ادبیات سئونلر

او ایللرده الیمیزه کئچن بوتون پولو پوکئمون کارتلاری، توربو ساققیزیندان چیخان شکیللری ییغماغا خرجله‌ییردیک. هامیسی‌نی «احد عمی»نین برکتیندن آلیردیق.
دوکانا الیمیزده پول، دسته‌یله گیریردیک. احد عمی بیزی گؤرن کیمی کئفی یئرینه گلیردی. آغ‌باش، لوپا بیغ، آریق کیشی ایدی. گوله‌نده اوست چنه‌سینده‌کی قیزیل دیشلری گؤرونوردو.
هديّه‌ کیتابچالاری اولان جیرتدان کولچه‌لری کوکوروزلاری وار ایدی اوندا. ایچیندن نؤمره‌لی شکیللر چیخیردی. هديّه‌ کیتابچالارینداکی بوتون شکیللری تاپیب، دولدوراندا نسه اودوردون. فوتبول توپو، قول ساعتی، فینجان، توز سوران، چایدان... کیمده هديّه‌ اودماق اوچون هانسی نؤمره قالسا بوتون اوشاقلارا، حتی قونشو محله‌‌لره‌ ده های سالیردی کی، او نؤمره‌نی تاپسین، لاپ پول وئریب آلسین. اوشاقلارین آنالاری دا بو هیجانا شریک اولموشدو. اؤز آرالاریندا اوشاغینا نئچه نؤمره‌لی شکلین لازیم اولدوغونو دانیشیردیلار، سوراقلاییردیلار.
کیمده هانسی شکلین قالدیغینی، آختاردیغیمیز شکلی کیمدن تاپا بیله‌جه‌ییمیزی ایسه هامیدان یاخشی احد عمی بیلیردی. آختاردیغیمیز شکلی احد عمیدن پوللا آلدیغیمیز دا اولوردو.
بیر دفعه‌ چؤرک آلماق اوچون «برکت»ه گیرنده، احد عمی‌نین تئز الینده‌کی هديّه‌ کیتابچاسینی قزئتین آلتیندا گیزلتدییینی گؤردوم. اؤزونو ائله آپاردی کی، گویا قزئت اوخویور. عئینه‌یینی چیخاریب منه "نه لازیمدی؟" سوالینی وئره‌نده گیزلتمه‌یه چالیشسا دا، عاییب ایش اوستونده توتولموش آداملار کیمی سسی‌نین اسدییینی حیسّ ائله‌دیم. اوندا باشا دوشدوم کی، احد عمی نییه هر دفعه‌ آلدیغیمیز کوکوروزلاری، کولچه‌لری یانیندا آچیب نؤمره‌لرینه باخماغیمیزی ایسته‌ییرمیش...
یای گونلرینده محله‌‌میزه پامبیق‌ساتانلار گلنده، هامی تئز قاچیب ائودن پول ایسته‌ییردی. پامبیق‌ساتانلارین آرابالاری‌نین اوستونده‌کی قوتولاردا بوکولموش کاغیذلار اولوردو. هر پامبیق آلان اوشاق بیرینی سئچیردی و کاغیذدا یازیلان هديّه‌ نه‌دیرسه، اونو اودوردو. فوسفورلو قول‌باقلار، ایچینه سو دولدوروب فیسقیرتماق اولان اوزوکلر...
پولوموزو ان چوخ دا کامپیوتر سالونلاریندا خرجله‌ییردیک. ائله گونلر اولوردو کی، سحر گیردیییمیز کامپیوتر سالونوندان هاوا قارالاندا چیخیردیق. سون قپیییمیزه کیمی فوتبول، ماشین، داوا اویونلاری اویناییردیق.
بیر ده گؤروردون سالونو ایشله‌دن گؤی‌گؤز توفیق ایچه‌ریده‌کی اوشاقلارا سسله نیردی:
-نیهات کیمدی بوردا؟
سالونا سوکوت چؤکوردو.
بیلیردیک کی، نیهات کیم‌دیرسه، آناسی گلیب. نیهات تئز کامپیوترین قاباغیندان قالخیب، قاچیردی چؤله.
یا دا آنالاریمیز گلیب بیزی دؤیه-دؤیه اورادان چیخاریردیلار. ان قورخدوغوموز دا بو ایدی.
الیمیزه کئچن پولو بئله شئی‌لره خرجله‌ییردیک اوندا.
ایبیش‌له جئیحون ایسه بونلارین هئچ بیری‌یله مشغول اولموردو. اونلاری هئچ یایین جیرهاجیر ایستی‌سینده بیرجه دفعه‌ دوندورما یئینده گؤرمه‌میشدیک.
تاپدیقلاری پولو نه‌یه خرجلدیکلرینی بیلمیردیک.
ایبیش نئچه دفعه‌ ائله منیم یانیمدا یئردن پول تاپمیشدی.
کوچه‌ده یئرییه‌نده بیردن تئز اییلیب یئردن قپیک، یا کاغیذ پول گؤتوروب منه گؤستریردی:
- بونا بااااخ!
منه طرف توتوب گؤستردییی قپییین، یا ماناتین آرخاسیندا همین حیله‌‌گر گولوشونون نئجه بؤیودویونو، بوتون اوزونه، یاناقلارینا، گؤزلرینه نئجه یاییلدیغینی گؤروردوم. گؤستردییی پولو جیبینه قویوب یولونا داوام ائدیردی.
اونون یانیندا گزنده من ده اؤزومدن آسیلی اولمادان دقتله آیاغیمین آلتینا یوللارین، کوچه‌لرین کونج-بوجاغینا باخیردیم. قاباغیما چیخان داشلاری تپیکله‌ییردیم. آمّا هئچ نه تاپمیردیم.
-بورالارین آلتی-اوستو پولدو ائ! یاخشی آختارسان، تاپارسان ایبیش دئییردی.
قصبه‌‌نی الی‌نین ایچی کیمی تانیییردی. هانسی ائوده کیم قالیر، کیم هارادا ایشله‌ییر، ساعت نئچه‌ده ایشه گئدیر، نئچه‌ده قاییدیر، کیمین قاپیسیندا ایت وار، ایتین آدی نه‌دیر، نئچه تویوق-جوجه‌سی وار، هانسی ماغازا ساعت نئچه‌ده آچیلیر، نئچه‌ده باغلانیر، اوبیئکت صاحبلری ساعت نئچه‌ده هارادا ناهار ائله‌ییر، بیر سؤزله، هر شئیی بیلیردی.
بیر دفعه‌ اونونلا گزنده، الی‌یله بیر ائوی گؤسته‌ریب دئدی:
-او ائوده ایندی هئچ کیم یوخدو.
ائوه دقتله باخدیم. اوزاقدان حیه‌طده‌کی بؤیوک اریک آغاجی گؤرونوردو.
-هاردان بیلیرسن؟
-بیلیرم ده. رایونا گئدیبلر. ایکی-اوچ گونه قاییداجاقلار. گل، زابوردان هوپپانیب بیر آز اریک یئیک.
ایبیش‌ین تکلیفی آغلیما باتدی. کؤمکله‌شیب دیرماشدیق. داش حاصارا، توللاندیق حیه‌طه. جومدوق اریک آغاجینا. ان یئتیشمیش، ان ایری، سولو و شیرین اریکلری دریب یئمه‌یه باشلادیق.

390 views03:24