سطیرلنمیش شعرلر
✍:«هدیه شفاقت»
کؤچورن:«سحرخیاوی»
حاضیرلایان:«ادبیات سئونلر»

اؤلوم بئله شئیمیش یقین
حزین- حزین بیر آغی لا، بیر دوعایلا، بیر- ایکی دامجی گؤز یاشی لا، هارداسا ایلیشیب قالان سینیق- سالخاق خاطیره‌لرله یوخا چیخیریق...
هامی ائوینه- ائشییینه تله‌سیر...
بیری آیاق قابیسینی آختاریر، بیری پنجره‌ده کی کؤلگه‌سینده پالتارینین یاخاسینی دوزلدیر، بیری یئریندن ترپنمیر- اونا بیر دفعه ده چای گلیر.
هامینین اؤز درد- سری، ایشی گوجو- وار.
باخیریق، باخیریق، باخیریق....
گوزگونون اوستونه آتیلمیش اؤرتویو خلوتجه آرالاییب اؤزوموزو آختاریریق- گؤرموروک کوسوروک.
سینمیش بوداق اولوروق، یانیب قالمیش بینانین دیواری اولوروق، اوت باسمیش جیغیر، آتیلمیش چؤره‌ک قیرینتیلاری اولوروق- اؤزوموز اولموروق بیر ده.
داغیلیریق، سونرا نه اولورسا آییلیریق
جانیمیزی اورا- بورا ووروروق- یوخوق، داشا- دیوارا ووروروق- یوخوق.
کوچه‌نین اورتاسیندا آداملارین آیاغی آلتیندا ییخیلیریق،
اوستوموزدن آدلاییب کئچیرلر- یوخوق
کیمین‌سه قاباغینی کسیریک- ایچیمیزدن یول سالیب آرالانیر...
بلکه کیمین‌سه الیندن توتوروق- الی اَسیر، مثلن بیر قاب سالیب سیندیریر، او بیری طرفدن کئچمیشده کی دوغما کیمین‌سه سسی گلیر:
- قیریب قورتاردین هر شئیی...
قالدیریب اللریمی بولودلارین بُوزلوغا، ماوی گوزگو قیرینتیلارینا بنزه‌ین
سمانین بوشلوغونا دوغرو،
‌پیچیلداییرام: خوش گلدین...
ائی کونلومون بوداق یئرینده کی چیچک هَوَسی، گوزلریمین او اوزونده کی ایشیق، جیگرلریمین درینلگینده کی قو قوشو سسی- هاردایدین؟...
هاردایدین، فیرتینالی دنیزین پیچیلدادیغی لایلانین گیزلی‌لیگی، اووجلاریمدا کی دوغما توخونوش، اللریمده کی ان یاخین هَنیر؟...
کوسه‌نیر، آغاجلارین دونیاسیزلامیش کؤلگه‌سی
یوخلوغوندا کوسه‌نیر
آمما سن بوردا، باخ ائله بوردا، قلبیمین ان سوکوت دوغولان یئرینده‌یدین...
خوش گلدین...
***

بیر سس کئچیر قلب ائوینین آیناسیندان- کؤلگه کیمی... بیر یئر چوکور اوره‌یه ان یاخین یئردن- تورپاق کیمی. بیر چیغ دوشور گؤیدن یئره، یئردن دیبه. بئله آیریلیق گؤرمه‌ییب هئچ کیم هله- یارادانین اوره‌ییندن قوپماق کیمی...
اوزادیر آللاه الینی، اوره‌یینین پارچاسینا، میلیون ایللیک قلمینه، میلیون ایللیک فیرچاسینا، میلیون ایللیک سوکوتونو یوللاییر یول آختارماغا آختارماغا- ائه...
بیرجه کلمه‌یه سیغیشان ائوینه کیمدیر ییغیشان؟...
گئجه‌نین آغ دونوندادیر
اوتاغیندان چیخان مَلَک،
آیاغینین آلتی بوشلوق، قانادینین اوستو بوشلوق
اووج- اووج بوز سولارین ایچینه قاریشان فلک
هارداسا اوجاق یاندیریر،
نفسینده ایستی بوشلوق...
چئوریلیر بیر ورق داها، اوخونور سون سیرری سؤزون. دوداقلارینین آراسیندان سوزولوب صبره بوکولور. تانری بیلیر، اوره‌ییندن قوپان یئرلر هاردا، هانسی آغیرلارا دؤزور... دؤزور...
او یئره ایشیق گؤندریر، او یئرده‌جه دان سؤکولور...
اوزونه گولومسه‌ییرم یوخویا گئدن آغاجلارین. سون یارپاقلار یوخا چیخیر
سکی‌لردن، سون نارینجی- ساریلیق شکیل‌لردن...
آغیر- آغیر، بوداق- بوداق بوزاریر گؤی اوزو. تورپاق سون ایستی‌لیگینی جانینا چکیر. قوشلار چیرپیر اؤزونو او یووادان بو یووایا.
آغاجلارین هره‌سی اؤز یوواسینی یانینا چکیر....

***
قارانلیق گئجه‌لرده هئچ کیمین گؤرمه‌دیگی یول آچیلیر، هاردان دوشدویو بیلینمه‌ین ایشیقین آلتیندا سولاری پاریلدایان یئرآلتی چایلارا...
چؤللرین قوپ- قورو اوتلارینین خیشیلتیسی آیاق آلتیندا قالیب ازیلیر
سوسورام، کور کیمی، لال کیمی، کار کیمی بوتون هارایلارا...
اوزانیر، نئی سسی ایسته‌ییر دوعالارین پیچیلتیسینا اووجلاریم.
دوداقلاریمین آراسیندا بیر گؤز یاشی یئری وار. چیینلریمین کپه‌نک یوکودور داشیدیغیم جان و بطنیم. یولون اوره‌ک دؤیونتولرینده اؤلو زامانی آدلاییب کئچیرم دیری... دیری...
سئوگی کیمی‌دیر آغیریلار، سئوگی کیمی قفیل و حیرت دوغوروجو.
آزجا شکایت، قاپانمیش گؤز قاپاقلاری آراسیندا یوروجو، واخت اوزانمیش عذاب دقیقه‌لری و نهایت، ایشیق.‌‌ و نهایت نووْبتی سیاحت...
بیر ان قارانلیق گئجه‌لرده
یئرآلتی چایلارین ساحیلینده گؤروشوروک، هره‌میز بیر تایدا...
کیمسه‌نین خبری یوخدور
سولاریندا تانریدان باشقا، هئچ کیمین یویونمادیغی چایدان...
...سونرا قاییدیریق. اوتلار یئنه خیشیلداییر آیاغیمیزی باسدیغیمیز یئرده، چیراقلار یئنه ساریشیر اوزاق شَهَرده.
آداملارین ایچیندن بیر سس گلیب کئچیر، بیر ایشیق گلیب کئچیر یوخوسوندا. هئچ کیم هئچ نه ائشیتمیر بیزیم اوز سسیمیزه قولاق آسدیغیمیز یئرده...
نه سن، نه من، هئچ نه خاطیرلامیریق آییلاندا...

