ادبیات سئونلر

اوشاق ادبیاتی

آذربایجان افسانه لری
سؤیله ین:«صمد بهرنگی - بهروز دهقانی»
چئویرن:«منیژه جم‌نژاد»

نخودی

👶🏻 گو٘نلرین بیر گو٘نونده بیر ار آرواد واریدی، اوشاقلاری اولموردو. داوا درمان دا کار کسمه دی. فال چی دا، کتاب دا، جادی جنبل ده بیر ایش گؤره بیلمه دی. بیر گو٘ن بیر درویش قاپیا گلدی، بیر شعر اوخودو. خانم چیخدی درویشی یولا سالا. درویش گؤردو بونون او٘ره یی دولودو. دئدی: باجی، نیه بئله توتقون سان؟ خانیم بیر آه چکیب دئدی: آللاه دان گیزلین دئییل، سندن نه گیزلین. هر نه ائدیرم اوشاغیم اولمور. درویش دئدی: بیر سؤز دئییل. بیر آووج نخود ایسلات، گئجه قوی باشیوین آلتینا. سحر گؤره سن نخودلار اوشاق اولوبلار. خانیم درویشی یولا سالیب قاییتدی. بیر کاسا نخود ایسلادیب باشینین آلتینا قویوب یاتدی. سحر یوخودان دوراندا گؤردو دؤره سینده یوزلر نارین اوشاق آتیلیب دو٘شورلر . بیری دئییر آنا منه باشماق آل. اوبیری دئییر آنا منه پالتار آل. خانیم بو دورومو گؤردو دئدی: بیز اوشاغین خئیریندن کئچدیک. گئدیب تندیری یاندیردی، نخودلارین هامیسینی سو٘پوروب تندیره تؤکدو. آما نخودلارین بیری بیر یئرده گیزلنیب، یانمادی. گو٘ن اورتا اولدو. خانیم آغاسینا ناهار پیشیریب، دئدی: کئشگه نخودلارین هامیسینی تندیره توکمه سئیدیم. ایندی بونو کیم آپارسین کیشیمه؟ نخودی چیخیب دئدی: ننه جان، او٘زولمه. آتامین ناهارین وئر من آپاریم. نخودی نین آناسی چوخ سئویندی. دستمالی ائششه‌یین بئلینه باغلییب، نخودی نی گؤتوروب قویدو اؤستونه. نخودی تئز آتیلیب ائششه یین قولاغیندا باغداش قوروب اوتوردو. ائششه یی سو٘روب گئتدی. کیشی اکینی خیش لاییردی، گؤردو بیر اییه سیز ائششک گیردی اکینه. اویان بویانا باخدی، کیمسه یی گؤرمه دی. قیشقیر باغیر سالدی، ائششک بیر زاد آنلامیردی. دو٘ز گلیردی اونا ساری. کیشی ال آغاجین گؤتوردو ائششه یی قووسون دئیه، نخودی آتیلیب آشاغا ائندی. دوردو آتاسینین قاباغیندا دئدی: آتا سنه ناهار گتیرمیشم. کیشی بیر اوغلو اولدوغونا چوخ سئویندی. نخودی دئدی: آتا جان، سن ناهاریوی یئ، من گئدیرم پادشاهدان سنین طلبیوی آلام. کیشی چوخ دئدی: گئتمه، پادشاهین منه بورجو یوخدو، نخودی سایمادی. دئدی: سن بئله شئیلری بیلمز سن آتا، من اؤزوم بیلیرم پادشاهین سنه نه قدر بورجو وار. ایشین اولماسین اؤزوم گئدیب طلبیوی آلارام. نخودی پادشاهین یانینا گئدیب، دئدی: پادشاه منیم آتاما بیر بیستی بورجلوسان، تئز اول وئر. پادشاه غلامینا دئدی: بیر بیستی وئرین بونا گئتسین. آما اؤنونه هر نه قدر پول تؤکدولر دئدی: بولارین هئچ بیری منیم آتامین بیستیسی دئییل. من اونون اؤز بیستی‌سین ایستیرم. سونوندا پادشاه سینیر له نیب دئدی: آپارین بونو سو آنبارینا سالین، خفه لنسین. قول لار تؤکولدولر باشینا، آپاریب سالدیلار سو آنبارینا. نخودی سویا دو٘شدوکده اوجادان دئدی: چک، چک، سولاری ایچری چک! سولارین هامیسینی ایچینه چکدی، چیخیب گئنه گئتدی پادشاهین یانینا. پادشاه تازا جا نفس آلیردی نخودی نین شرریندن بتر قورتولدوق دئیه، بیردن نخودی شیشیک قارنی له قاباغیندا ظاهر اولوب دئدی: تئز اول آتامین بیستی سینی وئر. پادشاه لاپ سینیر لنیب، چیغیردی: آپارین سالین تندیره، یانیب کو٘ل اولسون. قول لار نخودی نی آپاریب تندیره سالدیلار. نخودی تندیره دو٘شونجه اوجا دان دئدی: تؤک، تؤک، سولاری ائشیه توک! بیردن بیره سولارین هامیسی تندیره تؤکولوب اودو سؤندوردو. نخودی آتیلیب ائشیه چیخدی. پادشاهین یانینا گئدیب دئدی: تئز اول آتامین بیستی سینی وئر. پادشاه گؤردو بو بیر بارماق اوشاق ایله باشارا بیلمه یه جک، دئدی: آپارین اؤتورون خزانه یه، اؤزو دده سی نین بیستی سینی تاپسین، ایتیلیب گئتسین. قول لار نخودی نی آپاریب خزانه یه اؤتوردولر. نخودی نین آیاغی خزانه یه چاتینجا اوجادان دئدی: یئ، یئ، هامیسنی یئ! نخودی قیزیل لارین، جواهر لرین هامیسینی قارنینا یئر لشدیردی. چیخیب پادشاها دئدی: تاپدیم. ائوه قاییتدی. ننه سی نین او٘ره یی اوندان اؤترو بیر تیکه اولموشدو. ننه سی دئدی: ایندیه جه هاردایدین؟ نخودی دئدی: ایشین اولماسین. تئز گئت اوماج آشی پیشیر. نخودی نین ننه سی بیر قازان اوماج آشی پیشیردی. نخودی باشارینجا یئدی، سونرا قیزیل لارین، جواهر لرین هامیسینی چیخاردی. آناسی هامیسینی ییغیب یودو، بازارا گئدیب سئودیینی آلدی.

سون🌾
https://t.me/Adabiyyatsevanlar