ادبیات سئونلر

موحاریبه‌‌ قورتاردی -

#نرمین کمالدان یئنی حئکایه‌

کؤچورن:«ذکیه ذولفقاری»
پاییزین آخیرلاری, گنجلر دؤیوشدن آنالارینین, آتالارینین یانینا قاییدان گون تئیمور دا قاییدیردی, آمّا باشقا بیر داوادا، آروادییلا ایللرین موحاریبه‌‌سی داوا - دالاشی نهایت، سونا چاتمیشدی. عسگرلر نئجه یورغون قاییدیرلارسا، او دا ائله قاییدیردی.

هؤوساندا سوسوز ایکی والئریان آتیب آناسیگیله گئدن آوتوبوسا میندی. ان آرخا اوتوراجاغا چکیلیب پنجرده بیر- بیرینی عوض ائدن گئن دوزنلره باخماغا باشلادی. خوش بیر یئل باشینی سیغاللاییب بیر آز اوووتدو، آنجاق بو کیچیک راحتلیق چوخ چکمدی. اوکراینا دایره سینه چاتماغا آز قالمیش سوروجو سوکان آرخاسیندان قالخیب جاماعتی آوتوبوسدان دوشوردو. تئیمور ساغینا- سولونا بویلاندی:

- نه اولوب؟

- نه اولاجاق، یوللار باغلیدی. جاماعت بالاسینی قارشیلاماغا چیخیب. الینده تسبئح اوینادان بیر کیشی دئدی.

تئیمور بیر آددیم گئری چکیلدی:

یوللارباغلیدی!؟

نه طالعسیز گون. آروادییلا سون داوا بو گون یوخ، دونن اولسایدی، او آرتیق آناسیگیله چاتمیشدی، اوچ- بئش اؤیون یئمیشدی، باجیلارینین سورغو- سوالینا جاواب وئرمیشدی، چیممیشدی، آناسی دؤرد اوتاقدان بیرینی اونا آییرمیشدی، ایندی همین اوتاقدا اوزانیب دینجه لیردی. آمّا آروادییلا سون داوا دوننه یوخ، بو گونه، قلبه گونونه تصادوف ائتمیشدی. بختسیزلیک، ائله بیل کیمسه قصداً گونو گونون اوستونه سالیب. کؤهنه گونشلییه پیادا گئتمکدن باشقا چاره یوخدور.

تئیمور فیکیرلی- فیکیرلی یولا اوز قویموشدو کی، بو دفعه‌ ده اینسان دنیزینین اورتاسینا دوشدو. “
هورا ! یاشاسین” چیغیرماغا یوللانان قیزغین یئنی یئتمه لر، عسگرلرین قوهوملاری یاخینلاری، قهرمانلارا باخماغا گئدن یولدان کئچن یاد کیشیلر - قادینلار بیر- بیرینین آردینجا گلیب. باغلی یولدا دایانان آوتوبوسلارین دا هره سیندن بیر موحاریبه‌‌لیک آدام دوشوردو. هر آغیزدان بیر سس چیخیر، بیر دسته دایانیر، بیر دسته گئدیردی. هیجانلی جاماعت قیشین اورتاسیندا بی‌واخت یوخودان آییلمیش بؤیوک آج آیی کیمی چاشقینلیق ایچینده لنگر ووروردو. تئیمور ال- قول آتدی، آمّا آداملار آراسیندان جیغیر آچیب چیخماق مومکون اولمادی.

***

عسگرلر چوخ دئییل، یئددی- سککیز نفر ایدی. حربی موندیرده اولماسالار دا، او دقیقه سئچیلیردیلر. چییینلرینده کی بئز چانتا، شاخ دوروشلاری، گنج اوز- گؤزله رینده واختیندان اوّل قازانیلمیش ممنونلوق و مودریکلیک ایشارتیلاری عسگرلری نیشان وئریردی. موحاریبه‌‌ و قلبه اونلاری شرابدان بِتر سرخوش ائتمیشدی. اوزانان اللره ال وئریردیلر. واراولون .فخریمیزسیز. ساغ اولون.

بایراقلار و گول دسته لرییله عسگرلری قارشیلاماغا چیخان مکتب اوشاقلاریندان ایکیسی، قولاقلاری فینجان قولپلارینا بنزه ین بالاجا اوغلانلا قیز، تئیمورو دا عسگر سانیب قوجاغینا گول دسته سی و بایراق وئردی. اوشاقلار چوخ دا حاقسیز دئییلدیلر. تئیمور دا بو عسگرلر کیمی، جاواندی، اونون دا کوره یینده بئز چانتا واردی، چانتاسیندا پال-پالتاری، هر شئیینی ییغیب چیخمیشدی. بیرجه پالتوسو قالمیشدی، اونو دا درحال آشاغیدان قیزینی ائیوانا سسله ییب دئدی:

“ آتا قوربان، پالتوم قالدی. ”

“آنا پالتوسو قالدی. ”

ائله بیل اوشاق دئییل، هئچ آتاسینین دالینجا آغلامادی، اوشاقلار کیمی“گئتمه، آتا، آتاجان! ” چیغیریب اؤزونو یئره آتمادی، “ آنا، قویما گئتسین، سیز آیریلسانیز، ائودن قاچارام، اؤزومو اؤلدوره رم" دئییب یالاندان دا اولسا حده- قورخو گلمدی. دایچا کیمی ساکیتجه دوردو بیر کناردا، آتاسینین ایلخیدان آیریلماسینا آت گؤزلرییله تاماشا ائتدی. تئیمور گؤزلدی، پالتوسو ائیواندان قارا قاغایی کیمی اوچا - اوچا گلیب یئره قوندو. بونونلا دا دؤیوش مئیدانیندا هئچ نَیی قالمادی. هئچ بیر شئیی. بو عسگرلر کیمی دیش فیرچاسی دا کوره ییندکی چانتادایدی.

- عزیز اوغوللار، عزیز بالالاریمیز، وطن موحاریبه‌‌سی باشا چاتدی! ائنلی قالستوکلو بیر کیشی عسگرلره اوز توتوب سؤزه باشلادی.
- سیز قهرمانجاسینا آغیر دؤیوشلره تاب گتیره رک، آلنی آچیق، اوزوآغ بو حاقلی داوانی لیاقتله باشا ووردونوز.

- باشا ووردوم، تئیمور اورَگیینده دئدی.

- حیاتینیزین، عومرونوزون، گنجلییینیزین ديَرلی گونلرینی گله جک نسیل نامینه قوربان وئردینیز.

- قوربان وئردیم.

- بؤیوک شجاعت گؤستردینیز. چوخ بؤیوک شجاعت. چتین سیناقلارا ایراده، گوجلو روح سایه سینده تاب گتیردینیز.

- تاب گتیردیم.

-نئچه- نئچه قانلی دؤیوشلر اولدو.

- گاه اونو ووردوم، بورنوندان قان آچیلدی، گاه اؤزومو دوغرادیم، قوللاریمدان قان گئتدی.

318 views13:10