ایسته‌نیلن حالدا او یؤندمسیز، شله‌ساققال و بیر کلفتین اثرینه دؤنن، آمما استعدادلی همکاریم لئدان ایسه آرتیق تمامی ایله آرخایین اولا بیلر کی، منصف‌لر هئیئتی باشقا بیر سئچیمی قالمادیغیندان محض اونو غالب سئچه‌جک دیر.

https://t.me/Adabiyyatsevanlar

اوشاق ادبیاتی

اوشاق ادبیاتی هرهفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

«علی تقی زاده لاریجان »
کندیمیزیمیزده بیر قیش گونی

(آدلاروسوزلر عین کند تلفظی کیمی یازیلیب)

1349 نجی گونش ایلی ، قیش فصلیدی. او ایللر قیش قیشیدی .  بعضن گونده ایکی دفعه داملارین قارین کورومک یادیما گلیر. او فصیلده کند اهلینین ایشی ، مال حیوانا طوله ده یئم وئرمک ، دره ده سوارماق وطوله نی تمیزلمکدن عبارتیدی . بئش گوندن بیر اودون یئغماغا مئشیه گئدردیلر. قار یاغاندادا کی ، قار کورومک ایشه علاوه اولاردی . بللی دیر کی کند اهلی ، یای یاز فصلی کیمی گون چیخاندان جان چیخانا قدر چالیشماغا مجبور دگیلدیلر . بکار ساعاتلاری ناهار چاغیندان آخشاما قدر اولاردی. اوساعاتلاری حوسین قولونون دوکانینا یا اطرافینا جمع اولوب اوز لرین گونه وئرردیلر . پاپروز چکیب دردلشیردیلر. خییرلری حوسینقولویا آنجاق بیر کیلو دشتستان خورماسی یادا نیچه واراق پاپروز کاغاذی آلماق اولاردی . پاپروز کاغاذی اصلینده نازیک کاغذا یازیلمیش خارجی دیلده گونده لیک ایدی.اوخارجی لر گونده لیکدن گون خبرلری ، علمی، سیاسی معلومات آلاردی، بیزده ده هانسی عاغیللی کشف ائتمیشدی کی اونا تنبکی بوکوب سیگارت کیمی چکمک اولار.ایندی فیکیرلشیرم کی دوکانچیلار شهردن او گوندلیکلری آلاندا ، ساتیجیا نه دئییرمیش لر؟ ساوادسیز کند اهلینه بیر ایل قاباغین خارجی گونده لیگی نه لازم ؟ اونوتدوم کی دیه م او فراغت آنلاری کیشی لره  مخصوص ایدی . کند قادینی ، قیزی هانا اوزادیب ، پالازدان گبه دن فرمشدن توخومالیدی .قادین هارا فراغت هارا؟اوندا هاردایدیز آی های کویلی فئمنیستلر؟ هله باتمیش شاهین فرحی دونن دئییردی : بیزیم دورده قادین حاقی اعلا درجه ده قوروناردی !!! بلکه ده کاخداکی قادینلاری دئییرمیش . نه بیلیم .؟
مال داواری یئمله مکدن ده بیرآز دئییم کی کندیمیزی یاخشی تانیاسیز. یایین سونوندا تاخیل درزلرین اشان ایله ییب اوستونده ول سورندن سورا ، دنی یلده سوووروب آییرد ایلردیک . سامانی دا کوره کش آدلی بیر ابزار لا سامانلیغا توکردیک . او چاغدا کول ناریدا یتیشردی . بیلیرسیز آخی بیزیم کندین دره لری ، یال یاماجی ،بول نارلیقدی . اتک اتک نار یئغیب سامانلا بیرگه سامانلیغا توکردیک . قیشداکی ، شانا ایله سامانی ائشردیک ، بیر بیر نارلاردان تاپیب دیشه چکردیک . تصورائدین کی هر نار او چاغدا نئجه قیمتلی بیر تاپینتی اولابیلر. اوتین ، یونجانین باغین آچیب دیره یه باغلانان چین ایله دوغراییب سامانا قاتاردیق . (بیلدیر خان اوغلان گیلده مدرن برقی اوت دوغرایان گوردوم اوشاخلیق یورقونلوغوم چیخدی . دوغرودان نلر چکمیشیک؟!). آتام دیه ردی : تیخا سامانی مال حیوان قیش اوزونو یییه بیلمز . اوتدان یونجا دان دوغراییب  قاتاندا دادلی بیر یئم اولور . سورالار الیم چاتاندا ،گوردوم ایله بیزیم دویو خوروش ترکیبی کیمی بیر زاد اولورموش.
او گونلرین بیری ، ینه کند ین کیشیلری دوکان قاباغیندا عومور چورودیردیلر.  هره بیر دره دن بیر سوز سویله ییردی . قارداشیم ممدتاغی بیر ساهاتدان سورا گلیب اونلارا قاتیلدی. یوبانماغی نین سببی ایش یوخ ، یازی پوزیدی. قولاغینا چاتماسین هچ سن دیه ن ایش اهلی دگیلدی . باشقالار کیمی واقتیندا  زمی نی بیچمه ییب پاییزا ساخلاردی کی علی قهرمان دئییر: بیچین پاییزا قالاندا سحر شهی دوشور ،هم واغانییب توکولمور همده هاوا سرین اولور!!. سیزجه  پاییزاجان سئرچه لر سونبولده دن قویاردیلار؟
مدرسه اوزو گورمه دن ،اوزوندن کیچیک قارداشی انشالله دان درس آلیب ساوادلی اولموشدی. جوانلیق چاغلارینین برو برو واقتی شاعیرلیگی نین کورپه واقتی ایدی . ایلک یازدیغی شعرلرعلی آغا واحدین تاثیری آلتیندا غزل ایدی . سونرالار پئشه کار قوشما یازان اولدی . ایکی شعر کتابی چاپ اولوب اوچونجی سی چاپا حاضیرلانیر .اوزامان اوزیله زومزومه ایله دیگی بیر غزلین مطلعی هله ده یادیمدا.
او چمنزاری سئور کونلوم کی بیر جانان اولا
بیرقلم قاش توپ یریش گولدن گوزل بیر جان اولا
دئدیم کی ! هله تتی تتی ایله ین شاعیریدی . یوخسا آدامین سئوگیلیسی توپ کیمی دیغیرلانسا دای سئومه لی هاراسی قالار؟ اوجورکی چمندن توپدان باشلامیشدی تانیمیش فوتبالچی اولمالیدی. آنجاق گوزل بیر شاعیر اولدی.
خولاصه ، ممدتاغی جمعیته قاریشاندا هامی اونو سورغو ساوالا چکدیلر.
یدالله کیشی دئدی : بالا تزه خبر زاد یوخدی ؟
بالابئی اوغلو اوروج  ریشخندیله دئدی : اومود اولما یدیش !!
باباش کیشی دئدی : اوروج دوز دئییر بیزده شانس هاردایدی.
ماحمودالی اوزون بیلمه مزلیه ووروب سوروشدی: ایه نه خبری گودورسوز کی ممد اوغلو رادیودان سیزه گتیره؟
آبباس کاتدا اونا چپ چپ باخیب دئدی : یانی سن بیلمیرسن بولارین دردی ندیر فیریلداقچی؟ اده پامبوغ دا   پامبوغ!!

