ادبیات سئونلر

«ح.ا»

تبریز شهری عاشیق غریبین شعرینده :

تبریزین چئوره سی ، داغدیر ، مئشه دیر
ایچینده اوتوران بئی دیر ، پاشادیر
سکسن مین محلله ، یوزمین گوشه دیر
چارشی سی ، بازاری ، ائلی تبریزین

بو شعری اوخویارکن ، انسانین عاغلینا بیر آبارتما گلیر ، بو بوُیوکلوکده ده بازار اولار می ؟ بو بوُیوکلوده ده شهر اولار می ؟
اما بو گون دوغرو دوزگون آمار و رقم لره باخار کن ، بیر اوندا گوُرورسن کی ، حالا بوگونه قدر ، دونیا مقیاسیندا بیر شهر یوخدورکی او شهرین اوستو اوُرتولو بازاری ، تبریزین اوستو اوُرتولو بازاری بوُیوکلوکده اولسون .
تاریخی سندلرده ، (وقف نامه ربع رشیدی ده ) او علیم، بیلیم مرکزینین چئوره سینده ۳۰۰۰ دانا دوکان وار صنعت ، تجارت ، خسته خانا ، علیم ، بیلیم مرکزی وار دیر ، عین بوقدر دوکان بازار ، ارک علیشاه ین چئورسینده یاپیلیب دیر.
بو سوُز یعنی بوکی خیردا بورژوازی ، دونیا دا ایلک اولاراق ، "ونیز " شهرینده یوخ بلکه تبریز شهرینده تیکیلمیشدیر .
بوگون تبریزین گوی مسجد محلله سینده ، دورد قاتلی قبرستان تاپیلیبدیر ، ان اوسته کی قبرستانین قبیرلرینین یاشی ۲۰۰۰ مین ایلدن چوخدور ، بو قبیر لرین سایه سینده ، میتولوژلار تبریزین یاشینی ۴۰۰۰ مین ایلدن چوخ حدس ویریرلار .
او زامان دونیانین ان اوزون و بویوک یئر آلتی یولو دا تبریز شهرینده قازیلبدیر ، اویله کی بو یئرآلتی یولون بیر باشی ارک میدانی ، بیر اوجو ، شام قازان محلله سی ، بیر اوجو ربع رشیدیه دانشگاهی ، بیر باشیدا گوی مسجد میدانینا و هابئله بیر باشی یانیق داغینا آچیلیرمیشمیش .
بو یئر آلتی یولوندا ، دولتی مرکزلرین آت آرابالاری گئدیب گلیر میشلر ، یعنی بدراسی بیر غیبی و سری یول ایمیش . او یئرآلتی یولوندا ، بعضی یئرلر گنیش اولورموش کی ایمیش ، کی قارشیدان گلن آت آربایا ، یول وئره بیلسین.
ایندیده بعضا تبریزین ائولرینده بعضا قویولار هئچ زامان دولماز ، جماعت دیئرلر کی بیزیم قویوموزون ایاغیی گئده ر دیر .
بیزیم ائویمیز ( ۱۳۳۷ ده) تبریزین چرانداب محلله ، عین الدولله و ایکینجی سد اوستو محلله سینده ایدی ، بو ایکی سد ، بیر بیرینین آرخاسینجا ایله یاپمیشدی کی ، تبریزی سئل باسماق خطریندن قورسون . اما داها او چای و سو یولوندان سئل گلمز ایدی . ( بیز اورادا اولان سوره یالنیز بیرکره او چای یئریندن ، سئل گلدی ، ایندی او چای یئری ، گئنیش بیر خیاوان اولوبدور) بیز او قورو یئری او محلله ده آلاندان سونرا ، آنام او سددین توپراغیندان ، کرپیچ کسیب ، بنا یاپدی . آنام او آلدیغی قورو یئرده ، اوُزو سوقویو سودا قازدی ، اما بیزیم قویو بیر نئچه متر قازیلاندان سونرا ، بیر بوشلوغا ، یا همان گئده ر یولا آچیلدی ، - بیزیم عباد داداش - اوشاقلیغیدان ، بیر آز جولیک ایدی ، آنجاق دایانامادی و گئدیب او قویونون دیبینی بیلمک ایسته دی ، آنجاق قوه چراغی و ایپ ایله سالانیب گئتدی اما او قویونون دیبینی تاپابیلمه دی ، نه ایسه ، آنام او سو قویوسونون خیریندن کئچیب ، او قویونو ، مستراح قویوسو ایله دی . بیز نئچه ایل کی او محلله ده ایدیق ، او قویو اصلا دولمادی .
رسمی سندلره گوُره ، شام قازان محلله سینده ، هرگئجه او شهره یولو دوشه نین قارنی دویولور ، خسته لره درمان اولور . یاتماق و قالماغینا یئر وئریلیرمیش .
شهرین مرکزی سایلان ، گوی مسجد دن ، صاحیب الامر مسجدینه قدر بیر بوُیوک میدان وار ، بو میداندا دولتین اداره لری یاپیلی ، حمام لار ، مسجد لر ، کتابخانلار وارمیش. بو میدان دان ، دونیا دورد گوشه سینه گئدیب گلن وار ایمیش . تام بو مرکز ده ایدی ، عاشیق لار سلزلارین کوُکله یب ، گلیب گئدن جماعته ماهنی اوخویار میشلار ، ۱۳۴۵ لره قدر بو میدان ، او وظیفه نی داشیردی ، یعنی گوی مسجدین تام قارشیسیندا ، خورشید راه کاراژی وار ایدی ، دلالار اوجا سس ایله مسافرلری چاغیریردیلار ، واسمیش ، بوستان آوا ، تیکمه داش ، قره چمن ، میانا گئتدی ها ، بیر یاندان دا عاشیق لارین سسی او قهوه خانالاردان گوُیلره یوُکسه لیردی ،" جیز بیز ایسی انسانی مست ائدیردی . بیریده سسله ییردی : سرین آیران بوزلو آیران ، اورگی یانان بورا گلسین ‌ .
منیم گوُزوم حالا او یاغلی کوکه ساتانلارا دا قالیبدیر :
" دَوَه لر قاتار قاتار ، گل بالاوین دَوَه سین آپار "
آخی او هنر صاحیبلری تبریز اهلی ، اوشاقلاری شاد ایله مک اوچون ، یاغلی و شیرین کوکه لری ، دَوَه قیلیغیندا یاپیب ، اوُز ماللارینی گوُزه چکردیلر ....

استانبول ۲۲ آذر ۱۴۰۱

https://t.me/Adabiyyatsevanlar