اوزومو گولدورور آخشام...
بو یوخونون او اوزونده قالیب جان...
گونشین پنجره‌مدن کئچیب گئدن سون ایشیقلاری یولون قارشی طرفینده کی مزار داشلارینا چاتیر. مزار داشلاری گونشین سون ایشیقلارینی گؤی اوزونه قایتاریر...
اویناماقلا اویناماماق آراسیندا بیر نازیک خط، گلمک‌له گلمه‌مک آراسیندا سرحد، اولماقلا اولماماق آراسیندا فیکیر...
هاراسا چکیر، هاراسا حک ائدیر تانری آغ- قارا رسملری.
ان یورغون تبسسوملرین یئرینی آغ ساخلاییر
ان چوخ سئون آداملارین آدینی ساغ ساخلاییر، اؤزونو اؤلدورور...

***
بیر باخیشلیق گؤی اوزونده آدسیز قوشلارین اوچوشو بیربیرینه قاریشیر...


آغاجلار اللرینی قوشلارا اوزادیب اوچماغا دارتینیر، قوش قانادلارینین کؤلگه‌سینده ابدی ایشیق سایریشیر...
اوزاقلاشیر دوعالارین پیچیلتیسی،
کوچه‌لرین سسسیزلیگینده...
من اللریمه باخیرام، ایلک دفعه گؤرموش کیمی. کولک بوزلاشان بوداقلاری بیربیرینه دولاشدیریر کندیر هؤرورموش کیمی...
ائنیر آخشاما دوغرو یول آلان شَهَرین اوستونه سوکوتون ان درین، ان دینج، ان یونگول چاغی. قانادلاری قوشلاری یووالاریندان قوپاریب آپاریر قاطار، قاطار، دسته- دسته، آغیر- آغیر...
تَرلی پنجره‌لره زیلله‌ییب گؤزوموزو دایانمیشیق ترپنمه‌دن، دانیشمادان- او و من. آغاجلارین هؤروک بوداقلارینی گؤستریب گولومسه‌ییر... گولومسه‌ییر، بیر بوشلوق چیخیب گئدیر ایچیمدن...
" آمین..."
دوداقلارینین ترپَنیشی سوکوتون قاپالی قاپیسینی آرالاییر آزاجیق. تَرلی پنجره‌لردن دامجیلاییر گؤز یاشی. منی بیرجه آن بئله اونوتماییب ان آیدین گؤرونن یوخوسوندا، چوخ اوزاق بیر مزاردا یاتیر آتامین گولوشو...

***
صاباحین دومانلی قانادلاریندا قیزیل لپه‌لرین کؤلگه‌سی سحر آچیلینجا ایتیب گئده‌جک. کیمسه هئچ نه دوشونمه‌دن گئتدییی یوخودان قاییتمایاجاق- هر شئی بیته‌جک...
بیته‌جک یوللار دا، سئوگی‌لرین ان گؤزلی ده، سئونلر ده چیخیب گئده‌جک‌لر، سئویلن‌لرین اؤزلری ده..‌.
تکجه بو گئجه دومانی قالاجاق سمادان آسیلی.
پنجره‌یه توخوناجاق
بارماقلاری گیزلی- گیزلی، کوسولو- کوسولو.
اَریییب ایتنده یئرینده بیر چیچک رسمی...

سونقار (یئنی یئتمه‌لر اوچون بیر حیکایه)
✍سحرخیاوی

بالاجا کندین تکجه کارخاناسی صوبحدن آخشاما تاراق- توروق ایشله‌ییردی. اونلار قلم استحصال ائدیردیلر. هامیسی بیر رنگده، بیر آربادا. کول رنگی. اوردا طبیعتدن باشقا هر نمنه کول رنگده ایدی.
اونوچون او کندین آدینی "قارا کند" یوخسا "کوللو کند" قویموشدولار.
بو کندین شهرلر ایله او قدر ایلگیسی یوخ ایدی. آداملاری چوخلوق بوتون عؤمورلرینی ائله بالاجا یوردلاریندا یاشاییب اوردا دا اؤلوردولر.
"دانیار" کندلری باره ده چوخ دوشونوردو. آناسیندان حئیرتلندیریجی سورغولار سوروشوردو.
-- آنا نه دن بیزیم کندی، کوللو آدلاییرلار؟!
-- نه دن حیطیمیزده، باغیمیزدا اولان او گؤزللیک، رنگارنگ‌لیک ائولریمیزده یوخدو؟!
-- یوخسا بو قارا دووارلار گؤزللیک‌لرین قاباغینی آلیر؟!
-- نه‌دن ائویمیز، پالتارلاریمیز بو قدر کیفیر و اوره‌ک توتان دیر؟!
آناسی اونا دونوخوب بو سورغولارین هئچ بیریسینه جاواب تاپمیردی. دیلی دولاشارکن:
-- ن....نه بیلیم آخی آی اوغول، آتا- بابالاریمیز دا ائله بوردا بئله یاشاییب، بئله اؤلوبلر. سن ده باشینی آشاغی سال، درسینی اوخو، باشیندان بویوک دانیشما. آتا- بابالاریمیزدان مثل‌دیر " اوزون دیل باشینی بلایه سالار".-- دئدی.
دانیار باشینی آشاغی سالیب دینمه‌دی. آمما پیرتلاشیق فیکیرلر اونو دینج قویموردو. بیر ایش گؤرمه‌لی ایدی.
لاپبادان بیر فیکیر ذهنینی ایشیقلاندیردی.
رسیم دفترینی آچیب کول رنگی قلمی ایله بیر باغچا-باغلی ائو چکدی. سونرا حیطلرینه گئدیب گول- چیچکدن، یارپاقدان اوتاغینا گتیردی. گونشین شعاعلارینی گونه باخان گوللری ایله، گوللری گول یارپاقلاری ایله، آغاجلاری آغاج یارپاقلاری ایله و....‌هر نه‌یی سهمانلا اؤز رنگینده، طبیعتدن ایلهام آلاراق، یاپیشقانلا یاپیشدیریب، اؤزونه رنگلی- بزکلی بیر رسیم حاضیرلادی. رسیمی، ائولرینده کی کول رنگلی خالچایا یوخ، بویالی، اوره‌ک آچان خالچایا بنزه‌ییردی.
رسیمده کی آچیشقالارا کول رنگی پرده‌لر یوخ، گوللو-چیچکلی پرده‌لر آسیلمیشدی. آخی دانیار چکدیگی پرده‌لره ده گول یارپاغی یاپیشدیرمیشدی.
رسیمده کی ائو- ائشیک پار- پار پاریلداییردی.
صاباح اوخولدا رسیمی اؤیرتمنه گوسترنده، اؤیرتمن تعجوبلندی. اونا مرحبا دئییب، اوشاقلارا دفترینی گؤستردی.
-- اوشاقلار سیزده دانیار کیمی بئله گؤزل رسیملر چکین. گؤرورسونوزمی طبیعتدن نه گوزل فایدالانیب؟!
سونرا اؤز- اؤزونه دوشوندو: " ائله بئله اولوب دا بو کندین آداملاری بو قدر یازیق و کول باشلی اولوبلار!! تانینمایان قارا اللر بوتون گوزللیک‌لری بو یازیق کوتله‌دن اسیرگه‌ییب‌لر.
اوشاقلار دا دانیارین رسمینه باخیب، اونون نئجه بئله بیر فیکیر ذهنینه گلمه‌سیندن شاشیردیلارسا دا، اونو آلقیشلادیلار.

