چاغداش قادین شعیری
غزل قوشو
«لیلی کحالی»

من او قوشو اؤلدورموشم،
                من او قوشو
دیمدیگینده غزل قوشو
                من او قوشو
باخیشیندا سئوگی قوشو
                من او قوشو...
من او قوشو اؤلدورموشم
سینه­ مده یوواسی واردی
سئوگی یئرینه قان ایچدی
قانادلاری قانا دوشدو
دوشدو قالدی سینه­ م اوسته
ایچیمده­ کی آرزی قوشو
                من اؤلدورموشم
                من او قوشو...

 2.
یاغیش یاغیر
                ساعاتلاردیر
دامجی-دامجی باخیشلارین
                پنجره­ لرده داغیلیر
هرنه خاطیره­ میز واردی
                سئل کوچه­ لردن آپاریر
ائشیکده­ کی چیلغین هاوا
ایچیمده کی دومان آغیر
من آغلیرام
        یاغیش آغلیر
یاغیش یاغیر
                ساعاتلاردیر.

https://t.me/Adabiyyatsevanlar

«هادی قاراچای»

۱٫ گؤرونتو
دنیز دالغالاری‌یلا
آغاج یارپاقلاری‌یلا دانیشیر
من
دیلیمی آغزیمین بوشلوغونا سرمیشم دینجلسین
یالان بازارینا قیز بوراخمیرام.
بو آن قوم دیلینده
بارماقلاریملا دانیشیرام
باخ
اووجومدان سوزولن قومدا سنین آدین وار.

۲٫ گؤزلرین
قاپیلار آچیلاجاق
قاپیلار آچیلاجاق
قاپی باشی بیر مندیل آچیلاجاق گونشدن
اومودو اومسونانلارلا
سئوگینی سئونلرله بؤلوشه‌جه‌ییک
زوغال آغاجلاری قیپ- قیرمیزی
گیله‌نارلار یئتگین
یوسون قوخوسو
آراز
دوم- دورو
و اوچان بوتون قوشلارین قانادیندا سنین آدین
سؤیله
هانسی دنیزده یویونموش سنین گؤزلرین بونجا یاشیل ؟!

https://t.me/Adabiyyatsevanlar

یئراوزونده صولح اولماسا...

https://t.me/Adabiyyatsevanlar

«یونس اورنگ خدیو» بیزدن آیریلدی.

«یونس اورنگ خدیوی‌نین» جنازه‌سی جوما گونو اسفند آیی‌نین ۲۷سی ساعات ۱۰دا تهرانین بهشت زهرا مزارلیغیندا تورپاغا تاپشیریلاجاقدیر.
ادبیات سئونلر بو آجی آیریلیغی «یونس اورنگ خدیو ین» عائله سینه، سئونلرینه باش ساغلیغی وئریر.

