پادشاهین طؤیله سینه بوراخدی. پادشاه وزیره دئدی: وزیر ایندی گرک یئریوی اونا وئرسن. وزیر دئدی: قوربان اولوم بوگون یوخ. صاباح گلسین، سؤزوم یوخ. وزیر گئجه گئدیب بؤرکونو قاضی ائلییب دئدی: آی منیم بؤیوک بؤرکوم، اؤزون بیلیرسن من وزیرلیییمدن کئچیب یئریمی آداما بنزه‌مز، هر یئردن خبر سیز بیر کچله وئره بیلمرم. بو لعنت اولموش هاردان تاپیلیب منیم یئریمی توتماق ایستیر. بو ایشین یولو نه دی؟ دئ، منی قورتار. بؤرک دن سس چیخدی: آی بویوک باش وزیر، نیاران اولما، بو ایشین چاراسی سو ایچمک کیمی آساندی. صاباح پادشاها دئ، کچلی یوللاسین او اژداهانی کی چوخداندی پادشاهین گو٘نونو قارالدیب، قوشونون یاریسندان چوخونو آرادان آپاریب، اؤلدورسون. اؤزون بیلیرسن هئچ پهلوان اژداهانین الیندن ساغ سالم قورتولانماز. وزیر سئوینیب، بؤرکونو ایکی اللی ایکی قاشینین آراسینا قویوب، راحات نفس آلدی. سحر تئزدن حامام سیریستووسوندان قاباق، کروان یولا دو٘شممیش، وزیر پادشاهین ائوینه گئتدی. - وزیر، خئیر اولا، گئنه نه خبر؟
آردی وار...
گhttps://t.me/Adabiyyatsevanlar