او ایل لارجان دوزلرین هامی پامبوغ اکیب چوخلی محصول توپلاییب داملاردا آنبارلامیشدیلار. هر ایل پاییزین قیرخ بئشینه کیمی موشتری گلیب یالواریب آلان پامبوغ ، او ایل اللرینده قالمیشدی. اودور کی هر یردن پامبوغون بازاری ، ساتیشی حاقدا خبر گودوردیلر.
ممدتاغی اوزونه موسللط دوداغی قاچمادان جیددی حالدا دئدی: نیه ؟ اتفاقن ساهات ایکی خبرینده شاه اوزو دانیشدی.
هرکس ایکی قولاخدا بورج آلیب دقتله اونون سوزونون آردین گوزله دیلر.
ممدتاغی علاوه ایله دی : شاه دئدی برژنف ین اوزویله اوز اوزه اوتوروب ایکی ساهات دانیشدیق . آلله کسسین بو کمونیستلری . آجین بیری دیلر. پامبوغون قیمتی حاقدا نه قدر چنه لشدی . آنجاق منده ایسته دیگیم قیمتدن آشاغی ائنمدیم . فیکیرلشدیم بو شاه دوست اکینچیلرین قابیغی چیخیب یای اوزونو. قویمارام زحمتلری ضای اولسون.یاخشی قیمته سودالاشدیق . کاغیذ قلم گتیردیلر کی قراردادی امضالیاق . نصیبین گوزلری ایشیقلاندی . ایچینده بیر اومید یارانمیش کیمی ذیلفیقارا باخیب ایکی دفعه باشین ترپتدی.
ممدتاغی آرتیردی :او دیقه بیلمیرم بو مردم آزار اوغلو مردم آزار پادگورنی هاردان تاپیلدی . کوپک اوغلو ، ده ده سیده ایله مردم آزاریدی. گئتدی برژنفه نه پیچیلدادی ، کیشی نی پئشمان ایلدی . بشجه دیقه یوبانسایدی ، ایش قورتارمیشدی. ایندی مشد تمیر اوغلو علی نین الینده اوشتوبین ناری قالیب  چورویوب ، قولو بیلی دن بیله گزدیریب ساتا بیلمدیگی  کیمی ، بو میراث پامبوق دا قالیب الیمده . اسیریم چیخیب آلان یوخدی کی یوخدی.!!
ایله بیل هامینین باشینا سویوخ سو اله دین. ساکت اولدولار.  نصیب دئدی : ایه یازیق نیله سین ؟ اللشماغینا اللشیب . میراثا صاحاب چیخان یوخدی دا!!
علومبت کیشی باشین تولیا تولیا دئدی: جددابا نهلت مردم آزار کوپی اوغلو !.
نیفدواله بهزاد آغزین آچدی کی بیر سوز دئسین، نجققولی اوغلو  ممدتاغی گوزون قئییب اوزون توتدی بیزیم قارداشا . تحکومله سوروشدی: ایه ی ممدتاغی ! بورا باخ گوروم ، شاه مشد تمیر اوغلو علی نی هاردا تانییر هه ؟؟
عابباس خومارلو کی اولدن بیلردی ممدتاغی میرت ایله ییر دای اوزون ساخلیا بیلمدی پیققیلدادی .حوسینقولودا  ماحمودالی دا گولمه یه قوشولدیلار.ممدتاغی دا باشلادی گولمه یه . هاما باشقالاری سانکی او دیقه بیر قیمتلی شیئی لری ایتدی ،دیینمه یه باشلادیلار.
عسگر اوغلو یاغیب  دئدی : مردم آزار اوغلو ایکی ساهاتدی بیزی سی...نه  سارییب .
مشد تمیر اوغلو علی : بو کوپی اوغلونون شوغلوغو ینان جیددی سی هچ واقت بللی اولماز.
بالابئی اوغلو اوروج بوغدا تایی نین اوستوندن دوشوب ، یداله کیشیه طرف باخیب.: عرض ایله مه دیم یدیش ؟ دئییب جمعدن آیریلدی.
یاواش یاواش گون قاشقا زمیدن آشماغا طرف اییلدی . کیشیلرده  اوزولموش حالدا داغیلیب ائولرینه گئتدیلر.
نئچه سی اوره یینده آرزولاییردی کی کاش بو گئجه شاهینان برژنفین سوداسی باش توتا. باتمانی  نئچه قرا ن آشاغی اولسادا !!!