https://t.me/Adabiyyatsevanlar

آذربایجانلی یازیچی و آراشدیریجی«یونس اورنگ خدیوی» وفات ائتدی


چوخ تاسفله، آذربایجانلی یازیچی، آراشدیریجی و اجتماعی شخصیت «یونس اورنگ خدیوی» گؤزلنیلمه‌دن جوماآخشامی اسفند آیی‌نین ۲۶نجی گئجه‌سی یاشادیغی تهران شهرینده وفات ائتمیشدیر. آیاغی‌نین سینماسی سببیندن تهرانین «سینا» خسته‌خاناسیندا یئرلشدیریلن یونس اورنگ خدیوی، همن خسته‌خانادا آغ جییار آمبلیاسینا یولوخموش و حیاتینی ایتیرمیشدیر.
«یونس اورنگ خدیوی» ۱۳۳۴نجی ایل تبریز شهرینده دونیایا گؤز آچمیش، گنجلیک و خصوصیله‌ده اؤیرنجی‌لیک زامانیندا اجتماعی مدنی مبارزه‌یه قوشولموشدور. انقلابدان سونرا یارانان سیاسی دوروم آزادلیق و اجتماعی عدالت عشقیله یاشایان گنج یونسی آذربایجان دیلی و ادبیاتی‌نین انکشافی اوغروندا چالیشان درنک‌لر و درگی‌لره جلب ائدیر. او بیر سیرا دیگر آذربایجانلی یولداشلاریلا برابر بو آنا دیللی درگیلرین حاضیرلانیب یاییلماسیندا جدی امکداشلیق ائدیر.
«یونس اورنگ خدیوی»نین آراشدیریجیلیق زمینینده گؤردویو ایش‌لر ایندییه کیمی اونون قلم محصولو اولان اوچ کیتاب شکلینده ایشیق اوزو گؤروبدور. «من مرگ را سرودی کردم»، «دوشنبه سربی» و «مردی با خودنویس قرمز» کیتابلاری یونس اورنگ خدیوی‌نین یاییلمیش تدقیقی اثرلری‌دیر. «من مرگ را سرودی کردم» کیتابی آذربایجانین انقلابچی اوغلو «بهروز دهقانی»نین حیات و یارادیجیلیغیندان سؤز آچیر، «دوشنبه سربی» کیتابی قیرخینجی ایللر انقلابچی گنجلری اؤزونه جلب ائده‌ن یئنی رادیکال سیاسی حرکتین لیدرلریندن اولان «امیر پرویز پویان»ین اثرلری و حیاتی حاقیندادیر و «مردی با خودنویس قرمز» کیتابی ایسه ایندیکی دؤرون دورومونو اؤزونده عکس ائتدیرن خاطره‌لی حئکایه‌لردیر. بو چاپ اولموش کیتابلاردان علاوه اونون انقلابچی شاعر «علیرضا نابدل اوختای» و رئالیست یازیچی «علی اشرف درویشیان» حاقیندا حاضیرلادیغی تدقیقی اثرلرینین یاییلماسینا امکان یارانماییبدیر. کیتابلاریندان علاوه یونس اورنگ خدیوی‌نین بیر سیرا مقاله‌لری‌ده اینترنت صحیفه‌لرینده و مختلف مطبوعات اورگانلاریندا، او جومله‌دن «چیستا» درگیسینده نشر ائدیلمیشدیر.
یونس اورنگ خدیوی‌نین جنازه‌سی جوما گونو اسفند آیی‌نین ۲۷سی ساعات ۱۰دا تهرانین بهشت زهرا مزارلیغیندا تورپاغا تاپشیریلاجاقدیر.
«ایشیق» – آذربایجان ادبیات و اینجه‌صنعت سایتی- امکداشلاری آدیندان آذربایجانلی یازیچی، آراشدیریجی و اجتماعی شخصیت «یونس اورنگ خدیوی»نین آغیر ایتگیسینی اونون حؤرمتلی عائله‌سینه، یولداشلارینا، ائله‌جه‌ده عزیز دوستوموز مسعود اورنگ خدیوی جنابلارینا باش ساغلیغی وئریر، و اونودولماز دوستوموزون شرفلی خاطیره‌سینی عزیزله‌ییریک.
«ایشیق» – آذربایجان ادبیات و اینجه‌صنعت سایتی
۲۷/۱۲/۱۴۰۰


https://t.me/Adabiyyatsevanlar

«ژان_پل_سارتر»

آن لحظه فوق العاده بود. من آنجا بودم، بی حرکت و یخ‌زده، غرقه در جذبه‌ای وحشتناک. ولی، درست در قلب آن جذبه، چیز تازه ای هم اکنون پدیدار شده بود؛ من «تهوع» را می‌فهمیدم، مالکش بودم. حقیقت آن است که من کشفیاتم را برای خودم صورت‌بندی نمی‌کردم. ولی فکر می‌کنم که حالا برایم آسان بود که به قالب کلمات درشان آورم. امر اساسی همان احتمال است. منظورم این است که، بنا به تعریف، وجود ضروری نیست. وجود داشتن به سادگی یعنی «آنجا بودن»؛ موجودات پدیدار می‌شوند، می‌گذارند که با آنها «برخورد کنیم»، ولی هرگز نمی‌توان آنها را «استنتاج کرد»
#تهوع ترجمه#جلال_الدین_اعلم ۱۳۵۵

https://t.me/Adabiyyatsevanlar

«مرجان منافزاده»

اوسگو شهرینین بایرام عنعنه لری

بیلدیینیز کیمی بیزیم ایل آخیریندا دورد چرشنبه میز وار، آنجاق آخیر چرشنبه یا توپراق چرشنبه سی چوخ طنطنه لی قئید اولار.

بایراما ایکی هفته قالان خانیم‌لار بوغدالاری ایسلادیب، جویردردیلر.

توز آلما یا توز توکمک سؤزو اوسگوده حیس آلماق یا حیس توکمک دئییلیر.

خانیم‌لار چالیشاردیلارآخیر چرشنبه‌‌دن قاباق حیس آلما و تمیزلیک ایش‌لرین بیتیرسین‌لر.

منجه بو حیس آلما سؤزو اسگی چاغ‌لاردا ائولری اود ایله ایسیتمک‌له ایلگیلی دیر. ائولرده اود یاناردی و هاوانین سویوق اولدوغو اوچون قاپی پنجره باغلی اولاردی و اودون حیسی، دودو، توستوسو ائوین در، دووارینا، اشیالارینین اوستونه یاتاردی. بایرام یاخینلاشاندا هاوالار بیر آز یوموشالدیقدا خانیم‌لار ائولرین حیسین آلیب، تمیزلیب و بایرامین گلیشین گوزلردیلر.