گلن دفعه اؤیرتمن کنده گلنده، شهردن اؤزو ایله شاگیردلرین ساییجا بویالی قلم‌لر آلیب گتیردی. هر بسته ییرمی دؤرد رنگ.
اوشاقلار او گوندن بویالی رسیملر چکدیلر. هله یوخولاری دا بوتون رنگلی اولدو. آخی بوندان قاباق کول رنگی یوخولار گؤروردولر. کؤرپه‌لری قارا باسیردی. قاپ- قارا کابوسلو یوخولار گؤررکن قان-تر ایچینده دیکسینیب آغلاشیردیلار. برک- برک آنالارینا ساریلیردیلار.

بو حادیثه کارخانین مودورونه خوش گلمه‌دی. سان کی اونلار آداملاری شاد و خوشبخت گؤره بیلمیردیلر. سئوینجلی اینسانلار گؤزلرینه تیکان باتیریردی.
اودور کی بیر گئجه یاریسی یوک- یاپلارینی کنددن چکیب بیر کره‌لیک باش گؤتوروب قاچدیلار. البته گئتمه‌میشدن قاباق اَجلافلیقلا کارخانانی اودلادیلار.

رنگلر یاواش- یاواش ائو اشیالارینا دا کئچدی. کند اهلی لاپبادان یوخودان آییلان کیمی ائولریندن ایللر قازاماتین توزونو تؤکدولر. ائولرینه دسته- دسته گول- چیچک قویدولار. اونلار بویالارین نه قدر یاشاملاریندا شنلیک یاراتماسینی دوشوندولر. شهردن ائولرینه رنگلی- بزکلی شئیلر آلدیلار.
کند ایشیق- یاراشیق ایچینده پار- پار پاریلداییردی.
اورا داها کوللو کند یوخ، گوللو کند آدلانیردی.
گؤزل بویالار کندین آداملارینین اوره‌یینی آچیب، اوزلرینی شافاخلاندیرمیشدی. قیز- گلین‌لر آل- الوان گئیینیب، بزه‌نیردیلر. هامی اوره‌کدن گولوب، سئوینیردی.

کند اهلی ده یئنی ایلده اونلارا او قدر اوغور و سعادت گتیرن، بویالار کارخاناسینین یئنی دن برپا ائتمه‌سینه فیکیرلشیردیلر. اونلار ییرمی دؤرد رنگده قلم استحصال ائده‌جکدیلر.

صاباح ایل بایرام ایدی. قیشین سون گئجه‌سی دانیارین آناسی اونا بیر آللی- گوللو قارداش دا دونیایه گتیردی.
دانیارین سئوینجی باشیندان آشیب- داشیردی. بو کیچیک اوشاق اونا ان گوزل بایراملیق ایدی. اونون اؤنریسی ایله بالاجا قارداشینین آدینی "سونقار(سون قار) قویدولار. قدملری کندیمیزه، ائلیمیزه اوغورلو، خئییر-برکتلی اولسون دئدیلر. دانیار او آدین معناسینی هامیدان یاخشی دوشونوردو!!

https://t.me/Adabiyyatsevanlar

باغچامیزا_گلدی_باهار

موسیقی :«سعید_روستموف»
سؤز :«ایسلام_صفرلی»
اوخویور:«جابیر_عابدوللایئف»

https://t.me/Adabiyyatsevanlar

اوشاق ادبیاتی

اوشاق ادبیاتی هرهفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

اوشاق ادبیاتی

عبدالله شایق
اوشاق  چؤلده  اوينادي
اويناماقدان   دويمادي
***
بيرده‌ن يومورتا  تاپتدي
تويوغوندو ، او   قاپدي
***
تويوق  دئدي آي  اوشاق
منيم دي  بو ، بوش  بوراق
***
بير گون يومورتا     سينار
جوجه‌م تئز  اوندان چيخار
***
اوندا  جوجه‌مه‌  ده‌ن  وئر
اَزمه ،  اوْنا     آمان    وئر
***
بالامي   سن    قاچيدما
دام - دووارادا   چالما
***
آنا   تويوق   گؤزله‌يير
بالام   يوخدو سؤيله يير
***
بيز  حيوانيق  گوناحيق
محبت له        قالاريق

https://t.me/Adabiyyatsevanlar

اوشاق ادبیاتی

آذربایجان افسانه لری
سؤیله ین:«صمد بهرنگی - بهروز دهقانی»
چئویرن:«منیژه جم‌نژاد»

