ادبیات سئونلر

پول آختارانلار

یازان«اولوجای آکیف‌ین حئکایه‌سی»
کوچورن:«ویدا حشمتی»
حاضیرلایان:«ادبیات سئونلر»

دونن اوشاقلیق دوستوم جئیحون‌لا راستلاشدیم. 15 ایلدیر گؤروشموردوک، منی گؤردویونه سئویندی. حال-احوال توتاندان سونرا ایبیش‌ین هارالاردا اولدوغونو، نئیله‌دییینی سوروشدوم. جئیحونون اوزونده‌کی تبسّوم سیندی.

باییلین "20-جی ساحه" آدلانان اراضی‌سی بادامدار داغی‌نین اته‌یینده دنیزین ساحلینده آیریجا بیر قصبه‌‌دیر. بورا نه شهر کیمی شهردیر، نه ده کند کیمی کند. گئجه-گوندوز دایانمادان ایشله‌ین نئفت قویولاری‌نین بوروقلاری‌نین اولدوغو "20-جی ساحه"دن مازوت قوخوسو هئچ واخت چکیلمیر.
قصبه‌‌نین "دواتساتی‌نین کروقو" آدلانان مرکزی حیصّه‌‌سینده، آداملار یول قیراغینا دوزولموش پیش‌تاختالاردا ماشینلارین باقاژیندا مئر-مئیوه‌، وئدره‌لرده تزه‌جه توتولموش دیری بالیق، گؤی-گؤیرتی، بئشی بیر ماناتا لیمون، جوراب ساتیرلار. ساتیجی‌لارین دیلنچی‌لرین، تاکسی سوروجولری‌نین سسی بیری-بیرینه قاریشیر.
یایدا بیزیم محله‌‌لره تئز-تئز قارپیز-یئمیش دولو آرابالار، هر یئری دمیر -دومورله یوکلنمیش سینیق سالخاق ماشینلاری ایله تاققاتاق سسلر سالا-سالا، بورانین یوخوشلارینی گوج-بلا قالخان، ائنیشلرینی ائنن، یاریمجا ساعتا بوتون محله‌‌لری آیاقدان سالیب، یاواش-یاواش گؤزدن ایتن دمیر ییغانلار گلیر.
اوّل‌لر اللرینده توربالارلا محله‌‌لری گزیب خلور، آسئتون، کیسلوتا، نؤیوت، مئبئل یاغی ساتان خالالارین سسی قولاغیمیزدان گئتمزدی. او ایللرده "20-جی ساحه"نین کله-کؤتور کوچه‌لرینه، بالاجا محله‌‌لرینه یولونوز دوشسه، موطلق هاراداسا ایبراهیم و جئیحون‌لا راستلاشاردینیز.
بو ایکی قارداش محله‌‌میزین ان غریبه اوشاقلاری ایدی. آرالاریندا ایکی-اوچ یاش فرق اولاردی.
بؤیوک قارداش جئیحونون هوندور بویو، جدّی سیماسی واردی. قالین چاتما قاشلاری، قارا گؤزلری زهمینی داها دا آرتیریردی. یئکه‌پر، ایری جثّه‌لی اولسا دا، هئچ کیم اوندان قورخموردو. خاصيّتی گؤرونوشونه اویغون گلمیردی. بیز بئله دوشونوردوک، چونکی کیمله‌سه دالاشدیغینی گؤرمه‌میشدیک، قیسابویلو قیرمیزی یاناق، شاه‌بالیتی گؤزلری اولان ایبراهیم‌ین اوزوندن ایسه حیله‌‌گر تبسّومو هئچ واخت اسکیک اولموردو. دیری‌باش، قیوراق ایدی. ایبیش دئییردیک اونا.
داواسی دوشنده، گوجو چاتماسا، یئردن داش گؤتوروب دالاشدیغی آدامین باشینا چیرپیردی. سؤز آلتیندا قالماغی هئچ خوشلامیردی. بیر دئیه‌نه بئشینی قایتاریردی.
ایبیش‌له جئیحون هر گون پول آختارماغا چیخیردیلار. اوشاقلار توپالاشیب اوینایاندا، "بیز پول آختارماغا گئدیریک" دئییب آرالانیردیلار. سحردن آخشاما کیمی "20-جی ساحه"نین بوتون محله‌‌لرینی ایندیکی "باییل آرئنا"دان توتموش، او واختلار بو استادیوم تعمیرسیز ایدی. اونا "دواتساتی استادیومو" دئییردیک. بادامدار داغی‌نین اته‌یینده‌کی لزگی‌لر محله‌‌سینه اورادان بؤیوک نئفت چللکلری اولان آکاپئنه قدر بوتون کوچه‌لری گزیب پول آختاریردیلار. "دواتساتی‌نین کروقو"ندا "فحله اللری" پارکیندا بازارا گئدن یولدا، مکتبین حیه‌طینده... آداملارین چوخ اولدوغو یئرلری خصوصی دقتله آختاریردیلار.
یولون بیر قیراغی‌یلا ایبیش، او بیری قیراغی‌یلا جئیحون گئدیردی. ایتی باخیشلاری‌یلا یولون هر دلمه-دئشییینی کونج-بوجاغینی یوخلاییردیلار. راستلارینا چیخان داشلاری تپیکله‌یه-تپیکله‌یه گزن بو ایکی قارداش گونون ایسته‌نیلن ساعتی قفیل قاباغینیزا چیخا بیلردیلر‌.
بادامدار داغی هوندور دئییل. دقتله باخسان، لاپ اوزاقدان داغا چیخان آدامی، اته‌یینده قاچان ایتی ده گؤرمک اولور. هوندور اولماسا دا، بورا چیخاندا، بوتون باکی آیاغی‌نین آلتیندا قالیر. بی‌بی‌هئیبت مسجیدی‌نین میناره‌لریندن توتموش احمدلی‌یه، گونشلی‌یه کیمی هر یئری، "آلوو قلّه"لری‌نی بولواری، تئله‌ قلّه‌نی شیطان چارخی‌نی، استادیومو ایچینده نقطه‌‌ بویدا قاچان فوتبولچولاری دا گؤرمک اولور.
ایبیش تئز-تئز داغا قالخیردی، اورا پول آختارماق اوچون چیخمیردی. داغا قالخماق ایبیش‌ین ان بؤیوک ائیله‌نجه‌سی ایدی. او، داغا چیخاندا یا قورد کیمی اولاییر، یا دا اوزونو آشاغی توتوب چوخ پیس سؤیوشلر سؤیوردو.
داغین باشیندان سؤیوشلر ائشیدیله‌نده بیلیردیک کی، ایبیش داغا چیخیب. سؤیوشلری اونو ائشیدن هامییا عنوان‌لاییردی. بیز ده یا محله‌‌دن، یا دا استادیومدان سؤیوشلرینی اؤزونه قایتاریردیق. خالالار پنجره‌یه چیخیب عصبی‌لشیردیلر:
-او تربیه‌سیزدی، سیزه نه اولوب؟! باش قوشمایین!
اؤزوموزو ائله آپاریردیق، گویا سؤیوشلره دؤزه بیلمیریک. اصلینده، نه ایبیش‌ین سؤیوشلری بیزیم، نه ده بیزیم سؤیوشلریمیز اونون خاطیرینه دییردی.

484 views03:24