ادبیات سئونلر

اوشاق ادبیاتی
آذربایجان افسانه لری
سؤیله ین:«صمد بهرنگی - بهروز دهقانی»
چئویرن:« منیژه جم‌نژاد»

👨‍🦳🧑‍🦳 آدی له بودی

🌿🌿 قیز گئدیب آینا اوتاغینا باخیب گؤردو، آدی له بودی بتر وریانی سویا وئریبلر. تئز نوکرلرین یوللادی آینابند گتیردیلر کیشی سی نین خبری اولونجا اوتاغا آینا وورسونلار. او گو٘نو ده گئجه ائتدیلر. یاتماق واقتی قیز کنیزلرینه دئدی یئرلرین قازلارین اوتاغیندا سالسینلار. گئجه یاریسی قازلار اؤزلرینه اوخوردلار. آدی له بودی آییلدیلار، داها یاتانمادیلار. بودی دئدی: آدی! آدی دئدی: جانیم! بودی دئدی: بیلیرسن نه اولوب؟ آدی دئدی: نه اولوب مگر؟ بودی دئدی: ننه سین میرده‌شیر یوموش یازیق قیز! ایشلر ائله باشیوا قالانیب قازلارا یئتیشنمیسن، اولارین بیتین آریداسان؟ باخ بیر آدی، حئیوان قازلار گؤرنه آغلاییرلار. دور سو قاینادیب، هامیسینی یویوندوراق. دوردولار بیر قازان سو قیزدیردیلار. قازلاری بیر بیر توتوب سویا باسیب، چیخاردیب دووار دیبینه دو٘زدولر. سر صدا یاتدی. بودی دئدی: گؤرورسن آدی، حئیوانلار دینجلدیلر. سحر گلدیلر چای چؤره ک یئمه‌یه، بودی قیزینا دئدی: ننه ن قوربان قیز، بو خاراب قالمیش دا نه قدر گرک جانین چیخا، واقت ائله‌میرسن قازلارینی یویوندوروب تمیز له یه سن. گئجه سو قیزدیردیق، هامیسینی یودوق، آغلاماقلاری کسیلدی. قیز ایکی اللی باشینا چالدی: وای! آللاه منی اؤلدورسون، ذلیل قالمیشلار مگر قازین گئجه اوخوماغینی بیلمیرسینیز ؟ گئنه نوکرلرینه پول وئردی گئدیب قاز آلیب گتیرسینلر، اری ایی آنلاماسین دئیه. دؤردونجو گئجه آدی له بودی نین یئرینی نفت آنباریندا سالدیلار. نفتی کوزه لره دولدورب، دووار دیبینه دو٘زموشدولر. بودی کو٘زه لره باخیب دئدی: آدی! آدی دئدی: جانیم! بودی دئدی: یازیق قیز بیلیب بو گئجه یویونماق ایستیریک. کو٘زه لره سو دولدورب. دور سو قیزدیریب یویوناق. دوروب نفتی قیزدیریب باشلارینا توکوب، هر یئرلرین، یورغان دؤشک لرین، نفته بولادیلار. سحر جهنم ایتی کیمی چای چؤره‌ک یئمه یه گلدیلر. قیز کیفیر او٘ز گؤزلرین گؤروب قورخدو. بودی دئدی: قوربانین اولوم قیز! سن نه مهریبان سان. هاردان بیلدین بیزیم یویونماق واقتیمیزدی، کوزه لره سو دولدوروب قویموسان آنبارا؟ قیز دئدی: آلله منی اولدورسون! ذلیل قالمیشلار کوزه لرده نفت واریدی. سونرا نوکرلرینه دئدی: بولاری آپارین حاماما تئز قایتارین. آدی له بودی حامامدان قاییدار کن، قیز داها قویمادی ایچری گلسینلر. ائله قاپی آغزیندا بیر کوزه دوشاب، نئچه متر چیت بیر دانا دا آت وئریب دئدی: دا بسدی. اؤز ائوینیزه گئدین. آدی له بودی دوشابی، چیتی، آتی آلیب یولا دو٘شدولر. هاوا چوخ سویوغودو. تو٘ دئییردین گؤیده دونوردو. گئتدیلر گئتدیلر، بیر یئره چاتدیلار یئر شاخدادان جیریلمیشدی. بودی باخیب او٘ره یی یاندی. دئدی: آدی! آدی دئدی: جانیم! بودی دئدی: یازیق یئری گؤرورسن نئجه دابانی چاتلاییب؟ دئییرم دوشابی تؤکک ایشدی بیر آز یوموشانسین دو٘زه لسین. دوشابی یئرین جیریغینا تؤکوب یولا دو٘شوب گئتدیلر. بیرآز گتمیشدیلر بیر تیکان کولونا یئتیشدیلر. یئل اسیردی تیکان کولونو سیلکه لیردی. بودی باخیب او٘ره یی یانیب دئدی: آدی! آدی دئدی: جانیم! بودی دئدی: یازیق تیکانی گؤرورسن؟ سویوقدا لو٘ت قالیب تیتره ییر. نئجه دی چیتی سالاق باشینا، او٘شویوب سویوق دیمه سین دئیه؟ چیتی تیکانین باشینا سالیب یولا دو٘شدولر. گئتدیلر گئتدیلر، بیر چولاق قارغا گؤردولر، آخسایا آخسایا یئریییردی. بودی باخیب او٘ره یی یاندی. دئدی: آدی! آدی دئدی: جانیم! بودی دئدی: قارغانی گؤرورسن؟ ایندی بالالاری ائوده اوتوروب دئییرلر گؤره سن آنامیز هاردا قالدی، آجیمیزدان اؤلدوک. آدی دئدی: سن دئییرسن نه ائده ک؟ بودی دئدی: نئجه دی آتی وئره ک قارغایا یئیین گئتسین؟ بیزیم آیاغیمیز ساغ دی، پیادا دا گئده بیله ریک. آتی قارغانین قاباغینا اؤتوروب، یوللاندیلار. بیر آز گئتمیش درویش بابایا راست گلدیلر. دئدیلر: درویش بابا! درویش بابا دئدی: بلی. دئدیلر: گئدیب کله پاچانی یئییب یئرینه آیری شئی توکمه دین؟ درویش بابا دئدی: یوخ بابا. من بئکار ایدیم گئده م کله پاچا یئیه م؟ دئدیلر: درویش بابا! دئدی: بلی. دئدیلر گئدیب پول کیسه میزی بوشالدیب یئرینه ساخسی دولدورمادین؟ درویش بابا سینیرله نیب دئدی: ایتیلین گئـدین بابا! سیزده عجب آداملارسینیز! آدی له بودی سئوینیب دئدیلر : درویش بابا! درویش بابا دئدی: گئنه نه وار؟ دئدیلر: درویش بابا، گئدیب تیکانین او٘ستوندن چیتی گؤتوروب، قارغادان آتی آلمایاسان ها! درویش بابا سینیرله نیب چیغیردی:
آردی وار...

324 views02:22