ادبیات سئونلر

طنز:«بویوک آغا افندی»
قزئت احوالاتی «یوخو»

رحمتلیک گوهرخالامی دئییرم؛ دونن سحر عؤمرون وئردی سیزه. هامی قان آغلاییردی، خصوصیله قیزلاری اؤزلرینی اؤلدوروردولر؛ آنجاق بو قارا گوندن هله اییرمی دؤرد ساعات کئچمه‌میشدی کی خالامین بؤیوک قیزی، سحر تئزدن هامینی ییغمیشدی باشینا، دونن گئجه‌نین یوخوسونو تعریفله‌ییردی:
-سحره‌جن گؤزومو یوممامیشام. ائله گؤزومو یومماق همن، آنامی گؤردوم. او قدیمی بویون‌باغی‌سینی منیم بوینوما باغلاییردی. تئز- تئز دئییردی گؤرمویم بو بویون‌باغی سندن آیریلسین. او منیم یادیگاریمدی.
سونرا اوجادان آغلاماغا باشلاییردی. قوهوم- اقربا اونو اووودماق و آنانین یوخوسون یئرینه یئترمک اوچون بویون‌باغی‌نی اونون بوینونا باغلادیلار. او گونده بیلمه‌دیک بیزه نئجه کئچدی؛ آخی ایکینجی گون‌ایدی کی خالاسیز یاشاییردیق.
×××
قیشقرتی سسی منی یوخودان اویاتدی. خالامین اورتانجی قیزی اوشاقلاری‌نین الیندن یاپیشیب، خالانین حیطتینده اؤزون یئره،گویه چیرپیردی:
- ای وای آنا!
سسی بوتون قونشولاریدا حیطه چکمیشدی. او آغلایا آغلایا دئییردی:
-دونن گئجه آنامی یوخودا گؤردوم. گلمیشدی بیزه. آمما قاپی‌دان ایچری گلمیردی. هر نه یالواردیم، آنا باشینا دولانیم، گل ایچری‌یه! دئییردی:یوخ، تا او گونه‌جن کی منیم ائویم بوش قالا- قالا، سن بو قورا بالالاری ایجاره ائوده ساخلاییرسان، سنین قاپیندان ایچری گیرمیه‌جم.
هله گون اورتا آذانین وئریلمه‌میشدیر کی قورا بالالار خالانین ائوین دوشه‌میشدیلر.
×××
نه باشیزی آغریدیم؛ اییرمی گون آغیر عذابلی گونلری کئچیردیک. خالادا هرگون بیری‌نین یوخوسونا گلیردی، بیر زاد اونا باغیشلاییردی. نوبت خالانین ارینه چاتمیشدی. بیر گون سحر اودا یوخوسون بئله تعریف ائله‌دی:
-دونن گئجه رحمتلیک مشد گوهر توی پالتارلارینی گئییب، بزه‌نیب منیم یوخوما گلمیشدی. الینده بیر بوقچا واریدی. سوروشدوم او نه‌دیر؟ مشد گوهر سئوینجک دئدی: بولار توی پالتارلاریدی. گول‌باهار خانیمین اینینه تیکدیرمیشم. قیرخیم چیخمامیش اوننان ائولنمه‌سن، هئچ واخت سنی باغیشلامارام.
خالامین قیرخیندا، گول‌باهار خانیم‌دا آغلایانلارین سیراسینا اضافه اولموشدو.

https://t.me/Adabiyyatsevanlar