خانیم‌لار ائولرینه تازا اشیالار آلاردیلار. تاخچاپوش‌لاری، آق پرده‌لری یویوب، نیله سالاردیلار. لازیم اولسایدی یئنی‌لردیلر. تاخچاپوش‌لارین آشاغیسینا گول تیکردیلر.

آخیر چرشنبه گونو صبحانه دن سونرا چرشنبه یئمیشیندن اییب (برکت سیمگه‌سی اولاراق) اوشاق‌لارا خرحلیک (خشلیک) وئرردیلر. هامی تزه پالتار و باشماق‌لارین گئیب ائودن چیخاردی.

اوسگو بازاریندا اینه سالماغا یئر اولمازدی. اوشاق-بؤیوک بازارا گلردیلر.اوشاق‌لار خشلیق‌لاری ایله اویونجاق آلاردیلار. اوغلان‌لار توفنگ، توپ؛ قیزلار ایسه قولچاق .

چرشنبه بازاریندان خانیم‌لارمطلق: آینا، آیدینلیق دیر دئیه، سفره، برکتلی ایل اولسون دئیه، سوپورگه، ایلی باشاباش تمیزلیک اولسون، اوزرلیک، بدنظردن اوزاق قالماق آماجیلا آلاردیلار.

چرشنبه آخشام اود یاندیریب اوستوندن ایکی دفه آتیلاردیلار و آغیرلیغیم بوغورلیغیم بوردا قالسین دئییردیلر.

چرشنبه آخشام نیشانلی قیزلارا کوره‌کن ائویندن خونچا گلردی. خونچا دا  شام یئمه یی، آلما، پرتاغال، شیرنی، یئمیش، بویالی یومورتا، کیم (بوغدا جویه‌رمیشی) بیرده گلین اوچون چئشیلی پالتارلار، باشماق، چادیرا... اولاردی.

او ایلین ایچینده ائوینه گئدن قیزلارا آتاسی ائویندن خونچا گلردی. خونچادا شام‌دان علاوه آلما، پرتقال، مییانپور، یئمیش، بویانمیش یومورتا و  کوره کن اوچون کؤینک و قیزلارینا آلدیق‌لاری بایراملیق اولاردی. البته قایین آتا اوچون کؤینک و قایین آنا اوچون ده دونلوق یا چادرالیق قویاردیلار.

شام دان سونرا شال ساللاما اولاردی. شالا جوراب، مییانپور، یئمیش، مئیوه، شیرنی، بویانمیش یومورتا حتی پول باغلاردیلار.

چرشنبه فالی دا ماراقلی اولاردی. بیر نیت توتوب، قاپی دالیندان عایله دانیشیق‌لارین دینلردیلر. اؤلوملو و گؤزل سؤزلر ائشیتمک نیتی و ایسته‌یینه چاتماق آنلامیندا ایدی. او اوزدن آتا و آنالار چرشنبه گئجه‌سی گؤزل و پوزیتیو دانیشماغی اؤنه‌رردیلر. 

ائرته‌سی گون خانیم‌لار سو قیراغینا گئدیب، سو اوستدن آتیلیب، سودان آیدینلیق آلاردیلار. آغیر و کدرلی گون‌لری اوزاقلاشدیرماق نییتی ایله ساچ‌لاریندان کسیب ودیرناق‌لارین توتوب، سویا بوراخاردیلار .

بایرامدان قاباق خانیم‌لار سوغان قابیغی ایله یومورتالاری بویاردیلار و بایرام سفره‌سینه حاضیرلاردیلار.

ایل تحویل اولاندا هر ائوده یاپراق دولماسی قایناردی . بو دولمانین ایچینده چئشیدلی ارزاق‌لار اولدوغو اوچون اود اوسته قایناماسی، قارشیدان گلن ایلین برکتلی ایل اولاجاغینا اینانج داشییردی.

 بایرام سفره‌سینده آینا، شمع، قرآن، سماق، سومنی، بوغدا یا چورک، بالیق، ساریمساق، دمیر پول، سبزه، سیرکه، سو قویاردیلار. ایل تحویل ده عایله عضولری بو سفره‌نین باشیندا اوتوراردیلار. سونرا بیربیرلرینی تبریک ائدیب و بؤیوک بابا ائوینه گئدردیلر. و بیر بیر کیچیک‌لر بؤیوک‌لری زیارت ائدیب، تبریک ائدردیلر. بؤیوک‌لر ده بایراملیق وئرردیلر. اوسگوده عموما بایراملیق بویانمیش یومورتا ایله جوراب یا  پول اولاردی. قیزلار عایله‌لری ایله بیرگه بایرامین اول گونو ناهارا آتالارینا قوناق اولاردیلار. ناهار موطلق پلو اولاردی. گوی خوروشتو، قیمه، یئرکوکو خوروشتی و سونرالار تویوغ دب اولموشدو.

