ادبیات سئونلر

-- کئچ ائیلش!
میر جلال معللیمین الینی تورانه‌نین چیینیندن چکمه‌سی ایله زنگین وورولماسی اوست- اوسته دوشدو. سئوینجدن گؤزلریم یاشاردی. تورانه سئوینج دولو باخیشلارلا دوز گؤزومون ایچینه باخا- باخا گلیب چانتاسینی ییغدی و "هله‌لیک" دئدی. نه فیکیرلشدی سه:
-- بیز بیرآزدان کیتابخانایا گئده‌جه‌ییک. سن ده گئتمک ایستردین می؟ -- دییه علاوه ائتدی، بو آرتیق چاغیریش، دعوت ایدی، جاواب وئرملی ایدیم.
-- عوذورلو حساب ائدین. بو گون چوخ واجیب ایشیم وار.-- اوزونه باخمادان پیچیلدادیم.-- باشقا واخت گئده‌رم سیز گئدین.
تورانه داها هئچ بیر سوز دئمه‌ییب گئتدی. گویا نه ایسه یازدیغیمی بهانه ائدیب هامینین چیخیب گئتمه‌یینی گوزله‌ییردیم. بیردن میر جلال معللیمین یانیمدا ائیلشدیینی گوردوم. او هئچ واخت طلبه‌لردن قاباق صینیفی ترک ائتمزدی. همیشه زنگ وورولاندا ایش دفترینده نه ایسه قئیدلر آپارار، طلبه‌لر چیخاندان سونرا چانتاسینی گؤتوروب گئدردی. ائله من ده هامیدان سونرایا قالماق فندینی اوندان اؤیرنمیشدیم.
-- سن هئچ کیتابخانایا گئتمیرسن آذر؟ قفیل سؤال منی فیکیردن آییردی، ائله بیلدیم کی، تورانه دئیه‌نده او دا ائشیدیب.
-- هردن گئدیرم.-- تلسیک جاواب وئردیم.
-- اورا تک گئتمک لازیم دئییل.
قوروپ قیزلاریندان دا آپارماق لازیمدیر کی، اونلار دا کیتابخانادان فایدالانا بیلسین‌لر. یاخشی، سیز اوغلانلار آپارمیرسینیز، قیزلار دا تک گئتمه‌یه چکینیرلر. بئله اولماز آخی...
میر جلال معللیمین صؤحبتی خوشوما گلدی.
-- آذر، سن نییه تیمساح دریلی آیاق قابی آلیب گئیمیرسن؟ خوشون گلمیر؟ باخ، قوروپدا سندن باشقا، اوغلانلارین هامیسی آلیب گئییب.
سیخیلدیغیمدان بیلمه‌دیم نه دئییم. آیاغیمی آیاغیما سیخدیم کی، میر جلال معللیم آیاق قابیمین جیریلدیغینی گؤرمه‌سین. او ایسه دییه‌سن گؤرموشدو.
ائله بونا گؤره ده منی قاباغا درس دانیشماغا چیخارتمامیشدی.‌ تعججوب ایچینده‌یدیم، او بونو نئجه گؤره بیلردی؟
-- یقین کنددن هله پول گؤندرمه‌ییب لر. تقاعودونو ده کیتاب- دفتره خرجله‌میسن؟
-بلی
-- عیبی یوخدور. بیرینجی کورسدا بئله سیخینتیلار اولور، سونرا یولونا دوشه‌جک.
میر جلال معللیم الینی سول جیبیمه سالدی.
-- اوغلوم آذر، هامینیز منه دوغماسینیز. سیخیلما، بوردان چیخان کیمی گئت، اؤزونه تیمساح دریلی آیاق قابی آل. درسده هئچ کیمدن گئریده قالمادیغین کیمی، گئییمده ده قالما.
او بونو ائله ائتدی کی، کاریخیب قالدیم.
" ساغ اول" دا دییه بیلمه‌دیم.
اوچماغا قانادیم یوخ ایدی. ائرته‌سی گون عادتیم اوزه‌ره صینیفه هامیدان تئز گلسم ده، کئچیب یئریمده اوتورمامیشدیم، اورتادا وار- گَل ائدیب، گلن‌لره حال- احوال توتوردوم. منه ائله گلیردی کی اوتاغی ایشیقلاندیران لامپا دئییل، تیمساح دریلی آیاق قابیمین پاریلتیسی دیر.
بیردن تورانه‌ قاپیدا گؤروندو، آز قالدیم کی، قاباغینا یویوروم.
سالاملاشان کیمی آستادان سوروشدوم:
-- دونن کیتابخانایا گئتدینیز؟
-- یوخ، آذر-- دئدی.-- قیزلار گئتدی، من ده گئده بیلمه‌دیم. بو گون گئتمک ایسته‌ییرم.
-- ایسته‌سن بیرلیکده گئده‌ریک.
-- هه...
سئوینجدن تورانه‌نین گؤزلری پاریلدادی.
هر ایکیمیز کئچیب یئریمیزده ائیلشدیک.

https://t.me/Adabiyyatsevanlar‌‌

376 views02:09