ادبیات سئونلر

اوشاق ادبیاتی

آذربایجان افسانه لری

سؤیله ین:«صمد بهرنگی - بهروز دهقانی»
چئویرن:« منیژه جم‌نژاد»

ماوی قوش۱

🐦 بیری واریدی، بیری یوخودو. کئچمیشلرده بیر پادشاه واریدی، اوجاغی کورودو، اوشاغی اولمازدی. بیر گون آینانی الینه آلیب اؤزونه باخیب گؤردو ساققالی آغاریب. آه چکدی آینانی یئره چیرپدی. او آندا قاپی دؤیولدو، بیر درویش گلدی، دئدی: قبله عالم ساغ اولسون، نیه بئله دو٘شگون سن؟ دئدی: درویش بابا، ساققالیم آغاریب، هله اوشاغیم اولمییب. درویش چیخاریب پادشاها بیر آلما وئریب دئدی: بونو آل، یاریسین اؤزون یئ، یاریسین دا خانیمیوا وئر. اوشاغیز اولاندا آلتی آیا جان گرک قوجاغیزدا ساخلیاسیز، بیر آن یئره قویسانیز، دا او٘زونو گؤرنمه سیز. پادشاه دئدی: منیم اوشاغیم اولسون، آلتی آی نه دیر، آلتی ایل یئره قویمارام. دوقوز آی، دوقوز گو٘ن، دوقوز ساعات سونرا پادشاهین خانیمیسی بیر اوغلان دوغدو. آدینی "حسن یوسف" قویدولار. پادشاه بیر تایا توتدو، اوشاغی اونا تاپشیردی، گؤزونون ببه‌یی کیمی اونا باخسین، هئچ واخ دا یئره قویماسین دئیه. اوشاق ایکی آیلیق اولاندا، اونا سنت تویو توتدولار، شهره چیراغانلیق ائله دیلر، های کویون، شنلیگین آراسیندا تایا سو باشینا گئتمه لی اولدو. بونا دئدی بو اوشاغی بیر آز آل! ائشیتمه دی، اونا دئدی بو اوشاغی بیرآز آل، ائشیتمه دی. هامی نین باشی چال اویناسینا قاریشمیشدی. هامی اؤز ایشینده یدی. تایا اویانا باخدی، بویانا باخدی، گؤردو کیمسه یوخدو. اؤز - اؤزونه دئدی: بیر شئی اولماز، اوشاغی بوردا قویوب، تئز قاییدارام. بونو دئدی، اوشاغی یئره قویوب حیطین بوجاغینا گئتدی. قاییداندا گؤردو له‌له وار، یوردو یوخ! ایکی اللی باشینا چالیب های های آغلادی. هر یاندان تؤکولدولر باشینا دویونجا کتک له دیلر، آما نئیله مک اولار؟ پادشاه ماتم توتدو، وئردی شهرین هر یئرینه قارا چکدیلر.
باشقا شهرده بیر پادشاه واریدی، بو پادشاهین بیر قیزی واریدی. قیز هرگون پنجره قاباغیندا اوتوروب قیرخ قوشونا دن تؤکردی. بیر گو٘ن ائله سی اوتورموش قوشلارین دن یئمه یینه باخیردی. قوشلارین ایچینده بیر ماوی قوش واریدی، مین بیر او٘ره‌ک اونا عاشق اولدو. بیر آووج دن تؤکمک ایسته ینده، بیلرزیگی زو٘یوب دو٘شدو. ماوی قوش بیلرزیگی دیمدیینه آلیب آپاردی. قیز، اوچوب گؤزدن ایتن ماوی قوشا حسرت له باخدی. قیز خسته لنیب یاتدی. پادشاه شهرین بوتون حکیملرینی ییغدی، آما هئچ بیری اونو توختادانمادی. سونوندا بیری دئدی: پادشاه وئر بیر حامام دو٘زلتسینلر، خالق گلیب یویوناندا پول یئرینه ناغیل دئسینلر، قیزیوین باشی قاریشسین، درد کدر یادیندان چیخسین دئیه. قوجا بیر آرواد واریدی، کچل بیر اوغلو واریدی. کچل بیر گو٘ن ائوه گلیب دئدی: ننه من آجام. بیر آز چؤرک وئر. ننه سی دئدی: زهر مار یئ! نئچه آیدی حاماما گتمه میشم. سنده او بیری اوشاقلار کیمی گئت بیر ناغیل دان زاتدان اؤیرن، گل منه دئ، من ده حاماما گئدیم. کچل دئدی: اولسون. قاش قاباق لی کوچه یه گلیب بیر دووارین دیبینده اوتوردو. بیر دوه قاطاری گلیردی یو٘کو قیزیل. آتیلیب اوتوردو دوه لرین بیرینین او٘ستونده. دوه لر گئدیب، گئدیب، بیر باغا یئتیشدیلر. باغین قاپیسی اؤز - اؤزونه آچیلدی. دوه لر ایچری گئدیب یو٘کلرین بوشالدیب قاییتدیلار. کچل بیر اوتاغا گئتدی. گؤردو اوردا هر جوره یئمک وار. بیر آز یئدی، سونرا بیر یئرده گیزلندی. بیر آز سونرا قیرخ بیر قوش قاناد چالیب گلدیلر، اونلارین بیرینین قانادی ماوی ایدی. قوشلار پالتارلارین چیخاردیب قیرخ گؤزل قیز اولدولار. گؤله آتیلیب او٘زمه یه باشلادیلار. ماوی قوش پالتارین چیخارداندا گؤیچک بیر اوغلان اولدو، اوتاغا گلدی. جیبیندن بیر بیلرزیک چیخاردیب جانامازینین یانینا قویدو، نامازدان سونرا اللرین گؤیه قووزاییب دئدی: آی آللاه، بو بیلرزیگین صاحابینی منه یئتیر! قیزلار دا گؤلدن چیخیب، پالتارلارینی گئییب، ماوی قوشو دا گؤتوروب، قانادلانیب گئتدیلر. کچل ائوه گلدی، ننه سینه دئدی: ننه بیر ناغیل اؤیرنمیشم. سن گئت حاماما، دئنه ناغیلی اوغلوم دئیه جک. من گلیر ناغیلیمی دئیرم. قوجا آرواد سئویندی، حاماما گئدیب یویوندو. قوللوقچولار دئدیلر: ایندی گل ناغیلیوی دئ. دئدی: اوغلومو چاغیریم گلسین ناغیل دئسین. کچلی چاغیردی؛ گلدی سحر گؤردوکلرینی دئمه یه باشلادی. ماوی بیر قوش اولارین آراسیندا واریدی...دئمه یه یئتیشنده قیز باییلیب ییخیلدی. قوللوقچولار تؤکولدولر کچلین باشینا نه یئمیسن تورشولو آش. - نئیله دین قیز غش ائله دی؟ گو٘لاب سپدیلر، چیینلرین اوودولار، اؤزونه گلدی. گؤزونو آچماق هامان کچلی سوروشدو، هارا گئتدی دئیه. دئدیلر: دؤیوب سالدیق ائشیه. قیز دئدی: تئز تاپین گتیرین یانیما. قوللوقچولار گئدیب کوچه ده کچلی تاپدیلار. قیز دئدی: یاخجی دئ گؤروم سونرا نه اولدو؟
آردی وار...
https://t.me/Adabiyyatsevanlar