https://t.me/Adabiyyatsevanlar

«حسین محمد زاده صدیق» (حسین دوزگون)
1324-1401

دونیا سندن کیم‌لر کئچدی!!

تاسفله تانینمیش ادبیات شوناس، شاعیر، یازیچی، محقق دوکتور «حسین محمدزاده صدیق» بوگون 1401/6/2 تهراندا فیروزگر خسته‌خاناسیندا حیاتا گؤز یومدو.
بو آجی خبر ادبیات سئونلر عایله‌سینی اؤرک ائویندن ساریستدی. یورولماز ادبیات خادیمی 50 ایل آذربایجان ادبیاتیندا بیر فرهنگیستانجا اثر یارادیب.
او بیزدن آیریلسادا، موعاصیر ادبیاتیمیزین قالارقی سیمالاریندان‌دی و  ابدی اولاراق آذربایجان ادبیاتیندا یاشایاجاق.
ادبیات سئونلر بو آجی و یاندیریجی آیرلیغی سایین اوستادین حورمتلی عایله‌سینه، سئونلرینه، آذربایجان خالقینا، ادبیات سئونلر عاییله‌سینه باش ساغلیغی وئریر.
تکمیلی خبرلر، اوستادین یارادیجلیغی حاقیندا آرتیق معلومات حاضیر لانماقدا دیر.

