ادبیات سئونلر

478 viewsedited 03:37

اوشاق ادبیاتی

آذربایجان افسانه لری
سؤیله ین:«صمد بهرنگی - بهروز دهقانی»
چئویرن:«منیژه جم‌نژاد»

فلکین دالینجا

🪐 گو٘نلرین بیر گو٘نونده بیر کیشی واریدی. باخت سیز، چرخی دؤنموش بیری. الیندن گلنی ائله میش، آما فایدا گؤرمه میشدی. بیر گو٘ن اؤز یانیندا دئدی: بئله اولماز کی الیمی قویام الیمین او٘ستونه اوتورام. گرک گئدم فلکی تاپیب سوروشام منیم قدریم نه دیر، باشیما چاره قیلام. دوروب یولا دو٘شدو. گئتدی گئتدی بیر قوردا یئتیشدی. قورد اؤنونو کسیب دئدی: انسان اوغلو، هارا گئدیرسن؟ کیشی دئدی: گئدیرم فلکی تاپام. قورد دئدی: سنی آللاه، تاپسان اونا دئ: قورد سلام یئتیردی دئدی همشه باشیم آغریر، درمانی نه دیر؟ کیشی دئدی: اولسون، سونرا یولا دو٘شدو. گئنه گئتدی، گئتدی، بیر شهره یئتیشدی، اورانین پادشاهی ساواشدا یئنیلمیش، قاچیردی. پادشاهین گؤزو کیشیه دو٘شونجه دئدی: آی کیشی هارا گئدیرسن؟ کیشی دئدی: قوربان اولوم فلکی تاپماغا گئدیرم، قدَریمی دئییشم دئیه. پادشاه دئدی: سن کی بو یولو گئدیرسن، منیم وریمدن ده اونا دئ: نیه من بوتون ساواشلاریمدا یئنیلیرم؟ ایندیه دک بیر دفعه ده دو٘شمنیمی یئنمه میشم. کیشی یولا دو٘شوب گئتدی. بیر آز گئتدی، دنیزه یئتیشدی. نه گمی گؤردو، نه بیر یول. نه ائتسین دئیه حیران سرگردان قالمیشدی. بیردن بیر یئکه بالیق باشینی سودان چیخاریب دئدی: آدام بالاسی هارا گئدیرسن؟ کیشی دئدی: ایشیم دو٘یونله نیب، فلکی تاپماغا گئدیرم. آما سانکی بوندان اؤته سینه گئده بیلمیرم، قاییغیم یوخدو. یئکه بالیق دئدی: من سنی اوتایا آپارارام، بو شرط له کی فلکی تاپسان، سوروشاسان منیم بورنوم نیه همشه قاشینیر. کیشی راضی اولدو. یئکه بالیق اونو بئلینده دنیزین او تایینا آپاردی. کیشی یوللاندی، سونوندا بیر یئره یئتیشدی. بیر کیشی شالوارینین پاچالارین یوخاری ووروب، بئل چیینینده باخچاسینی سوواریردی. باغدا مینلر کردی واریدی، بؤیوک، کیچیک. کردی لرین چوخو سوسوزلوقدان چات چات اولموشدو. نئچه سینین ده سویو دولو کن باغوان گئنه سو وئریدی. باغوانین گؤزو کیشیه دو٘شونجه دئدی: هارا گئدیرسن؟ کیشی دئدی: گئدیرم فلکی تاپام. باغوان دئدی: اونا نه دئیه جکسن؟ کیشی دئدی: تاپسام بیلرم نه دئیم. یامانا باساجاغام اونو. باغوان دئدی: سؤزووو دئ، فلک منم. کیشی دئدی: اونجه دئنه بو کردی لر نه دی؟ باغوان دئدی: بونلار یئر او٘زونون آداملارینین دیر. کیشی دئدی: منیم کی هانی؟ باغوان کیچیک، سوسوز بیر کردی گؤستردی، سوسوزوندان چاتلامیشدی. کیشی حیرص له بئلی فلکین چیینیندن قاپیب سویو اؤز کردی سینه چئویردی. دیونجا سو وئریب دئدی: یاخشی، بوراسی دو٘زلدی. ایندی دئ گؤروم او یئکه بالیغین بورنو نیه همشه قاشینیر؟ فلک دئدی: اونون بورنوندا یئکه بیر لعل قالیب. یومروق لا باشیندان وورسالار، لعل دو٘شر، بالیغین حالی دو٘زلر. کیشی دئدی: فلان شهرین پادشاهی نیه همشه یئنیلیر، ایندیه دک دوشمنینه غالیب اولمییب؟ فلک دئدی: او پادشاه قادین دیر، اؤزونو کیشی شکلینه چیخاریب. قازانماق اوچون گرک ائولنه. کیشی دئدی: چوخ گؤزل، همشه باشی آغریان قوردون درمانی نه دیر؟ فلک دئدی: بیر آخماق آدامین بئینینی یئسه، باشی داها آغریماز. کیشی سئوینجک گو٘له گو٘له فلک دن آیریلیب قاییتدی. دنیز قیراغیندا یئکه بالیق اونو گؤزله ییردی. کیشینی گؤرونجه سوروشدو: تاپدین؟ کیشی دئدی: هه، اؤنجه منی دنیزین او تایینا آپار سنه دئییم. یئکه بالیق کیشینی دنیزین او تایینا آپاردی. کیشی دئدی: سنین بورنوندا بیر پارچا لعل قالیب، بیریسی گرک باشیندان وورا لعل دؤشه، قورتولاسان. یئکه بالیق دئدی: اوندا گل اؤزون وور، لعلی گؤتور. کیشی دئدی: منیم داها بئله شئی لره احتیاجیم یوخدو. کردیمی سو ایله دولدورموشام. یازیق بالیق هر نه یالواردی، کیشی سایمادی. پادشاهین گؤزو یولدایدی. کیشی یانینا یئتیشیب اولانلاری آنلاتدی. پادشاه دئدی: ایندی کی منیم سیرریمی بیلدین، گل کیمسه بیلمه دن من له ائولن، منیم یئریمه شاهلیق ائت. کیشی راضی لاشماییب دئدی: یوخ، شاهلیق نه ایشیمه گلر، کردیمه سو وئرمیشم. قیز چوخ یالوار یاخار ائله دی. کیشی قبول ائتمه دی. گئنه یولا دو٘شدو گلیب گلیب قوردا یتیشدی. قورد دئدی: آدام بالاسی، سانکی کئفین سازدی! تاپمیسان؟ کیشی دئدی: هه، سنین باش آغریوین درمانی بیر آخماق آدامین بئینینی یئمک دی. قورد دئدی: یاخجی، یولدا نه لر اولدو؟ کیشی باشدان آیاغا قوردا آنلاتدی، نئجه یئکه بالیغین لعلین ده پادشاهلیغی دا قبول ائتمه ییب، کردیسینه سو دولدوروب دئیه، داها اولارا احتیاجی یوخدو دئیه. قورد بیردن قالخیب کیشینین بوینون دیشینه آلیب بئینینی باشیندان چیخاریب دئدی: سندن آخماغینی هاردان تاپاجاغام؟
سون🍄

https://t.me/Adabiyyatsevanlar