ادبیات سئونلر

اوشاق ادبیاتی

آذربایجان افسانه لری

سؤیله ین:«صمد بهرنگی- بهروز دهقانی»
چئویرن:«منیژه جم‌نژاد»

پخمه دئو

🐸 بیری واریدی، بیری یوخودو. بیر اوغلان ، بیرده آناسی واریدی. اوغلان گو٘ن ایشیغیندان چوخ قورخاردی. او او٘زدن سحردن آخشاما اتاقدا قالیب، ائودن ائشیه چیخمازدی. ایش گو٘ج دالیسی جان دا گئتمزدی، چوخ دا قارین پایدی. ننه ده اونون قارنینی دویورا بیلمزدی. ننه بیر نقشه چکدی، نئجه اونو ایشه گو٘جه گؤندرسین دئیه. او٘چ آلما آلدی، بیرین اوتاغین آستاناسینا ، بیرین حیطین آراسینا، سونونجونو دا قاپی آغزینا قویدو. اوغلان یاواش گئدیب اول آلمانی گؤتوروب یئدی. سونرا گؤزو حیطده کی آلمایا دو٘شدو. قورخا قورخا گئدیب اونو دا گؤتوردو. اوندا گؤزو اوچونجویه دو٘شدو. گئدیب اونو دا گؤتوردو. ننه سی قاچیب اونو ایته له دی کوچه یه، قاپینی کیپله دی. اوغلان تک تنها کوچه ده قالدی. آناسینا یالواردی، دیل تؤکدو، آناسی سایمادی. اوغلان دا باشین گؤتوروب چؤللره گئتدی. بیر آز گئتدی سو قیراغیندا بیر قورباغا گؤردو، سویا جومماق ایستیردی. اونو توتوب قویدو جیبینه. سونرا بیر قوش یومورتاسی تاپدی. اونو دا او بیری جیبینه قویدو. بیر آز دا گئتدی، بیر آز ایپ تاپدی. اونو دا یان جیبینه قویدو. دا گئجه گلمیش دی. اوزاقدا بیر چیراق ایشیغی گؤردو. اونا ساری گئتدی. بیر ائویدی. ایچری گئتدی. بیر قازان دملنمیش دو٘یو اود او٘سته یدی. یئمه یه اوتوردو. آیاق سسی گلدی، سونرا بیر دئو گو٘له گو٘له یئتیشیب دئدی: اوغلان نه ائدیرسن؟ اوغلان دئدی: پلو یئییرم، کورسان؟ دئو دئدی: چوخ گؤزل، یئ گؤروم نه قدر یئیه بیلیرسن. اوغلان بشقابینی دولدوردو، خیرخیراسینا جان یئدی. دئو دئدی: ائله بو؟ ائله ده منیم یئمه ییمه تاماشا ائت، یئمک اؤیرن. دئو پلو قازانین اؤنونه قویوب، هامیسینی یئییب قورتاردی. سونرا دئدی: گل بیتلریمیزی آریداق، گؤره ک هانسیمیزین کی ایری دی. اوغلان دئدی: اولسون. دئو قولتوغونون آلتیندان پیس پیسلی بویدا بیت تاپیب گؤستردی. اوغلان دا الین جیبینه سالیب قورباغانی چیخاردی. دئو او یئکه لیکده بیت گؤردویونه، آز قالا بوینوز چیخاریردی. بیر آز اوغلاندان قورخدو. آیری جور سیناماق ایسته دی. دئدی: ایندی هره میز بیر داش گؤتوروب اووجوموزدا اوواق، کیم داها گو٘جلو دو گؤره‌ک. اوغلان دئدی: اولسون. دئو یئردن بیر داش گؤتوروب اووجوندا اوووب داغیتدی. اوغلاندا قوش یومورتاسینی اووجوندا توتوب سیخدی. یومورتا پاتلادی. اوغلان دئدی: من سویوندا چیخاردیم. دئو لاپ قورخموشدو. آما اوغلانین توزاغی اولماسین دئیه، باشقا بیر سیناو دا ائتمک ایسته دی. بو او٘زدن دئدی: ایندی بیر آووج توک قولتوغوموزدان قوپاراق، گؤره ک کیمین کی داها اوزوندو. اوغلان دئدی: اولسون. دئو بیر اووج توک قولتوغوندان قوپاردی، هر تئلی یاریم متر. اوغلان دا ایپین اوجوندان یاپیشیب چکدی، چکدی، چکدی، گئنه چکدی. دئو باخیب گؤردو توکدو کی چیخیر، او باشی دا بللی دئییل. دئدی: دا بس دی. ایندی گل بیربیرمیزی پو٘فله یه ک، کیمین پو٘فو داها گو٘جلودور گؤره ک. اوغلان دئدی: اولسون، اؤنجه سن، سونرا من. دئو آغزینا هاوا دولدوردو اوغلانا ساری پو٘فله دی. قاپی لار چیرپیلدی، ائو سیلکه لندی، اوغلان آتیلیب تاقچانین بوجاغینا دو٘شدو. دئو دئدی: به سن نیه گئتدین اوتوردون اوردا؟ اوغلان باغیردی: ترپشمه گلدیم دده وی یاندیرام! قاچما گلدیم! دئو جانینین قورخوسوندان ایکی آیاغی وار، ایکی‌سینی ده بورج آلیب قاچدی. یولدا فیکیرلشدی تو٘لکو چوخ بیلر، گئدیم اونون یانینا. تولکو قویروغویلا اویناییردی، دئو یئتیشیب دئدی: قارداش بیر آدام گلدی منی ائویمدن قوغدو. منیم گو٘جوم اونا چاتمادی. سن عاغیللی تو٘لکوسن. منه بیر چارا قیل. تو٘لکو قاققا چکیب گو٘لوب دئدی: سن نه پخمه سن! آدامین گو٘جو هاردایدی؟ گل گئده ک من اونا بیر آش پیشیریم، کئف ائله سین. دئو دئدی: یوخ قارداش. بئله اولماز. یولدا سن اکیلیب، منی تک قویسان نئجه؟ دو٘ز دئییرسن آیاغیوی منیم آیاغیما باغلا، قاچا بیلمه یه سن دئیه. اوغلان گؤردو تو٘لکو دئوی قایتاریر. اوزاقدان چیغیردی: آی حیله گر تو٘لکو! آتاوین وریندن یئددی دئو منه بورجلویدون، گتیرمه دین، ایندی کی بیرینی گتیریرسن، دریسین نیه سویمامیسان؟ گلیرم وورام بئینین داغیلسین. دئو بو سؤزلری ائشیدینجه، گئنه قاچدی، تو٘لکونو ده سو٘رویه سو٘رویه آپاریب اؤلدوردو. اوغلان ننه سی‌نین یانینا گلدی. قاپی دؤیدو. ننه سی دئدی: اوغلان گئنه گلدین کی! اوغلان دئدی: هه، ننه گل منیم عمارتیمه گئده ک، بیر دم دستگاه جو٘رله میشم گل گؤره سن. آنا سی دئدی: اینانمیرام لیاقتین اولا. اوغلان چوخ دئدی، ننه سی قاپینی آچدی. سونرا ایکی یاندان گئدیب دئوین ائو زندگانلیغینا صاحاب دوردولار.
سون🌵

https://t.me/Adabiyyatsevanlar