ادبیات سئونلر

اوشاق ادبیاتی

آذربایجان افسانه لری
سؤیله ین:«صمد بهرنگی - بهروز دهقانی»
چئویرن:« منیژه جم‌نژاد»

فاطمه خانیم ۲

👧🏻 قوجا آرواد دئدی: گل پانبیغینی آل. یولوندا او٘چ چشمه وار. قارا چشمه ده یویون، قیرمیزی چشمه نین سویونو ساچلارینلا قاشلارینا چک، آغ چشمه نین سویونو دا دوداقلارینلا یاناقلارینا.
قیز گلیب قارا چشمه ده یویونوب، قیرمیزی چشمه نین سویوندان ساچلاری له قاشلارینا چکیب، آغ چشمه نین سویوندان دا دوداقلاری له یاناقلارینا ووردو. آخشام قادین کوچه باشینا، قیزینین پئشوازینا گلدی. آما آی یئرینه گؤزو قاپ قارا بیرینه دو٘شدو، ساچلاری له قاشلاری قیرمیزی ایدی، دوداقلاری له یاناقلاری آغ آپباغ؛ پیس بیر شئی ده آلنیندان آسلانیر، آغزینا گیرمیش، قیز دا اونو چئینیردی. آرواد ایکی اللی باشینا چالیب، باییلدی. اؤزونه گلیب قیزینی دا گؤتوروب ائوه گئتدی. فاطمه خانیمی دویونجا تاپدالادی. یورولوب یاتمایا گئتدی. آما یوخو هاردایدی؟ ایلان وورموش کیمی هی قیوریلیر، آچیلیردی. فیکیر گؤتورموشدو، بو ایشلردن باش چیخارمیردی. سونوندا اؤز اؤزونه دئدی: بولارین هامیسی اینه یین باشینین آلتیندادی، گرک باشینی اکم. گلن گو٘ن او٘ز گؤزونه زفران یاخدی، بئلینه قورو چؤره ک باغلادی، اؤزونو ناخوشلوغا ووروب یاتدی. کیشی ائوه گلیب آروادینین سارالمیش رنگینی گؤروب سوروشدو: نه ییندی؟ آرواد بیر ترپندی، بئلینی بوردو. قورو چؤره‌ک اووولدو، سانکی سانجی دان بئلینین سو٘موکلری سس وئریردی. ارینه دئدی: گورمورسن؟ هر یئریم آغریر. بوگون حکیمه گئتدیم دئدی: درمانین ساری اینک اتی دیر. کیشی دئدی: چوخ قشه، بو کی بیر سؤز دئییل. گو٘ذر ده کی قصاب ساری بیر اینک کسیب، ایندی گئدیب آلارام. قادین دئدی: یوخ. هر ساری اینک درمان اولماز. دئییب گرک اؤز ساری اینه ییمیز اولسون. فاطمه خانیم نه قدر آغلادی، سیزلادی، یالواردی، فایداسیز ایدی. دده سی ده سوروشمادی حکیم بیزیم ساری اینه ییمیزی هاردان تانیر. فاطمه خانیم طؤیله یه قاچیب، قول لارینی اینه یین بوینونا سالیب های های آغلادی. اینک دئدی: آغلاما، من بیر ایش گؤررم اتیم هامیسینا آجی، سنه شیرین گلسین. سن یالنیز منیم سو٘موکلریمی دقت له ییغیب یئملیکیمین (آخور) آلتیندا قویلا. بیر سؤزون، دردین اولاندا گل منه دئ. اینه یی اؤلدوردولر. آروادین کئفی سازالدی. دوردو چادیراسین بئلینه باغلییب، بیر قازان آسدی اینه یین اتینی شاما پیشیرسین دئیه. گئجه هامی اینک اتی یئمه یه سوفرا باشیندا اوتوردو. ایلک تیکه نی آغیز لارینا قویوب چیخاردیلار. زهر کیمی آجی ایدی. قادین اؤزلرینه پنیر چؤره‌ک گتیردی، ات لری ده فاطمه خانیمین اؤنونه تؤکدو، یئییب اؤلسون دئیه. فاطمه خانیم اتی ائله ایشتاه لا، لذت له یئییردی هامی قیسقانیردی. نئچه گون کئچدی. پادشاهین اوغلونون تویویدو. قادین تازا پالتارلاری گئییب، اؤز قیزین دا بزه ییب، دو٘زه دی، اؤزیله آپارسین دئیه. فاطمه خانم چوخ ایسته دی اونو دا آپارسینلار ؛ آرواد دئدی: سن هارا پادشاهین اوغلونون تویو هارا؟ سؤزونده ده دانیشما، اؤز آبریمی آپارا بیلمرم. ایکی یاندان تویا گئتدیلر. فاطمه خانم چوخ آغلادی، گؤزلری شیشدی. بیر آز گو٘ل تیکدی، بیردن اینه یین سؤزلری یادینا دو٘شدو. دوروب گئتدی اینه یین سو٘موکلری اولان یئره. سو٘موکلری چیخاریب اولانلاری آنلاتدی. تئز بیر آغ آت ایله بیر دست آغ پالتار حاضیرلاندی. فاطمه خانیم گئیینیب میندی آتا. پالتارین بیر جیبی قیزیل، اشرفی له دولویدو، بیر جیبی ده کو٘ل له دولویدو. فاطمه خانم آتی قوووب پادشاهین قصرینه ساری یولا دو٘شدو. نوبتچی لر بئله بیر گؤزل شاهزادانی گؤرمکدن حیرت ده قالدیلار، اؤنونو کسنمدیلر. فاطمه خانیم ایچری گئدیب اویناماغا باشلادی. بوتون قیزلار، قادینلار ایکی گؤز ده بورج ائله ییب، بئله بیر گوزل لییه، اویناییب سیندیرماغا حئیران قالدیلار. فاطمه خانیم اویناییب قورتولاندان سونرا اشرفی لری مجلسده اوتورانلارا ساری سپدی، کو٘لو ده اؤگئی ننه یله قیزینین گوزلرینه. ننه لیک له قیز باغیردیلار: ایوای! گؤزلریم کور اولدو! ... توتون اونو! ...قیزلار قادینلار اؤزلرینه گلینجه فاطمه خانیم ائوه ده یئتیشمیشدی. ننه لیک له قیزی گلینجه پالتارلاری چیخاریب، سوموکلری قویلادی، ائو ائشیکی سیلیب سو٘پورمه یه باشلادی. آخشام ننه ایله قیزی گلدیلر. باهار بولودو کیمی دولموشدولار. فاطمه خانیم دئدی: ننه یئدییینیز، ایچدییینیز اؤزوزونکو، گؤردوکلرینیزدن منه دئیین. قادین بیر دن باشلادی ائله ناله نفزینه کی، بیری توتسایدی، اوینایان قیزین اتی تؤکولردی. - بیر قیز گلدی، آی پارچاسی، ائله اوینادی کی هامینین الی قالدی آغزیندا. آما سونرا جوان اؤلموش، اؤزگه لره قیزیل، اشرفی، بیزه کول سپدی. آز قالا ایکیمیزده کور اولاق. فاطمه خانم سوروشدو: قیزا نه ائتدیلر؟ ننه دئدی: توتانمادیلار، ذلیل اولموش قاچدی...

320 views03:09