ادبیات سئونلر_1401

https://t.me/Adabiyyatsevanlar

عکس ادبیات سئونلر آرشیویندن

https://t.me/Adabiyyatsevanlar

اوستاد دوکتور« حسین محمدزاده صدیقین» حیات و یارادیجیلغینا اوتری باخیش.

حسین محمدزاده صدیق۱۳۲۴ قورا بیشیرن آیین ییرمی دوردونده، تبریز شهرینده دونیا گوز آچدی.
او دیپلم آلاندان سونرا تبریز "دانشسرا"سیندا ۱۳۴۸ اینجی ایلده فارس ادبیاتی لیسانسی آلدی. ۱۳۶۰دا استانبول یونیورسیته‌سیندن تورک ادبیاتی یوکسک لیسانس و ۱۳۶۲‌ده فارس، عرب و تورک دیللرینین تطبیقی دکتراسینی همن یونیورسیته‌دن الده ائتدی.
او انقلابدان سونرا یولداش"، " "انقلاب یولوندا"، و "یئنی یول" نشرلرینده مشارکت ائتدی.

دوکتور صدیقین تخللصلری"دوزگون" باشقا امضاءلاری یازیلار و مقاله‌لرینده: حسین دوزگون، ح.صدیق، ح.م.صدیق، حسین صدیق، ح. دوزگون، حسین سرخابلی، حسین شمایلی.
او اطلاعات قزئته‌سینه باغلی "سهند" هفته‌لیگی‌نین سوروملو مودورو قفقاز جمهوریلرینه ۱۳۶۸ دن ۱۳۸۱جه اولوب. ۱۳۷۰ دن آذربایجان تورکوجه سینی درس وئرمه‌سینی یونیورسیته‌لرده باشلادی و تهران، طب علملری، صنعتی شریف، امام صادق، علم و صنعت، اورمو یونیورسیته‌سی، زنجانین آزاد یونیورسیته‌سی، رودهن واحدی، مرکزی تهران واحدی و باشقا یونیورسیته‌لرده درس وئردی.

اثرلر:
آذربایجانین شهید عالیم‌لری
موسیقی رساله‌لری ایله تانیشلیق
اردبیل لوحه‌لری
اوچغون داخما
اوشاقلارین ناغیل دونیاسی
حبیب ساهرین یئنی‌لیکلری
زنجان لوحه‌لری۲
سایالار
اوچ باستانی داش
مولوی‌نین تورکو شعرلرینده گزیش
صائب تبریزینین غزللری‌نین شرحی
صمد بهرنگی منظومه‌سی
عاشیقلار
قاشقایی لوحه‌لری
کچل ناغیللاری
ادبی- هنری متنلر
مشروطیت دونمینده فعالیت گوسترن نسیم شمال
ملا عبدالله زنوزی و زنوزیه مکتبی
ملاپناه واقف، گوزللیک و حقیقت شاعیری
ورزقان(شعر توپلوسو)
چیل مایدان
کیچیک شعرلر
تورکجه نظم سئچیلمیش‌لری
تورکجه باستانی یادمانلار
یورد غزللری
بیر گون خافدا(سفرنامه) دورد قیسمت


https://t.me/Adabiyyatsevanlar

‏داستان پردازی در آثار  حکیم نظامی گنجوی
استاد:«دکتر صمد رحمانی»
زمان: شنبه 1401/6/5
ساعت: 17
  آدرس: چای کنار، خانه ی ثقه الاسلام، موسسه ی فرهنگی هنری حکیم نظامی
ورود برای عموم آزاد و ریگان است.

https://t.me/Adabiyyatsevanlar

دوکتور:« حسین محمدزاده صدیق»

ئلیمین آجییان یاراسییام من،
ال قوی نبضیمه گؤر هاراسییام من،
پارچالانمیش قلبین پاراسییام من.
هر دونا گیرسم‌ده یئنه دۆزگۆنم،
بو آد ایله حققیم واردیر اؤیۆنم.
 
دۆشمن وارلیغیمی انکار ائیله‌دی،
قیر آتیمی، بوز آتیمی پئیله‌دی.
منه تهمت ووردو، هر سؤز‌ سؤیله‌دی،
ائلین قایغی‌سینی باشدان آتمادیم،
کئشیگینده اویاق قالدیم یاتمادیم.
 
