ادبیات سئونلر

562 viewsedited 02:07

اوشاق ادبیاتی

آذربایجان افسانه لری
سؤیله ین:«صمد بهرنگی - بهروز دهقانی»
چئویرن:« منیژه جم‌نژاد»

🧑 آلتین توپ
🌱 بیرگون واریدی، بیر گون یوخودو. بیر شهرده بیر باجی قارداش واریدی دونیا مالیندان هئچ بیر شئی لری یوخودو. قارداش سحرین کله سی دوروب، اوخون- یایین گؤتوروب، آوا گئدردی. آهو دان، قوشدان آولاییب گتیریب، ایکی یاندان یئیه‌ردیلر. هر گون باتاندا باجی کوچه باشیناجان قارداشینین پئشوازینا گئدردی. آتین آلیب طؤیله یه آپاراردی. ساماندان، آرپادان آتین قاباغینا تؤکوب قارداشینین یانینا گلردی. شاملارین یئییب، دانیشیب، دردلشیب، یاتاردیلار. بیر گون قارداش آودایکن قیز قویونون باشینا گلدی، بیردن قویودان بیر سس گلدی. قیز اییلیب دئدی: آدامسان، حیوانسان، کیمسن دانیش. قویونون تکیندن بیر سس دئدی: ایپ سال منی او٘سته چک سنه دئییم من نه یم. قیز اویان بویانا باخیب ایپ تاپمادی. باشیندان چادراسینی آچیب قویویا سالیب هین هین ایله یوخاری چکدی. بیر ساری بئ ترکیب دئو چادرانین اوجوندان توتموشدو. قیز چیغیریب، قاچماق ایسته دی. دئو الیندن یاپیشیب دئدی: هارا قاچیرسان؟ ایندی کی منی قویودان چیخاردین، گرک منیم قادینیم اولاسان. قیز یوخ دئدی، دئو دیرندی. سونوندا دئو دئدی: منیم کی اولماسان سنی ده اؤلدوره رم، قارداشینی دا. قیز چارا سیز قبوللانیب، دئوین آروادی اولدو. گو٘ن باتاندا قارداش ائوه قاییدارکن دئو بیر یئرده گیزلنیردی، قارداش اونو گؤرمه سین دئیه، سحر چیخیردی ائشیه. بیرگون ساری دئو قیزا دئدی: بور بوجاقدا گیزلنمک دن یورولدوم. قارداشیوین نئچه گون باشینی اکیب بیر یئره گؤنده رک، بیرآز راحات یاشیاق. قیز دئدی: آخی منیم قارداشیمدان سونرا دنیا دا کیمسم یوخدو. اودا گئدیب باشینا بیر ایش گلسه من باشیما نه داش سالارام. دئو دئدی: من اونو بونو بیلمرم. اؤزونو گرک ناخوشلوغا ووراسان، آخشام قارداشین گلنده اونا ناخوش اولدوغونو، آغ دئوین باغینین او٘زومو دردیوین درمانیدیر دئیه سن. قیز او٘زولوب آغلادی. آخشام اولدو قارداشی گلدی، باجیسینی او حالدا گؤروب سوروشدو: باجی نه اولوب؟ چوخداندی سن او قاباقکی باجی دئییلسن. آخشاملار منیم پئشوازیما گلمیرسن. آخی نیه بئله دئییشیلمیسن؟ باجی دئدی: قارداش الله دان گیزلین دئییل، سندن نه گیزلین، بیر زاماندی قارنیم آغریر. قونشلار دئییر درمانی آغ دئوین باغینین او٘زومودور. قارداش دئدی: باجی بو گئجه نی منه مهلت وئر. صاباح دوروب گئدرم هاردان اولسا تاپارام. گرکیر سه دونیانین سونونا جان گئدرم. سحر گو٘ن چیخمامیش قارداش دوروب آتینی مینیب یولا دوشدو. گئتدی گئتدی، گئنه گئتدی تا یئتیشدی آغ دئوین باغینا. آتینی دووارین دیبینده قویوب اؤزو دوواردان آشدی. آما باغا آیاق قویماق هامان آغ دئو نریلده یه نریلده یه گلدی اوغلانین اؤنونو کسیب دئدی: آی حرامزادا نیه گلیبسن؟ ایندی توتوب بوینونو او٘زه‌رم. اوغلان دئوه ساری یومولدو، محکم بئلیندن یاپیشدی. دئو ده اوغلانین بوینوندان یاپیشدی. چکیش، بکیش. آنجاق یاریم ساعات جان گو٘لشدیلر. سونوندا اوغلان دئوی قووزادی باشینا چیرپدی یئره. اؤزوده اوتوردو سینه سینین او٘ستونده. دئو دئدی: عجب قورخماز پهلوان سان، آما یاخجی دیر کی بیرده منی یئره ووراسان. اوغلان دئدی: بیزیم دبیمیز بئله دئییل. بیز بیر یول یئره ییخاریق. دئو گؤردو سؤزون یئریده بیلمه دی، ائله نعره چکدی کی ساری دئو سسینی ائوده ائشیدیب قیزا دئدی: یازیق اولدوم! قارداشین قارداشیمی اؤلدوردو. قیز سئویندی حالی بیر آز دو٘زه‌لدی. اوغلان دئوی اؤلدوروب بیر آز او٘زوم دریب ائوه قاییتدی. او٘زومو باجیسینا وئریب دئدی: یئ باجی. کئشگه دردیوین درمانی بو او٘زوملر اولسون. اون اون بئش گون کئچدی. گئنه ساری دئو باشلادی دئیینمه یه: گرک قارداشیوین باشین اکم، من بئله یاشاماقدان داریخیرام. گئنه اؤزووی ناخوشلوغا وور. قارداشیوا دئنه هامی دئییر قارا دئوین باغینین قارپیزی دردیوین درمانی دی. قارداش باجیسینین دردیندن خبری اولماق هامان سحر تئزدن آتینی مینیب، یولا دوشدو. گئتدی، گئتدی، گئتدی، قارا دئوین باغینا یئتیشدی. دوواردان آشدی، آیاغی یئره یئتیشیر کن قارا دئو قاباغینی کسیب دئدی: آی حرامزادا، سن هارا بورا هارا؟ بوردا قوش اوچا بیلمز. ایندی سنی توتوب بیر تیکه ائده رم. اوغلان دئو ایله توتوشدو. سونوندا دئوی باشینی قووزاییب یئره چیرپیب، سینه سی او٘سته اوتوردو. دئو یالواردی: بیر یول دا منی یئره وور سونرا اؤلدور.
آردی وار...

https://t.me/Adabiyyatsevanlar