ادبیات سئونلر

اوستاد رحیم رئیس نیا جنلابلارینین بایرام تبریکی ادبیات سئونلر عائیله سینه.

«رحیم رئیس نیا»

سلام دوستلار،حرمتلی ادبیات سئونلر.تازا ایلیز،نوروز بایرامینیز مبارک اولسون.نوروز بایرامی نئچه جهتدن دگرلی،معنالی بیر بایرامدی.بیری بو کی طبیعت ده بیر گوزه چارپان دگیلیشمه نین نشانه سیدیر.داها دوغروسو قیشین نفسدن،ایاقدان دوشمه سی،بهارین جانلانماسی جوجرمه سی و قیشا غلبه چالماسیدیر.اوزوده گوی گویرنتی،غنچه گولله،طبیعتین گولوب گوزللنمه سی ایله ،عشق، عاشق_معشوقلیق و سئویب سئویلمه یه،نغمه خوانلیغا،بلبلون گولون باشینا دولانماسینا،گئنیش،اوجسوز بوجاقسیز،رنگارنگ،چکیجی بیر میدان اچیلیر.
بو دگیشیلمه اوقدر دوشوندوروجودورکی افسانه ده اوسطوره ده انسانی و حتا اجتماعی معنالار تاپیر و او معنالار زمانلا یئنی یئنی مفهوملارلا زنگینلشیر.مثلا دئییلیرکی نوروز فریدونون،کاوه نین جوانلار بئینی یئین ضحاکا غلبه تاپان گوندور؛و یا جمشیدین پارلاق تاج گئییب آذربایجانا چاتان گونوندور و نئچه بئله بئله خلقین،خلقلرین اوره ییندن،اوره کلریندن، آرزوگاهلاریندان قوپان و افسانه ده،اسطوره ده اوزو اوچون مناسب و مساعدبیر زمین تاپیب کوک سالیر و قرنلری آشا آشا گلیب بیزه بیزیم زمانه میزه چاتیب وبیزلری نه تک کئچه جکلره،کئچه جکیمیزه باغلاییر،یعنی بیزی، ایران خلقلرینی بیری بیریمیزه باغلاییب و بو جهتلردن، ندنلردندیرکی نوروز خلقلری بیربیرینه باغلاییر و اوجهتدندیرکی بیرلیک سمبولو و عاملی ساییلا بیلر.بیز بیرلیگیمیزی قوروماقلادیر کی وارلیعیمیزی دا قورویا بیلریک.
اودور کی بو بایرامی قورومالی ییق،نئجه کی انالاریمیز و اتا بابا لاریمیز اوزون زمانلاری اونو سئومه ینلره قارشی، اولانلارین دواملی جوره به جوره باسقینلارینا رغما قورویوب ساخلاییب، بیزه تاپشیریبلار و بیزده اونو حتما کی گوز ببگیمیز کیمی قورویوب گلن نسلریمیزه تاپیشیرا جاییق.
بو گوزل قورویوجو بایرام سیز عزیز ادبیات سئونلره وبوتون وطن داشلاریمیزامبارک اولسون و یئنی ایل هامیمیز اوچون اوغورلو و اجتماعی عرصه ده کئچن ایل الده ائدیلنرین آردیجان باشقا باشاریلارلا دوام تاپسین.
شاد یاشایین!1402/1/1

https://t.me/Adabiyyatsevanlar