ادبیات سئونلر

آغاجدان دوشندن سونرا ایبیش ائوین حیه‌طینده گزیشمه‌یه باشلادی. اللرینی پنجره‌نین شوشه‌لرینه دیره‌ییب بیر خیلی ائوین ایچینه باخدی. سونرا بیر مدّت ائهمالجا ائوین قاپیسینی دارتیشدیردی. بیر آزدان منه "بسدی، گل گئدک ائ" دئییب حاصارا دیرماشدی.
اونون بو حرکتلری منی ناراحات ائله‌سه ده، اوستونو وورمادیم، دالینجا حاصارا دیرماشدیم و حیه‌طدن چیخدیق.

***

جئیحون‌لا ایبیش محلّه‌میزدن نه واخت کؤچدولر، هارا کؤچدولر، بیلمه‌دیم. اونلارین یوخلوغو بیزدن هئچ نه آلیب آپارمادی. جئیحون‌لا اون‌بئش ایل سونرا "فحله اللری" پارکیندا راستلاشاندا، "20-جی ساحه" ائله ده دییشمه‌میشدی.
"فحله اللری" پارکی یونگول‌واری تعمیر اولونموشدو، "کروق"دا بؤیوک مارکئت‌لرین قارشی‌سیندا مئر-مئیوه، گؤی-گؤیرتی، بالیق‌ساتانلار ایسه هله ده وار ایدی.
اوچ-دؤرد لوتئرئیا کؤشکو ده گتیرمیشدیلر بورا. ایبیش‌له جئیحون کیمی یئردن پول تاپماق عشقینده اولان قصبه آداملاری‌نین ان چوخ توپلاشدیغی یئر ده بو کؤشکلرین قارشیسی اولموشدو.
-ایبیشی توتدولار دا، ایچه‌ریده‌دی...
-جئیحون دئدی.
اونون بیر واختلار منه چوخ ضابیطه‌لی گؤرونن سیماسی‌نین نئجه یازیقلاشدیغی‌نین، زهملی گؤزلری‌نین نئجه یورغون و کدرلی گؤزلره چئوریلدییی‌نین فرقینه واردیم.
-نه دانیشیرسان؟! نه‌یه؟!
-اوغرولوغا گؤره.
-نه اوغرولوغو؟ هاچان؟
-هه..، اوغرولوغا گؤره. ائولره گیریردیک. ایکیمیزی ده توتدولار. پاپام پولیس رؤوشنین الی ایله پول وئریب منی چیخارتدی، آمّا ها چالیشدی‌سا، ایبیشی بوراخدیرامادی. هله محکمه‌سی اولاجاق. منه ده ائو دوستاقلیغی وئریبلر.
شالواری‌نین سول بالاغینی یوخاری قالدیردی، آیاغینداکی الکترون قاندالی گؤستریب، گولومسه‌دی.
بیر آز دا اوردان-بوردان صحبت ائله‌ییب اوشاقلیق ایللریمیزی یادا سالدیق. رحمتلیک احد عمی‌دن، پولیس رؤوشن‌دن، برکت‌دن، پوکئمون کارتلاریندان، "جیرتدان" کولچه‌لریندن...
جئیحون ایبیش‌له پول آختارماقلاریندان باشقا هر شئیی خاطیرلادی. هئچ من ده صحبتی آچمادیم.
ساغ اوللاشیب اؤز یولونا گئده‌نده، جئیحونون آرخاسیجا خیلی باخدیم... هردن بیر قارشیسینا چیخان بالاجا داشلاری تپیکله‌ییر، گؤزونو یئردن هئچ قالدیرمیردی.

https://t.me/Adabiyyatsevanlar