ادبیات سئونلر

اوشاق ادبیاتی
کوراوغلویلا کچل حمزه
یازار:«صمد بهرنگی»
چئویرن:«منیژه جم‌ نژاد»

۱۲- دئیرلر کوراوغلو داها بیر سؤز دئمه دی. اؤز یانلیشیندان ائله پئشمان اولموشدو کی. باشین آشاغا سالیب گئدیب بیریاندا گؤیرتی لرین او٘ستونده او٘زو او٘سته دو٘شدو. او٘چ گو٘ن او٘چ گئجه آج به سوسوز ترپنمه دن یاتدی. بو یاندان دا یولداشلار ایشلریندن پئشمان اولدولار. اوتوروب بیرلیکده شور مشورت ائدیب، دئدیلر: بیزده پیس ایش گؤردوک، کوراوغلویا او٘ره‌ ک وئرمک دن، اونو دانلاییب حالین پوزوب، او٘ره یین سیندیردیق. نه قدر کوراوغلونون یان یؤوره سینده گئت گل ائتدیلر، اویانمادی. سونوندا نیگار خانیما او٘ز سالدیلار. دمیرچی اوغلو دئدی: نیگار، دا ایندی سن گرک چیرمالاناسان. سندن سونرا کیمسه کوراوغلونون او٘ره گین اله گتیره بیلمز. نیگار دئدی: اولسون. هله ایندی قویون یاتسین. اویانماق ایسته ینده، هامینیز داغیلین، اوندا ایواز اونو منیم یانیما گتیرر، من کوراوغلونون اوره یین اله گتیریب، هامینی دا
باریشدیرارام. یولداشلار هره سی اؤز منزلینه گئتدی. ایندی ائشیدین کوراوغلودان. او٘چونجو گو٘ن یوخو گؤردو توقاتدا قیرآتین بئلینده، حسن پاشانین یانیندا دوروب، نعره چکیر، میدان اوخویور. بیردن یوخودان آییلیب، ایوازی باشینین او٘ستونده گؤردو سانکی دونیانین دردین او٘ره یینه دولدوروبلار،ایکی سؤز دئسن، باهار بولودو کیمی آغلایاجاق. کوراوغلو ایوازی گؤروب، او٘ره یی اود توتدو. سازی باغرینا باسیب بیر شورلو کدرلی ماهنی اوخودو: ایواز نیه بئله پوزغونسان؟ باشیمی ایستیرسن؟ جانیمی ایستیرسن؟ نه ایستیرسن دئ. بئله توتقون، کدرلی اوتورما. کور اوغلو دیری کن چنلی بئله غم توزو اوتورمیاجاق.
ایواز دئدی: دورکوراوغلو، دور گئده‌ک، هامی سنی گؤزله ییر. کوراوغلو سازی یئره قویوب، دئدی: ایواز، اولار کی چنلی بئلین کیشی لری، قادینلاری بیرده منی گوزله یه؟ من اولاری ائله اینجیتمیشم، کیمسه منیم او٘زومه باخمیاجاق. ایواز دئدی: کوراوغلو بو نه سؤزدو؟ سن بیزیم باشچیمیز سان. کوراوغلو دئدی: قیرآتی گتیرمه دن یولداشلارین یانینا گئده بیلمرم. ایواز دئدی: اوندا نه یی گؤزله ییرسن؟ دور گئیین، سلاح گؤتور، گئت. کوراوغلو دوردو. بیر ایکی آتدیم گؤتورممیش، چالیب اوخوماق سسی گلدی، ائله یانیقلی، ائله حسرت دولو کی، گؤیده قوشلار اوچماقدان قالیردیلار. کوراوغلو یان یؤوره یه باخیب نیگاری گؤردو، سازی باغریندا، اوجالیقدا بیر آغاجین آلتیندا دوروب، چالیب اوخویور، کوراوغلونو چاغیریر. کور اوغلو دؤزه بیلمه ییب نیگارا ساری گئتدی. اوجالیغا یئتیشیب چمن لیغا آیاق قویاندا، نه گؤردو؟ بیر دوستجا مجلس چنلی بئلین بوتون قادینلی کیشی لی یولداشلاریندان قورولوب. سوفرا آچیق، یئمک له شراب حاضیردی، پهلوانلار کیشی لی قادینلی، دووره دن اوتوروبلار. کیمسه نه دانیشیر، نه چوره‌یه ال اوزالدیر. هامی کوراوغلونو گؤزله ییر. کوراوغلو مجلسه گیردی. اؤپوش گؤروش بازاری قیزیشدی. کوراغلویلا پهلوانلاری هره سی بیر تهر دوستلوغونو، باریشما سینی گؤستردیلر. ایواز مجلسین آراسینا گلیب، ساقی اولدو. هامی یئییب ایچدی. هامینین کئفی سازالدی. اینجیک لیک لر، گیلئی لیک لر اونودولدو. کوراوغلو حمزه ایله باشینا گلنلری اولارا دئدی. پهلوانلار هره سی بیر طرفدن دئدیلر: ایندیجه من گئدیب قیرآتی قایتاریب، حسن پاشانین باشینی نیزه باشیندا پئش کئش گتیررم. کوراوغلو هامینی سوسدوروب، دئدی: یاخجی دی اؤزوم آتی گتیر مه یه گئدم. ایندی قیرآت منی گؤزله ییر. کوراوغلو دوروب باشدان آیاغا ساواش پالتاری گئییب، شمشیرین بئلینه باغلییب قالخانین، چوماغین، باشقا ساواش یاراقلارین گؤتوروب، کو٘رکونو گئییب، سازی چیینینده، تک تنها، یایان یاپیلداق، توقاتا ساری یولا دوشدو.
آردی وار...

https://t.me/Adabiyyatsevanlar