بایرامین ایلک گونونده یاسلی عایله‌لرین ده گؤروشو واجیب ساییلاردی.

بایرام گون‌لری سیزده له باشا چاتاردی. سیزده ده ناهاری حاضیرلاییب یانیندا قایقاناق پیشیریب، باغ‌لارینا گئدردیلر. عموما یئنه بؤیوک‌لرین باشینا ییغیشاردیلار. ناهاردان سونرا اوشاق‌لار اویناردیلار. خانیم‌لار یئنی جویرمیش تره‌وزلردن درردیلر. غازآیاغی، قالقان، شینگی، قویون قولاغی... و ائرته‌سی گون او تره‌وزلرین آشی اود اوسته قایناردی.



سیز عزیز اوخوجولارا، بوتون خالقیما هابئله دونیا تاش‌لاریما ساغلیق، شادلیق و دینج یاشام دیله‌ییرم. 

اؤنجه‌دن یئنی ایلینیز قوتلو، موتلو و برکتلی اولسون. 

 https://t.me/Adabiyyatsevanlar

فولکولور
آتا بابا سوزلری، مثللر، دئیم لر...
ادبیات سئونلر کانالیندا
زمان: هرهفته جمعه گئجه
ساعات: 21

https://t.me/Adabiyyatsevanlar

آتالار سوزو
سهمانلایان:« تورانلی قیز»
حاضیرلایان:« ادبیات سئونلر»

۱- آدامی تانییان یئرده قورد یئسین.
۲- دادانمیسان دولمویا بلکه بیر گون اولمویا.
۳- من راضی سن راضی ... یئییر قاضی.
۴-چوخ یئماخلیق آز یئماخلیقدان سالار.
۵- حالوا- حالوا دئمه‌گی‌نن آغیز شیرین اولماز.
۶- خان اوغلان دایی سینا چکر خانیم قیز بیبی‌سینه.
۷- یتیمه وای- وای دئین چوخ اولار، چؤرک وئرن اولماز.
۸- آغانین مالی چیخاندا نوکرین جانی چیخار.
۹- بوردا منم باغدادا کور خلیفه.
۱۰- ایت هورر کاروان گئچر.
۱۱- سو بولانماسا دورولماز.
۱۲- چاغیران یئرده بیت، چاغیرمیان یئردن ایت.
۱۳- پیشیگین آغزی اته یتیرمیردی دییر مینداردی.
۱۴- یول گئدن آت قمچی یئمز.
۱۵- دوه اوینویاندا قار یاغار.
۱۶- یئرینه ایشه‌ماغی بس دگیل شیرین چایدا ایستیر.
۱۷- ناهاردان معلومدی شاما نه وار.
۱۸- ایش‌لیین یئیَر بویانی ایشله‌مین یئیر هایانی.
۱۹-چراغ اوز دیبینه ایشیق سالماز.
۲۰- پیچاق اؤز دسته‌سین کسمز.
۲۱- آتا مینماغین بیر عیبی اولسا، آتدان دوشماغین مین عیبی وار.
۲۲- باغلی سفره‌نین بیر عیبی اولسا آچیلی سفره‌نین مین عیبی اولار.
۲۳- یئمه‌میسن قاز اتینی، نه بولوسن لذتینی.
۲۴- قود‌داسان قوردی چیخار.
۲۵- قورد دومانلغی سئور.
۲۶- هامینی بزر، اوزی لوت گزر.
۲۷- نسیه گیرمز کیسیه.
۲۸- مالیم خراب اولونجا قوی قارنیم خراب اولسون.
۲۹- تویدا اوینویانین باشیدا اوینار گوتو‌ده اوی نار.
۳۰- تویدا اوینویانین، اویان- بویانی گوررلر.
۳۱- قویونی اولان قورد دان قوخماز.
۳۲- حامام فیته‌سین بئلدن آچارلار.
۳۳- آدین ندی رشید، بیرین دئ، بیرین ائشیت.
۳۴- قاتیخ توکولر یئری قالار ایئران توکولسه نه قالار.
۳۵- ائل گوجی سئل گوجی.
۳۶- باغدان اریک قوتولدی سلام علیک قوتولدی.
۳۷- آژ تویوخ یاتار یوخودا داری گو رر.
۳۸- قیصاص قیامته قالماز.
۳۹- قاباغا گئچنده دئییل لر بیژدی، دالی قالاندا دئییل‌لر گیژدی.
۴۰- قوری- قوری قربانین اولوم.
۴۱- یاغماسادا گورولدور.
۴۲- قیز بادامدی بالاسی بادام ایچی.
۴۳- کور نه ایستر ایکی گوز، بیری ایری بیری دوز.
۴۴- کیشی توپوردویون یالاماز.
۴۵- قره واش الینه جیگر دوشوب.
۴۶- گئجه بازارا گئدن چوخ اولار.
۴۷- لالین دیلین ننه‌سی بولر.
۴۸- بیر دیلی وار ایلانی یووادان چادار.
۴۹-لای- لای بیلیسن نیه یاتمیسان.
۵۰- ائی‌بئله اوتلویوب، هانی قویروغو.