بو ائلین تاریخی کئچمیشی تایسیز،
کلامی، هر سؤزۆ، هر ایشی تایسیز،
دوروشو، گلیشی، گئدیشی تایسیز،
آلدانما اؤزگه‌نین یاغلی دیلینه.
آللاهیوا باش اگ، باغلان ائلینه.
 
گلمه‌دی دیلیمه بیرجه یالان سؤز،
دۆزگۆنم ایلقاریم دوغرو سؤزۆم دۆز.
سن‌ده اجنبی‌دن من تک الین اۆز،
گل ائله، وطنه، یوردا گوه‌نک،
بوردا گؤمۆلمۆشدۆر یۆزمینلر دیلک

https://t.me/Adabiyyatsevanlar

اوشاق ادبیاتی

اوشاق ادبیاتی هرهفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

اوشاق ادبیاتی

آذربایجان افسانه لری
سؤیله ین:«صمد بهرنگی - بهروز دهقانی»
چئویرن:«منیژه جم‌نژاد»

فاطمه خانیم ۳

فاطمه خانیم هر نه یالواردی: ننه، بوگون منی ده آپار، گؤروم پادشاهین اوغلونون تویو نه جور اولار.
قادین چیغیردی: ایتیل! او٘زونآچیلماسین! من سنی اؤزومله آپارانمارام قاپی قونشونون یانیندا آبریم گئتسین.
قادین لا قیزی گئدینجه، فاطمه خانیم گئنه اینه‌یین سو٘موکلرینین باشینا گئتدی. بو دفعه بیر ساری آت، بیر دست ساری پالتار حاضیرلاندی. فاطمه خانیم پالتارلاری گئییب، آتا مینیب، تویا گئتدی. گئنه دوننکی کیمی قیزیل لاری، اشرفی لری قوناق لارا آتدی، کول لری ده ننه لیک له قیزینین گؤزلرینه سپیب چیخدی. آخشام ننه یله قیزی قاییداندا دئدی: ننه یئدیکلرین، ایچدیکلرین اؤزوونکو، گؤردوکلریندن  منه دئ. ننه لیک گئنه باشلادی یامان سؤیوش دئمه یه: بوگو٘نده گئنه همان قیز گلمیشدی. ساری گئیینمیشدی. اوینادی اوینادی، سونوندا گئنه بیزیم پاییمز کو٘ل اولدو،
بو یازینین آردینی ادبیات سئونلر کانالیندا اوخویون.

https://t.me/Adabiyyatsevanlar

اوشاق ادبیاتی

آذربایجان افسانه لری
سؤیله ین:«صمد بهرنگی - بهروز دهقانی»
چئویرن:«منیژه جم‌نژاد»

