ادبیات سئونلر

اوشاق ادبیاتی

آذربایجان افسانه لری

سؤیله‌ین:«صمد بهرنگی - بهروز دهقانی»
چئویرن:«منیژه جم‌نژاد»

ای وای های ۱

🧙‍♀ بیری واریدی بیری یوخودو. ابراهیم آدلی بیر کچل واریدی. باشی قولاق لارینا جان کچل ایدی. کچل گو٘نده چؤله گئدردی، آخشام قاییداندا پادشاهین قیزینی قصرین بالاخاناسیندا اوتورورکن گؤرردی. کچل مین بیر او٘ره‌ک له پاشاهین قیزینا وورولموشدو. آما او٘ره یینین سؤزونو کیمسه یه دئیه بیلمیردی. بیرگون آتا آناسینا دئدی: ایللاه گرک پادشاهین قیزینی منه ایستیه‌سیز. ننه سی دئدی: آخی اوغلان، بیزیم یئددی گؤیده بیر اولدوزوموز یوخدو، نئجه ایستیرسن پادشاهین قیزین آلاسان؟ ابراهیم ایکی آیاغین بیر باشماغا تیکدی، داوا معرکه سالدی. سونوندا ننه سی دئدی: کیشی صاباح گئدیب اوتورارسان ائلچی لیک داشینین او٘ستونده. بیر شئی اولماز. پادشاه یوخ جوابی وئرر، گلیب اوغلانا دئیرسن، اوتورار یئرینده. کیشی سحر تئزدن پادشاهین قصرینه گئتدی. ایشچی لر تازاجا قاپینین قاباغینی سولاییب سو٘پورمه یه باشلامیشدیلار. کیشی دو٘ز گئدیب اوتوردو ائلچی داشیندا. پادشاه گؤروب چاغیردی. کیشی ایچری گئدیب سلام وئردی. پادشاه دئدی: نه ایستیرسن؟ کیشی دئدی: آلله دان گیزلین دئییل، سندن نه گیزلین. منیم اوغلوم سنین قیزیوا وورولوب ائلچی لییه گلمیشم. پادشاه دو٘شونوب دئدی: منیم سؤزوم یوخدو، آما منیم قیزیمی ایسته ین گرک "عجیب- غریب" اویونو باشارا. کیشی قاییدیب حال قضیه نی اوغلونا دئدی. اوغلان قالخیب دئدی: یالله دور منی "عجیب - غریب" چی نین یانینا آپار. آتاسی دئدی: آخی من بیلمیرم "عجیب - غریب" چی هاردادی. قوی صاباح سوروشوم، خبر آلیم گئده ک. نئچه گون ابراهیمین باشینی سریدی. بیر گون ابراهیم دئدی: ایندی جه گرک دوراسان گئده ک "عجیب - غریب " چی نی تاپاق. ابراهیمین ننه سی آش پیشیرمیشدی. دئدی: اولسون کیشی. ناهاریوی یئ، الیندن یاپیش آپار اویان بویانا، گؤزونون اؤنونده نئچه نفر دن سوروش. اؤزو گؤرر کیمسه " عجیب - غریب " چی نی تانیمیر. کور پئشمان گلیب اوتورار یئرینده. ناهاردان سونرا آتا کچلین الیندن یاپیشیب یولا دو٘شدولر. بیر ایکی ساعات شهر ده سو٘لندیلر. کیمسه "عجیب - غریب" چی نین توکانین تانیمیردی. آخشام چاغی بیر چشمه یه یئتیشدیلر. کیشی دئدی بیر آز بوردا اوتوروب یورغونلوغوموزو آلیب سونرا یولا دو٘شک. چوخ یورولموشدولار. آتا بئله سی آه چکیب دئدی: "ای وای های!" بیردن چشمه نین سویو ترپشیب بالاجا بیر کیشی سودان چیخیب دئدی: هه؟ نه ایشین وار؟ آتا دئدی: منیم سنله ایشیم یوخدو. سحرین گؤزوندن یولا دو٘شموشوک بیرینی تاپاق بو اوغلانا "عجیب - غریب" اویونونو اؤیرده. هله کیمسه یی تاپمامیشیق. اوغلوم پادشاهین قیزینا عاشق اولوب، پادشاه دا دئییر قیزیمین باشلیغی "عجیب - غریب " اویونودو. بورا یئتیرنده من بیلمز یانا اؤز اؤزومه دئدیم " ای وای های". بالاجا کیشی دئدی: ائله منیم آدیم بودور. بو شهر ده تک من بو اویونو باشارارام. کیشی دئدی: قادان آلارام، منیم اوغلوما دا اؤیرت. بالاجا کیشی دئدی: اولسون. ابراهیمین الیندن یاپیشیب چشمه نین ایچینه آپاردی. کیشی گؤزلرین اوغوب دؤره یه باخیب گؤردو ابراهیمدن خبر یوخدو. ایکی اللی باشینا چالدی، بو نه ایشی دی گؤردوم دئیه. ننه سینین جاوابینی نه وئریم؟ اویاندان دا ابراهیم له بالاجا کیشی " ای وای های" ین ائوینه یئتیشدیلر. "ای وای های"ین بیر قیزی واریدی، ابراهیمی گؤرونجه اونا وورولدو. بیر گون بو قیز ابراهیمه دئدی: ابراهیم بو ائوه آیاق قویانین قاییدیشی اولماز. سن منه سؤز وئرسن منی آلاجاقسان، سنه قاچیش یولونو اؤیردرم. ابراهیم آند ایچدی قیزی آلسین. قیز دئدی: آتام سندن سوروشاندا نه باشاریرسان؟ دئنه: سو٘پورمک، بیرده چؤره ک سولاماق. ابراهیم بیر زامان اوردا قالدی. بالا بالا "ای وای های" ین گوز باغلییجی ایش لریندن بیر آز اؤیرندی. آما " ای وای های " سوروشاندا نه باشاریرسان؟ ابراهیم دئییردی: سو٘پورمک، چؤره‌ک سولاماق. بیر گو٘ن ابراهیمین آناسی گئنه آش پیشیرمیشدی. قازانی اوجاق او٘ستن گؤتوروب یئره قویاندا ابراهیم یادینا دو٘شدو، گوزلری دولدو. ارینه دئدی: آپاردین اوشاغیمی یوخا چیخاردین. تئز اول دور گئت هاردان اولسا تاپ گتیر، او٘ره ییم اوندان اؤترو بیر تیکه اولوب. کیشی دوروب گئتدی چشمه باشینا دئدی: " ای وای های" چشمه نین سویو ترپشدی بالاجا کیشی چیخدی. کیشی دئدی: ابراهیمین آناسی اوشاغینا داریخیب، او٘چ دؤرد گو٘ن قوی گلسین ائوه، گئنه گتیره رم. "ای وای های" گئدیب ابراهیمی گتیریب آتاسینا تاپشیریب دئدی: دؤرد گو٘نون باشی قایتاراسان. ابراهیم له آتاسی ائولرینه ساری گئتدیلر. یولدا ابراهیم اوُز اوُزونه دئدی: قوی گؤروم بیر شئی اؤیرنمیشم یا یوخ. آتاسینا دئدی: دده سن گئت، من گئدیم سو باشینا، دالینجا گلرم.
آردی وار...

https://t.me/Adabiyyatsevanlar