https://t.me/Adabiyyatsevanlar

قزئت احوالاتی
طنز:«بویوک آغا افندی»
هرهفته جمعه گئجه ساعات 21
ادبیات سئونلر کانالیندا

https://t.me/Adabiyyatsevanlar

طنز:«بؤیوک‌آغا افندی»
قزئت احوالاتی
بایرام دوعالاری
 
یا الله، یاالله، یا الله
الهی!
آمین دئین دیل‌لری لال ائله‌مه!
الهی، پروردگارا!
بوتون میوه‌لری، آجیل‌لری، خصوصن بادام هندینی و پوسته‌لری قوناقلارین شرریندن، مخصوصن جیبه تؤکن‌لرین الیندن محفوظ و برقرار ائله! 
یا ربی!
منیم گؤزومدن ایراق اوشاقلارینا دؤرد -دؤرد شیرنی شوکالات وئرنلری تیریغا سال!   
پروردگارا!
زنگ ائله‌ییب «ائوده‌سیز؟ بئش دقیقه گؤروشه گلیریک» دئین، آنجاق شامی یئمه‌یینجه دوروب گئتمک ایسته‌مه‌ین قوناقلارین مکرلرینی اؤزلرینه قایتار!
بارالهی!
سنی آند وئریرم اؤز جلالینا، بایرامدا ائوه داش کیمی دوشوب، اون بئش گون یئییب، ایچیب  شیللاق آتان قوناقلاردان بیزی آماندا ساخلا!  
یا ربیم!
او قوناقلارکی آیفوندان باخاندا ایکی نفر، قاپیدان گیرنده 45 نفر اولورلار، دالدادا گیزلنن‌لرین نیست و نابود ائله!
پروردگارا!
سوفره باشیندا قازماغا، تویوقون بودونا حمله ائدنلرین مئیلین کوسدور!
الهی!
او آداملارکی قاپیدان گیرمه‌میش قودوقلارینا دئییرلر: «عمی جاندان بایراملیغینی آلدین؟ قاچ گئت عمی‌جاندان بایراملیغینی آل!» اونلاری اؤزلریندن پیسینه راست گتیر!
خدایا، خداوندا!
بوتون او قوناقلاری کی بو شهردن کنار، بیزیم ائوه گلمک خیالیندادیرلار، اؤز الله‌لیغیوا خاطیر اونلاری اؤز یورد- یووالارینا هدایت ائله!
الهی!
سنه آند وئریرم اوز الله‌لیغیوا، منی بیچاره‌نین آیلیغینی فروردین آیی‌نین ایگیرمیسینه‌جه آرواد- اوشاغین، باققاللارین  شرریندن حفظ و مستدام ائله!
پروردگارا!
سنی آند وئریرم اؤز رحمان و رحیم‌لیگینه، قاینانانین لشگرین باجاناق ائوینه هدایت ائله، بیز ده اونلارین ایچینده!
یا ارحمن راحیمین!
گئتدیگیمیز یئرلرده بیزه بوللو و دویونجا کوفته، کاباب، دولما، باغلاوا، پوسته و بادام نصیب ائیله!
آمین یا رب‌العالمین الله!

https://t.me/Adabiyyatsevanlar

«رسول رضا»

دورنانین قاتاری گؤر نه قشنگ‌دیر
سحر بولودلاری نه لاله رنگ‌دیر
مهریبان گؤزلرین یول چکیر یئنه
بیر سس پیچلداییر
گلمه‌یه‌جک‌دیر

حسرت تئللرینه کیم‌دیر ال ووران
گؤیرچین گؤنلوم‌دور یوللاردا دوران
یوز ایل‌لیک بیر عؤمور قوربان وئرردیم
خومار گؤزلرینه باخسایدیم بیر آن

