ادبیات سئونلر

کؤپوک

✍یازان:«هرناندو_تلز»
تورکجه‌یه چئویرن:« سحرخیاوی»

ایچری کئچنده، هئچ نه دئمه‌دی. ان یاخشی دسته‌لی تیغه‌لریمی ایتیلدیردیم. اونو تانییارکن تیتره‌دیم، آمما او باشا دوشمه‌دی. حیسلریمی گیزلتمک اوچون اؤزومو تیغه ایتیلتمه‌یه مشغول گؤرستدیم.
تیغه‌نی باش بارماغیما چکمک‌له سینادیم. سونرا اونو ایشیق قاباغینا توتدوم. او گولله قاطاری اولان قاییشینی بئلیندن آچدی. تاپانچاسی دا اوندان آسلانمیشدی. قاییشی پالتار آسقی‌سینین گیره‌سیندن آسلادی. بؤرکونو ده اوستونه قویدو. سونرا کراواتی‌نین دوگونونو بوشالتدی.
- " لامصصب هاوا سان کی جهنم اولوب. اوزومو اصلاح ائله".
آینا اؤنونده کی چارپاییدا اوتوردو. دؤرد گونون ساققالی اولدوغونو تخمین ائتدیم.
دؤرد گون ایدی بیزیم یولداشلاری تاپماق اوچون گئتمیشدی. اوزونو گون یاندیرمیشدی. سوکوتدا دیققتله صابون کؤپویو حاضیرلاییردیم. نئچه تیکه صابون خیردالاییب کاسایا آتدیم، اوستونه ایستی سو تؤکدوم، فیرچایلا یاواش- یاواش قاریشدیرماغا باشلادیم.
- " باشقا اوشاقلار دا ساققاللانیب"- دئدی.
من کؤپویو قاریشدیرماغا داوام وئردیم.
-" آمما بیز الی یالین دا قاییتمادیق. باشچیلارینی توتدوق. بعضی‌لرینی دیری، بعضیلرینی اؤلو. البته دیریلرین ده حسابینا یئتیشه‌جه‌ییک".
- نئچه نفر توتدونوز؟-سوروشدوم.
- اون دؤرد نفر. مئشه‌لیگین سونونادک اونلاری ایزله‌دیک، بو دفعه بیر نفری ده دیری قالمایاجاق.
صابونلو فیرچانی الیمده گؤررکن چارپایی‌یا سؤیکندی.آمما من هله آغ دؤشلویو بوینونا باغلامامیشدیم. ال آیاغیمی ایتیردیگیم بللی ایدی. بیر دؤشلوک کشودان چیخاردیم. کؤکسونه توتوب، بوینونون دالیندا دوگونله‌‌دیم. او هله ده دانیشیردی، منیم، اونونلا و آداملاری ایله راضیلیغیمی دوشونوردو.
-" شهر گرک بو نئچه گونلوک ایشلریمیزدن عیبرت آلسین!"
من دؤشلویو ترله‌میش بوینوندا برکیده‌رک- "بلی" دئدیم.
- " یاخشی نماییش ایدی، هن؟"
- " چوخ یاخشی". فیرچایا ساری گئتدیم. او گؤزلرینی یومدو. یورغونلوغو بللی ایدی. هئچ واخت اونو بو قدر یاخیندان گؤرمه‌میشدیم. نئچه گون قاباق، شهرین بوتون آداملارینین مکتبده بیر یئره ییغیشماسینی و دؤرد دئوریمچی‌نین دارا چکیلمه‌سینی گؤرمه‌یی امر ائتمیشدی. من یالنیز بیر آن اونو یاخیندان گؤردوم، آمما دار باشینداکیلارین تیکه‌لنمیش جیسمی، اعداملارین اؤندری و سببکاری اولان بو کیشی‌نین اوزونه باخماغیما مانع اولدو. بو کیشی الان منیم اختیاریمدایدی.
اوزو اییرنج ده دئییلدی، ساققالی اونو یاشلی گؤرسدیردی، امما اوزونه دوشوردو. آدی "تورز" ایدی،" سروان تورز"‌. کیمسه اوندان باشقا دئوریمچی‌لری لوت دارا آسماق فیکرینه دوشردی؟سونرا بدنلرینین حساس یئرلرینی سربازلارا گولله آتما تمرینی اوچون هدف قویا بیلردی؟!
اوزونه کؤپوک یاخدیم.
گؤزو یومولو دئدی:" الان راحات یاتماق ایسته‌ییرم، آمما ناهاردان سونرا چوخ ایشیمیز وار".
من فیرچانی اوزوندن گؤتوردوم، ساختا اعتناسیزلیقلا سوروشدوم:" اعدام مراسیمی؟"
- " اعدام کیمی بیر زاد، آمما یاواش- یاواش".
فیرچالاماغا داوام وئردیم. اللریم یئنه تیتره‌ییردی. او بونو دوشونموردو و بو خئیریمه ایدی. آمما کئشکه اصلن بورایا گلمه‌ییدی، بلکه بیزیم آداملارین بیری اونو بورا گلنده گؤروب منه سؤز دوزلدردیلر.
من ایندی هر بیر موشتری کیمی، دوشمنیمین اوزونو قیرخماق زوروندایدیم، اؤزو ده اوزونده حتا بیر چیوزه‌نی بئله قاناتمادان! بیر داملا قان تؤکمه‌دن!
دوغرو کی من گیزلی بیر دئوریمچی ایدیم، آمما ایش‌بیلن و ویجدانلی بیر بربر ایدیم. ایشیمی اعلا گؤرمکدن غرورلانیردیم.
تیغه‌نی گتیریب دسته‌سینی آچیب، قیرخماغی باشلادیم. تیغه اعلاء ایشله‌ییردی. اونون دا ساققالی کوبود، اَییلمز و قالین ایدی.
یاواش- یاواش اوزونون دریسی گؤرسنیردی. تیغه قاباغا زویودو، توکه قاریشمیش کؤپوک اوزونه ییغیشدی. تیغه‌نی تمیزله‌دیم، یئنه ایتیلتمه‌یه باشلادیم.

منیم کیمی دقیق بَربَر ایشینده هونَر ایشلدر. سروان تورز یومدوغو گؤزلرینی آچدی،بیر الینی پارچانین آلتیندان چیخاردی و بارماقلاری ایله یومشاق قیرخیلمیش اوزونه توخوندو.
-" بو گون ساعات آلتیدا مکتب حیطینه گَل"- دئدی.
قورخولو سوروشدوم:" یئنه او ایشلردن؟!"
- "داها یاخشیسی"- جاوابلادی.
- اونلارلا نه ائده‌جکسیز؟
- هله فیکیرلشمه‌میشم، آمما اَیلَنجه‌میز وار.
یئنه چارپایی‌یا سؤیکنیب گوزلرینی یومدو. تیغه الیمده اونا یاخینلاشدیم.
- هامیسینی جزالاندیرماق ایستیرسینیز؟
- هامیسینی.
صابین اوزونده برکیییردی، ایشه باشلادیم. آینادان خیاوانا باخدیم. خیاوان همیشه کی کیمی بوش و سسسیز ایدی. یالنیز بیر- ایکی نفر باققال توکانلاریندا وار ایدی. دیوار ساعاتینا باخدیم، ایکی یاریم ایدی. تیغه منیم الیمده، اونون اوزونده آشاغی زیویوردو. دیققتله بوغازینین آلتینی قیرخیردیم. اؤزومله بئله خئیرینه‌دیر دوشونوردوم...

422 views03:36