نخودی

👶🏻 گو٘نلرین بیر گو٘نونده بیر ار آرواد واریدی، اوشاقلاری اولموردو. داوا درمان دا کار کسمه دی. فال چی دا، کتاب دا، جادی جنبل ده بیر ایش گؤره بیلمه دی. بیر گو٘ن بیر درویش قاپیا گلدی، بیر شعر اوخودو. خانم چیخدی درویشی یولا سالا. درویش گؤردو بونون او٘ره یی دولودو. دئدی: باجی، نیه بئله توتقون سان؟ خانیم بیر آه چکیب دئدی: آللاه دان گیزلین دئییل، سندن نه گیزلین. هر نه ائدیرم اوشاغیم اولمور. درویش دئدی: بیر سؤز دئییل. بیر آووج نخود ایسلات، گئجه قوی باشیوین آلتینا. سحر گؤره سن نخودلار اوشاق اولوبلار. خانیم درویشی یولا سالیب قاییتدی.
بویازینین آردینی ادبیات سئونلر کانالیندا اوخویون.

https://t.me/Adabiyyatsevanlar

اوشاق ادبیاتی

آذربایجان افسانه لری
سؤیله ین:«صمد بهرنگی - بهروز دهقانی»
چئویرن:«منیژه جم‌نژاد»

نخودی

👶🏻 گو٘نلرین بیر گو٘نونده بیر ار آرواد واریدی، اوشاقلاری اولموردو. داوا درمان دا کار کسمه دی. فال چی دا، کتاب دا، جادی جنبل ده بیر ایش گؤره بیلمه دی. بیر گو٘ن بیر درویش قاپیا گلدی، بیر شعر اوخودو. خانم چیخدی درویشی یولا سالا. درویش گؤردو بونون او٘ره یی دولودو. دئدی: باجی، نیه بئله توتقون سان؟ خانیم بیر آه چکیب دئدی: آللاه دان گیزلین دئییل، سندن نه گیزلین. هر نه ائدیرم اوشاغیم اولمور. درویش دئدی: بیر سؤز دئییل. بیر آووج نخود ایسلات، گئجه قوی باشیوین آلتینا. سحر گؤره سن نخودلار اوشاق اولوبلار. خانیم درویشی یولا سالیب قاییتدی. بیر کاسا نخود ایسلادیب باشینین آلتینا قویوب یاتدی. سحر یوخودان دوراندا گؤردو دؤره سینده یوزلر نارین اوشاق آتیلیب دو٘شورلر . بیری دئییر آنا منه باشماق آل. اوبیری دئییر آنا منه پالتار آل. خانیم بو دورومو گؤردو دئدی: بیز اوشاغین خئیریندن کئچدیک. گئدیب تندیری یاندیردی، نخودلارین هامیسینی سو٘پوروب تندیره تؤکدو. آما نخودلارین بیری بیر یئرده گیزلنیب، یانمادی. گو٘ن اورتا اولدو. خانیم آغاسینا ناهار پیشیریب، دئدی: کئشگه نخودلارین هامیسینی تندیره توکمه سئیدیم. ایندی بونو کیم آپارسین کیشیمه؟ نخودی چیخیب دئدی: ننه جان، او٘زولمه. آتامین ناهارین وئر من آپاریم. نخودی نین آناسی چوخ سئویندی. دستمالی ائششه‌یین بئلینه باغلییب، نخودی نی گؤتوروب قویدو اؤستونه. نخودی تئز آتیلیب ائششه یین قولاغیندا باغداش قوروب اوتوردو. ائششه یی سو٘روب گئتدی. کیشی اکینی خیش لاییردی، گؤردو بیر اییه سیز ائششک گیردی اکینه. اویان بویانا باخدی، کیمسه یی گؤرمه دی. قیشقیر باغیر سالدی، ائششک بیر زاد آنلامیردی. دو٘ز گلیردی اونا ساری. کیشی ال آغاجین گؤتوردو ائششه یی قووسون دئیه، نخودی آتیلیب آشاغا ائندی. دوردو آتاسینین قاباغیندا دئدی: آتا سنه ناهار گتیرمیشم. کیشی بیر اوغلو اولدوغونا چوخ سئویندی. نخودی دئدی: آتا جان، سن ناهاریوی یئ، من گئدیرم پادشاهدان سنین طلبیوی آلام. کیشی چوخ دئدی: گئتمه، پادشاهین منه بورجو یوخدو، نخودی سایمادی. دئدی: سن بئله شئیلری بیلمز سن آتا، من اؤزوم بیلیرم پادشاهین سنه نه قدر بورجو وار. ایشین اولماسین اؤزوم گئدیب طلبیوی آلارام. نخودی پادشاهین یانینا گئدیب، دئدی: پادشاه منیم آتاما بیر بیستی بورجلوسان، تئز اول وئر. پادشاه غلامینا دئدی: بیر بیستی وئرین بونا گئتسین. آما اؤنونه هر نه قدر پول تؤکدولر دئدی: بولارین هئچ بیری منیم آتامین بیستیسی دئییل. من اونون اؤز بیستی‌سین ایستیرم. سونوندا پادشاه سینیر له نیب دئدی: آپارین بونو سو آنبارینا سالین، خفه لنسین. قول لار تؤکولدولر باشینا، آپاریب سالدیلار سو آنبارینا. نخودی سویا دو٘شدوکده اوجادان دئدی: چک، چک، سولاری ایچری چک! سولارین هامیسینی ایچینه چکدی، چیخیب گئنه گئتدی پادشاهین یانینا. پادشاه تازا جا نفس آلیردی نخودی نین شرریندن بتر قورتولدوق دئیه، بیردن نخودی شیشیک قارنی له قاباغیندا ظاهر اولوب دئدی: تئز اول آتامین بیستی سینی وئر. پادشاه لاپ سینیر لنیب، چیغیردی: آپارین سالین تندیره، یانیب کو٘ل اولسون. قول لار نخودی نی آپاریب تندیره سالدیلار. نخودی تندیره دو٘شونجه اوجا دان دئدی: تؤک، تؤک، سولاری ائشیه توک! بیردن بیره سولارین هامیسی تندیره تؤکولوب اودو سؤندوردو. نخودی آتیلیب ائشیه چیخدی. پادشاهین یانینا گئدیب دئدی: تئز اول آتامین بیستی سینی وئر. پادشاه گؤردو بو بیر بارماق اوشاق ایله باشارا بیلمه یه جک، دئدی: آپارین اؤتورون خزانه یه، اؤزو دده سی نین بیستی سینی تاپسین، ایتیلیب گئتسین. قول لار نخودی نی آپاریب خزانه یه اؤتوردولر. نخودی نین آیاغی خزانه یه چاتینجا اوجادان دئدی: یئ، یئ، هامیسنی یئ! نخودی قیزیل لارین، جواهر لرین هامیسینی قارنینا یئر لشدیردی. چیخیب پادشاها دئدی: تاپدیم. ائوه قاییتدی. ننه سی نین او٘ره یی اوندان اؤترو بیر تیکه اولموشدو. ننه سی دئدی: ایندیه جه هاردایدین؟ نخودی دئدی: ایشین اولماسین. تئز گئت اوماج آشی پیشیر. نخودی نین ننه سی بیر قازان اوماج آشی پیشیردی. نخودی باشارینجا یئدی، سونرا قیزیل لارین، جواهر لرین هامیسینی چیخاردی. آناسی هامیسینی ییغیب یودو، بازارا گئدیب سئودیینی آلدی.

