ادبیات سئونلر

و بورا بوغازینین آلتی ایدی، گرک تیغه‌نی اوستالیقلا چکه‌یدیم. قیوریم ساققالی وار ایدی.
ایندییه‌دک بیزیم نئچه‌میزین اعدام امرینی وئرمیشدی؟! نئچه‌میزی تیکه- تیکه ائلتدیرمیشدی؟!
تورز اونون دوشمنی اولدوغومو بیلمیردی، باشقالار دا بیلمیردیلر. بو بیر سیرر ایدی، یالنیز آز بیر عیدده هاوادارلاریمیز بیلیردی. من تورزون شهرده کی نقشه‌لرینی یولداشلاریما خبر وئریردیم، اونلارا، تورز تیغه‌مین آلتیناجا گلیب آمما من اونو سالامات بوراخدیغیمی نئجه دئیه‌جکدیم؟!
اصلاح تقریبن قورتارمیشدی. او گلدیگی زاماندان داها گنج گؤرونوردو. آزجا کؤپوک بورادا، بوغازینین آلماسی اوستونده، دوز بوغازینین شاه داماریندا...
هاوا جهنم قدر ایستی ایدی. تورز دا من کیمی ترله‌میشدی. آمما مندن قورخموردو. او آرام و سویوق قانلی کیشی ایدی، حتا نئچه ساعات سونرا دوستاقلارین باشینا گتیره‌جه‌یی بلا باره‌ده ده فیکیرلشمیردی. من ده بو بوغازی اوسته گلیب- گئدن ایتی تیغه‌ ایله فیکریم قاریشیر. لعنته گلسین، من بیر دئوریمچی‌یم قاتیل دئییلم... اونو اؤلدورمک ایندی نه قدر آسان دیر... یوخ، هئچ کیمسه‌نین آدام اؤلدورمه‌یه حاققی یوخدور. هله بونون اؤلمه‌سینین نه فایداسی وار؟ هئچ. او اؤلسه باشقاسی گله‌جک. من الان بو بوغازی دوغرایا بیله‌رم، گؤزلری ده یومولودور، آمما اونا فیکیرلشمکدن ده قورخورام...قانین فواره کیمی آغ پارچایا فیشقیرماسیندان قورخورام. توکانی ائرکن باغلاماغا مجبور اولاجام، قانین فیشقیرماسینین قاباغینی آلا بیلمیه‌جم. من اونون لئشی ایله نئینیه‌جم؟! اونو هاردا گیزلده‌جم؟!

سونرا قاچماق زوروندا قالاجام، هر نه‌ییمی قویوب چوخ اوزاقلارا قاچماق زوروندا.
آمما اونلار آرخامجا گلیب منی تاپاجاقلار. اونلار منی بو قتل اوچون قینایاجاقلار، آمما دوستلاریم منی آلقیشلاییب، آدیمی حؤرمتله چکه‌جکلر. "او ساده بیر بربر ایدی، کیمسه اونون دئوریمچی اولدوغونو بیلمیردی"- دییه‌جکلر.
آمما سونوندا نمنه؟ من قاتیل اولاجام یوخسا قهرمان؟! آمما من قاتیل اولماق ایسته‌میرم. او اصلاح اوچون گلیب، من ده ایشیمی شرفلی گؤره‌جم. او اعدام مٵمورودور، من ایسه بربر. بو توپلومدا هر کسین اؤزو اوچون بیر ایشی وار.

ایندی چنه‌سی ده تمیزلشمیشدی. آینایا باخدی. الینی اوزونه چکیب، اوشاق اوزو کیمی تزه‌لیینی حیس ائتدی.

آیاغا قالخدی، آسقی‌یا آسلانمیش قاییش و سلاحینا طرف گئتدی. منیم رنگیم قاچمیشدی، بوتون بدنیم تر ایچینده ایدی. تورز قاییشینی باغلادی، گولله قاتارینی قاییشین اوستونده سهمانلادی، توکلرینه دوزن وئریب دارادی. نیظام بؤرکونو باشینا قویوب، جیبیندن پول چیخاریب ماسانین اوستونه قویدو. قاپییا طرف یولا دوشدو. قاپینین چرچیوه‌سینده قاییدیب: -" بورا گلدیکده منی اؤلدوره‌جه‌یینی منه دئمیشدیلر، یالنیز دوغرولوغونو سیناماق ایسته‌ییردیم. آدام اؤلدورمک آسان دئییل، سؤزومه اینان"، و خیاواندا اوزو آشاغی یولا دوشدو.

https://t.me/Adabiyyatsevanlar