بیلمیرم، صادیق‌سن آندا، ایلقارا
قوی چکمه‌سین فیکریم، گؤنلومو دارا
او بؤیوک عشقینله ساغالاجاق‌دیر
اینانکی آلدیغیم ان درین یارا

بلکه بیر گون، مندن گتیردی سوراق
قان لکه‌سی دوشموش، بیر ساری یارپاق
بیل کی، سون شعریمین ایلک سؤزو سن‌سن
بیر ده جان وئردیییم بو آنا تورپاق


https://t.me/Adabiyyatsevanlar

«رقیه علیقلیان» (لاله)
باهارگلدی
آرخاداقویدوق قیشی شن باهارین آدیله
ظولماتلارایشیق لانیب اوجاقلارین اودیله
قارانلیق چیلله لرده اوجاق قوران چوخ اولدو
ایشیغی هارایلادیق قاراظولمات یوخ اولدو
بولود لارین باغریندا اولدوزلارسایریشد
یلار
ایشیقلارچوخالدیلارگونشه قاریشدیلار
شن گونشیم یایلدی داغلارین زیروه سینده
اشید دی یاز گلمه یین چوبانلارنغمه سینده
قارلی داغلار کوینه گین د ییشدی بیردن-بیره
اوچونجوچرشنبه ده نفسین وئردی یئره
بولاقلارین آیناسی سیندی بارداق سسیله
فرح لندی داغ دره قیزلارین گولمه سیله
داشلاندی شن بولاقلارباغلاراوزونده سوزدو
یارپیزلارقولاغینایئنه سیرغانی دوزدو
ایپک الین یازمئه هی چکدی خالقین اوزونه
نوروزون شن خبرین وئردی ائلین اوزونه
(لاله)لرتوپلاندیلاریئنه یاماج دوزونده
سئویندی چیچکله نیب قوجامانلارایزینده

https://t.me/Adabiyyatsevanlar

ایلک باهار چاغیندا...

https://t.me/Adabiyyatsevanlar

«اسماعیل خرمی»

بیر قوجاق شعیر تؤکموشم اؤنومه.
بیر قوجاق ماهنی توپلامیشام .
بیر قوجاق رومان ائشمیشم.

مصراعلار آراسی،
سنین ساچیندان بیر تئل آراییرام-
یئنی یازدیغیم بیر شعره بزک وورام.
تاپا بیلمیرم.
الیم بوشا گئدیر
دئمه ساچلارین یول اوستونده دیر.

سسیندن، بیر دیرک آختاریرام،
ایلیم - ایلیم ایتمیش-
او نوتلاردان کی،
قولاغیما یاد دئییل.
آختاران تاپار دئییبلر،
یا من چالغیچی دئییلم،
یادا سنون نوتوندا،
من داها چالینمیرام.


اوره ییمین اوزون یوخوسونو دیکسیندیردین.
قهرمانی سن اولان-
اؤزوم یازدیغیم روماندا.
ایلیشیب قالمیشام اوردا.
چیخا بیلمیرم.
سطیرلر آرا-
أیاق ایزینی آختاریرام.