سون🌾
https://t.me/Adabiyyatsevanlar

اوشاق ادبیاتی
باخین بو اوشاقلارین چیخارینا گورسن بیر کس واربولاری تاپا بولارین اوستونده گله جه یه سرمایا قویا؟

https://t.me/Adabiyyatsevanlar

اوشاق ادبیاتی
  «علعسگر علی اوغلو»

«آناسی یانیندادیر»
 
ملک سسله نیر: "مه... مه!.."،
سوسور، مله‌میر قوزو.
قوزونون بو سوسماغی،
برک حیرصله‌ندیریر قیزی:
دئییر:
- بابا، بو قوزو
سؤزه عمل ائله‌میر
نه قدر سسله‌نیرم،
مله‌میر کی مله‌میر،
بابا گولومسه‌یه‌رک،
جاواب وئریر:
- قاداسی،
قوزو نیه مله‌سین،
یانیندادیر آناسی!

https://t.me/Adabiyyatsevanlar

اوشاق ادبیاتی
«کارتون»
آریلارین غضبی

اوشاق ادبیاتی هرهفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

اوشاق ادبیاتی
حیوان تانیتیمی

حشره غول‌پیکر مالزیایی کاتیدید

این حشره وحشتناک به این شکل است که طول آن 25 سانتی‌متر است و صدای آزاردهنده‌ای از پشت خود ایجاد می کند و بسیار بداخلاق و زشت به نظر می‌رسد.

‌‌‌‌‌‌‌‌‌‌‌‌‌‎‌‌‌‎‌‌‌‌‎‌‌‌‌‌‌‌‌‌‌‌‌‌‌‌‌https://t.me/Adabiyyatsevanlar

آداغلار، آداغلار سنده نه لر وار...
شعیر:«ممد آراز»
اوخویور:«عاشیق محبوب خلیلی»

https://t.me/Adabiyyatsevanlar

ژانر داخیلی پروسئسلر: قیسا-حئکایه‌لر 
یازار:« جاوانشیر یوسیفلی»
کوچورن:«ویدا حشمتی»
حاضیرلایان:« ادبیات سئونلر»

هر بیر ژانر اوچون بئله دئیک، گؤزه آلدیغی، آنجاق توتا بیلمه‌دییی، فتح ائتمک مقامینی گؤزله‌دییی ساحه‌‌لر، اراضی‌لر وار. حئکایه‌ ژانریندا و عوموما بوتون پروزا ژانرلاریندا بو پروسئس قارشیسی آلینمادان گئدیر. بئله کی، همیشه متنی اوخودوغوموز یاخود دونیانین مختلف نقطه‌‌لرینده متنین قورولدوغو بوتون مقاملاردا بو تهلوکه‌‌ سوووشمور، آنجاق باش وئرمه‌یی گؤزله‌نیلیر. اوتوردوغون یئرده اوزاق دنیزلرین دالغاسی‌نین آیاقلارینا وورماسی حیسّی کیمی‌. ژانرلار همیشه اؤزونه بنزه‌ین یوخ، تام عکسینه، هئچ بنزمه‌ین باشقا ژانرلارین اراضی‌لرینه مئییل ائدر‌. نثرین پوئزییادان، پوئزییانین نثردن اخذ ائتدییی کئیفيّتلر محض بو"ایستیلا ائستئتیکاسینین روحوندان ایرلی گلیر...

بو یازینین آردینی ادبیات سئونلر کانالیندا اوخویون.

https://t.me/Adabiyyatsevanlar

ژانر داخیلی پروسئسلر: قیسا-حئکایه‌لر 
یازار:« جاوانشیر یوسیفلی»
کوچورن:«ویدا حشمتی»
حاضیرلایان:« ادبیات سئونلر»