فاطمه خانیم ۳

فاطمه خانیم هر نه یالواردی: ننه، بوگون منی ده آپار، گؤروم پادشاهین اوغلونون تویو نه جور اولار.
قادین چیغیردی: ایتیل! او٘زونآچیلماسین! من سنی اؤزومله آپارانمارام قاپی قونشونون یانیندا آبریم گئتسین.
قادین لا قیزی گئدینجه، فاطمه خانیم گئنه اینه‌یین سو٘موکلرینین باشینا گئتدی. بو دفعه بیر ساری آت، بیر دست ساری پالتار حاضیرلاندی. فاطمه خانیم پالتارلاری گئییب، آتا مینیب، تویا گئتدی. گئنه دوننکی کیمی قیزیل لاری، اشرفی لری قوناق لارا آتدی، کول لری ده ننه لیک له قیزینین گؤزلرینه سپیب چیخدی. آخشام ننه یله قیزی قاییداندا دئدی: ننه یئدیکلرین، ایچدیکلرین اؤزوونکو، گؤردوکلریندن  منه دئ. ننه لیک گئنه باشلادی یامان سؤیوش دئمه یه: بوگو٘نده گئنه همان قیز گلمیشدی. ساری گئیینمیشدی. اوینادی اوینادی، سونوندا گئنه بیزیم پاییمز کو٘ل اولدو، او بیر لرینکی قیزیل، اشرفی. صاباح گئنه تویا گئتمک ایسته دیلر. فاطمه خانیم دئدی: ننه، بیر یول دا منی آپار. پادشاهین اوغلونون تویونو گؤرمک ایستیرم. قادین چیمخیردی: سنجه اؤزومله پادشاهین تویونا آپارا بیله جه ییم بیری سن؟ دا سؤزون ده دانیشما!... بو دفعه فاطمه خانیم بیر دست قیرمیزی پالتار گئییب، قیرمیزی بیر آت مینیب، گئتدی پادشاهین ائوینه. گئنه اوینادی، اوینادی، قیزیللاری، اشرفی لری اوبیرلره، کولوده ننه لیک له قیزینین گؤزلرینه سپدی. یولدا آیاغی بورخولدو، بیر تای قیزیل باشماغی چشمه یه دو٘شدو. ننه لیک له قیزی گلنه جان پالتارلاری چیخاریب، گول تیکمک له باشینی قاتدی. قادینلا قیزی قاییدینجا هرگون کیمی، بیر آز بو سوروشدو، بیر آز اولار جواب وئردیلر. نئچه گون سونرا پادشاهین کیچیک اوغلو آتینی سووارماق اوچون چشمه باشینا گئتدی. آت سویا باخیب هو٘رکدو. پادشاهین اوغلو دئدی: باخین گؤرون چشمه ده نه وار. نوکرلر آراییب بیر تای قیزیل قادین باشماغی تاپدیلار. پادشاهین اوغلو باشماق تایین  گؤرونجه آغزی سولاندی. اؤز یانیندا دئدی: بئله باشماغین صاحابی چوخ گوزل اولمالی دیر، حتما تاپیب اونونلا ائولنه‌رم. باشماق تایینی قوللوقچولارا وئریب دئدی: گئدین بوتون شهری آختارین، بو باشماغین اییه‌سینی تاپین. قوللوقچولار گئدیب بیر بیر ائولری آختاردیلار. هاردا بیر قادین، قیز واریدی، باشماغی گئیدیردیلر. آما فایداسیزیدی. یا گئن گلدی، یا دار. سونوندا فاطمه خانیمین ائوینه یئتیشدیلر. قادین ائشیدینجه تئز فاطمه خانیمی تندیر ده گیزله دیب، قاپیسینی باغلییب، اوستونه داری سپدی، تویوقلار دنله سین  دئیه. پادشاهین اوغلونون قوللوقچولاری قاپی دؤیوب، ایچری گلدیلر. دئدیلر: قیزیوی گتیر. قادین اؤز قیزینی گتیردی. قوللوقچولار باشماق تایینی چیخاردیلار اونا گئیدیرسینلر دئیه، گؤردولر آیاغی بؤیوکدور باشماق آیاغینین اوجوندا قالدی. سوروشدولار باشقا قیزین یوخدور؟ قادین آند ایچدی، یوخدو دئدی. کنیزلر گئتمه یه قالخدیلار. بیردن خوروز بانلادی: قوقولی قو...قو
فاطمه خانیم تندیرده
ناخیشی دیزی او٘سته
او٘زونون ایشیغیندا
کول ایچینده ناخیش وورور
گولدن گوزل ناخیشلار..
کنیزلر خوروزون سسینه دؤنوب دئدیلر: بو خوروز نه دئییر؟ قادین خوروزون قانادیندان بیر تپیک ووروب دئدی: کیش!... کنیز لر دو٘زلدیلر یولا ، گئنه خوروز بانلادی: قوقولی قو...قو.
فاطمه خانیم تندیر ده
ناخیشی دیزی اوسته
او٘ز‌ گوزو نور ایچینده
کو٘ل ایچینده ایینه وورور
گو٘لدن گوزل ناخیش وورور
بو دفعه کنیزلر قاییتدیلار. تندیرین قاپاغین گؤتوروب گؤردولر آی پارچاسی کیمی بیر قیز کو٘للرین ایچینده اوتوروب گول تیکیر. باشماغین تایین آیاغینا تاخیب، گؤردولر دو٘ز آیاغی بویدادی. دئیه گو٘له پادشاهین اوغلونون یانینا گئدیب حال احوالی دئدیلر. پادشاهین اوغلو سئوینیب دئدی: خوروزو دا گتیرین بیزیمله قالسین. یئددی گئجه، یئددی گو٘ندوز  شنلیک ائله ییب، شهری بزه دیلر. یئددینجی گئجه گلینی دامادین ائوینه آپاراندا، ننه لیک دئدی: قیزیمی اؤزوم آپاراجاغام. آما فاطمه خانیمی آپارماق یئرینه اؤز قیزینی آپاردی. فاطمه خانیمین دا او٘ز گؤزونه قارا یاخیب، گئنه تندیره سالدی. پادشاهین اوغلو گلینه باخیب باشقاسی اولدوغونو بیلدی. دئدی باشماغین تایین گتیرسینلر. گؤردو آیاغینا گلمه دی. بو آندا خوروز گئنه بانلادی:
قوقولی قو....قو...
فاطما خانیم تندیرده
ناخیشی دیزی اوسته
او٘ز گؤزو نور ایچینده
کو٘ل ایچینده ایینه وورور
گو٘لدن گوزل ناخیش وورور
پادشاهین اوغلو امر ائله دی فاطمه خانیمی گتیردیلر. ننه لیک له قیزینی دا بیر هو٘رکک آتین قویروغونا باغلییب، داغا داشا اؤتوردولر.
سون🪴