https://t.me/Adabiyyatsevanlar

«ذکیه ذولفقاری»
بیزیم بایرام

آنام دوشموشدو هول ولایا، بایراما بیر هفته قالیر هله‌ده چوخ ایشیم قالیب دئیه-‌دئیه، ائوده وای گل- یوخ گل ائلیردی.
ایکی اوتاق، بیر دهلیزین نمنه‌سی واریدی، اینه‌دن چؤپه بوشالتمیشدیق حیطه. آنجاق شانسدان، بیز ال- آیاق ائلینجه‌، توزارانتی قار یاغماغا باشلامیشدی.
-قاردا یاغماغا وخت تاپدی، من بیر چوب‌ده یومامیشام، دوز دئیبلرها آذربایجانین 9 آیی قیشدی، اوچ آیی قمیش!!! نه بایرامی نه ائیرانی، نه چرشنبه‌سی بابا؟ آغ یودوم قرا سردیم ائدیب، ائوی دؤشویجه‌ییک!!!.
بیر آز دایانیب حیرصی یاتاندان سونرا، بیر اوزون هیس سوپورگه‌میزله، دیرکلی تاوانین- دووارلارین توزلارینی آلماغا باشلادی. ائوده توزدان گؤز گؤزو گؤرموردو.
واللاهی ائوده ایت اولاسان کیچیک اولمایاسان، آنام قارین، قیشین، ائو تؤکمگین حیرصین‌ده منده چیخاردیردی.
-بو هایا-هایدا سنین ده درس یادیوا دوشوب؟ دور بیر ایش اوجوندان توت! او قابلاری یوو هئچ اولماسا، ایکی اوچ دانا یومورتا قوی پیشسین، ایکی دانا دا چای قوی، بوغازیم قوپ-قورو قورویوب. ایش گؤر ایشه اوخشاسین با!
-بایرام تعطیلاتی‌نین مشقلریمی یازیرام مامان!
اصلینده بیز هرنه ایش گؤرسیدیک، ایشه اوخشامازدی، نه قاب یووماق ایشیدی، نه ائو سوپورمک، و نه یئمک پیشیرمک، ایش فقط آنام گؤرن ایشیدی!!!
کیتابلاریمی فرشین اوستونه تولازلاییب قالخدیم آیاغا.
-باجیم، موبل‌لاری، فرشلری نجور تمیزلییم؟ روقیه خانیمین سسیدی.
-موبل؟
تئز اؤزومه گلدیم. قیرخ ایل اؤنجه بایرام ائو تؤکمک لر هارا ایندی هارا؟
-باغیشلا روقیه خانیم فیکریم بوردا دئییلدی. اؤزون بیل، هر نه‌اینه یاخشی تمیزلنسه دا!
چای ایچیرسیز گلیم تؤکوم؟
ائوین فرشینی، کیلیمینی هله سالمامیشدیق کی، کوچه‌دن ریتمیلی سسلر ائشیدیلیردی:
سایاچی ممد گلیب، خیر برکت گلیب.
سایاچی گلدی، گؤردوز مو؟
سالامینی آلدیزمی؟
آنلی قاشقا، قوچ قوزونو سایاچیا وئردیز می؟
بو سایا کیمدن قالیب؟
آتام آدمدن قالیب.
حضرت آدام گلنده،
دونیا بونیاد اولاندا
.....
من تلسیک قاپیا قاچیب، قاپی‌نین چاتلاغیندان کوچه‌یه باخدیم، نئچه جاوان اوغلان گوللو- گوللو میللی پالتارلارلا چالیب اوخویوردولار، چیینلرینده‌ایسه بیر هئیبه قاپی- قاپی گزیب بایراملیق آلیردیلار. کوچه میزین جاوان اوشاق‌لاری دا اونلارلا گزیب شادلیق ائدیردیلر.
-ماماااان مامان! منده بونلارلا گئدیم کوچه باشینا جان نولار؟
-هه! بویور دا، بیر اوسوموز قالمیشدی!!! قیز نه بو ایشلر نه؟
روقیه خانیمدان سوروشدوم سیزین کندیزده بایرام قاباغی سایاچی گلردی؟ یوخ دئدی، آنجاق بره‌ک( شال) ساللاما دبی واریدی. بیز فقط عمیم گیلین ائو داملارینا چیخیب اوردان توربا نی آتاردیق حیطلرینه، زن عمیم یئمیشدن زاددان باغلاردی. آنجاق اوغلانلار آزادیدی، هر داما، اؤزللیکله قیز اولان ائولرین دامینا چیخیب، بره‌ک ساللاردیلار.
روقیه خانیم بره‌ک دئدی، یئنه کئچن گونلر سیناما پرده‌سی کیمی گؤزومون قاباغیندا جانلاندی.
بیر تورلو بایرام ایشلریمیز قوروتولموشدی، بایرام حامامینا دا گئدیب بیر ایکی قات دریمیزدن سویوب، تر- تمیز یویونوب چیخمیشدیق. بایرام آخشامیدی، دئیه گوله آیین شایین، سوفره باشیندا اوتوروب بایرام پیلوو یئییردیک کی، دامدا ن بتر آیاق سسی گلدی ، بیردن پنجره میزه دانقیلتیلا بیر داش دیدی، هامیمیز آغزی دولو، دؤنوب پنجره‌یه باخاندا، گؤردوک شوشه دالیندان بیر شالی سالاییب تربدیرلر.!!! منله باجیم قورخوب قاچدیق صاندیق خانایا. آنام:
- قورخمایین بالام، بره‌کدی دا، بایرام آخشامیدی دئییل به!!! ایندی دوروب یئر- یئمه‌لی باغلارام گئدرلر. آنام، اتگینی دولدوروب آپاردی باغلادی پارچانین اوجونا. چکین دئدی! دامداکی جاوان اوغلان شالی چکدی گئتدی. چوخ چکمدی دامیمیزدا سانکی هولا قوشدولار. دئیه‌سن محله اهلینه خبر اولموشدو! محله‌نین بوتون جاوان اوغلانلاری هره‌سی بیر دستمالا، شالا داش باغلاییب پنجره میزی داشا باغلادیلار!!!
هامیمیزین حالیمیز پوزولموشدو دا! آتاما پیچاق ورسایدین قانی چیخمازدی. حیرصله چیخیب حیطده، هامیسی‌نین قوپالاغین گؤتوردو اونلار ایسه دابانا قووت قاچدیلار.
بو آرادا منله باجیم یئمک قاباغیمیزدا قورویوب قالمیشدیق.
بو حئینده کوچه قاپیسی دؤیولدو، آنام قاپینی آچماغا گئدنده منده اونون آتگیندن یاپیشیب گئتدیم ( گئنلده بو منیم عادتیمیدی، آنام قاپیدان چیخاندا من اوندان قاباق چیخاردیم!). قاپی دؤین دئدی، سس گلمه‌ینجه، آنام قاپینی آچماغا مجبور اولدو. قاپی آچیلماق همان یئکه بیر شال آتیلدی آیاغیمیزین آلتینا. ایکیمیزده دیسکینیب دالی چکیلدیک. بیلدیمیزده کی قونشو خانیمیدی راحاتلاییب گولوشدوک... آنام منه گؤزونون یانیلا باخیب دئدی: آجان حیرصلیدی او بیلمه‌سین بره‌ک دی ها!!! .

قونشونون شالی باغلاندیقدا، گوله- گوله شالینی چکدی گئتدی.
روقیه خانیم شیرین جانیلا ایشلیردی من ایسه، ندن ایندی قونشولارین بئله ایشلره ماراغی یوخدو؟ دلی شیطان دئییر، گئدیم قونشوموزون قاپیسنی دؤیوب شال آتیم ائولرینه! دئسه‌لر بو نه ادادی ؟ دئییم شال سالللاماق ، بایرام دبلریمیزدن!!! شال یوخ! هه نیت ائدیم، گئدیم دوروم آستانالاریندا، گؤروم نه دئییرلر؟ دوشونوردوم.
قیزیمین گؤرونتولو تلفون زنگیله، خیاللاریمدان قوپوب، تلفونومو آچدیم. خئیلک دانیشاندان سونرا گؤورتدیگی گؤیلری منه گؤستریب دئدی، سنینکیلر اولوب؟ یادیما دوشدو هله من نه بوغدا ایسلاتمیشام نه مرجی...
دئدیم یوخ هله... لعنته گلمیش کورونا قویور میه بایرام یادا دوشسون؟
او ایل، تحویل سحر صوبح واختی اولاجاغیدی. بیز دورونجا بایرام سوفره‌سی آنامین تلاشیلا حاضیر اولموشدو.
گؤی، کوزه‌یه چکیلمیش شوورن گؤیو، آینا، قوران، سو، سوغاندا بویانمیش یومورتالار، سیککه، آنام دوزلدن بادام شیرنیلری، چرشنبه یئمیشی( یئددی لووون) میان پور، ایده، آلما، نار، بیر بانکادا قیرمیزی بالیق. - بئله اینام واریدی کی ایل تحویل اولاندا بالیقلار اوزو قیبله‌یه دورارلار- هامیدان اؤنملی بیر مژمئییده ائوده بوتون قورو دن‌دؤشدن(دویو، نوخود، لوبیه، یارما و... ایل تحویل اولاندان سونرا بو دن‌دوشلر قابلارینا تؤکولردی) . آنام دئییردی:
ایل زوماری ایلین تحویلینده سوفره‌ده اولسا، برکتلی اولار.
گؤزلریمی اووا-اووا تازا گوللو-گوللو پالتارلاریمی گلیب سوفره باشیندا اوتوردوم.
آنامین دستورویلا منله باجیم قورانلاریمیزی گؤتوروب یاواش- یاواش اوخوماغا باشلادیق. بوتون بایرام عادت- عنعنه‌لریمیز اؤز کولتوروموز، اؤز دیلیمیزله اولماغا رغما، رادیودان بیری عربجه تحویل دوعاسینی اوخودو، سونرا فاسجا ترسه سایما باشلاندی، ده-نه- هشت... دیرین آغاز سال........!!!
ائشیکدن هاوایا آتیلان گولّه سسلری باهارین گلیشینی قارشیلادی .
آنجاق قیرمیزی بالیق ایسه، هر ایل اولدوغو کیمی اوزو قیبیله‌یه دورمادی کی دورمادی.
و بیز ایسه، قوران آراسینا آتام قویان شاخ کاغاذ پولاری، سوفته گؤتوروب، اؤپوشماغا باشلادیق. و... بئله اولدو کی بایرامیمیز موبارک اولدو.

https://t.me/Adabiyyatsevanlar