جاوانشیر یوسیفلی

 
هر بیر ژانر اوچون بئله دئیک، گؤزه آلدیغی، آنجاق توتا بیلمه‌دییی، فتح ائتمک مقامینی گؤزله‌دییی ساحه‌‌لر، اراضی‌لر وار. حئکایه‌ ژانریندا و عوموما بوتون پروزا ژانرلاریندا بو پروسئس قارشیسی آلینمادان گئدیر. بئله کی، همیشه متنی اوخودوغوموز یاخود دونیانین مختلف نقطه‌‌لرینده متنین قورولدوغو بوتون مقاملاردا بو تهلوکه‌‌ سوووشمور، آنجاق باش وئرمه‌یی گؤزله‌نیلیر. اوتوردوغون یئرده اوزاق دنیزلرین دالغاسی‌نین آیاقلارینا وورماسی حیسّی کیمی‌. ژانرلار همیشه اؤزونه بنزه‌ین یوخ، تام عکسینه، هئچ بنزمه‌ین باشقا ژانرلارین اراضی‌لرینه مئییل ائدر‌. نثرین پوئزییادان، پوئزییانین نثردن اخذ ائتدییی کئیفيّتلر محض بو"ایستیلا ائستئتیکاسینین روحوندان ایرلی گلیر( یعنی بیر وار شعر کیمی، مئتافورالارلا یازیلان نثر متنلری پوئتیک-نثر، بیر ده وار پوئزییانین گیزلی ساخلاندیغی، هر آن اوزه چیخا بیله‌جه‌یی نثر متنی بونلار فرقلی آنلاییشلاردیر. بیزیم نثر پراکتیکامیزدا بو ایکینجیسی اؤنه چیخماغا باشلاییب...). بو پروسئسلر باش وئردیکده آغلیمیزا ایلک گلن"ژانرین توکه‌نمه‌سی " حیسّی اولور، بعضا سووئت دؤنه‌میندن بو گونه قدر" ژانرین اؤلومو" ( رومانین سونو، تنقیدین اؤلومو و سایر...) ایله باغلی گئدن صؤحبتلرین مغزی اصلینده ژانر ترانسفورماسییاسی حادثه‌‌سینه عایددیر و یالنیز اونونلا باغلیدیر. هانسی معنادا مسئله‌ بئله دیر کی، ژانرین "آنادان گلمه"
خوصوصيّتلری زامانلا ان مختلف فورمالاردا ديیشیر، ترانسقرئسسییایا(تخلف-عصیان) اوغراییر. یعنی بعضی ائلئمنتلر بیرلشیر بعضیلری، فورمانین داغیلماسی( اؤز دیوارلاری ایچینده پارتلاماسی) اِفکتینی وئریر. زامانلا رومانلا تئاتر، حئکایه‌ ایله پوئزییا آراسیندا بیزیم بیرباشا مشاهده ائده بیلمه‌دیییمیز پروسئسلر گئدیر. ژانر بو پروسئسلرین سونونجوندا همیشه "یوخا" چیخیر و بیر داها، بیر داها گئری قاییدیر، هر ادبی نسل اونون سونسوز ایمکانلاری‌نین بیر قیسمینی کشف ائدیر. ژانر داخیلی ترانسقرئسسییا(خطا-تخلف) و کونفلیکت( تضاد) بو پروسئسی سرعتلندیریر. نه معنادا کونفلیکت؟ بونو ایکی موستویده آنلاماق اولار: بیرینجیسی صرف متن داخیلی کونفلیکتلر بونسوز حئکایه‌، نثر متنی‌نین قورولماسی غیری مومکوندور و ایکی ساحه‌‌ده عیانی‌لشیر. یازیچینین فیکرینده و بیرباشا بدیعی متنده و هر ایکیسینده دییشیکلیکلره اوغراییر. ایکینجی... آیدیندیر کی، ادبی پروسئس آرخیولره(آرشیولر) چکیلدیکده بئله سؤنمور. یادداشی بو گونون یازی مئتودلاریندا گیزلی شکیلده اولسا دا داوام ائدیر. حئکایه‌ده ده بئله‌دیر. یعنی ان معاصیر حئکایه‌ده ( شوبهه سیز کی، اوستا قلمی ایله یازیلمیش!) هانسی یوللا اولور، اولسون، ژانرین عنعنه‌وی یادداش ائلئمنتلری ایله موباریزه گئدیر. بونو یازیچی، یاخود اوخوجو و یا تنقیدچی حیسّ ائله‌مه‌یه بیلر، آنجاق بو پروسئس گئدیر و اساس حادثه‌‌لرین (حئکایه‌نین گله‌جه‌یین ادبی پروسئسینه تأثیری...) باش وئرمه‌سینده موهوم رول اویناییر. یوسیف صمدوغلونون "بایاتی شیراز" "آستانا " اینجه دره سینده یاز چاغی" و سایر حئکایه‌لرینده بو خصوصيّتی اوخوماق مومکوندور، بو حئکایه‌لرده اوخوجونون لذّتله اوخودوغو، بعضا آلتینی جیزدیغی مقاملار محض همین کونفلیکتین نتیجه‌سی اولور، یعنی او گیزلی ساواشدان ساغ چیخماق مسئله‌سی... آنجاق بو ژانرداخیلی ترانسقرئسسییا و کونفلیکت عنعنه‌نین تظاهرلری‌نین سیلینمه‌سینه آدلاری چکیلن اوستادلارین متنلری‌نین گوجونون آزالماسینا ذرّه‌‌ قدر ده تأثیر ائتمیر. مسئله‌ ژانرداخیلی پروسئسلرین"بوتون جبهه بویو" گئتمه‌سینده و هر آن گئنیشلنمه‌سینده‌دیر مؤولود سولئیمانلی‌نین"یئل احمدین بی‌لییی" پووئستینده ایلک سطرلردن باشلامیش سونا قدر نه قدر گؤزل عیبرتلی، پوئتیک سیستمین "دویونلرینی" آچیب بیزه اوخودان مقاملار وار، یاخود اونون" شیطان" "دوزسوزلوق " کیمی متنلرینده... "یئل احمدین بی‌لییی"نده ائکسپوزیسییا حیصّه‌‌سینده تصویر ائدیلن "کپه نک قانادلاری" تکجه مئتافورا دئییل، هم ده نسیمی دیوانیندان گلن ایشاره‌لردیر. سئیمور بایجانین "پوقاچوو عصیانی" یاخود "قاب- قاشیق سسلری" حئکایه‌لری ده بو باخیمدان ماراقلیدیر. بو متنلرده ژانر اؤزونو تام فرقلی سپئکتردن گؤسته‌ریر. حئکایه‌ده لنگ ديیشن فورمال ائلئمنتلرله یاناشی، بایاق دئدیییمیز کیمی اینتئنسیو شکیلده ديیشن "قابیق قویان" جهتلر ده وار. بو آسپئکت سئیمورون حئکایه‌لرینده قاباریقدیر.