https://t.me/Adabiyyatsevanlar

اوشاق ادبیاتی
یاشام
چکیم

چکدیم بیر یومورو باش
قویدوم ایکی قارا قاش
قاشلارین آلتیندا گوز
آلما یاناق لی بیر اوز
فندق کیمی بیر بورون
دوداق ،چنه،بیر بویون
آغزینا دوزدوم دیشین
دیلی !!! قالدی بو ایشین
چکدیم ایکی قولاغین
ایکی قولون، آیاغین
شوه ، قارا تئللرین
بئش بارماقلی اللرین
ایندی خیاط اولموشام
پالتاریندا قالمیشام
آنجاق فیکیردن سونرا
تاپدیم ایشه بیر چارا
نه فرقی اوغلان ، قیزین؟
تیکدیم شالوار ، بولوزون
گئیدیردیم باشماقلارین
جوت له دی آیاقلارین !!!
دئدیم : هارا ؟ بیر دایان
سوسدو !؟ باغریم اولدو قان
آغزین آچدی یوخ دیلی
باغلادی آغزین الی ؟!!

https://t.me/Adabiyyatsevanlar

اوشاق ادبیاتی

بیر نفر اون و بال آلمیشدی، مئشه ‎یه گئدیردی.
سوروشدولارکی: «اوردا نه ایشین وار؟»
دئییر: مئشه ‎ده “آیی”( خرس) توتماغا گئدیرم.
سوروشدولار: «نییه بال آپاریرسان؟»
دئییر: «آیی‎نـین، بالدان خوشو گلیر. بیر آز بال قویاجاغام آغاجین اوستونه، بیر آز دا یاخاجاغام آغاجین تنه‎سینه.»
سوروشدولار: «یاخشی، نه اولسون؟ منظورون ندیر؟»
دئییر: «آیی بال یئمک اوٍچوٍن، آغاجا دیرماشاجاق. ائله کی، بالی ‎یئدی، اوزون ایتیریب آغاجدان ائنه‎جک، اوندا بال بدنینه یاخیلاجاق.»
سوروشدولار: «پس او اونو نه اوچون آپاریرسان؟»
دئییر: «اونو دا تؤکه‎جییم آغاجین دیبینه. آیی، ائله کی، آغاجدان ائندی، دوشه‎جک اونون اوستونه، باشدان آیاغا اونلی اولاجاق.سونرا دوروب گئده ‎جک ائوه. من ده دالیسیجا.یئکه- زیرپی آیی ائوه گیرندن سونرا، گئده‎جک آینانین قاباغیندا دایاناجاق، اؤزونه باخاجاق، گوره‎جک باشدان آیاغا آغ-آپباق اولوب.ائله بیله‎جک کی قوطب آیی‎سیدیر.
دئیه‎جک: «من کی قوطب آیی‎سییام، بوردا نه قاییریرام». یوکون چاتاجاق گئده‎جک قوطبا.من ده دالیسیجا.ائله کی،یئتیشدی قوطبا،بدنی دوناجاق، داها حرکت ائله‎یه بیلمه‎یه‎جک،اوندا من ده یئتیشیب اونو شیکار ائده‎جگم

اوشاق ادبیاتی


https://t.me/Adabiyyatsevanlar

اوشاق ادبیاتی
«کارتون»



اوشاق ادبیاتی هرهفته پنجشنبه گونو ادبیات سئونلر کانالیندا  .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar