ادبیات سئونلر

پروفسور یئترینجه دونیا گؤروشلو، معلوماتلی، بیلیکلی، کامیل اینسان، ضیالی ایدی. دالغالی گوموشو ساچی، یاراشیقلی گولر اوزو ائله بیل پالاتانی ایشیقلاندیریر، هر خسته‌ ایله اؤز آدامی کیمی گؤروشور، اوز دیلینده دانیشیر، اوره‌کلره یونگوللوک گتیرن اونسیت یارادیردی. شاعیرین خاطیرینی مخصوص ایسته‌ییب، گرگین ایش گونونون سونوندا اونونلا آرخایین اوره‌ک صحبتی ائدیردی. اؤزونون دئدییی کیمی " نادیر کیتابلاری چیراقلا آختاران"، مطالعه‌سیز کئچینمه‌ین پروفسورون غبطه ائدیلن حافظه‌سی وار ایدی.
صحبت اثناسیندا یادداشیندا داشلاشان آفوریزملری*، حکمتلی سؤزلری یئرلی یئرینده ایشلدیردی.
بیر دفعه صحبتین شیرین یئرینده او، شاعیره ظن ایله باخیب اؤزونه مخصوص آوازلا سینه‌دن دئدی:

وطنین مرد قیزی، اوغلو قوجالماز
تورپاغا کؤکویله باغلی قوجالماز!
نورلو صیفتینه قیریش قونسا دا
مودریک آداملارین عاغلی قوجالماز!
***
شاعیر بویوک حؤرمت بسله‌دییی طبیبه کؤورک سس ایله مینتدارلیغینی بیلدیردی:
- ساغ اولون، پروفسور، سیز منی سورپریز ائتدینیز. هئچ بیلمزدیم کی، سینه دفترینیزده منیم ده شعریم، روباعیم وار.
-- نییه ده اولماسین؟ گوزل دئییبسیز:
" نورلو صیفتینه قیریش قونسا دا/ مودریک آداملارین عاغلی قوجالماز!".

او سؤزونه آرا وئریب نفسینی دَردی:
-- سیز بایاقدان آذربایجانی قاریش- قاریش گزمه‌یینیزدن، قلم دوستلارینیزلا بیرلیکده مختلف تدبیرلرده اشتراکینیزدان، اوخوجولارلا گؤروشلرینیزدن ائله ماراقلا دانیشیرسینیز کی، آدام اؤزونو طبیعتین بیربیریندن گؤزل گوشه‌لرینده حیس ائدیر. آمما دئیه‌نده کی خسته‌خانادان چیخاندان سونرا یئنه همین یئرلره گئتمک ایسته‌ییرسینیز، تعجوبلندیم.
-- بورادا تعجوبلو نه وار کی؟!
-- اصلینه قالسا هئچ نه! آدام داها چوخ گزمک، گؤرمک، گوزللیکدن ذوق آلماق ایسته‌ییر. ایللاه دا صنعت آدامی. شاعیر. سیزین کیمی طبیعت، گؤزللیک وورغونو اولان. آنجاق...- او بارماقلارینی داراقلاییب آلنینا تؤکولن گوموشو بیاض ساچینی یاتیمینا سیغاللادی،- آنجاق سیزه دؤنه- دؤنه دئدیکلریمی هئچ واخت اونوتمایین: نه یاش او یاشدیر، نه ده اوره‌ک او اوره‌ک، ائنیب- قالخان قان تضییقی، دویغولاناراق اسیب- جوشان عصبلرینیز ده همچنین.- پروفسور آنی اولاراق سوسوب سؤزونه داوام ائتدی.- ائله بیلمه‌یین کی، سیزینله سَرت دانیشیرام. خئیر، اولانی دئییرم. بو منیم طبیب کیمی بورجومدور.

البته باشا دوشورم سیزی، اؤزونوزو قوش کیمی یونگول حیس ائدیرسینیز، آمما- اونون اوزو خوش تبسسومله ایشیقلاندی، ارکله، آمما اوچماق اولماز قوش کیمی. ساده جه یئریمک گرک دیر. اؤزو ده آستا- نارین آددیملارلا، تلسمه‌دن. داها جاوان یازارلارا قوشولوب داغلارا دیرمانماق، نفسی تنگیدن اوزاق یوللار یورغونو اولماق، مجلس‌لرده قدحلری جینگیلده‌دیب ساغلاملیغی ایتیرمک سیزه یاراماز. مصلحت گؤرورم، حیات طرزینیزی یاشینیزا، صحتینیزه اویغونلاشدیرین. مومکون قدر یاخین یئرلره، تدبیرلره گئدین.
پروفسورا دیققتله قولاق آسان شاعیر آرتیردی: -- سؤزونوزون قوووتی، بورایا خسته‌خانایا ان یاخین یئر ناتوان کلوبودور. اجازه وئرسه‌یدینیز گئدیب قلم دوستومون یوبلئی تدبیرینده اشتراک ائدردیم.
او، اؤزونه مخصوص تمکین‌له دئدی:
- سیز تامام ساغالمامیسینیز هله. گوندوزلر احوالینیز یاخشیلاشسا دا، گئجه‌لر آغریلارینیز اولور. گرک معالجه‌نیزی باشا چاتدیراق.
شاعیر فیکیرلی حالدا اعتراف ائتدی:
- دوغرودور، یاخشی یاتا بیلمیرم، گئجه‌لر آغریلاریم تزه‌دن باشلاییر ائله‌ بیل.
پروفسور اونو محرم نظرلرله سوزوب:
- سیز اولدوقجا دویغولو، طبیعتن ناراحات آدامسینیز-- دئدی- هر شئیی اوره‌یینیزه سالیب، ایچینیزده اؤزونوزو قیناییب، دانلاییرسینیز: نییه خسته‌لندیم، فلان یئره گئده بیلمه‌دیم، سؤزومو دئمه‌دیم، ایشیم تؤکولوب قالدی.
-- سوال دولو گوزلرینی شاعیره تیکدی.-- مگر بئله دئییل؟
شاعیر سوچلو- سوچلو باشینی ترپتدی:
- ائله‌دیر، اوره‌ییمی اوخویورسونوز ائله بیل.
- خواهیش ائدیرم اؤزونوزو اَله آلین، صبرلی، حووصله‌لی اولون. سیزی امین ائدیرم اوره‌یینیز کیمی عصبلرینیزین ده معالجه‌سی اؤز نتیجه‌سینی وئره‌جک. تامام ساغالاجاقسینیز و...- یاری زارافات، یاری گئرچک- و ایلهام پریسی یئنه یازیب- یاراتماغا روحلاندیراجاق سیزی! -- دئدی.
***
پروفسورون سؤیله‌دییی کیمی ده اولدو. شاعیر ساغالیب ائوینه گلدی. گئجه آغریلاری داها اونو ناراحات ائتمیردی. راحات یاتیردی. بیر گئجه یوخوسوندا سمانین انگین‌لیینده قوش کیمی سوزن بیاض بیر گوزل گؤردو. گؤزلری قاماشدی، غفلتن یوخودان آییلیب غیر ارادی یوخارییا بویلاندی. " دییه‌سن یوخودا گؤردویوم ایلهام پریسی ایدی"، فیکریندن کئچیردی، شاعیر دوستو ایله صحبتینی خاطیرلادی.

400 views01:18