1

بئله بیر آیرینتی: بو گون میرزه جلیل یاخود حاق‌وئردییئو و یا یوسیف وزیر چمنزمینلی‌نین حئکایه‌سینی یازماق اونلاری تقلید ائتمک غیری مومکوندور. بو متنلردن یالنیز منبع کیمی "الیفبا" کیتابی کیمی استفاده ائتمک اولار. معاصیر حیکایه‌ اونلارلا مقایسه‌ده یوز دفعه‌لرله لیباسینی ديیشیب، یعنی ژانرداخیلی هیبریدلشمه دقتی ثابت ديیشمه‌ین شئیلره یوخ، دایم ديیشن تظاهرلره یؤنه‌لدیر. هیبریدلشمه ژانرداخیلی پروسئسله‌رین اساس ائلئمنتی‌دیر. بوتون بونلار حئکایه‌نین فورماسینین تمیزلییی و ديیشمزلییینی سوال آلتینا قویور. نثر اثرینده اصلینده مضموندان، ایدئیا موندریجه... بونلاردان داها چوخ فیلولوژی باخیمدان ژانر داخیلی پروسئسلری آییرد ائتمک و محض بو بارده یازماق اساسدیر. دونیادا بیر بیرینه بنزه‌ین نثر متنلری وار، هر حئکایه‌چی معلوم ایدئیا و معنانی بیر شکیلده ديیشیر، ائدقار آلن پو نومونه‌سینی یادا سالین، یاخود مارک توئن. یالنیز پوئتیک مئتافورالاردان هؤرولن متنلر زامانلا چؤکور، همین مئتافورالار عادیلشیر، اساس اولان ترانسقرئسسییا و هیبریدلشمه‌دیر. عنعنه‌یه و گلجیه گؤندریلن مئساژلاردیر.
یاخشی حئکایه‌لر همیشه یا دا اکثر حاللاردا بیزه تانیش اولان بیر احوالاتین هئچ دخلی اولمایان یئریندن باشلاییر چونکی محض بو دخلی اولمایان یئر حئکایه‌ اوستالارینین هئچ نظر سالمادیغی مقامدیر. بو معنادا مئهدی دوستعلیزاده‌نین حئکایه‌سی ده استثنا دئییل. منجه، چوخ یاخشیدیر. بایاق وورغولادیغیم طرزده یول آلان تحکیه‌ده اساس کئیفيّت ائکسپرِسسیولیکدیر. احوالات سانکی جان قورتارماق اوچون نقل ائدیلیر. آمّا بعضی یئرلرده- "نفس دریمینده" آرایا دئتاللار گیریر(موتورلا باغلی:... "لئنینین واختیندان قورباچووا قدر...") و بو تئز-تلسیک سؤیله‌نن نسنه‌لر اینسانلارین دوشونجه طرزینه ایشاره ائدیر. مسئله‌ بئله دیر کی، کئچید مقامیندا ائله اینسانلارین دا داتچیکلری خاراب اولور... حئکایه‌ بونو یاخشی تقدیم ائدیر، چاتدیرا بیلیر. داتچیک مسئله‌سینه بیر آز سونرا قاییداجاغیق.
ایلک قلم تجروبه‌لریندن بیری اولسا دا مئهدی دوستعلیزاده‌نین "موتور سسی " حئکایه‌سینده یئنی و اوریژینال حئکایه‌ تحکیه تیپینین علامتلری  قاباریق شکیلده گؤرونور. حئکایه‌ متنی هر شئیدن، بوتون تفرّوعاتلاردان سیلکینیب اولان، یاخود اولاجاق حادثه‌‌لری "تئز تلسیک" چاتدیران فعللردن عبارتدیر. بدیعی متن ائله بو شکیلده ده قورولور. باخین: "داروازانی دؤیمکدن آز قالا بارماقلاریم قیریلاجاقدی. سس گلمه‌دییینی گؤروب حاصاردان حیه‌طه توللاندیم. قاپینی آچیب ایچری گیردیم، آروادیمی سسله‌دیم. اوتاقلارا بیر-بیر باخدیم، هامیسی بوش ایدی. بیردن موتور سسی‌نین گلدییینی ائشیدیب حیطه چیخدیم. موتور ایشله‌ییردی. تزه دن ائوه گیرنده آروادیمی حامام خالاتیندا گؤردوم. موتورون دوزه‌لدییینی دئییب، قورولانماغا گئتدی. کئچیب بیر قیراقدا اوتوردوم. اگر موتور ایندی ایشله‌ییرسه، بس سحر نییه ایشله‌میردی- سوالینا جاواب آختارماغا باشلادیم. موضوع ایله اوزاقدان-یاخیندان علاقه‌‌م اولمادیغینا گؤره هئچ بیر جاواب تاپا بیلمه‌دیم. ان یاخشیسی ال-اوزومو یویوب، بیر تیکه چؤرک یئمکدیر دئییب، توالئته گئتدیم. کرانتی آچاندا قورولتو سسیندن باشقا هئچ نه گلمدی. علاجسیز قالیب حیه‌طه دوشدوم. هله ائوه یئرله‌شدیرمه‌یه اریندیییم وئشله‌ین ایچیندن بیر-ایکی آچار گؤتوروب موتورو سؤکدوم". حئکایه‌ده ایکی یئرده "قورولتو" سؤزو ایشله‌دیلیر و طنّیمیزجه عبث دئییل بو. هر شئی بوتون جهدلر، حرکتلر، ایللر بویو بؤیویه-بؤیویه ایچینه ییغدیغین انرژی دینامیکا...بوشا گئدیر، کرانتی آچیرسان یالنیزجا قورولتو...
ایکینجی مقامدا، اینسان او قدر بوغازدان یوخاری سؤزلر ذئییر، ان دوغما آداملارینین یانیندا اؤزونو او قدر اؤیور کی، آخیردا ییخیلیر قوسور، اؤیویور و یئنه قورولتو.. "(همین مقاما دقت ائدین: ... رومکانی باشینا چکندن سونرا سوفره‌نین اوستونه قوسدو. قولوندان یاپیشیب اونو توالئته آپاردیم، قاپینی باغلاماماغینی دؤنه-دؤنه تاپشیردیم. بیر آز گؤزله‌یندن سونرا سس چیخمادیغینی گؤروب ایچری گیردیم. قایین‌آتام توالئتین هر طرفینه قوسموش، اؤزو ده یئرده اوزانمیشدی. سویو آچیب اونون اوست-باشینی تمیزله‌مک ایسته‌ینده قورولتو سسیندن باشقا هئچ نه گلمه‌دی. گئدیب وضعيّتی آروادیمین قولاغینا پیچیلدادیم، او ایسه سسینی باشینا آتیب توالئته یویوردو. قولوندان توتوب اونو ساکیتله‌شدیرمک ایسته‌ینده بؤیوک قاینیم سوفره ده‌کی بیچاغی گؤتوروب اوستومه جومدو، قایینانام آرایا گیردی)".


