ادبیات سئونلر

دوکتور «حسین محمد زاده صدیق» ین تورپاغا تاپیشیرما مراسیمیندن شکیل لر.

https://t.me/Adabiyyatsevanlar

417 views18:29

«حسن بابایی» عجبشئرلی

دوکتور صدیق جنابلاری نین سون سوز شعرینه بیر حاشیه

مقاله نین آماجینا وارمادان اوءنجه بیر خاطیره نی تعریف ائتمگی گرکلی گورورم.
شهریمیزده اورتا مکتب ده تحصیل آلدیقدا عرب دیلی وادبیاتی اوزره چالیشقان اوءیرتمن محمود ولی زاده جنابلاری بیزیم فارس ادبیاتی دئییلن حاشیه وی درسلییمیزین اوءیرتمن ایدی. ولیزاده جنابلاری واختیلا تبریز دانیشگاهیندا اوءیرنجی لیگینی بیتیریب، نئچه ایل لر فارس عرب ایالت لرینده مجبوریت قارشیسیندا قالسادا اوءیرتمن لیک ائدیب نهایت اوءزآنا یوردو عجب شئره دوءنموشدو.
سونرالار من اورتا مکتبی بیتیردیکدن ائله اولدوایش یئریم آذربایجانین گوز ببگی تبریز شهری سئچیم لندی، دئمک وارلیق درگی سینی هرآیین باشیندا اوءزومونکو ائدیب اوخوماعا باشلادیم. بونونلا یاناشی طالقانی اوچ یولونون آیریجیندا یئرده دوشه یب کیتاب ساتانلارین آبونه چیسی کیمی تانیندیم، اونلاردان الده ائتدییم کیتابلارین بیر نئچه سینین اوزرینده(ح_صدیق) آدینی گوروب یادداشیمدا ساخلادیقدا اوءزوم دن سوراردیم بو یازار کیم اولا بیلر؟
عاشیقلار، واقف شاعرزیبایی وحقیقت، شاعران آذربایجان، نظامی و آثار او، میرزا شفیع واضح، صمد بهرنگی منظومه سی، کیچیک شعرلر، باکی لوحه لری، اوچقون داخما، یورد غزل لری، سایاچی لار، حبیب ساهیردن ترجومه لر، مقالات تربیت آدلارینی چکدییم آز حجملی کیتابلار هامیسی(ح_صدیق) ایمضا سیلا گئدیردی
آدلارینی چکدییم کیتابلار سای باخیمیندان اوچ اونلوغو آشیب ،اوواختلار هله پهلوی دوءنمیندن بیر اونلوق گئری ده قویمامیشدیق. گئت گئده عالیم میزین طرفیندن یاییلان کیتابلارین سایی یئنه ده آرتدی، اورنک اولاراق قارا مجموعه، حکیم ابوالقاسم نباتی نین تورکجه _فارسجا دیوانی، فضولی میزین دیوانی، ان اوءنملیسی کاشغرلی محمودون دیوان اللغات ترک وووو....‌‌.بونلاری بیر قیراغا قویوب تهران دا وارلیق درگی سینده چاپ اولونان مقاله لر توپلوسوندا(دوکتورحسین محمد زاده صدیق) آدینی گوردوکده محمود ولی زاده جنابلاری نین آدی یئنی دن یادداشیمدا جانلاندی.
دوءنه لرین بیرینده اوءیرتمن ایمله دانیشدیقدا سوءیله میشدیلر: حسین دوزگونله تبریز دانیشگاهیندا طلبه لیک ایل لرینده مندن ایسته میشدی آزیندان بیر تورکو غزل یوخسا قصیده یازیب ادبیات ساعاتلاریندا اوخویوم، اوءزوده یاری جیدی _یاری شوخلوق تمناسینی بو لحن ایله تاماملامیشدی: ولی زاده یازماسان منم_سنسن......نئجه سن بو استعدادا مالیک اولاسان، آنان دانیشدیران دیلده بیر شعر یاراتمایاسان. منده یاری قورخو _یاری احترام اوجباتیندان یازیب کیلاس دا اوخودوم.
شوخلوق واری آنتراکت زامانی صدیق منی قیراغا چکیب سوءیله دی: جانیوی قورتاردین ولی زاده.
اوءیرتمن دانیشدیقدان سونرا اشاره بارماغیم دوداقلاریما مات قالدی ‌،حسین معلیم پهلوی دوءنمینده ندنسه ولی زاده جنابلاریندان تورکجه شعر یازماغی ایسته میش؟ بو سئوال لا یئنی دن اوءیرتمن یمه مراجعت ده دوشوندوم صدیق جنابلاری ایلک آماجینی آنادیلینه حصر ائتمیش دیر دئدیلر.
بو خاطیره نی کاغاذ اوزره گتیرمک دن بونو چاتدیرماق ایستردیم حسین دوزگون، حسین صدیق، ح_صدیق، دوکتورحسین محمدزاده آدلاریلا چاپا بوراخیلان کیتابلار، توپلانان فولکلور اثرلری، مقدمه لر، مقاله لر، معروضه لر، دانیشیقلار، گوروش لر ائله جه ده اوءلکه میزین باشا _باشیندان ساوایی باشقا اوءلکه لرده ده بیزیم معنوی وارلیغیمیزین ائلچیسی اولدوغو حالدا کئشیینده ده دوروب. صدیق جنابلاری هانسی سا یازینی یازیب یوخسا تدقیق، تحقیق ائدیبسه معنوی وارلیغیمیزا آرتیم گتیرمه یی نظردن قاچیرمایب.
واختیلا ادبیات اوجاغی نین ایکینجی جیلدینده اونلارین شعر نمونه لریندن

سون سوز، ،عنوانلی بیرقصیده لریندن یارارلانیب گتیردییمیز بیت لرله داشییدیغیمیز فیکیرین کئشیینده دوراجاغیق.
اویان بیر خواب غفلت دن ئوتوبدور کاروان چوخدان
هامی بیدار اولوب گئتدی، منم یالنیز سنه حیران
گورونور بو قصیده نین مطلعی تورک قانلی گنج نسیله اویانیش _دیرچلیش فلسفه سینی آچیقلاماق ایسته ییر، باشقا طرزده دئسک چاغیریش هارایی دیر.
اونوتدون کئچمیشی، اجدادینیندا داشینی آتدین
ندن اوءزو وئردی سن تک هوشیاره بویله بیر نسیان
گذشته چراغ راه آینده است، کیتابینی یازان رحمت لیک فرزانه لر، بولود قاراچورلو لارین بویوروقلاری بو اولموشدو: کئچمیشینی بیلمه ین خالق گلجیینه گون آغلایا بیلمز. بو آچی دان باخدیقدا دوزگون معلیم یازیب _اوخویان نسیله آندیرماق ایسته ییر کئچمیشینی اونودان، اجدادی نین داشینی آتان توتدوغو یولون هارایا وارماسینی دوشونوب دویمالیدی.

386 views19:14