ادبیات سئونلر

316 viewsedited 03:08

اوشاق ادبیاتی
آذربایجان افسانه لری
سؤیله ین:«صمد بهرنگی - بهروز دهقانی»
چئویرن:« منیژه جم‌نژاد»

👱 آلتین توپ
🌱🌱 اوغلان دئدی: بیزده ایکی یول یئره وورماق دب دئییل. بیز دوشمنی بیر یول یئره ووراریق. دئو او٘ره کدن نعره چکدی، ائله کی قارداشی ساری دئو ائوده ائشیدیب قیزا دئدی: یازیق اولدوم، اوبیری قارداشیمی دا اؤلدوردو. دا یالقیز قالدیم. قیز چوخ سئویندی. قارداش قارا دئوی اؤلدوردو، ایکی اوچ دانا قارپیز دریب باجیسینین یانینا قاییتدی. قارپیزی وئریب دئدی: یئ باجی. کئشگه دردیوین درمانی بو قارپیز لار اولسون. نئچه آی کئچدی. قیزین بیر اوشاغی اولدو. قورخوردو، نه ائدیم نه ائتمییم، قارداشیمین جاوابینی نه وئریم دئیه. آخشام قارداش یورغون آرقین ائوه قاییتدی. باجی همشه کی کیمی اونون پئشوازینا گلمه‌میشدی. قارداش گلیب گؤردو باجینین رنگ روفو آتیبدی. دئدی: باجی گئنه نه اولوب؟ اولمایا گئنه ناخوشلامیسان؟ قیز دئدی: آلله دان گیزلین دئییل سندن نه گیزلین، گلمیشدیم سنی قارشیلامایا، یولدا بیر اوشاق گؤردوم دو٘شوب قالیب، او٘ره ییم یاندی، گؤتوروب ائوه گتیردیم. قورخوردوم سن گلیب منه آجیقلاناسان اوشاغی نیه گتیردیم دئیه. قارداش اوشاغا باخیب گؤردو تپل مپل سئومه لی بیر اوشاقدی. قانی قاینادی، دئدی: باجی اوشاغی گتیرمکده چوخ یاخجی ایش گؤروبسن. اوشاغین آدین آلتین توپ قویدولار. گو٘نلر، آیلار، کئچدی. آلتین بؤیودی. آخشاملار اوغلان شکاردان گلنده، آلتین توپ قاباغینا قاچیب، دایی جان دایی جان دئییردی. سونرا آتینی آلیب طؤیله یه آپاریب اؤنونه سامان تؤکوب گلیردی. بیر گون آلتین آناسیندان سوروشدو: منیم آتام هاردا؟ قیز ترسه جاوابلار وئردی، آلتین راضیلاشمادی. سونوندا قیز چاراسیز هر شئیی بیر به بیر دئدی. سونرا دا دئدی: ساقین دایینا بو سؤزلردن بیر کلمه دئمه. بیر گو٘ن گئنه دئو دئیینمه یه باشلادی: من بوردا تک تنها قالیرام، داریخیرام. سنی ده قویوب گئتمک ایسته میرم. گل بو زهری قات قارداشیوین یئمه یینه، الیندن قورتولاق. قیز آغلادی، یالواردی، آما دئوین او٘ره‌یی برک ایدی، ال چکمه‌دی. دئمه آلتین توپ پرده دالیندان اولارین سؤزلرینی ائشیدیر. آخشام دایی آو دان گلنده قاباغینا قاچیب دئدی: دایی من سوفرا باشینا گلمه یینجه یئمه یه ال وورما. آتی آپاریب آخیرا باغلاییب قاچیب گلدی اتاغا. آناسی له دایی سوفرا باشیندا اونو گؤزله ییردیلر. آلتین توپ ایتین تولا سین دا حیطدن توتوب گتیرمیشدی. دئدی: دایی اؤنجه بیر شئی وئر منیم ایتیم یئسین، چوخ آجدی. ایت یئمک هامان فیرلانیب دو٘شوب اؤلدو. دایی سینیرلندی. شمشیرینی چکیب باجیسینین قارنینا سوخدو. آلتین توپ دئدی: دایی نیه اؤلدوردون؟ اونون سوچو یوخودو. سونرا اولانلارین هامیسینی بیر به بیر داییسینا دئدی. دایی گئدیب ساری دئوی ائشیه چکیب اونو دا قارداشلارینین یانینا یوللادی. آلتین توپ اوندا اون بئش اون آلتی یاشلاردایدی. بالا بالا اوخ آتماق، شمشیر چکمک اؤیره نیردی. دایی دئدی: آلتین توپ، بیز داها بو ائوده قالا بیلمریک. دور گئده‌ک داغ باشیندا قالاق. ایکی یاندان دوروب وار یوخ لارین ییغیب گئدیب داغ باشیندا چادر ووردولار. گئجه لر سیرایلا بیری یاتیب بیری کئشیک دوروردو. آلتین کئشیک دوراندا داییسی نین آیاق آلتیندا، باشی او٘سته شام یاندیریب، اوندان بتر موغایات اولوردو. بیر گئجه دایی یاتمیشدی، آلتین توپ آییغیدی. بیردن دایینین آیاغ آلتی شامی پیت پیت ائدیب، سؤندو. آلتین اویان بویانا باخیب عاغیل ائده بیلمه دی اونو دایینین باشی اوسته کی شام ایله یاندیرسین. اوزاقدان بیر ایشیلتی گلیردی. آلتین توپ سؤنموش شامی گؤتوروب یولا دو٘شدو. گئتدی گئتدی، بیر دربچه یه یئتیشدی. دربچه نین آلتیندا پیلله واریدی. پیلله دن آشاغا ائندی. قیرخ حرامی اتاغین دوره سینده اوتورموش، چالیب اوخویوردولار. بیر های کویودو گل گؤره‌سن. نئچه حرامی پلو قازانین گؤتورمک ایستیردیلر، آما چوخ گو٘ج ووردولار، تر تؤکدولر، قازانی ترپده بیلمه دیلر. آلتین توپ قاباغا گئتدی، حرامی لاری اویانا چکیب تک اللی قازانی گؤتوروب اویانا آتدی. سونرا دا شامی یاندیریب، تاقچادا ایکی آلما واریدی، بیرینی گؤتوروب، جیبینه قویوب، چیخدی. نئچه آتدیم گئتمیشدی، اؤز اؤزونه دئدی: قاییدیم اوبیری آلمانی دا داییما گؤتوروم. اویاندان دا حرامی لار قیرخ حرامی باشینا خبر وئردیلر نه اوتورموسان، بیر جوان گلدی بئله، بئله ائله ییب چیخیب گئتدی. حرامی باشی دئدی: تئز تاپین اونو. آلتین توپ ایکینجی آلمانی جیبینه قویورکن حرامی لار یئتیریب، اونو حرامی باشینین یانینا آپاردیلار.
آردی وار...

https://t.me/Adabiyyatsevanlar