2

حئکایه‌ده بیر طرفدن حادثه‌‌نی کسکین ماکسیموم اکسپرئسسیولیکله ایفاده ائتمک، اینسانلا گؤز-گؤزه دوروب اونون اوز جیزگیسیندن توتموش، هانسیسا سیتاتلاردا یئر آلمایاجاق خصوصيّتلرینی ان یاخین مسافه‌دن ائکراندا ایشیقلاندیرماق پلانی، دیگر طرفدن، بو قدر قیسا، سانکی بیر آن ایچینده نقل ائدیلن حادثه‌‌یه کناردان تاماشا ائتمک اؤزه‌للییی وار.
موتور سسی بو حادثه‌‌ و اونلارلا باغلی دوشونجه‌لرین سیراسینین پوزولماسی اولوب، بیتمیش احوالاتلارین یئنیدن باشلانماسی و موتورون سسینین کسیلمه‌سی‌یله دایانماسی آنلامینا گلیر.
مشهور حئکایه‌ آراشدیریجیلاریندان بیری‌نین یازدیغی کیمی قیسا حئکایه‌ده فانتازییانین یاییلماسی یوخ، بیر نقطه‌‌یه فوکوسلانماغی اساسدیر. سوژئت داخیله ایچه یؤنه‌لیکدیر، یعنی سوژئت بیر قاپالی چئوره ایچینده‌دیر. بئله‌ده آدی سؤزلردن ییغیلان جومله‌‌لر آدی معیشت صحنه‌‌لرینی عکس ائتدیرن فرازالار همین مولیفین فیکرینجه، معنالارین گوجلنمه‌سینی شرطله‌ندیریر. یعنی بو قیسا خبر جومله‌‌لری دالغالار کیمی بیر-بیرینی وورور و نتیجه‌ده مولیف قاورادیغی درینلییینی بیلدییی معنانی هم وار گوجویله ایفاده ائدیر، هم ده اونون وئکتورونو ديیشدیرمک فیکرینه دوشور( باجاریرمی؟ -بو باشقا مسئله‌دیر...). مئهدی‌نین حئکایه‌سینده تحکیه‌نین یورودویو اراضی کیچیک، آمّا نئجه دئیرلر، ائلاستیکدیر( یوخاریدا دئدیییمیز کیمی، سو هر یئری باسا بیلر و بو قفیل حادثه‌‌ دونیانی ديَیشدیرر...)، سوژئتله باغلی قاپالی چئوره‌نین دیوارلاری ایله محدودلاشیر و گئری دؤنوب یولو تکرار قطع ائدیر. داخیله یؤنه‌لیک سوژئت تیپینده همین فانتازییا گوجو حئکایه‌نین هانسیسا اساس معنا و وورغولاریندان بیرینی قاباردیر، همین وورغو حئکایه‌ده بیر یئرده، مثلا، داتچیک سؤزو "چؤله آتیلیر" همین سوژئت چئوره‌سی‌نین دیوارلارینا چیرپیلیر. بیر آنلیق حئکایه‌نین و محیطین خاصّه‌سینی بلیرله‌ییر ("قورولتو سؤزوندن باشقا حبکایه‌ده‌کی موهوم اؤنم داشییان بو ایکینجی سؤز قیسا خبر جمله‌‌لرینین معناسینی لاکونیک شکیلده چاتدیریر...). بو ایکی سؤز بیر یئرده بیر جمله‌‌ بیر آبزاس داخیلینده "راستلاشماسالار دا، هر ایکیسی قیسا خبر جمله‌‌لرینین انرژیسی‌نین آیری-آیری متنلره چئوریلمه‌سینی شرطله‌ندیریر.
حئکایه‌ده حادثه‌‌دن حادثه‌‌یه آدلاما، سانکی آیری-آیری مکان و زامانلاردا باش وئرمیش حادثه‌‌لری ایفاده ائدن فراقمئنتلرین ایختیاری شکیلده بیر آرایا گلمسی هارداسا آنئکدوت پوئتیکاسینی خاطیرلادیر، تحکیه‌چی بلکه ده اون ایللر بویو بو پئرسوناژلار آراسیندا باش وئرن حادثه‌‌لری کسیب دوغرامیش، اونلاری داخیله یؤنه‌لیک سوژئتین دار چرچیوه‌سینه مونجر ائتمیشدیر. ایکی بنزرسیز، اؤزو ده یئرله گؤی قدر آرالی و فرقلی پلان وار، سربستلیک تصویرده، ایختیاری‌لیک، دیگر طرفدن، بو سربست‌لییین بوی وئرمه‌ین دیوارلا حاشیه‌لنمه‌سی... نتیجده نه آلینیر؟ حئکایه‌چی بو حادثه‌‌لره، ایختیاری تصویرلره، گوجلو فانتازییایا یول وئرمزدن اؤنجه اونلارین کسیشمه نقطه‌‌لرینده ایشاران معنالاری منیمسه‌میش و حادثه‌‌لرده پئرسوناژلاراراسی کونفلیکتلر ده ساپی قاچمیش، اله گلمه‌ین یایا بنزه‌ییر. یوخاریدا سیتات وئردیییمیز آراشدیرمادا بو آسپئکت(جنبه، وجه، ویژگی، نمود)
حئکایه‌ده معنانین یازیچی حئکایه‌چی ناغیلچی، طرفیندن مکمل شکیلده منیمسه‌نیلمه‌سی( بیزیم فیکریمیزجه ایسه، تحکیه بویو بو معنانین شاخه‌لنمه‌سی و قیسماً یول آیریجلاریندا- همین شاخه‌لرده ديیشمه‌سی معاصر حئکایه‌چیلیکده اساس وئکتورلاردان بیریدیر) اساس خطدیر
معاصر حئکایه‌( قیسا حکایه‌!) ساده لییی ایله بیر طرفدن قدیم ايّاملاردان اینسانلارین ناغیل لطیفه‌‌... سؤیله‌مک احتیراصینی ایفاده ائدیرسه دیگر طرفدن، نثر اراضیسینده گئدن ژانرداخیلی ديیشیکلیکلری عکس ائتدیریر. اساس اولان دا بودور. بو معنادا بیزیم حئکایه‌لریمیز دونیا نثر تجروبه‌سی ایله قوشا آددیملاییر.

https://t.me/Adabiyyatsevanlar

« کریم گل اندام»

آغیر ایش!
 
دولانماقدادیر
بوستلجم توتموش دونیا!
بیر –بیرینه یاخین داملاری ،
بیر-بیریندن اوزاق آداملاری !
و اوره ک بولاندیریجی ایلهاملاری ایله!

شاعیر اولماق نئجه ده آسان!
بو بوش بوغازلیق،ساییل-باییلدان
اینسانلیق اوره یی بولانماقدادیر !

نه اوم نه کوس !
اونوتقانلیق اپیدیمی اولان هر  یئرده
بئله دیر اولای:
دنیزده قاتیق چالماق
خاطیره لرده قالماقدا
داها چوخ قولای!

https://t.me/Adabiyyatsevanlar

1.mp3

https://t.me/Adabiyyatsevanlar

مجازی انجمن " سسلی شعیر گئجه سی "

سایین کانالداشلار
شنبه گئجه: 1401/2/3
ساعات : 21/30
ادبیات سئونلر قوروپوندا مجازی انجمن ( سسلی شعیر گئجه سی) اولاجاق بو وئرلیش عینی زاماندا ادبیات سئونلر کانالیندان یایلاجاق سئویملی شاعیرلری ، گوزل سسلی دیکلاماتورلاری آذربایجان شعیرینین هوسکارلارین سیجاق قاتیلماغا دعوت ائدیریک .

https://t.me/Adabiyyatsevanlar

قزئت احوالاتی
طنز:«بویوک آغا افندی»
هرهفته جمعه گئجه ساعات 21/30
ادبیات سئونلر کانالیندا

https://t.me/Adabiyyatsevanlar