ادبیات سئونلر

- منی بتر شرمنده ائله‌ییبسیز. من دای اؤلونجه سیزین اوزوزه باخا بیلمه‌رم. کیشی! آخی بوردا ات تاپیلمیردی، سن آلله بولار نه ایشدی گؤروبسن؟
خلاصه، شامی یئدیک. من بتر یورقون ایدیم. بیر دوش توتوب، باشیمی یئره قویمامیش یوخو آپاردی. سحر تئزدن ائودن بتر تاق- توق سسی گلیردی. دوردوم گئده‌م توالته، اوتاقدان چیخاندا «مئشه اکبر»له قارشیلاشدیم. منی گؤرجک باشلادی آغلاماغا. الین بوینوما سالیب، دئدی:
- وآللاه من دای اؤلونجه سنین اوزووه باخا بیلمییه‌جم. سحر، ساعات بئش‌ده شمالدان قاینآنام زنگ ائله‌میشدی. ائله‌بیل حاج‌آغا برک ناخوشدو. بیزگئتمک مجبوریتینده‌ییک. من اؤلوم، سنی جددین، سیز اؤز ائویزکیمی قالین، یئیین، ایچین، دولانین. بیز ده سیزدهه‌جه هاردان اولسا قاییداریق.
«مئشه اکبر»ین گؤز یاشلاری آمان وئرمیردی. هؤنکور - هؤنکور آغلایا-آغلایا دئدی:
- ائوی ییخیلمیشلار بایرام اوستو ده بیزی بتر الی قولتوق قویدولار. حقوقلاریمیز قالیب سیزده‌دن سورایا. های های‌دا -کئچل توی‌دا. بو احوالدا ماشینیم دا خاراب اولدو. الیمده اولانی دا وئردیم تعمیرگاها. بو وضعیتده هئچ بیلمیرم نجور شمالا گئده‌جه‌ییک!
وار- یوخ دؤرد میلیونوم واریدی. اوچونو قویدوم «مئشه اکبر»ین جیبینه، اولاری یولا سالیب، قاییدیب یاتدیم.
سحر صبحانه‌یه دوراندا، آرواد بیر آز اویان- بویانا باخاندان سونرا دئدی:
- بؤیوک‌آغا، بولارین ائوی موللا گؤتوندن تمیزدی. چیخ بیر آز چؤره‌کدن، پنیردن زاد‌دان آل گتیر، آجیمیزدان اؤلدوک.
دئدیم:
- بابا، بیر ماشین وسیله گتیرمیشیک.
آرواد دئدی:
- سن اؤله‌سن! «مئشه اکبر»ده ائله اونو دئییر. ائو- ائشیگی ائله سیلیب، سوپوروب گئدیبلر، هئچ اوغرو کؤپک‌اوغلو بو پوخو یئیه بیلمزدی. حتتا دونن آلدیغیمیز چؤره‌کلری ده، گئجه‌دن قالان کابابی دا آپاریبلار.
ایندی ایگیرمی ایل او ماجرادان کئچیر. هر ایل بایرام تعطیلینده، «مئشه اکبر»، شاهین‌شهر، اصفهان، هامیسی‌نین آدی بیزیم جانیمیزا تیترتمه سالیر. «مئشه اکبرآغا»دان دا داها بیر خبر یوخدو. ائله بیل، بیزی بایرام تعطیلی سیزده‌جه قوناق ائده‌ن قدیمی و اوشاقلیقدا جان بیر قه‌لیب اولان دوستوم «مئشه اکبرآغا» هئچ اول‌دن یوخ ایمیش.

https://t.me/Adabiyyatsevanlar