ادبیات سئونلر

اوشاق ادبیاتی

آذربایجان افسانه لری
سؤیله ین:«صمد بهرنگی - بهروز دهقانی»
چئویرن:«منیژه جم‌نژاد»

فاطمه خانیم ۱

👧🏻 کئچن زامانلاردا فاطمه خانم آدیندا بیر قیز واریدی. فاطمه خانیمین آناسی اؤلموش، آتاسی آیری آرواد آلمیشدی. بو قادین فاطمه خانیما پیس داوراناردی. همشه اونو دانلاییب دئیردی: فاطمه خانم، ایتی گؤزوم گؤتورور، پیشیکی گؤزوم گؤتورور، سنی گؤزوم گؤتورمور. ایلانین یارپیز دان آجیغی گلن کیمی، بو آروادین دا فاطمه خانم دان آجیغی گلردی. سحر دن آخشاما مین جوره بویروق وئریب، یامانلاردی. آما اؤز قیزینا گو٘لدن آغیر دئمزدی. قویمازدی الینی آغدان قارایا وورسون. شام باشیندا بیرآز قورو چؤره‌ک فاطمه خانیمین اؤنونه تؤکوب، اؤزو، اری، قیزی، اوبیری اتاقدا شیرین پلو یئیردیلر. فاطمه خانیمین آتاسی پخمه بیر کیشی ایدی. خانیمیسی نین قورخوسوندان بیر سؤز دئیه بیلمزدی. بیر گو٘ن قادین بیر باتمان پانبیق فاطمه خانیما وئریب دئدی: گئت داغ باشیندا اوتور؛ بولاری آخشاما جان گرک اییره سن. سونرا اینه یی طؤیله دن چیخاریب دئدی: بونو دا آپار اوردا اوتار. آل بو دا ناهارین. بیر آز کیفلنمیش چؤره‌ک الینه وئریب، یولا سالدی. فاطمه خانیمین اینه‌یی سیرا دان بیر اینک دئییلدی. آدام دیلی بیلردی. فاطمه خانیمین آناسی اؤلرکن قیزینی اینه یه تاپشیرمیشدی، اونا گؤز اولسون دئیه. فاطمه خانیم پانبیغی اینه یین بئلینه قویوب یولا دو٘شدو. داغ باشینا یئتیشینجه پانبیقلاری اؤنونه قویوب، اییرمه یه باشلادی. بیردن بتر بیر یئل گلیب پانبیقلاری گؤتوروب آپاردی. فاطمه خانیم یئلین دالیسی جان قاچیب سسله دی: آی قانادینا قوربان یئل، منیم پانبیغیمی اوزاغا آپارما، اؤگئی ننه م منه ساواشار. یئل پانبیقلاری آپاریب بیر قوجا آروادین ائوجییینه آتدی. فاطمه خانیم ائو جییین قاپیسینا یتیشیب دئدی: ننه جان، منیم پانبیقلاریمی یئل بورا گتیردی. قویورسان اولاری گؤتورم؟ قوجا آرواد دئدی: جان ننه، گل باخ گؤر منیم ساچلاریم تمیز دی یا آنانینکی؟ فاطمه خانم گئدیب قارینین توکلرینی آلت او٘ست ادیب گؤردو دولودو بیت، سرکه یله. دئدی: البتده کی سنین ساچلارین داها تمیز دی! قوجا آرواد دئدی: یاخجی، گئت کیلیمین گوشه سین قووزا گؤر منیم ائویم تمیز دی یا آنانین کی؟ فاطمه خانیم گئدیب کیلیمین بیر گوشه سینی قووزاییب گؤردو یوزلر سوسری، پیس پیسلی، قیرخ آیاق قیمیلدیر. دئدی: بو ائوین نه دخلی وار منیم آنامین ائوینه؟ سنین ائوین یوز یول منیم آنامین ائویندن داها تمیز دی. قوجا آرواد دئدی: گل ننه، بودا سنین پانبیغین. آل گئت. یول او٘سته او٘چ چشمه گؤره جکسن: آغ چشمه ده یویون، قارا چشمه نین سویوندان ساچلارینلا، قاشلارینا وور، قیرمیزی چشمه نین سویوندان دا دوداقلارین لا یاناقلارینا. فاطمه خانیم پانبیقلاری گتیریب اینه یین یانینا قویوب، آغ، قارا، قیرمیزی چشمه یه گئتدی. گئنه اینه یین یانینا گلدیکده گؤردو اینک پانبیقلارین هامیسینی یئییب، یوماق ائدیب. گو٘ن باتارکن آرواد کوچه باشینا گلدی گؤرسون جانی یانمیش فاطمه خانیم نیه یوبانیب؟ بیردن گؤردو کوچه نین دیبیندن آی چیخدی هر یئری ایشیقلاندیردی. گؤیه باخدی، آیی گو٘نده کی یئرینده گؤردو. کوچه نین دیبینه دو٘ز عمللی باخاندا گؤردو گلن فاطمه خانیمدی، آلنینین اورتاسیندا بیر آی ایشیلدیر. سینیردن آز قالا دلی اولوردو. فاطمه خانیمین باشیندان چالیب دئدی: ایندیه جان هانسی گوردایدین؟ فاطمه خانیم باشینا گلنلری دئدی؛ قادین ائشیدینجه دو٘شوندو: صاباح اؤز قیزیمی گرک یوللایام. صاباح گو٘ن چیخمامیش دوردو. گؤزل بیر پلو پیشیریب، تازا چؤرک له بیر مندیله باغلییب، قیزینا وئریب، بیر پونزا (باتمانین اون آلتی دان بیری) دا پانبیق وئردی، آپار داغ باشیندا اییر دئدی. قیز داغ باشینا چاتینجا یورولدو، اوزانیب یاتدی. سونرا آییلیب، ایکی ساعات گرنشدی، ناهارین یئدی. سونرا پانبیقلاری اییرمه یه چیخاردی. بیردن یئل گلیب پانبیغی گؤتوروب آپاردی. قیز چیغیر باغیر سالدی: قانادین سینسین یئل! منیم پانبیغیمی هارا آپاریرسان؟ یئل پانبیغی آپاریب آتدی قوجا آروادین ائوجییینه، یولونو چکیب گئتدی. قیز ائوجییین قاپیسینا یئتیشیب چوخ آجیقلی قاپینی آچیب چیغیردی: آی هاف هافلامیش قاری، تئز اول منیم پانبیغیمی وئر، یوخسا نه گؤرسن اؤز گؤزوندن گؤررسن. قوجا آرواد دئدی: جوشما ننه! گل ایچری گؤر منیم ساچلاریم تمیزدی یا سنین آنانین کی؟ قیز قوجا آروادین ساچلارینی آلت او٘ست ائدیب گؤردو دولودو بیت ، سیرکه یله. دئدی: وای، کو٘ل باشیما، نه کیفیر دی! قوجا آرواد دئدی: چوخ گؤزل، گؤر کیلیمین آلتی نه جوردو؟ قیز کیلیمین بیر گوشه سین قوزاییب گؤردو دولودو سوسری، پیس پیسلی، قیرخ آیاق لا. دئدی: ایوای، آدامین او٘ره یی بولانیر! منیم آنامین ائوی گو٘لدن تمیز دی.
آردی وار...

https://t.me/Adabiyyatsevanlar